|
ທ່ານຜູ້ຟັງທີ່ເຄົາລົບ, ຕອນເຊົ້າວັນທີ 18 ມີນານີ້ຢູ່ທີ່ປັກກິ່ງ, ພາຍຫຼັງສຳເລັດວາລະປະຊຸມຕ່າງໆ, ກອງປະຊຸມປະຈຳປີເທື່ອທຳອິດຂອງສະພາປະຊາຊົນແຫ່ງຊາດຈີນຊຸດໃໝ່ທີ່ດຳເນີນມາເປັນເວລາ 13 ວັນນັ້ນກໍ່ໄດ້ອັດລົງ. ໃນກອງປະຊຸມອັດລົງ, ທ່ານຫູຈີນທ່າວ ຜູ້ໄດ້ຮັບເລືອກຕັ້ງເປັນປະທານປະເທດຈີນອີກເທື່ອໜຶ່ງດ້ວຍຄະແນນສູງກ່າວວ່າ, ຈະປະຕິບັດໜ້າທີ່ຮັບຜິດຊອບອັນສັກກາລະບູຊາທີ່ລັດຖະທຳມະນູນມອບໃຫ້ນັ້ນຢ່າງຊື່ສັດ, ຮັບໃຊ້ປະຊາຊົນແລະອອກແຮງຢ່າງສຸດຂີດເພື່ອປະເທດຊາດ, ຈະບໍ່ເຮັດໃຫ້ປະຊາຊົນເຜົ່າຕ່າງໆຂອງທົ່ວປະເທດຜິດຫວັງຢ່າງເດັດຂາດ.
ໃນ 5 ປີກ່ອນ, ກໍແມ່ນຢູ່ຫໍສະພາປະຊາຊົນ, ທ່ານຫູຈີນທ່າວໄດ້ຮັບເລືອກຕັ້ງເປັນປະທານປະເທດຈີນຄັ້ງທຳອິດ. ຫ່າງຈາກນັ້ນ 5 ປີ, ທ່ານຫູຈີນທ່າວໄດ້ຮັບເລືອກຕັ້ງເປັນປະທານປະເທດຈີນອີກເທື່ອໜຶ່ງດ້ວຍຄະແນນສູງ. ຕໍ່ຄວາມໄວ້ວາງໃຈແລະການສະໜັບສະໜູນທີ່ບໍ່ເຄີຍປ່ຽນແປງຢ່າງສະເໝີຕົ້ນສະເໝີປາຍ, ປະມຸກລັດຈີນທ່ານນີ້ໄດ້ເຫັນໜ້າທີ່ແລະພາລະກຳຂອງຕົນ, ທ່ານກ່າວວ່າ:
"ພະນັກງານໃໝ່ພວກຂ້າພະເຈົ້າໄດ້ຫາບແບກໜ້າທີ່ສຳຄັນທີ່ປະຊາຊົນມອບໝາຍໃຫ້, ຕ້ອງຕອບສະໜອງຄວາມຮຽກຮ໊ອງຂອງຍຸກສະໄໝ,ກໄປຕາມຄວາມມຸ່ງຫວັງຂອງປະຊາຊົນ. ພວກຂ້າພະເຈົ້າຕ້ອງປະຕິບັດຈຸດປະສົງທີ່ຮັບໃຊ້ປະຊາຊົນຢ່າງໝົດຈິດໝົດໃຈແຕ່ຕົ້ນຕະຫຼອດປາຍ, ຮັບປະກັນສິດຜົນປະໂຫຍດຕ່າງໆຂອງປະຊາຊົນ, ເປັນຜູ້ຮັບໃຊ້ປະຊາຊົນທີ່ດີແລະສ້າງຄວາມສຸກໃຫ້ແກ່ປະຊາຊົນຢ່າງຈິງໃຈ. ຍຶດໝັ້ນຊື່ສັດສຸດຈະລິດ. ນຳໃຊ້ສິດຂອງຕົນຢ່າງຖືກຕ້ອງ, ຍອມຮັບການຕິດຕາມກວດກາຂອງປະຊາຊົນຢ່າງຈິງໃຈ, ມີລະບຽບຕໍ່ຕົນເອງຢ່າງເຄັ່ງຄັດ, ປະຕິບັດຢ່າງບໍລິສຸດຜຸດຜ່ອງ, ເຮັດວຽກເພື່ອປະຊາຊົນແລະປະເທດຢ່າງລະມັດລະວັງແລະບໍລິສຸດ."
"ຖືຄົນເປັນກົກ", ແມ່ນທັດສະນະຄະຕິດຳເນີນການບໍລິຫານທີ່ລັດຖະບານຈີນກ່າວເນັ້ນຕະຫຼອດໃນຫຼາຍປີມານີ້, ກໍໄດ້ກາຍເປັນຄວາມຮັບຮູ້ທີ່ເອກະພາບກັນຂອງຜູ້ນຳຈີນ. ຜູ້ແທນສະພາປະຊາຊົນແຫ່ງຊາດຈີນປະມານ 3000 ຄົນທີ່ເຂົ້າຮ່ວມກອງປະຊຸມເທື່ອນີ້ກໍພາກັນສັນຍາວ່າ, ຈະບໍ່ເຮັດໃຫ້ປະຊາຊົນຜິດຫວັງ.
ທ່ານໝາເວີງຟັງ ທ່ານໝໍຊົນນະບົດຂອງເມືອງຄາຍເຟີງແຂວງເຫີນານ ຜູ້ແທນສະພາປະຊາຊົນແຫ່ງຊາດຈີນທີ່ມາຈາກຮາກຖານກ່າວວ່າ:
"ສິ່ງທີ່ຂ້າພະເຈົ້າສົນໃຈນັ້ນແມ່ນບັນຫາລະບົບການປິ່ນປົວແບບມີສ່ວນຮ່ວມໃນຊົນນະບົດ ຊາວກະສິກອນປົວພະຍາດແພງຫຼາຍແລະຍາກຫຼາຍ. ພາຍຫຼັງກັບຮອດທ້ອງຖິ່ນແລ້ວຂ້າພະເຈົ້າຈະເຂົ້າຮ່ວມການສຳຫຼວດຄົ້ນຄວ້າຫຼາຍກວ່າເກົ່າ, ຊອກຮູ້ສະພາບຂອງປະຊາຊົນ, ເພື່ອປະກອບຄຳຄິດຄຳເຫັນດີກວ່າເກົ່າໃນປີໜ້າແລະປະກອບສ່ວນເຂົ້າໃນການປະຕິຮູບການປິ່ນປົວ."
ທ່ານນາງສູຊົງຫວາ ປະທານສະຫະພັນອຸດສາຫະກຳການຄ້າເມືອງສູໂຈ່ວແຂວງອ່ານຮຸ່ຍ ຜູ້ແທນສະພາປະຊາຊົນແຫ່ງຊາດຈີນກ່າວວ່າ:
"ພາຍຫຼັງກັບເມືອແລ້ວຂ້າພະເຂົ້າຈະສຳຫຼວດຄົ້ນຄວ້າຢ່າງຕັ້ງໃຈ, ທ້ອນໂຮມສະພາບການທີ່ກ່ຽວຂ້ອງຂອງການພັດທະນາເສດຖະກິດບໍ່ເປັນສ່ວນລວມ, ທ້ອນໂຮມສະພາບການພັດທະນາວິສາຫະກິດເອກະຊົນແລະຄວາມເຫັນຂອງນັກທຸລະກິດເອກະຊົນເພື່ອມີຂໍ້ສະເໜີທີ່ດີໆໃນກອງປະຊຸມເທື່ອໜ້າ."
ຜູ້ແທນສະພາປະຊາຊົນແຫ່ງຊາດຈີນພາກັນກ່າວວ່າ, ເຖິງວ່າກອງປະຊຸມເທື່ອນີ້ອັດລົງແລ້ວ, ແຕ່ພາລະກຳຂອງພວກເຂົາເຈົ້າທີ່ປະຕິບັດໜ້າທີ່ຮັບຜິດຊອບຍັງບໍ່ໄດ້ສິ້ນສຸດລົງ. ຄືກັບຄວາມເວົ້າຂອງທ່ານອູປາງໂກ່ວ ປະທານຄະນະປະຈຳສະພາປະຊາຊົນແຫ່ງຊາດຈີນທີ່ໄດ້ຮັບການເລືອກຕັ້ງເປັນປະທານອີກເທື່ອໃໝ່ກ່າວໃນພິທີອັດດອງປະຊຸມວ່າ, ກອງປະຊຸມເທື່ອນີ້ພຽງແມ່ນການເລີ່ມຕົ້ນເທົ່ານັ້ນ.
"ກອງປະຊຸມເທື່ອນີ້ຍ່ອມຈະຊຸກຍູ້ແລະລະດົມໃຫ້ປະຊາຊົນເຜົ່າຕ່າງໆຂອງທົ່ວປະເທດເປັນຈິດໜຶ່ງໃຈດຽວກັນ, ບຸກໜ້າບຶນຕົວ, ສາມັກຄີສູ້ຊົນເພື່ອຍາດເອົາໄຊຊະນະໃໝ່ແຫ່ງການກໍ່ສ້າງສັງຄົມອີ່ມໜຳສຳລານຢ່າງຮອບດ້ານແລະສ້າງໃບໜ້າໃໝ່ໃຫ້ແກ່ຂອງສັງຄົມນິຍົມທີ່ມີສີສັນພິເສດຂອງຈີນ."
|
