|
ປີນີ້, ກຳປູເຈຍເໝົາຫໍວາງສະແດງສິນຄ້າຈີນອາຊຽນເປັນເທື່ອທຳອິດ
cri
ຕາມຂ່າວສານຊິ່ນຮວາ: ວັນທີ 8 ເມສານີ້, ກອງເລຂາຂອງງານວາງສະແດງສິນຄ້າຈີນອາຊຽນແຈ້ງຂ່າວວ່າ, ກຳປູເຈຍຈະເໝົາຫໍວາງສະແດງສິນຄ້າຈີນອາຊຽນຄັ້ງທີ 5 ເປັນຄັ້ງທຳອິດເຊິ່ງງານວາງສະແດງດັ່ງກ່າວຈະຈັດຂຶ້ນຢູ່ເມືອງນານນິງເຂດກວາງຊີຈີນໃນເດືອນຕຸລາປີນີ້, ວິສາຫະກິດທີ່ຈະເຂົ້າຮ່ວມງານວາງສະແດງແລະຈຳນວນຮ້ານວາງສະແດງກໍ່ຈະເພີ່ມຂຶ້ນຢ່າງຫຼວງຫຼາຍ.
ກຳປູເຈຍຈະເປັນປະເທດຫົວຂໍ້ຂອງງານວາງສະແດງສິນຄ້າຈີນອາຊຽນຄັ້ງທີ 5. ປະຈຸບັນ, ກະຊວງການຄ້າກຳປູເຈຍໄດ້ເລີ່ມເຊື້ອເຊີນວິສາຫະກິດແລະນັກທຸລະກິດຂອງປະເທດຕົນເຂົ້າຮ່ວມງານວາງສະແດງຢ່າງຮອບດ້ານແລ້ວ, ແລະຈະວາງນະໂຍບາຍພິເສດສົ່ງເສີມວິສາຫະກິດເອກະຊົນຂອງປະເທດຕົນຫຼາຍກວ່າເກົ່າເຂົ້າຮ່ວມງານວາງສະແດງ, ຄາດວ່າ, ຈະມີວິສາຫະກິດກຳປູເຈຍຫຼາຍສົມຄວນເຂົ້າຮ່ວມງານວາງສະແດງ.
ໃນງານວາງສະແດງສິນຄ້າຈີນອາຊຽນ 4 ຄັ້ງແລ້ວນີ້, ມູນຄ່າການຄ້າຂອງກຳປູເຈຍນັບລວມແລ້ວມີ 20 ລ້ານກວ່າໂດລາ, ມູນຄ່າສັນຍາຂອງໂຄງການຮ່ວມມືລົງທຶນລວມມີເກືອບ 900 ລ້ານໂດລາ.
|
|
