|
ວັນທີ 19 ມີນານີ້ຢູ່ທີ່ປັກກິ່ງ, ທ່ານເຢີຕິ ປະທານກິຕິມະສັກຂອງຄະນະກຳມະການໃຫ້ຄຳປຶກສາການພັດທະນາເຂດປົກຄອງຕົນເອງຕິເບດຂອງຈີນກ່າວປະນາມຢ່າງຮຸນແຮງຕໍ່ເຫດການຈາລະຈົນທີ່ເກີດຢູ່ນະຄອນລາຊາເທດສະບານເຂດຕິເບດ. ທ່ານກ່າວວ່າ, ເຫດການເທື່ອນີ້ສະແດງໃຫ້ເຫັນວ່າການເຄື່ອນໄຫວທຳລາຍແບ່ງແຍກຂອງກຸ່ມດາໄລລາມະບໍ່ເຄີຍຢຸດເຊົາຈັກເທື່ອ.
ຕອນເຊົ້າວັນທີ 14 ມີນານີ້, ຢູ່ວັດສ້ຽວຈ່າວທີ່ພາກຕາເວັນອອກສຽງເໜືອຂອງນະຄອນລາຊາ, ພະສົງຈຳນວນໜຶ່ງໃຊ້ກ້ອນຫີນໂຈມຕີຕຳຫຼວດທີ່ພວມຢືນຍາມ, ຫຼັງຈາກນັ້ນ, ຄົນຮ້າຍຈຳນວນໜຶ່ງເລີ່ມເຕົ້າໂຮມກັນຢູ່ຖະໜົນ, ຮ້ອງຄຳຂວັນທີ່ແບ່ງແຍກປະເທດແລ້ວດຳເນີນການເຄື່ອນໄຫວກໍ່ຈາລະຈົນເຊັ່ນທຸບຕີ,ທັບມ້າງແລະຈູດໄຟເຜົາເປັນຕົ້ນ. ຕາມສະຖິຕິ, ເຫດການກຳລັງຮຸນແຮງເທື່ອນີ້, ຄົນຮ້າຍໄດ້ຈູດເຜົາເຮືອນແລະຮ້ານຄ້າ 210 ກວ່າແຫ່ງ, ທຳລາຍແລະຈູດເຜົ່າລົດ 56 ຄັນ, ຂ້າແລະເຜົາປະຊາຊົນທີ່ບໍ່ມີໂທດຫຍັງເສຍຊີວິດ13 ຄົນ.
ທ່ານເຢີຕິ ບຸກຄົນຜູ້ມີຊື່ສຽງຂອງເຜົ່າຕິເບດ ປະທານກິຕິມະສັກຂອງຄະນະກຳມະການໃຫ້ຄຳປຶກສາການພັດທະນາເຂດປົກຄອງຕົນເອງຕິເບດຂອງຈີນເປີດເຜີຍວ່າ, ມີຫຼັກຖານອັນພຽງພໍທີ່ຢັ້ງຢືນວ່າ, ການເຄື່ອນໄຫວທຳລາຍເທື່ອນີ້ແມ່ນກຸ່ມດາໄລລາມະວາງແຜນແລະປຸກປັ່ນກໍ່ຂຶ້ນຢ່າງມີການຈັດຕັ້ງຄັກແນ່. ທ່ານກ່າວວ່າ:
"ເປົ້າໝາຍຂອງພວກເຂົາແມ່ນເຈຕະນາກໍ່ເລື່ອງລາວຢູ່ໃນໄລຍະເວລາທີ່ອ່ອນໄຫວ, ຕັ້ງໃຈເຮັດໃຫ້ເຫດການດັ່ງກ່າວໃຫຍ່ກວ່າເກົ່າຈົນຮອດເຖີງຂັ້ນນອງເລືອດ, ເພື່ອລົບກວນງານກິລາໂອລິມປິກປັກກິ່ງ, ທຳລາຍສະພາບການການເມືອງສັງຄົມທີ່ສະຫງົບແລະກົມກຽວກັນຂອງຈີນ."
ທ່ານເຢີຕິປີນີ້ອາຍຸ 70 ປີ, ແມ່ນທາດກະສິກອນໃນສະໄໝເກົ່າ, ທ່ານໄດ້ເປັນສັກຂີພິຍານຂອງການປ່ຽນແປງຂອງເຂດຕິເບດເລີ່ມແຕ່ການປົດປ່ອຍໂດຍສັນຕິເມື່ອປີ 1951 ມານີ້. ທ່ານເຢີຕິກ່າວວ່າ, ລາຊາເກີດເຫດການດັ່ງກ່າວບໍ່ແມ່ນບັງເອີນ. ໃນສິບກວ່າປີມານີ້, ເຂດຕິເບດໄດ້ຜ່ານໄລຍະທີ່ພັດທະນາໄວທີ່ສຸດ, ມີການປ່ຽນແປງໃຫຍ່ທີ່ສຸດແລະປະຊາຊົນໄດ້ຮັບຜົນຫຼາຍປະໂຫຍດທີ່ສຸດໃນປະຫວັດສາດ. ແຕ່ວ່າອິດທິກຳລັງແບ່ງແຍກກຸ່ມດາໄລລາມະບໍ່ຍອມເຫັນສະພາບທີ່ສັງຄົມຕິເບດກ້າວໜ້າ, ເສດຖະກິດພັດທະນາແລະຊົນເຜົ່າສາມັກຄີກັນ, ກໍບໍ່ຍອມເຫັນສະພາບການທີ່ປະຊາຊົນເຂດຕິເບດເປັນເຈົ້າຕົນເອງແລະດຳລົງຊີວິດຢ່າງຜາສຸກ, ສະນັ້ນຈຶ່ງໃຊ້ທຸກວິທີເພື່ອທຳລາຍແລະລົບກວນການພັດທະນາຢ່າງໝັ້ນທ່ຽງຂອງເຂດຕິເບດຈົນກະທັ້ງທົ່ວພກາພື້ນທີ່ຊາວເຜົ່າຕິເບດດຳລົງຊີວິດຢູ່.
ພາຍຫຼັງເຫດການດັ່ງກ່າວເກີດຂຶ້ນ, ເຂດປົກຄອງຕົນເອງຕິເບດໄດ້ໃຊ້ມາດຕະການຢ່າງວ່ອງໄວ, ດັບມອດຈຸດຖືກຈູດເຜົາແລະຊ່ອຍຜູ້ໄດ້ຮັບບາດເຈັບ, ແລະຕໍ່ຕ້ານການເຄື່ອນໄຫວກໍ່ຈາລະຈົນໃຊ້ຄວາມຮຸນແຮງຢ່າງໜັກໜ່ວງຄືທຸບຕີ ທັບມ້າງແລະຈູດໄຟເຜົາຕາມກົດໝາຍ. ແຕ່ວ່າ, ກຸ່ມດາໄລລາມະແລະບາງບຸກຄົນຂອງປະເທດຝ່າຍຕາເວັນຕົກພັດຖືເອົາການເຄື່ອນໄຫວຕໍ່ຕ້ານການກະທຳໃຊ້ຄວາມຮຸນແຮງທີ່ທຳລາຍຄວາມປອດໄພດ້ານຊີວິດແລະຊັບສິນຂອງປະຊາຊົນແລະລະບຽບການສັງຄົມຢ່າງໜັກໜ່ວງນັ້ນວ່າເປັນການ"ປາບປາມການສະແດງກຳລັງໂດຍສັນຕິ".
ທ່ານເຢີຕິກ່າວວ່າ, ຄວາມເວົ້າເຫຼົ່ານີ້ບໍ່ສົນໃຈນຳຄວາມເປັນຈິງຂອງເຫດການດັ່ງກ່າວເລີຍ, ຍັງໄດ້ປີ້ນຂາວເປັນດຳອີກ, ທ່ານກ່າວວ່າ:
"ຂ້າພະເຈົ້າຢາກຖາມວ່າ, ບໍ່ວ່າປະເທດໃດໆແລະລັດຖະບານໃດໆໃນໂລກແລ້ວ, ຖ້າວ່າເກີດເຫດການກໍ່ຈາລະຈົນເຊັ່ນທຸບຕີ,ທັບມ້າງແລະຈູດໄຟເຜົາຄືທີ່ຢູ່ນະຄອນລາຊານັ້ນ, ຈະສາມາດເມີຍເສີຍໄດ້ບໍ່? ລັດຖະບາດໃດກໍ່ລ້ວນແຕ່ບໍ່ສາມາດເມີຍເສີຍຕໍ່ຄວາມປອດໄພດ້ານຊີວິດແລະຊັບສິນຂອງປະຊາຊົນໄດ້ດອກ, ແລະກໍບໍ່ອາດເບິ່ງພວກຄົນຮ້າຍທຳລາຍສັງຄົມອັນກົມກຽວໝັ້ນທ່ຽງ, ທຳລາຍສະພາບທີ່ສະຫງົບແລະສາມັກຂີ. ຂໍເວົ້າເລີຍວ່າ, ຕໍ່ເຫດການແນວນີ້ປະເທດໃດກໍ່ອົນທົນບໍ່ໄດ້ຢ່າງແນ່ນອນ."
ຕາມຂ່າວແຈ້ງວ່າ, ປະຈຸບັນ, ຮ້ານຄ້າສ່ວນຫຼາຍຂອງນະຄອນລາຊາເຂດປົກຄອງຕົນເອງຕິເບດໄດ້ຟື້ນຟູການບໍລິການແລ້ວ, ໂຮງຮຽນຊັ້ນສູງແລະໂຮງຮຽນປະຖົມມັດທະຍົມໄດ້ຟື້ນຟູການຮຽນ, ຄວາມເປັນລະບຽບຮຽບຮ້ອຍຂອງສັງຄົມໃນນະຄອນລາຊາໄດ້ກັບຄືນສູ່ສະພາບປົກກະຕິໂດຍພື້ນຖານແລ້ວ..
|
