|
ຕາມຂ່າວCRI: ທ່ານຜູ່ຟັງ,ວັນທີ20ມີນານີ້,CCTVຂອງຈີນໄດ້ສາຍຮູບເງົາບັນທຶກເຫດການກໍ່ການຈະລາຈົນໃນວັນທີ14ມີນາຢູ່ນະຄອນລາຊາ,ເປີດເຜີຍລາຍລະອຽດຂອງເຫດການນີ້ຫຼາຍກວ່າເກົ່າ.
ຕອນເຊົ້າວັນທີ14ມີນານີ້,ຢູ່ວັດຣາໂມເຊໂມນາສເທີຣີຢູ່ພາກຕາເວັນອອກສຽງເໜືອຂອງເມືອງລາຊາ ພະສົງຈຳນວນໜຶ່ງແກວ່ງກ້ອນຫີນໃສ່ຕຳຫຼວດທີ່ລາດຕະເວນຕາມຖະໜົນ,ຫຼັງຈາກນັ້ນ,ພວກກໍ່ການຈະລາຈົນເລີ່ມເຕົ້າໂຮມກັນຕາມຖະໜົນຫົນທາງ, ຮ້ອງຄຳຂັວນແບ່ງແຍກປະເທດຊາດ,ສະພາບການນີ້ແຜ່ລາມໄວຫຼາຍ.
ຢູ່ໃຈກາງນະຄອນລາຊາ,ພວກກໍ່ການຈະລາຈົນຢ່າງຜິດກົດໝາຍພາກັນຕີ ທັບມ້າງ ປຸ້ນແລະເຜົາຢູ່ທຸກແຫ່ງຫົນ.ຮ້ານຊູເບີມາເກັດ ຮ້ານຄ້າ ແລະຮ້ານອາຫານຫຼາຍແຫ່ງຖືກເຜົາໄໝ້ໄປໝົດ.ໃນຮ້ານເສື້ອຜ້າແຫ່ງໜຶ່ງທີ່ຖືກໄຟເຜົາ,ຍິງສາວ5ຄົນທີ່ກຳລັງເຮັດວຽກຖືກເຜົາຈົນເສຍຊີວິດຍ້ອນໜີບໍ່ທັນ. ນາງໂຈໝ້າ ແມ່ນຜູ່ດຽວທີ່ລອດຕາຍຈາກທະເລໄຟໃນຮ້ານນີ້,ໃນເວລາຫວນຄືນເຫດການຕອນນັ້ນ,ນາງເວົ້າວ່າ:
"ປະຕູຂອງພວກເຮົາແມ່ນເຮັດດ້ວຍແກ້ວ,ເວລາພວກເຂົາທຸບຕີ,ມີສຽງດັງແຮງຫຼາຍແລະແຕກໝົດ.ພວກເຮົາຢ້ານຈົນຮ້ອງໄຫ້ຂຶ້ນ,ແຕ່ລະຄົນກໍ່ສັ່ນທົດໆ,ບໍ່ກ້າປາກ.ຂ້ອຍບໍ່ນຶກບໍ່ຝັນເລີຍວ່າຈະເກີດເຫດການແນວນີ້,ຕອນເຊົ້າພວກເຮົາຍັງໄປເຂົ້າການຢ່າງສະບາຍອົກສະບາຍໃຈ,ຊ້ຳພັດເກີດເຫດການຄືແນວນີ້ຢ່າງກະທັນຫັນ.ຂ້ອຍຢາກຖາມກຸ່ມກໍ່ການຈາລະຈົນເຫຼົ່ານັ້ນວ່າ,ເປັນຫຍັງພວກເຈົ້າຕ້ອງຂ້າຄົນທີ່ບໍ່ມີຄວາມຜິດຫຍັງຫຼາຍປານນີ້?"
ໃນເຫດການຈາລະຈົນເທື່ອນີ້,ກຸ່ມກໍ່ການຈາລະຈົນໄດ້ໃຊ້ວິທີທີ່ໂຫດຮ້າຍປ່າເຖື່ອນທີ່ສຸດ.ຜູ້ຊາຍຄົນໜຶ່ງທີ່ພວມຂັບລົດຈັກຖືກກຸ່ມກໍ່ການຈາລະຈົນລັດຢູ່ກາງທາງ,ສິບກວ່າຄົນໃຊ້ດິນຈີ່ແກວ່ງໃສ່ຫົວຂອງລາວ,ຕາເບື້ອງຂວາຂອງລາວຖືກຕີຈົນບອດ,ຫູເບື້ອງຊ້າຍຖືກຕັດ.ສິ່ງທີ່ບໍ່ໜ້າເຊື່ອແມ່ນ,ແພດໝໍທີ່ອອກມາກອບກູ້ຊ່ວຍເຫຼືອຄົນທີ່ໄດ້ຮັບບາດເຈັບນັ້ນກໍ່ໄດ້ກາຍເປັນເປົ້າໝາຍໂຈມຕີຂອງກຸ່ມກໍ່ການຈາລະຈົນຄືກັນ.
ພາຍຫຼັງເກີດເຫດການຈາລະຈົນຢູ່ນະຄອນລາຊາແລ້ວ,ອົງການປົກຄອງເຂດປົກຄອງຕົນເອງຕິເບດໄດ້ສົ່ງຕຳຫຼວດໄປຮັກສາຄວາມສະຫງົບຂອງສັງຄົມ,ປົກປັກຮັກສາຊີວິດແລະຄວາມປອດໄພທາງຊັບສິນຂອງປະຊາຊົນ.ຈາກໂທລະພາບ,ພວກເຮົາເຫັນໄດ້ວ່າ,ເວລາຕຳຫຼວດປະຕິບັດໜ້າທີ່,ບໍ່ໄດ້ໃຊ້ອາວຸດໃດໆເລີຍ,ມີແຕ່ຍົກກຳບັງ,ເພື່ອໄລ່ກຸ່ມກໍ່ການຈາລະຈົນໃຫ້ໜີໄປ,ແຕ່ວ່າ,ພວກເຂົາເຈົ້າພັດຖືກກຸ່ມກໍ່ການຈາລະຈົນໂຈມຕີດ້ວຍກ້ອນຫີນ ດິນຈີ່ແລະພ້າມີດ.
ຕາມສະຖິຕິ, ໃນເຫດການເທື່ອນີ້, ຄົນຮ້າຍໄດ້ຈູດເຜົາເຮືອນແລະຮ້ານຄ້າ 216 ແຫ່ງ, ທຳລາຍແລະຈູດເຜົາລົດ 56 ຄັນ, ຂ້າແລະເຜົາປະຊາຊົນທີ່ບໍ່ມີຄວາມຜິດຫຍັງເສຍຊີວິດ13 ຄົນ.
ທ່ານໄບມາຊິຫຼິນ ເຈົ້າໜ້າທີ່ເຂດປົກຄອງຕົນເອງຕິເບດກ່າວວ່າ, ມີຫຼັກຖານອັນພຽງພໍທີ່ຢັ້ງຢືນວ່າ, ການເຄື່ອນໄຫວທຳລາຍດ້ວຍການທຸບຕີ ທັບມ້າງແລະຈູດໄຟເຜົາທີ່ເກີດຂຶ້ນຢູ່ລາຊາເທື່ອນີ້ແມ່ນກຸ່ມດາໄລລາມະວາງແຜນແລະປຸກປັ່ນກໍ່ຂຶ້ນຢ່າງມີການຈັດຕັ້ງຄັກແນ່. ທ່ານກ່າວວ່າ:
"ກຸ່ມດາໄລລາມະສວຍໃຊ້ທຸກວິທີ, ຕິດຕໍ່ກັບພະສົງຈຳນວນໜຶ່ງຂອງເຂດຕິເບດ, ແລະສົ່ງຄ່ຳສັ່ງໄປເຂດຕິເບດດ້ວຍຊ່ອງທາງຕ່າງໆ. ພ້ອມກັນນັ້ນ, ກຸ່ມດາໄລລາມະຍັງປຸກປັ່ນແລະຕົວະຍົວະປະຊາຊົນທີ່ບໍ່ຮູ້ຄວາມຈິງດ້ວຍວິທີຕ່າງໆ, ເຮັດໃຫ້ເຂົາເຈົ້າເຂົ້າຮ່ວມການກໍ່ເຫດການຈະລາຈົນທີ່ຄົນຈຳນວນໜ້ອຍກໍ່ຂຶ້ນ."
ຕາມພາກສ່ວນທີ່ກ່ຽວຂ້ອງຂອງເຂດປົກຄອງຕົນເອງຕິເບດກ່າວວ່າ, ນັບມາຮອດເວລາ 22 ໂມງ ວັນທີ 19 ມີນານີ້ຕາມເວລາທ້ອງຖິ່ນ, ນະຄອນລາຊາໄດ້ມີຜູ້ເຂົ້າຮ່ວມກໍ່ເຫດຈະລາຈົນປະມານ 170 ຄົນເຂົ້າມອບຕົວ. ວັນທີ 20 ມີນານີ້, ນັກຂ່າວສັງເກດຢູ່ເຂດແລະເສັ້ນທາງສຳຄັນຂອງນະຄອນລາຊາວ່າ, ຢູ່ຖະໜົນສາຍຕ່າງໆໄດ້ມີລົດແລ່ນຢ່າງເປັນປົກກະຕິ, ຮ້ານຄ້າສ່ວນຫຼາຍໄດ້ຟື້ນຟູການບໍລິການແລ້ວ, ໂຮງຮຽນຊັ້ນສູງແລະໂຮງຮຽນປະຖົມມັດຖະຍົມໄດ້ເຂົ້າຮຽນຢ່າງປົກກະຕິ, ຄວາມເປັນລະບຽບຮຽບຮ້ອຍໃນສັງຄົມຂອງນະຄອນລາຊາໄດ້ກັບຄືນສູ່ສະພາບປົກກະຕິໃນພື້ນຖານແລ້ວ.
|
