|
CRIລາຍງານວ່າ: ຫວ່າງມໍ່ໆນີ້, ນະຄອນລາຊາ ເທດສະບານເຂດປົກຄອງຕົນເອງຕິເບດຂອງຈີນໄດ້ເກີດເຫດການຈາລະຈົນຢ່າງຮ້າຍແຮງຄືເກີດການທຸບຕີ ທັບມ້າງແລະຈູດໄຟເຜົາ, ຄວາມເປັນລະບຽບຂອງສັງຄົມທ້ອງຖິ່ນດັ່ງກ່າວຖືກທຳລາຍຢ່າງຮ້າຍແຮງ.ວັນທີ17ມີນານີ້,ຢູ່ທີ່ປັກກິ່ງ,ທ່ານຊຽງປ່າພິງໂຊ ປະທານເຂດປົກຄອງຕົນເອງຕິເບດກ່າວວ່າ,ເຫດການຈາລະຈົນໃຊ້ຄວາມຮຸນແຮງຢ່າງຮ້າຍແຮງເທື່ອນີ້ແມ່ນກຸ່ມດາໄລລາມະຈັດຕັ້ງ ວາງແຜນຢ່າງລະອຽດ,ຍຸຍົງອິດທິກຳລັງແບ່ງແຍກຕິເບດອອກຈາກຈີນໃຫ້ເປັນເອກະລາດທັງພາຍໃນແລະຕ່າງປະເທດສົມຮູ້ຮ່ວມຄິດກັນກໍ່ຂຶ້ນ.
ວັນທີ17ມີນານີ້,ຫ້ອງການຖະແຫຼງຂ່າວລັດຖະບານຈີນໄດ້ຈັດກອງປະຊຸມຂ່າວ,ທ່ານຊຽງປ່າພິງໂຊ ປະທານເຂດປົກຄອງຕົນເອງຕິເບດໄດ້ແຈ້ງສະພາບກ່ຽວກັບເຫດການຈາລະຈົນໃຊ້ຄວາມຮຸນແຮງຕໍ່ນັກຂ່າວພາຍໃນຈີນແລະຕ່າງປະເທດ.ເວລາ11ໂມງວັນທີ14ມີນານີ້,ຢູ່ວັດສ້ຽວຈ່າວ ທີ່ຢູ່ທາງພາກຕາເວັນອອກສຽງເໜືອຂອງນະຄອນລາຊາ,ພະສົງຈຳນວນໜຶ່ງໄດ້ໃຊ້ກ້ອນຫີນໂຈມຕີຕຳຫຼວດທີ່ພວມປະຕິບັດໜ້າທີ່ປົກກະຕິ.ຫຼັງຈາກນັ້ນ,ຜູ່ໃຊ້ຄວາມຮຸນແຮງຈຳນວນໜຶ່ງເລີ່ມເຕົ້າໂຮມກັນຢູ່ທ້ອງຖະໜົນ,ຮ້ອງຄຳຂວັນທີ່ແບ່ງແຍກປະເທດ,ສະພາບຄວາມຮຸນແຮງແຜ່ລາມຢ່າງວ່ອງໄວ.ກຸ່ມຄົນບໍ່ດີໄດ້ທຸບຕີ,ທັບມ້າງ,ປຸ້ນຈີ້ຮ້ານຄ້າຢູ່ຕາມຖະໜົມສຳຄັນຂອງເທດສະບານເມືອງ,ທຳລາຍໂຮງຮຽນປະຖົມແລະມັດທະຍົມ,ໂຮງໝໍ,ທະນາຄານ,ສິ່ງກໍ່ສ້າງໄຟຟ້າ,ສື່ສານ,ໜ່ວຍງານຖະແຫຼງຂ່າວຂອງນະຄອນລາຊາ.ໂຈມຕີຮ້ານທຸລະກິດໂທລະຄົມແລະອົງການປົກຄອງ,ຈູດເຜົາລົດຍົນຕາມທ້ອງຖະໜົນ,ໄລ່ທຸບຕີປະຊາຊົນທີ່ສັນຈອນຜ່ານໄປມາ.
ໃນເຫດການສ້າງຄວາມວຸ້ນວາຍເທື່ອນີ້, ກຸ່ມໃຊ້ຄວາມຮຸນແຮງໄດ້ເຜົາເຮືອນຢູ່, ຮ້ານຄ້າ 210 ກວ່າຫ້ອງ, ທຸບແລະເຜົາລົດ 50 ກວ່າຄັນ, ເຜົາແລະຂ້າປະຊາຊົນຕາຍ 13 ຄົນ. ທ່ານຊ້ຽງປ່າພິງໂຊ້ກ່າວວ່າ, ໃນເຫດການສ້າງຄວາມຮຸນແຮງດັ່ງກ່າວ, ກຸ່ມທີ່ໃຊ້ຄວາມຮຸນແຮງໄດ້ໃຊ້ວິທີທີ່ທາລຸນຫຼາຍ,ຄື ປະຊາຊົນຜູ້ໜຶ່ງຖືກຫົດນ້ຳມັນເຊື້ອໄຟແລ້ວເຜົາໃຫ້ຕາຍທັງເປັນ, ຍັງມີຕຳຫຼວດຜູ້ໜຶ່ງກໍ່ຖືກກຸ່ມທີ່ໃຊ້ຄວາມຮຸນແຮງຕີຈົນສະຫຼົບແລ້ວຍັງຖືກໃຊ້ມີດປາດເອົາຊິ້ນກົ້ນຂອງລາວໃຫຍ່ຊ່ຳກຳປັ້ນ.ທ່ານເວົ້າວ່າ,ໃນທົ່ວໂລກ,ບໍ່ມີປະເທດປະຊາທິປະໄຕທີ່ປົກຄອງດ້ວຍກົດໝາຍສາມາດອົດກັ້ນນຳການກະທຳທີ່ໂຫດຮ້າຍທາລຸນແບບນີ້ໄດ້.
ທ່ານຊ້ຽງປ່າພິງໂຊ້ກ່າວວ່າ, ພາຍຫຼັງເຫດການ, ເຂດປົກຄອງຕົນເອງຕິເບດໄດ້ໃຊ້ມາດຕະການທີ່ເໝາະສົມໃນທັນທີ, ໄດ້ປາບປາມການກໍ່ຄວາມຮຸນແຮງວຸ້ນວາຍຕາມກົດໝາຍ.
"ເຂດປົກຄອງຕົນເອງຕິເບດຈັດວາງກຳລັງເຈົ້າໜ້າທີ່ໃນທັນທີ, ດັບມອດໄຟ,ກອບກູ້ແລະປິ່ນປົວຜູ້ຖືກບາດເຈັບ, ແລະໄດ້ເພີ່ມການປ້ອງກັນຄວາມປອດໄພຕໍ່ໂຮງຮຽນ,ໂຮງໝໍ,ທະນາຄານແລະອົງການປົກຄອງ,ຈັດການກັບພວກທີ່ກໍ່ຄວາມຮຸນແຮງນັ້ນຕາມກົດໝາຍ.ໃຊ້ມາດຕະການເຫຼົ່ານີ້,ກໍ່ແມ່ນເພື່ອຮັກສາຄວາມໝັ້ນທ່ຽງຂອງສັງຄົມ,ຮັກສາລະບຽບກົດໝາຍຂອງບ້ານເມືອງ,ຮັກສາຜົນປະໂຫຍດພື້ນຖານຂອງປະຊາຊົນບັນດາເຜົ່າຢູ່ຕິເບດ. ປະຈຸບັນ, ສະຖານະການຢູ່ນະຄອນລາຊາໄດ້ສະຫງົບລົງແລ້ວ, ລະບຽບສັງຄົມໄດ້ຟື້ນຟູຄວາມໝັ້ນທ່ຽງແລ້ວ."
ທ່ານຊ້ຽງປ່າພີງໂຊ້ຊີ້ອອກວ່າ,ເຫດການຈາລະຈົນເທື່ອນີ້ແມ່ນກຸ່ມດາໄລລາມະກໍ່ຂຶ້ນຢ່າງມີການວາງແຜນ,ມີຈຸດປະສົງແບ່ງແຍກປະເທດຊາດແລະທຳລາຍຄວາມສາມັກ ຄີຂອງຕິເບດ.ທ່ານກ່າວວ່າ:"ເຫດການໃຊ້ຄວາມຮຸນແຮງຢ່າງຮ້າຍແຮງເທື່ອນີ້ມີການວາງແຜນ ປຸກປັ່ນຢ່າງຄັກແນ່ໂດຍກຸ່ມດາໄລລາມະຢ່າງມີການຈັດຕັ້ງແລະມີແຜນການລ່ວງໜ້າ,ແມ່ນອິດທິກຳລັງແບ່ງແຍກຕິເບດເປັນເອກະລາດທັງພາຍໃນແລະຕ່າງປະເທດສົມຮູ້ຮ່ວມຄິດກັນກໍ່ຂຶ້ນ.ຈຸດປະສົງຂອງເຂົາແມ່ນເພື່ອສ້າງຫາງສຽງ,ທຳລາຍພາບຄວາມໝັ້ນທ່ຽງອັນດີໃນໄລຍະຂໍກະແຈທີ່ປັກກິ່ງຈະຈັດງານກິລາໂອລິມປິກ."
ທ່ານຊ້ຽງປ່າພີງໂຊ້ຍັງບອກໃຫ້ຮູ້ວ່າ,ໃນເວລາປາມປາມເຫດການເທື່ອນີ້,ອົງການປົກຄອງເຂດຕິເບດໄດ້ໃຊ້ທ່າທີຮັບຜິດຊອບ,ຍຶດໝັ້ນປະຕິບັດຕາມກົດໝາຍຢ່າງມີຄວາມສິວິໄລ.ໃນຂະບວນການແກ້ໄຂເຫດການເທື່ອນີ້,ບໍ່ໄດ້ນຳໃຊ້ອາວຸດຮ້າຍແຮງຫຍັງ.ທ່ານຊ້ຽງປ່າພີງໂຊ້ກ່າວວ່າ,ຫຼາຍສິບປີມານີ້,ລັດຖະບານຈີນເອົາໃຈໃສ່ວຽກງານຕິເບດໃນລະດັບສູງ,ໃຊ້ວິ ທີການຕ່າງໆເຮັດໃຫ້ຊີວິດການເປັນຢູ່ຂອງປະຊາຊົນຕິເບດດີຂຶ້ນຢ່າງບໍ່ຢຸດຢັ້ງ.ທ່ານກ່າວວ່າ,ກົນອຸບາຍໃດໆທີ່ຢາກທຳລາຍສະຖຽນລະພາບຂອງຕິເບດແລະກໍ່ການແບ່ງແຍກນັ້ນຍ່ອມຈະປະລາໄຊຢ່າງແນ່ນອນ.
|
