|
ນາງຈ່ຽງມິງອາຍຸ 24 ປີເຮັດວຽກຢູ່ບໍ່ລິສັດແຫ່ງໜຶ່ງຂອງປັກກິ່ງ. ຄຽງຄູ່ກັບງານກິລາໂອລິມປິກປັກກິ່ງປີ 2008 ນັບມື້ນັບຫຍັບມໍ່ເຂົ້າມາ, ນາງຮູ້ສຶກວ່າຂະບວນການກະກຽມງານກິລາໂອລິມປິກທີ່ຈິງແລ້ວກໍແມ່ນຂະບວນການທີ່ສ້າງຜົນປະໂຫຍດໃຫ້ແກ່ປະຊາຊົນ. ນາງເວົ້າວ່າ:
"ຄົມມະນາຄົມສະດວກກວ່າເກົ່າ. ຂ້ອຍຮູ້ສຶກວ່າລົດເມຫຼາຍກວ່າເກົ່າ, ເວລາຫ່າງກັນລະຫວ່າງລົດນັ້ນກໍສັ້ນຂຶ້ນກວ່າເກົ່າ. ປະຈຸບັນຂ້ອຍເຂົ້າການກໍສາມາດປະຢັດເກືອບໜຶ່ງຊົ່ວໂມງທຽບກັບເມື່ອກ່ອນ. ລາຄາປີ້ກໍຖືກກວ່າເກົ່າ, ພຽງແຕ່ 4 ເໝົາຕໍ່ເທື່ອເທົ່ານັ້ນ."
ຈາກການປັບປຸງມົນລະພິດທາງອາກາດຮອດການພັດທະນາຄົມມະນາຄົມສາທາລະນະກ່ອນ, ຈາກການຊຸກຍູ້ການອະນຸລັກສິ່ງແວດລ້ອມຮອດການດຳເນີນການເຄື່ອນໄຫວຫັດກາຍຂອງທົ່ວປວງຊົນ, ປະເທດຈີນທີ່ຈະຮັບຕ້ອນງານກິລາໂອລິມປິກນັ້ນ, ຍຶດໝັ້ນຖືຄົນເປັນກົກ, ເຮັດໃຫ້ສັງຄົມແລະປະຊາຊົນໄດ້ຊົມໃຊ້ໝາກຜົນຂອງງານກິລາໂອລິມປິກ.
ທັດສະນະຄະຕີຂອງຄະນະກຳມະການຈັດຕັ້ງງານກິລາໂອລິມປິກປັກກິ່ງແມ່ນ"ງານໂອລິມປິກສີຂຽວ, ໂອລິມປິກວັດທະນະທຳແລະໂອລິມປິກວິທະຍາສາດ". ສາມດ້ານດັ່ງກ່າວລ້ວນແຕ່ກ່ຽວພັນເຖິງຊີວິດການເປັນຢູ່ຂອງປະຊາຊົນຢ່າງສະໜິດສະແໜ້ນ. ຕົວຢ່າງຄືໂອລິມປິກສີຂຽວ", ເພື່ອປັບປຸງຄຸນນະພາບສິ່ງແວດລ້ອມຂອງປັກກິ່ງ, ນະຄອນຫຼວງປັກກິ່ງໄດ້ຢຸດຕິຫຼືຍົກຍ້າຍວິສາຫະກິດເຊື່ອມພິດ 140 ກວ່າແຫ່ງດ້ວຍມາດຕະການປັບປຸງໂຄງປະກອບ ຍົກຍ້າຍຫຼືປິດວິສາຫະກິດເປັນຕົ້ນ. ປະຈຸບັນຢູ່ໃຈກາງເມືອງ, ບໍ່ມີວິດສາຫະກິດເຊື່ອມພິດໜັກແລ້ວ. ພ້ອມກັນນັ້ນ, ໃນຫຼາຍປີມານີ້, ນະຄອນຫຼວງປັກກິ່ງໄດ້ຄັດ ລົດເມເກົ່າໜຶ່ງໝື່ນກວ່າຄັນແລະລົດຕັກຊີເກົ່າ 5 ໝື່ນກວ່າຄັນຖິ້ມ. ດ້ວຍຄວາມພະຍາຍາມຢ່າງບໍ່ລົດລະ, ຄຸນນະພາບອາກາດຂອງປັກກິ່ງໄດ້ຮັບການປັບປຸງດີຂຶ້ນຢ່າງເດັ່ນຊັດເປັນເວລາ 9 ປີມາແລ້ວ.
ເພື່ອຜ່ອນຄາຍບັນຫາຄົມມະນາຄົມແອອັດ, ນະຄອນປັກກິ່ງໄດ້ປະຕິບັດຍຸດທະສາດພັດທະນາຄົມມະນາຄົມສາທາລະນະກ່ອນ, ແລະປະຕິບັດນະໂຍບາຍລາຄາຕ່ຳຂອງລົດເມແລະລົດໄຟໃຕ້ດິນ. ປະຈຸບັນ, ລົດລາງ 4 ສາຍທີ່ກ່ຽວກັບງານກິລາໂອລິມປິກລ້ວນແຕ່ໄດ້ດຳເນີນຢ່າງສະດວກ, ໃນນັ້ນລົດໄຟໃຕ້ດິນສາຍ 5 ໄດ້ແລ່ນລົດແລ້ວ, ອັດຕາໝູນເດີນຂອງຄົມມະນາຄົມສາທາລະນະມີ 34,5%. ທ່ານຫຼິວຈິ້ງມິນ ຮອງເຈົ້າຄອງນະຄອນປັກກິ່ງກ່າວວ່າ:
"ເລີ່ມແຕ່ລົດໄຟໃຕ້ດິນສາຍ 5 ແລ່ນລົດໃນປີກາຍມານີ້,ໄດ້ຂົນສົ່ງຜູ້ໂດຍສານ 5 ແສນຄົນຕໍ່ມື້, ອັນໄດ້ເສີມຂະຫຍາຍບົດບາດສຳຄັນທີ່ສຸດຕໍ່ການຜ່ອນຄາຍບັນຫາຄົມມະນາຄົມເໜືອໃຕ້ຂອງປັກກິ່ງ. ໃນຕໍ່ໜ້າຍັງຈະມີລົດໄຟໃຕ້ດິນອີກ 3 ສາຍເປີດການບໍລິການກ່ອນຈັດງານກິລາໂອລິມປິກປັກກິ່ງ, ຕໍ່ສະຖານະພາບລວມຂອງຄົມມະນາຄົມປັກກິ່ງ, ຂ້າພະເຈົ້າເຫັນວ່າມີບົດບາດສຳຄັນຫຼາຍ."
ເພື່ອຈັດງານກິລາໂອລິມປິກໃຫ້ດີ, ນະຄອນຫຼວງປັກກິ່ງໄດ້ໃຊ້ງົບປະມານສ້າງສະໜາມກິລາ 37 ແຫ່ງ. ສະໜາມກິລາແລະພື້ນຖານໂຄງລ່າງເຫຼົ່ານີ້ຍັງສາມາດບໍລິການຊາວເມືອງປັກກິ່ງພາຍຫຼັງງານກິລາໂອລິມປິກ, ຊຸກຍູ້ການພັດທະນາເສດຖະກິດແລະສັງຄົມຂອງປັກກິ່ງ. ສະໜາມກິລາແຫ່ງຊາດ"ຮັງນົກ"ຈະສ້າງສຳເລັດໃນເດືອນເມສາປີນີ້ຍ້ອນພິທີໄຂອັດແລະການກໍ່ສ້າງຕ່າງໆ. ຕາມຂ່າວແຈ້ງວ່າ, ໃນເວລາອົງການປົກຄອງປັກກິ່ງເຊັນສັນຍາທີ່ມອບໝາຍໃຫ້ສະເພາະກັບເຈົ້າຂອງສະໜາມກິລາຮັງນົກນັ້ນກໍ່ໄດ້ຕື່ມເນື້ອໃນທີ່ວ່າ, ຕ້ອງສະໜອງລາຄາປີ້ທີ່ຊາວເມືອງສາມາດຮັບເອົາໄດ້, ເຮັດໃຫ້ປະຊາຊົນມີຄວາມສາມາດເຂົ້າຊົມໄດ້. ນອກນີ້, ທ່ານຢູເຕີປິ່ນ ຮອງຫົວໜ້າພະແນກບ້ານໂອລິມປິກຂອງຄະນະກຳມະການຈັດຕັ້ງງານກິລາໂອລິມປິກປັກກິ່ງກ່າວວ່າ, ພາຍຫຼັງງານກິລາໂອລິມປິກສິ້ນສຸດລົງ, "ບ້ານໂອລິມປິກ"ທີ່ມີຂະໜາດໃຫຍ່ໂຕມະໂຫລານຈະກາຍເປັນ"ບ້ານສະໜຸກສະໜານ"ຂອງຊາວປັກກິ່ງ.
ທ່ານເວົ້າວ່າ:
"ຫຼັງການແຂ່ງຂັນຂອງງານກິລາໂອລິມປິກຈະປັບປຸງບ້ານໂອລິມປິກ, ພາກເໜືອໃຫ້ເຮັດເປັນສວນສາທາລະນະປ່າໄມ້ຕາມແຜນການ, ໃນນັ້ນ, ສະໜາມຊັກທຸງໃນຖານະທີ່ເປັນບ່ອນມໍລະດົກວັດທະນະທຳໂອລິມປິກອັນສຳຄັນຈະຮັກສາໄວ້ຈົນເທົ່າໃດໆ, ເປີດໃຫ້ນັກທ່ອງທ່ຽວມາຊົມ. ບ່ອນພັກຢູ່ພາກໃຕ້ຈະຖືເປັນເຂດເຮືອນຢູ່ລະດັບສູງ, ຜ່ານການດັດແປງແລ້ວຈະມອບໃຫ້ຊາວເມືອງຢ່າງເປັນທາງການໃນທ້າຍປີ 2009.
ທ່ານລິວຈິ້ງມິນ ຮອງເຈົ້າຄອງນະຄອນຫຼວງປັກກິ່ງກ່າວວ່າ:
"ຂ້າພະເຈົ້າເຊື່ອວ່າ, ສະໜາມກິລາທັງໝົດຂອງງານກິລາໂອລິມປິກຈະສືບຕໍ່ເສີມຂະຫຍາຍບົດບາດຂອງມັນຫຼັງງານແຂ່ງຂັນ, ແລະຈະກາຍເປັນບ່ອນພັກຜ່ອນແລະຫັດກາຍທີ່ດີສຳລັບຊາວເມືອງທັງຫຼາຍ."
ນອກຈາກປັກກິ່ງແລ້ວ, ຍັງມີ 6 ຕົວເມືອງຊ່ອຍຈັດງານກິລາໂອລິມປິກຄືຮົງກົງ ຊຽງໄຮ້ ທຽນສິນ ເສີນຢາງ ຊີງຕາວ ແລະສິນຮວງຕາວ. ຊາວເມືອງໄດ້ມີຄວາມກະຕືລືລົ້ນຕໍ່ການຈັດງານກິລາໂອລິມປິກ, ໄດ້ສະເໜີຄຳຂວັນທີ່ວ່າ" ທຸກໆຄົນແມ່ນເຈົ້າພາບ, ທຸກໆຄົນແມ່ນອາສາສະໝັກ", ໄດ້ເຂົ້າຮ່ວມການເຄື່ອນໄຫວຕ່າງໆຢ່າງຕັ້ງໜ້າ. ຕົວຢ່າງຄືການຮຽນພາສາອັງກິດ, ຊາວເມືອງປັກກິ່ງໄດ້ຮຽນພາສາອັງກິດໃນທຸກສະຖານຢ່າງເປັນເຈົ້າການ. ຊູເຟີໂກ່ ຜູ້ຂັບລົດເຕັກຊີປັກກິ່ງທີ່ອາຍຸ 45 ປີເວົ້າວ່າ:
"ບໍລິສັດລົດເຕັກຊີໄດ້ອົບຮົມພວກເຮົາຕະຫຼອດ, ໃນເວລາຂັບລົດ, ຕົນເອງກໍ່ຝຶກເວົ້າເລື້ອຍໆ. ນີ້ກໍ່ໄດ້ເຮັດໃຫ້ຕົນເອງເພີ່ມຄວາມຮູ້ ຄືຄວາມຮູ້ກ່ຽວກັບງານກິລາໂອລິມປິກ ແລະຄວາມຮູ້ດ້ານພາສາອັງກິດຂອງງານໂອລິມປິກ. ໂດຍສະເພາະແມ່ນພາສາອັງກິດ, ຂ້ອຍແອບເວົ້າເລື້ອຍໆ, ສົມມຸດວ່າ"Welcome to Beijing, ຖາມສະບາຍດີHello."
ທ່ານລິວຢາງ ຫົວໜ້າຫ້ອງການຄະນະຈັດຕັ້ງຊາວເມືອງຮຽນພາສາຕ່າງປະເທດຂອງປັກກິ່ງເວົ້າວ່າ, ກ່ອນຈັດງານກິລາໂອລິມປິກປີ 2008, ປະຊາຊົນທີ່ສາມາດເວົ້າພາສາຕ່າງປະເທດໃນນະຄອນປັກກິ່ງຈະບັນລຸເຖິງ 5 ລ້ານຄົນ, ກວມປະຊາກອນປະຈຳປະມານ 35%.
ນອກນີ້, ການຈັດງານກິລາໂອລິມປິກ, ກໍ່ໄດ້ເຮັດໃຫ້ຄົນຈີນມີສະຕິດ້ານສຸຂະພາບດີຂຶ້ນ, ໃນປະຊາຊົນໄດ້ມີກະແສຫັດກາຍ. ທ່ານເຊ້ຍທ່າວ ກຳມະການສະພາປຶກສາການເມືອງປະຊາຊົນແຫ່ງຊາດ ຮອງອະທິການບໍດີຂອງມະຫາວິທະຍາໄລກະສິກຳແຂວງອ່ານຮຸ່ຍກ່າວວ່າ, ເມື່ອເບິ່ງຈາກການສຳຫຼວດແລ້ວເຫັນວ່າ, ໃນຫຼາຍປີມານີ້, ຄົນທັງຫຼາຍໄດ້ເອົາໃຈໃສ່ນຳກິລາຫຼາຍຂຶ້ນ, ຈຳນວນຜູ້ເຂົ້າຮ່ວມກໍ່ຫຼາຍຂຶ້ນ. ທ່ານເວົ້າວ່າ:
"ຄຽງຄູ່ກັບການເຜີຍແຜ່ໂຄສະນາຂອງງານກິລາໂອລິມປິກ, ດ້ານໜຶ່ງເຮັດໃຫ້ຄົນທັງຫຼາຍເອົາໃຈໃສ່ນຳການຫັດກາຍບໍລິຫານຫຼາຍຂຶ້ນ, ອີກດ້ານໜຶ່ງ, ຜ່ານການຈັດຕັ້ງຂອງເຂດຊຸມຊົນຈຳນວນໜຶ່ງ, ເຮັດໃຫ້ຄົນທັງຫຼາຍຮູ້ວ່າການຫັດກາຍແມ່ນມີຜົນດີຕໍ່ຕົນເອງ, ສະນັ້ນຈຶ່ງເຂົ້າຮ່ວມການຫັດກາຍບໍລິຫານຢ່າງຕື່ນຕົວ."
ເວົ້າລວມແລ້ວ, ບໍ່ວ່າໃນດ້ານວັດຖຸຫຼືດ້ານຈິດໃຈ, ງານກິລາໂອລິມປິກລ້ວນແຕ່ໄດ້ນຳເອົາຜົນປະໂຫຍດຕົວຈິງມາໃຫ້ຄົນຈີນ, ທົ່ວປະເທດຈີນພວມຊົມໃຊ້ໝາກຜົນຂອງງານກິລາໂອລິມປິກ.
|
