|
ຜູ້ສະໝັກຮັບເລືອກຕັ້ງປະທານາທິບໍດີກ່າວວ່າ, ສົງຄາມອີຣັກເຮັດໃຫ້ເສດຖະກິດອາເມລິກາຊຸດໂຊມລົງ
cri
ຕາມຂ່າວສານຊິ່ນຮວາ: ວັນທີ 20 ມີນານີ້, ໃນເວລາກ່າວປາຖະກະຖາຢູ່ລັດເວິຈິເນຍຕາເວັນຕົກ, ທ່ານບາຣັກ ໂອບາມາ ຜູ້ສະໝັກຮັບເລືອກຕັ້ງປະທານາທິບໍດີອາເມລິກາຂອງພັກປະຊາທິປະໄຕອາເມລິກາ, ສະມາຊິກສະພາສູງຂອງລັດອິລິໂນອິສຊີ້ອອກວ່າ, ການໃຊ້ຈ່າຍອັນໃຫຍ່ຫຼວງຂອງສົງຄາມອີຣັກໄດ້ເຮັດໃຫ້ເສດຖະກິດອາເມລິກາຊຸດໂຊມລົງ.
ທ່ານຊີ້ອອກວ່າ, ນັບມາຮອດປະຈຸບັນ, ການໃຊ້ຈ່າຍເພື່ອສົງຄາມອີຣັກໂດຍກົງຂອງອາເມລິກາໄດ້ບັນລຸເກືອບ 500 ຕື້ໂດລາ, ຕາມຝ່າຍທີ່ກ່ຽວຂ້ອງຄາດຄະເນວ່າ, ໃນທີ່ສຸດ, ອາດຈະບັນລຸ 3000 ຕື້ໂດລາ. ສົງຄາມບັ້ນນີ້ແມ່ນປັດໄຟອັນສຳຄັນທີ່ເຮັດໃຫ້ລາຄານ້ຳມັນເຊື້ອໄຟສູງຂຶ້ນແລະໜີ້ສິນຂອງລັດເພີ່ມຂຶ້ນຢ່າງຫຼວງຫຼາຍໂດຍໄວ, ແລະປະຈຸບັນ, ສະເລ່ຍແລ້ວ, ແຕ່ລະຄອບຄົວອາເມລິກາຕ້ອງຫາບແບກປະມານ 100 ໂດລາຕໍ່ເດືອນໃຫ້ສົງຄາມອີຣັກ.ເງິນເຫຼົ່ານີ້ແຕ່ເດີມສາມາດໃຊ້ສຳລັບປັບປຸງຊີວິດການເປັນຢູ່ຂອງປະຊາຊົນ, ເຊັ່ນປັບປຸງລະບົບປິ່ນປົວພະຍາດ, ສ້ອມແປງເສັ້ນທາງແລະຂົວເປັນຕົ້ນ.
ການສຳຫຼວດປະຊາມະຕິສະແດງໃຫ້ເຫັນວ່າ, ໃນການເລືອກຕັ້ງປະທານາທິບໍດີອາເມລິກາປີນີ້,ເສດຖະກິດແລະສົງຄາມອີຣັກແມ່ນສອງບັນຫາທີ່ປະຊາຊົນຜູ້ມີສິດເລືອກຕັ້ງສົນໃຈຫຼາຍກວ່າໝູ່. ຜູ້ສະໝັກຮັບເລືອກຕັ້ງຂອງພັກປະຊາທິປະໄຕແລະພັກສາທາລະນະລັດມີຄວາມເຫັນຕ່າງກັນຫຼາຍກ່ຽວກັບບັນຫາສົງຄາມອີຣັກ.
|
|
