|
ໂຄສົກກະຊວງການຕ່າງປະເທດຈີນກ່າວວ່າ, ຈີນຈະສະເໜີໃຫ້ໄຂກອງປະຊຸມເທື່ອໜ້າຂອງການເຈລະຈາ 6 ຝ່າຍກ່ຽວກັບບັນຫານິວເຄຼຍແຫຼມເກົາຫຼີໃນເວລາທີ່ເໝາະສົມ
cri
ຕາມຂ່າວ CRI: ວັນທີ 17 ເມສານີ້, ຢູ່ທີ່ປັກກິ່ງ, ໃນກອງປະຊຸມນັກຂ່າວທີ່ຈັດຂຶ້ນເປັນປະຈຳ, ທ່ານນາງຈ່ຽງອີ ໂຄສົກກະຊວງການຕ່າງປະເທດຈີນກ່າວວ່າ, ຈີນສະແດງຄວາມຊົມເຊີຍຕໍ່ການພົບປະລະຫວ່າງອາເມລິກາກັບສ.ປ.ປເກົາຫຼີໃນມໍ່ໆນີ້, ແລະຈະສະເໜີໃຫ້ໄຂກອງປະຊຸມເທື່ອໜ້າຂອງການເຈລະຈາ 6 ຝ່າຍກ່ຽວກັບບັນຫານິວເຄຼຍແຫຼມເກົາຫຼີໃນເວລາທີ່ເໝາະສົມຕາມການຄືບໜ້າແຫ່ງການປຶກສາຫາລືຂອງຝ່າຍຕ່າງໆທີ່ກ່ຽວຂ້ອງ.
ທ່ານນາງຈ່ຽງອີກ່າວວ່າ, ຫວ່າງມໍ່ໆນີ້, ຂະບວນການການເຈລະຈາ 6 ຝ່າຍໄດ້ປະກົດມີໂອກາດໃໝ່, ນີ້ສະແດງໃຫ້ເຫັນອີກເທື່ອໜຶ່ງເຖິງຄວາມປາຖະໜາຂອງຝ່າຍຕ່າງໆທີ່ຈະຜ່ານຜ່າຄວາມຫຍຸ້ງຍາກດ້ານການເມືອງ, ສືບຕໍ່ກ້າວໄປໜ້າ.
ວັນທີ 8 ເມສານີ້, ຢູ່ສິງກະໂປ, ທ່ານກຼິສໂຕເຟີ ຮິວ ຜູ້ຊ່ອຍລັດຖະມົນຕີວ່າການກະຊວງການຕ່າງປະເທດອາເມລິກາໄດ້ພົບປະເຈລະຈາກັບທ່ານກີມເກກວນ ຜູ້ແທນສ.ປ.ປເກົາຫຼີກ່ຽວກັບບັນຫານິວເຄຼຍແຫຼມເກົາຫຼີ. ວົງການພາຍນອກຕີລາຄາຢ່າງຕັ້ງໜ້າຕໍ່ການເຈລະຈາເທື່ອນີ້.
|
|
