|
|
(GMT+08:00)
2008-04-04 18:35:39
|
|
ຄະນະກຳມະການໂອລິມປິກສາກົນຍ້ອງຍໍວຽກງານກະກຽມຂອງງານກິລາໂອລິມປິກປັກກິ່ງ
cri
ທີ່ນີ້, ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ້ຟັງທີ່ໂຄລົບ, ເມື່ອໄຟສັກສິກຂອງງານກິລາໂອລິມປິກປັກກິ່ງ2008ໄດ້ສົ່ງຕໍ່ຢູ່ໃນຂອບເຂດທົ່ວໂລກ, ຄະນະກຳມະການປະສານງານຂອງງານກິລາໂອລິມປິກຄັ້ງທີ29ຂອງຄະນະກຳມະການໂອລິມປິກສາກົນໄດ້ຈັດກອງປະຊຸມຄົບຄະນະຄັ້ງທີ10ຢູ່ປັກກິ່ງແຕ່ວັນທີ1ຫາວັນທີ3ເມສາປີນີ້. ໃນກອງປະຊຸມຂ່າວທີ່ຈັດຂຶ້ນຫຼັງກອງປະຊຸມໃນວັນທີ3ເມສາ, ເຈົ້າໜ້າທີ່ຄະນະກຳມະການໂອລິມປິກສາກົນຕ່າງໆເຊັ່ນ: ທ່ານແຮນ ເວີບຼູເກນ ປະທານຄະນະກຳມະການປະສານງານແລະທ່ານກິວເບີດ ເຟວລີ ຫົວໜ້າບໍລິຫານງານໂອລິມປິກຄະນະກຳມະການໂອລິມປິກສາກົນ ໄດ້ຕີລາຄາສູງຕໍ່ວຽກງານກະກຽມທຸກລາຍຂອງງານກິລາໂອລິມປິກປັກກິ່ງ. ຕໍ່ໄປເຊີນຟັງລາຍລະອຽດ.
ໃນໄລຍະກອງປະຊຸມ, ຄະນະກຳມະການປະສານງານແລະຜູ້ຮັບຜິດຊອບທີ່ກ່ຽວຂ້ອງຂອງຄະນະກຳມະການຈັດງານໂອລິມປິກປັກກິ່ງໄດ້ຈັດກອງປະຊຸມໜ່ວຍງານຫຼາຍເທື່ອ, ໄດ້ລົງເລິກແລກປ່ຽນແລະປະເມີນຜົນຕໍ່ຫົວຂໍ້ວຽກງານຕ່າງໆເຊັ່ນ: ສິ່ງແວດລ້ອມ, ການບໍລິການດ້ານສື່ມວນຊົນ, ຜູ້ຊົມ, ຄະນະກຳມະການໂອລິມປິກຂອງປະເທດແລະເຂດແຄວ້ນຕ່າງໆ.
ໃນກອງປະຊຸມຄົບຄະນະຄັ້ງນີ້, ທ່ານແຮນ ເວີບຼູແກນ ໄດ້ຂອບໃຈລັດຖະບານຈີນທີ່ໄດ້ອອກແຮງສຸດຂີດຕໍ່ວຽກງານກະກຽມງານໂອລິມປິກປັກກິ່ງ, ແລະໄດ້ສະແດງຄວາມໂຄລົບນັບຖືຕໍ່ໝາກຜົນທີ່ອົງການປົກຄອງນະຄອນຫຼວງປັກກິ່ງແລະຄະນະກຳມະການຈັດງານໂອລິມປິກປັກກິ່ງໄດ້ຮັບໃນວຽກງານກະກຽມງານກິລາໂອລິມປິກ. ທ່ານກ່າວວ່າ:
ພວກຂ້າພະເຈົ້າຮູ້ສຶກປິຕິຊົມຊື່ນທີ່ຄາດຄະເນວ່າ, ໃນງານກິລາໂອລິມປິກປັກກິ່ງທີ່ຈະຈັດຂຶ້ນໃນລະດູຮ້ອນປີນີ້, ຍ່ອມຈະໄດ້ຮັບຜົນສຳເລັດຢ່າງຈົບງາມ. ວຽກງານຂອງຄະນະຈັດງານໂອລິມປິກປັກກິ່ງໄດ້ເດີນຕາມວົງໂຄຈອນທີ່ຖືກຕ້ອງຕະຫຼອດມາ, ງານໂອລິມປິກທີ່ຈະຈັດຂຶ້ນໃນເດືອນສິງຫາປີນີ້ຈະໄດ້ຮັບຜົນງານອັນພົ້ນເດັ່ນ, ແລະຍ່ອມຈະສ້າງຜົນປະໂຫຍດໃຫ້ແກ່ນັກກິລາທັງຫຼາຍຢ່າງແນ່ນອນ.
ປັດຈຸບັນ, ປັກກິ່ງພວມອອກແຮງປະຕິບັດມາດຕະການຕ່າງໆເພື່ອຄວບຄຸມມົນລະພິດອາກາດ, ແລະຮັບປະກັນໃຫ້ບັນລຸຈຸດໝາຍທີ່ຈຳນວນມື້ທີ່ຄຸນນະພາບອາກາດບັນລຸລະດັບທີ 2 ແລະດີກວ່າລະດັບທີ 2 ໃນໝົດປີນີ້ມີ 70%. ນັບແຕ່ວັນທີ 1 ມີນາປີນີ້ເປັນຕົ້ນໄປ, ນະຄອນຫຼວງປັກກິ່ງເລີ່ມປະຕິບັດມາດຕະຖານທີ 4 ຂອງການລະບາຍຂອງລົດຍົນແຫ່ງຊາດຊຶ່ງເທົ່າທຽມກັບມາດຕະຖານ 4 ຂອງເອີລົບ. ປັກກິ່ງຍັງຈະສ້າງລະບຽບການພະຍາກອນຄຸນນະພາບອາກາດ, ເຂດແຂວງ ແລະກຳແພງນະຄອນຕ່າງໆທີ່ຢູ່ອ້ອມຂ້າງປັກກິ່ງຈະສະໜອງການພະຍາກອນຄຸນນະພາບອາກາດພ້ອມກັນ. ຫວ່າງມໍ່ໆນີ້, ອົງການຕິດຕາມຄວບຄຸມຄຸນນະພາບອາກາດສາກົນໄດ້ສຳເລັດການປະເມີນຄຸນນະພາບອາກາດປັກກິ່ງໃນເດືອນສິງຫາປີນີ້. ທ່ານແຮັນ ເວີບຼູເກນສະແດງຄວາມພໍໃຈຕໍ່ຜົນການປະເມີນ, ທ່ານເຊື່ອວ່າ, ໃນໄລຍະງານກິລາໂອລິມປິກ, ປັກກິ່ງຈະມີຄຸນນະພາບອາກາດທີ່ດີ, ຈະບໍ່ມີຜົນກະທົບຫຍັງຕໍ່ນັກກິລາ.
ປັດຈຸບັນ, ໃນສະໜາມກິລາ 37 ແຫ່ງທີ່ຕ້ອງການໃຊ້ໃນງານກິລາໂອລິມປິກປັກກິ່ງ, ມີ 36 ແຫ່ງໄດ້ສ້າງສຳເລັດແລ້ວ, ສະໜາມກິລາແຫ່ງຊາດກໍ່ຈະສຳເລັດໃນເດືອນນີ້. ໃນສິ່ງກໍ່ສ້າງທີ່ກ່ຽວຂ້ອງ 6 ແຫ່ງນັ້ນ, ອາຄານປັກກິ່ງດີຈີຕອນໄດ້ສ້າງສຳເລັດ, ບ້ານໂອລິມປິກ ບ້ານສື່ມວນຊົນ ແລະສູນປະຊຸມແຫ່ງຊາດຈະສ້າງສຳເລັດໃນເດືອນນີ້; ເສົາອາກາດຖ່າຍທອດທີ່ມີຫຼາຍສັບພະຄຸນ ແລະສວນປ່າໄມ້ໂອລິມປິກພວມຂ້ຽວສ້າງ, ຈະສຳເລັດໃນທ້າຍເດືອນມິຖຸນາປີນີ້. ຕໍ່ຄວາມໄວການສ້າງສິ່ງກໍ່ສ້າງເຫຼົ່ານີ້, ທ່ານແຮັນ ເວີບຼູເກນຮູ້ສຶກພໍໃຈຫຼາຍ. ໃນກອງປະຊຸມເທື່ອນີ້, ທ່ານແຮັນ ເວີບຼູເກນໄດ້ນຳພາກຳມະການຂອງຄະນະກຳມະການປະສານງານ 20 ກວ່າທ່ານທີ່ເຂົ້າຮ່ວມກອງປະຊຸມ ໄປກວດກາບ້ານໂອລິມປິກຂອງປັກກິ່ງທີ່ຈະສ້າງສຳເລັດ. ຕໍ່ບ້ານໂອລິມປິກທີ່ຈະເລີ່ມໃຊ້ໃນລະດູຮ້ອນປີນີ້, ທ່ານກີວເບີດ ເຟນລີ ກຳມະການຂອງຄະນະກຳມະການປະສານງານ ຫົວໜ້າບໍລິຫານງານຂອງງານກິລາໂອລິມປິກຂອງຄະນະກຳມະການໂອລິມປິກສາກົນບອກນັກຂ່າວວ່າ,
"ບ້ານໂອລິມປິກງາມຫຼາຍ, ແຕ່ລະຫ້ອງກໍ່ດີທີ່ສຸດ. ຂ້າພະເຈົ້າພໍໃຈຫຼາຍຕໍ່ຂະໜາດຂອງຫ້ອງ ຕຽງ ແລະບ່ອນນັ່ງ, ຂ້າພະເຈົ້າເຊື່ອວ່າ ນັກກິລາທັງຫຼາຍກໍ່ຍ່ອມຈະພໍໃຈແນ່ນອນ."
ກອງປະຊຸມເທື່ອນີ້ແມ່ນກອງປະຊຸມຄົບຄະນະຄັ້ງສຸດທ້າຍຂອງຄະນະປະສານງານຂອງງານກິລາໂອລິມປິກຄັ້ງທີ 29 ຂອງຄະນະກຳມະການໂອລິມປິກສາກົນ, ນີ້ເປັນຂີດໝາຍສະແດງໃຫ້ເຫັນວ່າ ວຽກງານກະກຽມຂອງງານກິລາໂອລິມປິກປັກກິ່ງໄດ້ເຂົ້າສູ່ໄລຍະສຸດທ້າຍແລ້ວ.
|
|
|