|
|
 |
| (GMT+08:00)
2008-03-17 16:40:12
|
 |
|
ລາຍການພິເສດສອງກອງປະຊຸມສະພາຈີນ(ວັນຈັນ, ທີ 17 ມີນາ 2008)
cri
ກອງປະຊຸມສະພາປຶກສາການເມືອງປະຊາຊົນແຫ່ງຊາດກໍ່ອັດໄປແລ້ວໃນວັນສຸກຜ່ານມານີ້. ສຳລັບກອງປະຊຸມສະພາຜູ້ແທນປະຊາຊົນແຫ່ງຊາດກໍ່ສືບຕໍ່ດຳເນີນຢູ່, ມື້ອື່ນກໍ່ແມ່ນມື້ສຸດທ້າຍແລ້ວ. ມິດລາຍການທີ່ຕິດຕາມຂ່າວຈາກ CRI ເປັນປະຈຳກໍ່ຄົງຈະຮູ້ແລ້ວວ່າ, ໃນຕອນເຊົ້າມື້ວັນເສົາຜ່ານມານີ້, ທ່ານຫູຈີນທາວ, ໄດ້ຮັບການເລືອກຕັ້ງຄືນໃໝ່ໃຫ້ເປັນປະທານຄະນະກຳມະການທະຫານສູນກາງອີກຕຳແໜ່ງໜຶ່ງ. ທ່ານຫູຈີນທາວປີນີ້ອາຍຸ 66 ປີ. ໃນມື້ດຽວກັນ, ທ່ານອູປ່າງກົວ ກໍ່ໄດ້ຮັບເລືອກຕັ້ງຄືນໃໝ່ໃຫ້ເປັນປະທານຄະນະກຳມະການປະຈຳຂອງສະພາປະຊາຊົນແຫ່ງຊາດຊຸດທີ 11, ທ່ານອູປ່າງກົວປີນີ້ອາຍຸ 67 ປີ. ຫຼ້າສຸດໃນຕອນເຊົ້າວານນີ້ດ ທ່ານເວີ່ນເຈ່ຍປາວກໍ່ໄດ້ຖືກແຕ່ງຕັ້ງໃຫ້ເປັນນາຍົກລັດຖະມົນຕີຈີນຄືນໃໝ່, ປີນີ້, ເພິ່ນກໍ່ອາຍຸ 66 ປີທໍ່ກັບທ່ານຫູຈີນທາວ. ທັງສອງທ່ານນີ້ຂຶ້ນດຳລົງຕຳແໜ່ງປະທານປະເທດແລະນາຍົກລັດຖະມົນຕີຂອງຈີນພ້ອມກັນ ຄືແຕ່ເດືອນມີນາປີ 2003. ສ່ວນທ່ານສີຈິນຝິງທີ່ມີອາຍຸ 55 ປີກໍ່ໄດ້ຮັບການເລືອກຕັ້ງໃຫ້ເປັນຮອງປະທານປະເທດຈີນ. ສ່ວນຕຳແໜ່ງຕ່າງໆໃນຄະນະລັດຖະບານຈີນຊຸດໃໝ່ບໍ່ວ່າຈະເປັນຮອງນາຍົກ, ທີ່ປຶກສາແຫ່ງລັດ, ບັນດາລັດຖະມົນຕີວ່າການ, ປະທານຄະນະກຳມະການ, ຜູ້ວ່າການທະນາຄານປະຊາຊົນຈີນແລະຕຳແໜ່ງສຳຄັນອື່ນໆ, ກອງປະຊຸມສະພາຜູ້ແທນກໍ່ໄດ້ຮັບຮອງເອົາແລ້ວໃນຕອນບ່າຍມື້ນີ້.
ໃນມື້ອື່ນເຊົ້າກໍ່ຈະມີກອງປະຊຸມຂ່າວທີ່ສຳຄັນຫຼາຍ, ເພາະວ່າທ່ານເວີ່ນເຈ່ຍປາວດ ນາຍົກລັດຖະມົນຕີທີ່ໄດ້ຮັບການແຕ່ງຕັ້ງຄືນໃໝ່ຈະຖະແຫຼງຂ່າວ, ສື່ມວນຊົນໃຫຍ່ທາງການຂອງຈີນບໍ່ວ່າຈະເປັນວິທະຍຸແຫ່ງຊາດ (CNR), ໂທລະພາບສູນກາງ (CCTV), ວິທະຍຸສາກົນແຫ່ງປະເທດຈີນ (CRI) ກໍ່ຈະທຳການຖ່າຍທອດສົດໄປທົ່ວປະເທດຈີນແລະທົ່ວໂລກ. ເວັບໄຟທາງການທີ່ສຳຄັນບໍ່ວ່າຈະເປັນເວັບ www.xinhuanet.com ທີ່ເປັນຂອງສຳນັກຂ່າວຊິນຮວາແລະເວັບ www.people.com.cn ທີ່ເປັນຂອງໜັງສືພິມປະຊາຊົນກໍ່ຈະຖ່າຍທອດກອງປະຊຸມຂ່າວໃນມື້ອື່ນເຊົ້າຄືກັນ. ທ່ານຜູ້ຟັງລາວທີ່ຮູ້ພາສາຈີນ ພາສາອັງກິດກໍ່ສາມາດຕິດຕາມການຖ່າຍທອດສົດໄດ້ຢ່າງວ່ອງໄວທັນໃນ. ຫຼືຖ້າບໍ່ໄດ້ພາສາຕ່າງປະເທດກໍ່ຕິດຕາມຂ່າວການຖະແຫຼງນະໂຍບາຍຂອງລັດຖະບານໃໝ່ຜ່ານ CRI ພາກພາສາລາວພວກເຮົານີ້, ພວກເຮົາຈະລາຍງານຂ່າວໃໝ່ໆໃຫ້ທ່ານຊາບໃນແຕ່ລະໄລຍະຮັບຮອງບໍ່ຕົກຂ່າວທີ່ສຳຄັນນີ້ແນ່ນອນ.
ທີ່ສຳຄັນອີກອັນໜຶ່ງຂອງກອງປະຊຸມສະພາຜູ້ແທນປະຊາຊົນໃນວັນເສົາຜ່ານມານີ້ກໍ່ແມ່ນການຮັບຮອງເອົາແຜນການຊັບຊ້ອນໂຄງສ້າງຂອງລັດຖະບານຄືນໃໝ່, ຄືຊັບຊ້ອນເຕົ້າໂຮມເອົາພາກສ່ວນທີ່ມີໜ້າທີ່ຄ້າຍໆກັນ ເຊັ່ນວ່າ ຄະນະກຳມະການສຳຫຼວດແລະພັດທະນາແຫ່ງຊາດ, ຄະນະກຳມະການວິທະຍາສາດເຕັກໂນໂລຊີແລະອຸດສາຫະກຳປ້ອງກັນຊາດ, ກະຊວງອຸດສາຫະກຳຂໍ້ມູນຂ່າວສານແລະຫ້ອງການຂ່າວສານຂອງສະພາແຫ່ງລັດ. ກະຊວງທີສອງທີ່ສ້າງໃໝ່ແມ່ນກະຊວງຄົມມະນາຄົມຂົນສົ່ງທີ່ຈະເຂົ້າມາແທນທີ່ກະຊວງໂທລະຄົມມະນາຄົມແລະກົມໃຫຍ່ການບິນພົນລະເຮືອນ. ກະຊວງທີ 3 ແມ່ນກະຊວງຊັບພະຍາກອນມະນຸດແລະປະກັນສັງຄົມທີ່ຈະໂຮມເອົາກະຊວງພະລາກອນແລະກະຊວງແຮງງານແລະປະກັນສັງຄົມເຂົ້າກັນ. ກະຊວງທີ 4 ແມ່ນກະຊວງອະນຸລັກສິ່ງແວດລ້ອມທີ່ເປັນການຍົກລະດັບກົມອະນຸລັກສິ່ງແວດລ້ອມແຫ່ງຊາດຂຶ້ນເປັນກະຊວງແລະກະຊວງທີ 5 ແມ່ນກະຊວງເຮືອນຢູ່ແລະກໍ່ສ້າງຕົວເມືອງແລະຊົນນະບົດທີ່ຈະເຂົ້າມາເຮັດໜ້າທີ່ແທນກະຊວງກໍ່ສ້າງ. ນອກນັ້ນ ກໍ່ຈະສ້າງຕັ້ງຄະນະກຳມະການພະລັງງານແຫ່ງລັດ, ແລະຈະໃຫ້ກົມອາຫານແລະຢາແຫ່ງຊາດໄປຂຶ້ນກັບກະຊວງສາທາລະນະສຸກ. ຈາກການປັບປຸງຊັບຊ້ອນເທື່ອນີ້ຈະເຮັດໃຫ້ຈາກ 28 ກະຊວງແລະຄະນະກຳມະການທີ່ມີຢູ່ໃນປະຈຸບັນໃຫ້ເຫຼືອ 27 ເທົ່ານັ້ນ. ນີ້ຖືວ່າເປັນເທື່ອທີ 6 ແລ້ວທີ່ຈີນປັບປຸງຊັບຊ້ອນໂຄງສ້າງຂອງລັດຖະບານໃນຮອບ 30 ປີມານີ້, ເພື່ອໃຫ້ບັນລຸເປົ້າໝາຍການສ້າງວັດທະນະທຳການເມືອງສັງຄົມນິຍົມສີສັນຂອງຈີນໃຫ້ໄວກວ່າເກົ່າ, ແລະປັບປຸງການພົວພັນລະຫວ່າງລັດຖະບານ, ປະຊາຊົນ, ສັງຄົມແລະຕະຫຼາດຄືນໃໝ່.
|
|
|
