|
CRIລາຍງານວ່າ: ວັນທີ14ເດືອນນີ້,ເຂດຕິເບດພ້ອມດ້ວຍເຂດບໍລິເວນໃກ້ຄຽງຂອງຈີນໄດ້ເກີດເຫດການຈະລາຈົນ.ຄົນບໍ່ດີຈຳນວນໜຶ່ງທຸບຕີ ທັບມ້າງ ຈູດໄຟເຜົາປຸ້ນຈີ້ແລະຂ້າຄົນ,ເຊິ່ງພາໃຫ້ທົ່ວໂລກສົນໃຈນຳ.ຕໍ່ເຫດການເລື່ອງນີ້,ນັກຂ່າວCRIປະຈຳໄທໄດ້ສຳພາດທ່ານສຽນເຟິງ ຜູ່ຊ່ຽວຊານບັນຫາຈີນຂອງໄທໃນຫວ່າງມໍ່ໆນີ້.ທ່ານເຫັນວ່າ, ການລາຍງານຂ່າວກ່ຽວກັບບັນຫາຕິເບດຂອງສື່ມວນຊົນຝ່າຍຕາເວັນຕົກຂາດຈັນຍາບັນຂ່າວ.
ທ່ານສຽນເຟິງແມ່ນຮອງຫົວໜ້າທັງເປັນນັກປະພັນທີໜຶ່ງຂອງໜັງສືພິມຢ້າໂຈ່ວຢື້ປ້າວ ໜັງສືພິມພາສາຈີນຂອງໄທ.ພາຍຫຼັງເຫດການຈະລາຈົນທີ່ນະຄອນລາຊາເກີດຂຶ້ນແລ້ວ,ທ່ານໄດ້ຕິດຕາມເຫດການນີ້ ຕະຫຼອດ.ເມື່ອກ່າວເຖິງເຫດການນີ້,ທ່ານກ່າວວ່າ,ສື່ມວນຊົນຝ່າຍຕາເວັນຕົກໄດ້ຟ້າວຟັ່ງລາຍງານຂ່າວກ່ຽວກັບເຫດການຈະລາຈົນກ່ອນໝູ່.ສື່ມວນຊົນຕ້ອງລາຍງານຂ່າວໄວເທົ່າໃດຍິ່ງດີ,ແຕ່ບໍ່ຄວນບິດເບືອນຂ່າວ,ບິດເບືອນເນື້ອໃນທີ່ແທ້ຈິງຂອງຂ່າວ.ເອົາຂ່າວກ່ຽວກັບຕຳຫຼວດເນປານຂັບໄລ່ພວກແບ່ງແຍກຕິເບດອອກຈາກຈີນໃຫ້ເປັນເອກະລາດທີ່ພັດຖິ່ນຢູ່ເນປານສະແດງກຳລັງນັ້ນມາລາຍງານວ່າແມ່ນຕຳຫຼວດຈີນຈັບຕົວພວກແບ່ງແຍກຂອງຕິເບດ.
ທ່ານສຽນເຟິງຍົກຕົວຢ່າງວ່າ,ສື່ມວນຊົນຝ່າຍຕາເວັນຕົກລາຍງານວ່າຕຳຫຼວດຈີນຈັບຄົນ,ເລື່ອງຈິງຫາກແມ່ນຕຳຫຼວດຈີນຊ່ວຍສົ່ງຜູ່ໄດ້ຮັບບາດເຈັບຂຶ້ນລົດພະຍາບານ,ແຕ່ບໍ່ແມ່ນລົດຕຳຫຼວດ.ສື່ມວນຊົນຝ່າຍຕາເວັນຕົກສາຍພາບວິດີໂອທີ່ມີຊາວເຜົ່າຕິເບດໄດ້ຮັບບາດເຈັບນັ້ນລົບໄປລົບມາວ່າແມ່ນຕຳຫຼວດແລະທະຫານຈີນເປັນຜູ່ທຸບຕີຊາວຕິເບດໃຫ້ໄດ້ຮັບບາດເຈັບ,ທີ່ຈິງແລ້ວ,ຊາວໜຸ່ມເຜົ່າຕິເບດຜູ່ນີ້ແມ່ນນາຍໝໍ,ເພື່ອຊ່ວຍເຫຼືອເດັກນ້ອຍເຜົ່າຮ້ານທີ່ເຈັບປ່ອຍເປັນພະຍາດຈິ່ງຖືກພວກຄົນບໍ່ດີທຸບຕີຈົນໄດ້ຮັບບາດເຈັບຢູ່ຫົວ.
ນັກທ່ອງທ່ຽວຈາກປະເທດຕາເວັນຕົກຈຳນວນໜຶ່ງທີ່ໄດ້ເຫັນຄວາມວຸ້ນວາຍຢູ່ນະຄອນລາຊາຂອງເຂດຕິເບດກັບຕາ, ເຂົາເຈົ້າໄດ້ໃຊ້ກ້ອງຖ່າຍຮູບ, ກ້ອງຖ່າຍວິດີໂອຂອງຕົນຖ່າຍເອົາສະພາບຕົວຈິງ, ຕໍ່ມາ, ເຂົາເຈົ້າກໍ່ໄດ້ວາດພາບໝົດທຸກສິ່ງທີ່ເຂົາເຈົ້າໄດ້ເຫັນ, ຕ່າງກັນຫຼາຍກັບອັນທີ່ວ່າຕຳຫຼວດແລະທະຫານປາບປາມການແຫ່ຂະບວນໂດຍສັນຕິທີ່ສື່ມວນຊົນຝ່າຍຕາເວັນຕົກໂຄສະນາ.
ທ່ານຊຽນເຟິ່ງວິເຄາະວ່າ, ຄວາມວຸ້ນວາຍທີ່ເກີດຂຶ້ນຢູ່ນະຄອນລາຊາສັ່ງຜົນຮ້າຍຢ້ອນຫຼັງອັນຮ້າຍແຮງ, ສາເຫດອັນໜຶ່ງກໍ່ແມ່ນອົງການປົກຄອງເຂດຕິເບດມີຄວາມສຸຂຸມຮອບຄອບຕໍ່ບັນຫາຊົນເຜົ່າທີ່ສຸດ, ຈຶ່ງມີປະຕິກິລິຍາຕອບໂຕ້ຊ້າ,ແຕ່ກໍ່ບໍ່ແມ່ນການປາບປາມຈະລາຈົນດ້ວຍກຳລັງອາວຸດໃນທັນທີດັ່ງສື່ມວນຊົນຝ່າຍຕາເວັນຕົກເວົ້າ. "ຂ້າພະເຈົ້າຮູ້ນະໂຍບາຍຊົນເຜົ່າຂອງລັດຖະບານຈີນຢ່າງເລິກເຊິ່ງ. ລັດຖະບານຈີນມີຄວາມສຸຂຸມຮອບຄອບທີ່ສຸດຕໍ່ບັນຫານີ້, ການຮັບມືກັບເຫດການສຸກເສີນທີ່ເກີດຂຶ້ນຢູ່ເຂດຊົນເຜົ່າແມ່ນສຸຂຸມຮອບຄອບທີ່ສຸດ. ເວລານັ້ນພໍດີແມ່ນໄລຍະຈັດກອງປະຊຸມ 2 ສະພາຂອງຈີນ, ຜູ້ນຳສຳຄັນຂອງເຂດຕິເບດລ້ວນແຕ່ປະຊຸມຢູ່ປັກກິ່ງ. ເມື່ອເກີດເຫດການກະທັນຫັນແບບນີ້ແລ້ວ, ຜູ້ນຳທີ່ເຫຼືອຢູ່ນະຄອນລາຊາບໍ່ກ້າຈັບຜູ້ກໍ່ເຫດການ. ຜູ້ກໍ່ເຫດການຈຶ່ງມີເວລາພຽງພໍເພື່ອກໍ່ການຈະລາຈົນ. ຖ້າສະພາບການດັ່ງສື່ມວນຊົນຝ່າຍຕາເວັນຕົກເວົ້າ, ຂ້າພະເຈົ້າເຊື່ອວ່າ, ຜົນຮ້າຍຢ້ອນຫຼັງຈະບໍ່ຮ້າຍແຮງປານນີ້."
|
