ຫວ່າງມໍ່ໆນີ້,ໃຕ້ການສົມຮູ້ຮ່ວມຄິດແລະການປຸກປັ່ນຂອງກຸ່ມດາໄລລາມະ,ພະສົງສ່ວນໜ້ອຍໃນນະຄອນລາຊາເຂດປົກຄອງຕົນເອງຕິເບດຈີນໄດ້ພາກັນກໍ່ການຈາລະຈົນ,ແລະໄດ້ທຳລາຍຄວາມສະຫງົບຂອງສັງຄົມຂອງລາຊາຢ່າງໜັກໜ່ວງ,ໄດ້ສ້າງຄວາມເສຍຫາຍຢ່າງໜັກໜ່ວງຕໍ່ຊີວິດແລະຊັບສິນຂອງປະຊາຊົນລາຊາ.ເຫດການໃຊ້ຄວາມຮຸນແຮງຢູ່ລາຊາດຳເນີນໄປແນວໃດ?ນັກຂ່າວວິທະຍຸ CRI ປະຈຳເຂດຕິເບດໄດ້ສຳພາດຜູ້ເຫັນກັບຕາແລະຜູ້ຖືກທຳຮ້າຍໃນເຫດການດັ່ງກ່າວຫຼາຍຄົນ.
ເວລາ 11 ໂມງຂອງວັນທີ 14 ມີນານີ້,ຢູ່ວັດຣາໂມເຊ ໂມນາສເທິຣີທີ່ຕັ້ງຢູ່ພາກຕາເວັນອອກສຽງເໜືອຂອງນະຄອນລາຊາ,ມີພະສົງຈຳນວນໜຶ່ງໄດ້ໃຊ້ກ້ອນຫີນແກວ່ງໃສ່ຕຳຫຼວດທີ່ພວມປະຕິບັດໜ້າທີ່ຕາມປົກກະຕິ,ຫຼັງຈາກນັ້ນ,ພວກກໍ່ການຈາລະຈົນຈຳນວນໜຶ່ງເລີ່ມເຕົ້າໂຮມກັນຢູ່ຖະໜົນ,ຮ້ອງຄຳຂວັນທີ່ແບ່ງແຍກປະເທດຊາດ,ພວກກໍ່ການຈາລະຈົນໄດ້ທຸບຕີ ປຸ້ນຈີ້ແລະເຜົາຮ້ານຄ້າ ໂຮງຮຽນປະຖົມແລະມັດທະຍົມ ໂຮງໝໍ ທະນາຄານແລະໜ່ວຍງານຖະແຫຼງຂ່າວທີ່ຢູ່ຕາມແຄມຖະໜົນທີ່ສຳຄັນຂອງນະຄອນລາຊາ,ແລະເຜົາລົດຍົນຕາມຖະໜົນ,ໄລ່ທຸບຕີປະຊາຊົນທີ່ຍ່າງຕາມທາງ.ເມື່ອຫວນຄືນສະພາບໃນມື້ນັ້ນ,ທ່ານນີມາຊື້ເຣິນ ຜູ້ອຳນວຍການໂຮງຮຽນປະຖົມໄຫເຊິງນະຄອນລາຊາກ່າວວ່າ:
"ພວກກໍ່ການຈາລະຈົນກຸ່ມນັ້ນໂຈມຕີຕຶກໂຮງຮຽນພວກເຮົາຄືເປັນປ່ວງບ້າ,ຕໍ່ສະພາບແນວນັ້ນ,ພວກເຮົາໄດ້ສັ່ງໃຫ້ຄູສອນເອີ້ນເອົານັກຮຽນກັບເຂົ້າຫ້ອງຮຽນໃນທັນທີ,ເພື່ອປ້ອງກັນແລະປອບຂວັນນັກຮຽນ.ເຫດການດັ່ງກ່າວໄດ້ສ້າງຄວາມເສຍຫາຍເກືອບ 1 ລ້ານ 4 ແສນຢວນແກ່ໂຮງຮຽນເຮົາ,ແຕ່ສິ່ງທີ່ໜັກກວ່ານັ້ນແມ່ນໄດ້ເຮັດໃຫ້ນັກຮຽນປະຖົມຂອງໂຮງຮຽນເຮົາເສຍຂວັນຢ່າງໜັກໜ່ວງ."
ເມື່ອເວົ້າເຖິງເຫດການເທື່ອນີ້,ນາງດາວາຢູຈົນ ນັກຮຽນຫ້ອງປ.2ເວົ້າວ່າດຽວນີ້ຍັງຮູ້ສຶກຢ້ານກົວຢູ່.
"ໃນເວລານັ້ນ,ຫຼານໄດ້ເຫັນຄົນກຸ່ມໜຶ່ງພວມທຸບຕີຕຳຫຼວດ,ຍັງເຫັນຄົນອີກກຸ່ມໜຶ່ງພວມທຸບມ້າງຮ້ານຄ້າ,ຫຼານຢ້ານກົວທີ່ສຸດ.ຢູ່ແຕ່ໃນເຮືອນ 3 ມື້,ບໍ່ກ້າອອກໄປໃສ."
ຕາມຮູ້ວ່າ,ໃນເຫດການຈາລະຈົນເທື່ອນີ້,ກຸ່ມກໍ່ການຈາລະຈົນໄດ້ເຜົາເຮືອນປະຊາຊົນແລະຮ້ານຄ້າ210ກວ່າຫ້ອງ,ທັບມ້າງແລະເຜົາລົດຍົນ56ຄັນ,ເຜົາແລະຂ້າປະຊາຊົນຜູ່ບໍ່ມີໂທດຫຍັງ13ຄົນ.
ໃນຫ້ອງຄົນເຈັບຂອງໂຮງໝໍແຫ່ງໜຶ່ງຂອງລາຊາ,ນັກຂ່າວເຫັນທ້າວເພີງສຽວໂປ່ ຜູ່ຖືກທຳຮ້າຍ.
ລາວເວົ້າວ່າ,ກຸ່ມກໍ່ຄວາມວຸ້ນວາຍໃຊ້ນ້ຳມັນແລະອາຍແກັສຈູດເຜົາຮ້ານຄ້າ4ຫຼັງຂອງຄອບຄົວລາວ. ຍ້ອນຕື່ນຕົກໃຈ ທ້າວເພີງສຽວໂປ່ກັບຄອບຄົວຈຳເປັນໄດ້ໂດດຈາກຕຶກ,ເມຍຂອງລາວ ກະດູກແອວຫັກ,ອາວແລະນ້ອງສາວຖືກເຜົາຈົນເສຍຊີວິດຍ້ອນໜີບໍ່ທັນ.ລາວເວົ້າວ່າ:
"ນ້ອງສາວຂອງຂ້ອຍອາຍຸໄດ້18ປີ,ເວລານັ້ນ ຂັ້ນໄດໄໝ້ຂຶ້ນແລ້ວ,ແຕ່ນ້ອງສາວບໍ່ກ້າໂດດອອກທາງປ່ອງຢ້ຽມ,ຢາກແລ່ນໄປລົງທາງຂັ້ນໄດ,ແຕ່ຂັ້ນໄດໄໝ້ແລ້ວ,ຫາກໍ່ຢຽບ ກໍຫັກໂລດ,ສຸດທ້າຍນ້ອງສາວຂອງຂ້ອຍກໍ່ຖືກໄຟເຜົາຈົນເສຍຊີວິດ."
ຍາດພີ່ນ້ອງເສຍຊີວິດເຮັດໃຫ້ປະຊາຊົນຜູ່ຖືກທຳຮ້າຍໃນເຂດລາຊາຄຽດແຄ້ນທີ່ສຸດ, ການກະທຳທີ່ໂຫດຮ້າຍປ່າເຖື່ອນຂອງພວກກໍ່ການຈາລະຈົນເຮັດໃຫ້ບຸກຄົນວົງການຕ່າງໆໃນສັງຄົມຕິເບດຄຽດແຄ້ນຫຼາຍແລະກ່າວປະນາມຢ່າງຮຸນແຮງ.ປະຈຸບັນ ປະຊາຊົນຜູ່ຖືກທຳຮ້າຍໃນເຫດການຈາລະຈົນເທື່ອນີ້ໄດ້ຖືກສົ່ງໄປໂຮງໝໍແຫ່ງຕ່າງໆຂອງນະຄອນລາຊາ,ແລະພວມໄດ້ຮັບການປິ່ນປົວຢ່າງເອົາໃຈໃສ່.
ວັນທີ20ມີນານີ້ ນັກຂ່າວເຫັນວ່າຢູ່ເຂດແລະຖະໜົນສາຍສຳຄັນຂອງເມືອງລາຊາ,ລົດຍົນແລ່ນໄປມາຢ່າງເປັນປົກກະຕິ,ຮ້ານຄ້າສ່ວນຫຼາຍກໍ່ເປີດຄືນໃໝ່,ໂຮງຮຽນຊັ້ນສູງ,ປະຖົມແລະມັດ ທະຍົມເປີດການຮຽນເປັນປົກກະຕິ,ຄວາມເປັນລະບຽບຮຽບຮ້ອຍໃນສັງຄົມກໍ່ຄືນສູ່ສະພາບປົກກະຕິໂດຍພື້ນຖານ.
|