|
ສະບາຍດີທ່ານຜູ້ຟັງທຸກທ່ານ
ພໍເຖີງເວລານີ້ພົບກັບສັງຂານຈູມຄຳພັນ ຊ່ຽວຊານຕ່າງປະເທດຂອງພະແນກ ພາສາລາວຂອງCRI ໃນລາຍການພິເສດທີ່ມືຊື່ວ່າ"ສອງກອງປະຊຸມສະພາຈີນຜ່ານສາຍຕາຂອງຊ່ຽວຊານລາວ". ມື້ນີ້ແມ່ນມື້ສຸດທ້າຍຂອງສັບປະດາແລ້ວ, ແລະກໍ່ແມ່ນມື້ອັດກອງປະຊຸມເທື່ອທີ1ຂອງສະພາປຶກສາການເມືອງປະຊາຊົນແຫ່ງຊາດຈີນຊຸດທີ11ທີ່ເປັນອົງການທີ່ເຮັດວຽກແນວໂຮມຂອງຊາດແລະອົງການໃຫ້ຄຳປຶກສາການເມືອງສູງສຸດຂອງປະເທດ. ມື້ວານນີ້ກໍ່ມີການປ່ອນປັດເລືອກຕັ້ງຄະນະປະທານຂອງສະພາປຶກສາການເມືອງຊຸດທີ11, ຜົນປະກົດວ່າທ່ານເຈຍຊິ້ງລິນໄດ້ຖືກເລືອກຕັ້ງເປັນປະທານຂອງສະພາຄືນໃໝ່ແລະມີຮອງປະທານ25ທ່ານໃນນັ້ນເປັນຜູ້ຍິງ3ທ່ານ,ເຜົ່າຕິເບດ2ທ່ານ ເຜົ່າອຸຍເວີ ເຜົ່າຮຸຍແລະເຜົ່າຈ້ວງ ເຜົ່າລະ1ທ່ານ, ເຫຼືອນັ້ນແມ່ນເຜົ່າຣ້ານທີ່ເປັນພົນລະເມືອງສ່ວນໃຫຍ່ຂອງຈີນ, ນອກນັ້ນກໍ່ຍັງໄດ້ເລືອກກຳມະການອີກ298ທ່ານມາເປັນກຳມະການປະຈຳຂອງສະພາທີ່ປຶກສາການເມືອງ. ກໍຂໍສະຫຼຸບຫຍໍ້ໆສູ່ຟັງແນວນີ້, ເພາະລາຍລະອຽດຖ້າທ່ານຕິດຕາມຂ່າວຈາກCRIກໍ່ຄົງຈະຮູ້ແນ່ນອນ.
ສ່ວນກອງປະຊຸມເທື່ອທີ1ຂອງສະພາຜູ້ແທນປະຊາຊົນແຫ່ງຊາດຊຸດທີ11ກໍພວມດຳເນີນຢູ່, ມື້ນີ້ກໍ່ຍັງສືບຕໍ່ຄົ້ນຄວ້າພິຈາລະນາແຜນສະເໜີປັບປຸງໂຄງສ້າງຂອງລັດຖະບານຈາກສະພາແຫ່ງລັດຢູ່. ຊຶ່ງແຜນນີ້ຫຼາຍຝ່າຍກໍ່ເຊື່ອວ່າຈະຊ່ອຍຕໍ່ຕ້ານການສໍ້ລາດບັງຫຼວງໄດ້ດີ, ເພາະວ່າໃນແຜນນີ້ຄະນະກຳມະການປະຕິຮູບແລະພັດທະນາແຫ່ງຊາດຈະລົງເລິກຂໍ້ກຳນົດກົດລະບຽບຂອງລະດັບມະຫາພາກແລະຈະພະຍາຍາມບໍ່ກ່ຽວຂ້ອງກັບການຄຸ້ມຄອງເສດຖະກິດຈຸນລະພາກ, ພ້ອມທັງຫຼຸດຜ່ອນການກວດກາຕິດຕາມແລະອະນຸມັດໂຄງການພິເສດ. ຢູ່ໃນກອງປະຊຸມສູນກາງພັກກອມມູນິດຈີນໃນເດືອນແລ້ວນີ້ກໍ່ໄດ້ຮັບຮອງເອົາແຜນການປະຕິຮູບລະບົບການປົກຄອງທີ່ເປັນຫຼັກການ, ເປົ້າໝາຍແລະເຄື່ອງມືຕິດຕາມກວດກາການປະຕິຮູບການບໍລິຫານແລະປົກຄອງຂອງລັດຖະບານຈີນ, ແຜນການປະຕິຮູບເທື່ອນີ້ມັນຈະມີຄວາມສຳຄັນຫຼາຍຕໍ່ປັບປຸງອຳນາດຂອງການກວດກາແລະກົນໄກການຕິດຕາມການສໍ້ລາດບັງຫຼວງ, ເພາະວ່າຍ້ອນກົນໄກການຕິດຕາມກວດສອບອຳນາດການປົກຄອງທີ່ຍັງບໍ່ສົມບູນກໍ່ເປັນຊ່ອງຫວ່າງໃຫ້ເກີດການໃຊ້ຖານະຕຳແໜ່ງໄປໃນທາງທີ່ຜິດແລະສວຍໂອກາດກອບໂກຍຜົນປະໂຫຍດໃຫ້ຕົນເອງ ຄອບຄົວແລະພວກພ້ອງ. ຕົວຢ່າງໃນ5ປີຜ່ານມາກໍ່ແມ່ນກໍລະນີຂອງທ່ານເຈິ້ງສຽວອູ ອະດີດຫົວໜ້າກົມອາຫານແລະຢາທີ່ຖືກປະຫານຊີວິດໃນຄະດີຮັບສິນບົນ6ລ້ານ4ແສນ9ໝື່ນຢວນແລະກໍລະນີຂອງທ່ານເສິນຫຼຽງອູ ອະດີດເລຂາຄະນະພັກນະຄອນຊຽງໄຮ້ທີ່ຖືກໄລ່ອອກຈາກພັກແລະຕຳແໜ່ງລັດທັງໝົດແລະດຽວນີ້ພວມຖືກກັກຂັງເພື່ອລໍຖ້າການຕັດສິນຄະດີຢູ່.
ຢູ່ໃນບົດລາຍງານຂອງທ່ານເຈຍຈຸນຫວາງ,ອະທິໄອຍະການຂອງອົງການໄອຍະການປະຊາຊົນສູງສຸດທີ່ສະເໜີຕໍ່ກອງປະຊຸມສະພາຜູ້ແທນປະຊາຊົນເທື່ອນີ້ກໍ່ບອກວ່າ,ມີເຈົ້າໜ້າທີ່ລະດັບແຂວງແລະກະຊວງ 35 ຄົນ,ລະດັບກຳແພງນະຄອນ 930 ຄົນແລະໃນລະດັບອົງການປົກຄອງທ້ອງຖິ່ນເກືອບ 14000 ຄົນຖືກສອບສວນຍ້ອນຄະດີຍັກຍອກຊັບສິນ,ຮັບສິນບົນແລະອື່ນໆ,ໃນໄລຍະ 5 ປີຜ່ານມາ,ຄາດວ່າແຜນການປະຕິຮູບໂຄງສ້າງຂອງລັດຖະບານທີ່ພວມຄົ້ນຄວ້າພິຈາລະນາຢູ່ຈະນຳໄປສູ່ການສ້າງຕັ້ງກົນໄກການປົກຄອງທີ່ກົມກຽວແລະໃຫ້ອຳນາດໃນການຕິດຕາມກວດກາເພີ່ມຂຶ້ນແກ່ການຕັດສິນບັນຫາ,ການໃຊ້ມາດຕະການແລະການກວດສອບທີ່ຈະປູທາງໄປສູ່ການກຳຈັດ"ພະຍາດສໍ້ລາດບັງຫຼວງ".
ເຈົ້າໜ້າທີ່ທີ່ກ້ຽວຂ້ອງທີ່ເຂົ້າຮ່ວມພິຈາລະນາແຜນການກໍ່ມີຄຳເຫັນວ່າ,ມອບອຳນາດຄືນໃຫ້ສະຖາບັນສະເພາະຈະແມ່ນວິທີທີ່ເປັນຂໍກະແຈເພື່ອປ້ອງກັນບໍ່ໃຫ້ເຈົ້າໜ້າທີ່ລັດສວຍໃຊ້ຖານະຕຳແໜ່ງເພື່ອກອບໂກຍສ້າງຮັ່ງຄູນມີໃຫ້ແກ່ຕົນເອງ.ທ່ານຫຼິວຊີຢົງ ຜູ້ແທນສະພາກໍ່ເວົ້າວ່າ:"ຮາກເຫງົ້າຂອງການສໍ້ລາດບັງຫຼວງກໍ່ແມ່ນການຄ້າຂາຍລະຫວ່າງອຳນາດກັບເງິນຄຳ,ມັນແມ່ນຕະຫຼາດໜຶ່ງ."ທ່ານເວີນເຈຍປາວ ນາຍົກຈີນກໍ່ກ່າວໃນກອງປະຊຸມວ່າ:"ພວມເຮົາຈຳເປັນຕ້ອງຕໍ່ສູ້ກັບບັນຫາໃຊ້ອຳນາດໄປໃນທາງທີ່ຜິດແລະການກວດສອບການໃຊ້ອຳນາດທີ່ຍັງບໍ່ທັນເຂັ້ມງວດເພື່ອສ້າງລັດຖະບານທີ່ປອດໃສຂາວສະອາດ."
ເອົາລະທ່ານຜູ້ຟັງທີ່ເຄົາລົບ,ມື້ນີ້ເວລາຂອງລາຍການພິເສດສອງສະພາຈີນໃນສາຍຕາຂອງຊ່ຽວຊານລາວກໍ່ໝົດເວລາແລ້ວ;ມື້ອື່ນແລະມື້ຮືສັງຂານ ຈູມຄຳພັນຈະບໍ່ໄດ້ມາພົບກັບທ່ານ;ວັນຈັນໜ້າ ເວລາດຽວກັນນີ້ຈຶ່ງພົບກັນອີກ.ສະບາຍດີ.
|
