|
ໂຄສົກກະຊວງການຕ່າງປະເທດຈີນເຕືອນສະມາຊິກລັດຖະສະພາອາເມລິກາທີ່ກ່ຽວຂ້ອງຢ່າເຮັດເລື່ອງທີ່ທຳລາຍການພົວພັນລະຫວ່າງຈີນອາເມລິກາ
cri
ຕາມຂ່າວ cri:ວັນທີ 7 ເມສານີ້ ຢູ່ປັກກິ່ງ,ນາງຈ່ຽງອີ ໂຄສົກກະຊວງການຕ່າງປະເທດຈີນກ່າວວ່າ,ຈີນເຕືອນໃຫ້ສະມາຊິກລັດຖະສະພາອາເມລິກາທີ່ກ່ຽວຂ້ອງຈົ່ງເຄົາລົບເລື່ອງຈິງ, ປະລະຄວາມເຫັນລຳອຽງ,ເຫັນແຈ້ງໂສມຫນ້າທີ່ແທ້ຈິງຂອງກຸ່ມດາໄລລາມະ,ເຊົາຊຸກຍູ້ການຜ່ານມະຕິທີ່ກ່ຽວພັນເຖິງຕິເບດ, ຢ່າເຮັດເລື່ອງທີ່ປະຊາຊົນຈີນບໍ່ພໍໃຈແລະທຳລາຍການພົວພັນລະຫວ່າງຈີນກັບອາເມລິກາ.
ຫວ່າງແລ້ວນີ້ ທ່ານເພໂລຊີ ປະທານສະພາຕ່ຳອາເມລິກາໄດ້ສະເຫນີ ຍັດຕິ,ຮຽກຮ້ອງລັດຖະບານຈີນເຊົາປາບປາມຕິເບດ,ແລະສົນທະນາກັບພະດາໄລລາມະຢ່າງມີລັກສະນະທາດແທ້.ໃນເວລາຕອບຄຳຖາມຂອງນັກຂ່າວ, ນາງຈ່ຽງອີກ່າວວ່າ, ສະມາຊິກສະພາຕ່ຳຈຳນວນຫນ້ອຍທີ່ສຸດຂອງອາເມລິກາໄດ້ສະເຫນີຍັດຕິທີ່ກ່ຽວຂ້ອງ, ບໍ່ພຽງແຕ່ບໍ່ກ່າວປະນາມພວກກໍ່ການຈະລາ ຈົນຢູ່ເມືອງລາຊາ,ບໍ່ກ່າວປະນາມກຸ່ມດາໄລລາມະທີ່ເປັນຜູ່ວາງແຜນແລະຈັດຕັ້ງກໍ່ເຫດການທີ່ໃຊ້ກຳລັງຮຸນແຮງເທື່ອນີ້ຢູ່ເບື້ອງຫລັງທໍ່ນັ້ນ,ຫາກຍັງແນປາຍຫອກໃສ່ລັດຖະບານແລະປະຊາຊົນຈີນອີກ, ປິ້ນຂາວເປັນດຳ, ມີເຈດຈຳນົງອັນເລິກແລບ.
ນາງຈ່ຽງອີກ່າວວ່າ, ຂໍແຕ່ດາໄລລາມະປະລະເຈດຈຳນົງທີ່ໃຫ້ຕິເບດເປັນເອກະລາດຢ່າງແທ້ຈິງ,ຢຸດຕິການເຄື່ອນໄຫວແບ່ງແຍກປະເທດຊາດ,ເຊົາວາງແຜນປຸກປັ່ນກໍ່ການກະທຳຜິດດ້ວຍຄວາມຮຸນແຮງຢູ່ຕິເບດແລະແຫ່ງອື່ນໆ,ເຊົາທຳລາຍງານກິລາໂອລິມປິກປັກກິ່ງ, ຕ້ອງຮັບຮອງວ່າຕິເບດແລະໄຕ້ຫວັນແມ່ນພາກສ່ວນຫນຶ່ງຂອງດິນແດນຈີນທີ່ຕັດແຍກອອກບໍ່ໄດ້ແລ້ວ, ລັດຖະບານສູນກາງຈີນຈິ່ງຈະສືບຕໍ່ເຈລະຈາກັບເຂົາ.
|
|
