|
ພາຍຫຼັງທີ່ດຳເນີນວຽກງານມາຢ່າງເຄັ່ງຮ້ອນໃນການຄົ້ນຄວ້າພິຈາລະນາແລະຮັບຮອງເອົາບັນຫາສຳຄັນຕ່າງໆຂອງຊາດມາໄດ້2ອາທິດ,ມາໃນຕອນເຊົ້າມື້ນີ້ ກອງປະຊຸມເທື່ອທີ1ຂອງສະພາຜູ່ແທນປະຊາຊົນແຫ່ງຊາດຈີນຊຸດທີ11ກໍ່ໄດ້ອັດລົງຢູ່ຫໍສະພາປະຊາຊົນທີ່ນະຄອນຫຼວງປັກກິ່ງຢ່າງຈົບງາມ.
ຢູ່ໃນພິທີອັດກອງປະຊຸມໃນມື້ເຊົ້ານີ້ ທ່ານຫູຈິນທາວ ປະທານປະເທດຈີນທີ່ຖືກເລືອກຕັ້ງໃຫ້ດຳລົງຕຳແໜ່ງນີ້ອີກຕໍ່ໄປ5ປີກໍ່ໄດ້ກ່າວຄຳໝັ້ນສັນຍາຕໍ່ປະຊາຊົນຢ່າງໜັກແໜ້ນອີຫຼີ.ເພິ່ນບອກວ່າ,ຈະເຮັດໃຫ້ລັດຖະບານປອດໃສຂາວສະອາດແລະນຳໃຊ້ອຳນາດທີ່ປະຊາຊົນມອບໃຫ້ຢ່າງເໝາະສົມເພື່ອຮັບໃຊ້ປະຊາຊົນຢ່າງໝົດຈິດໝົດໃຈ ຈະອຸທິດຕົນເພື່ອປະເທດຊາດ,ເປັນລັດຖະກອນທີ່ດີແລະຈິງໃຈເພື່ອສ້າງຜົນປະໂຫຍດໃຫ້ແກ່ປະຊາຊົນ,ປະຊາຊົນຕ້ອງມາກ່ອນ ຈະບໍ່ປ່ອຍປະລະເລີຍປະຊາຊົນຢ່າງເດັດຂາດ.ແລ້ວເພີ່ມກໍ່ຍັງໄດ້ກ່າວຂອບໃຈຜູ່ແທນປະຊາຊົນເກືອບ3000ຄົນທີ່ເຂົ້າຮ່ວມກອງປະຊຸມເທື່ອນີ້ທີ່ໄດ້ໃຫ້ຄວາມໄວ້ວາງໃຈແກ່ເພິ່ນ,ຈະຂໍນຳພາພັດທະນາປະເທດຊາດໄປສູ່ປະຊາທິປະໄຕທີ່ທັນສະໄໝຕາມ ລະບຽບກົດໝາຍ.
ຫຼັງຈາກອັດກອງປະຊຸມແລ້ວທ່ານເວິ່ນເຈ່ຍປາວ ນາຍົກລັດຖະມົນຕີທີ່ໄດ້ຮັບການແຕ່ງຕັ້ງຄືນໃໝ່ຈາກສະພາແລະຈະດຳລົງຕຳແໜ່ງໄປອີກ5ປີກໍ່ຖະແຫຼງຂ່າວແລະຕອບຄຳຖາມຂອງນັກຂ່າວທັງພາຍໃນແລະຕ່າງປະເທດຫຼາຍພັນຄົນ,ມີການຖ່າຍທອດສົດທັງວິທະຍຸ,ໂທລະພາບແລະເວັບໄຊໄປທົ່ວໂລກພ້ອມ.ບັນຍາກາດຟົດຟື້ນຫຼາຍ.ນັກຂ່າວກໍ່ຍາດກັນຍົກມືຖາມ,ທ່ານນາຍົກກໍ່ຕອບຢ່າງເປີດໃຈເປັນກັນເອງເລີ່ມແຕ່10ໂມງເວລາປັກກິ່ງທີ່ກົງກັບ9ໂມງເວລາເມືອງລາວ ແກ່ຍາວໄປຈົດຮອດ2ຊົ່ວໂມງກັບ21ນາທີ,ຖືວ່າທ່ານນາຍົກເວີ່ນເຈ່ຍປາວໃຫ້ເວລາແກ່ນັກຂ່າວໄດ້ຕັ້ງຄຳຖາມຢ່າງເຕັມທີ່ເລີຍ.ແຕ່ເພິ່ນກໍ່ພະຍາຍາມໃຫ້ນັກຂ່າວຫຼາຍຄົນທີ່ສຸດໄດ້ຖາມ.ມີນັກຂ່າວບາງຄົນກໍ່ຖາມ2ຄຳຖາມ,ມີນັກຂ່າວຈີນຂອງສຳນັກຂ່າວສານຊິນຮວາ ຜູ່ໜຶ່ງຖາມ3ຄຳຖາມ ທ່ານນາຍົກກໍ່ວ່າ"ຖາມຫຼາຍຄຳຖາມໂພດ,ຂ້າພະເຈົ້າຂໍຕອບຄຳຖາມດຽວກໍ່ພໍແລ້ວ".ມື້ເຊົ້ານີ້ທັງໝົດທ່ານນາຍົກຕອບປະມານ15ຄຳຖາມທີ່ສ່ວນຫຼາຍກໍ່ແມ່ນກ່ຽວກັບການພັດທະນາເສດຖະກິດ,ສິ່ງທ້າທາຍແລະໂອກາດ,ໄຟເງິນເຟີ້,ເຫດການກໍ່ຈາລະຈົນຢູ່ຕິເບດໃນວັນສຸກຜ່ານມາ,ບັນຫາໄຕ້ຫວັນແລະບັນຫາອື່ນໆ.ນັກຂ່າວຕ່າງປະເທດຫຼາຍຄົນຢາກເດີນທາງໄປເບິ່ງສະພາບການຢູ່ນະຄອນລາຊາຂອງເຂດປົກຄອງຕົນເອງຕິເບດ,ທ່ານນາຍົກກໍ່ບອກວ່າຈະພິຈາລະນາຄວາມເປັນໄປໄດ້ເພື່ອໃຫ້ໄປເຫັນກັບຕາເພາະວ່າດຽວນີ້ສະພາບຄວາມສະຫງົບກໍ່ຄືນສູ່ປົກກະຕິແລ້ວ.ທ່ານນາຍົກຊີ້ແຈງວ່າເຫດການຈາລະຈົນເທື່ອນີ້ກໍ່ແມ່ນຈຸດປະສົງຂອງດາໄລລາມະສົມຮູ້ຮ່ວມຄິດກັນກັບກຸ່ມຄົນບໍ່ດີທັງພາຍໃນແລະຕ່າງປະເທດເພື່ອທຳລາຍພາບພົດຂອງຈີນແລະທຳລາຍໂອເລັມປິກປັກກິ່ງທີ່ພວມຈະໄຂຂຶ້ນໃນເດືອນສິງຫາປີນີ້.ທ່ານວ່າ ພວກເຮົາທຸກຄົນຄວນເຄົາລົບນ້ຳໃຈຂອງໂອລິມປິກ ບໍ່ຄວນດຶງບັນຫາການເມືອງເຂົ້າມາກ່ຽວຂ້ອງ.ທ່ານຍັງເຊື່ອໝັ້ນວ່າ,ຮອຍຍິ້ມຂອງຄົນຈີນ1ຕື້300ລ້ານຄົນທີ່ສົ່ງໃຫ້ຄົນທົ່ວໂລກ ກໍ່ຈະໄດ້ຮັບຮອຍຍີ້ມຈາກຄົນທົ່ວໂລກຄືນມາເຊັ່ນດຽວກັນ.
ສຳລັບເລື່ອງໄພເງິນເຟີ້ນັ້ນ,ທ່ານເວິ່ນເຈ່ຍປາວ ບອກວ່າ,ລັດຖະບານຈີນໝັ້ນໃຈຢ່າງເຕັມທີ່ວ່າຈະສາມາດຄວບຄຸມໄດ້ໃນປີນີ້ເຖິງວ່າຈະເປັນວຽກທີ່ຍາກກໍ່ຕາມ.ທ່ານຖະແຫຼງວ່າ ມັນບໍ່ມແມ່ນວຽກທີ່ງ່າຍເລີຍທີ່ຈະຮັກສາອັດຕາໄພເງິນເຟີ້ໃຫ້ຢູ່ໃນລະດັບ4,8%ແລະຄວບຄຸມລາຄາສິນຄ້າທີ່ຖີບຕົວສູງຂຶ້ນແລ້ວ ຈີນກໍ່ຍັງປະສົບໄພພາຍຸຫິມະທີ່ສ້າງຄວາມເສຍຫາຍຕໍ່ເສດຖະກິດໜັກສົມຄວນໃນສອງເດືອນທຳອິດຂອງປີນີ້ອີກ,ແຕ່ພວກເຮົາກໍ່ຈະບໍ່ປ່ຽນແປງເປົ້າໝາຍທີ່ໄດ້ຕັ້ງວໄວ້ແລ້ວເພາະຈີນມີຄວາມໝັ້ນໃຈໃນພະລັງແຮງທີ່ຕົນມີຄືຄັງທັນຍາຫານສຳຮອງກໍ່ມີເຖິງ150ຫາ200ລ້ານໂຕນແລການຕອບສະໜອງຂອງຜະລິດຕະພັນອຸດສາຫະກຳຕົ້ນຕໍກໍ່ຍັງເຂັ້ມແຂງຢູ່.
|
