|
ນັກຂ່າວຣັດເຊຍຮຽກຮ້ອງນັກຂ່າວຂອງປະເທດຕ່າງໆໃນໂລກຈົ່ງລາຍງານຂ່າວກ່ຽວກັບບັນຫາຕິເບດຢ່າງທ່ຽງທຳແລະຖືກຕ້ອງຕາມຄວາມຈິງ
cri
CRIລາຍງານວ່າ:ວັນທີ21ເມສານີ້,ນັກຂ່າວຣັດເຊຍສອງຄົນທີ່ເຄີຍໄປເອົາຂ່າວຢູ່ເຂດປົກຄອງຕົນເອງຕິເບດຈີນໄດ້ໄປວິທະຍຸສາກົນແຫ່ງປະເທດຈີນຕາມການເຊີນ.ພວກທ່ານໄດ້ເລົ່າເລື່ອງທີ່ໄດ້ຮູ້ໄດ້ເຫັນຢູ່ຕິເບດ,ແລະຮຽກຮ້ອງນັກຂ່າວຂອງປະເທດຕ່າງໆໃນໂລກຈົ່ງໃຊ້ຫຼັກໝັ້ນທີ່ທ່ຽງທຳແລະພາວະວິໄສໃນເວລາລາຍງານຂ່າວກ່ຽວກັບບັນຫາຕິເບດ.
ພາຍຫຼັງເຫດການຈະລາຈົນ14ມີນາທີ່ນະຄອນລາຊາຕິເບດເກີດຂຶ້ນແລ້ວ,ທ່ານເວິ່ນເຈ່ຍປາວ ນາຍົກລັດຖະມົນຕີຈີນໄດ້ໃຫ້ຄຳໝັ້ນສັນຍາຢ່າງຈິງຈັງວ່າ,ຈະເຊີນນັກຂ່າວຕ່າງປະເທດໄປເອົາຂ່າວຢູ່ຕິເບດ.ຈາກນັ້ນບໍ່ດົນ,ນັກຂ່າວຕ່າງປະເທດ10ກວ່າຄົນກໍ່ໄດ້ມີໂອກາດໄປເອົາຂ່າວຢູ່ຕິເບດ.ທ່ານອູເກນີ ໂຊໂປວີຟ ນັກຂ່າວຂ່າວສານອີຕາຕາສຂອງຣັດເຊຍປະຈຳປັກກິ່ງກໍ່ແມ່ນໜຶ່ງໃນຫັ້ນ.ທ່ານກ່າວວ່າ,ຢູ່ນະຄອນລາຊາຂອງຕິເບດ,ພວກເຮົາໄດ້ໄປຢ້ຽມຊົມໂຮງຮຽນແຫ່ງໜຶ່ງ,ສິ່ງກໍ່ສ້າງແຫ່ງໜຶ່ງຂອງໂຮງຮຽນດັ່ງກ່າວຖືກກຸ່ມຄົນບໍ່ດີທຳລາຍ,ນີ້ເປັນເລື່ອງທີ່ໜ້າຄຽດແຄ້ນຫຼາຍ,ເພາະວ່າຄົນເຫຼົ່ານີ້ວາງແຜນກໍ່ເຫດການຈະລາຈົນອັນໄດ້ກະທົບເຖິງເດັກນ້ອຍ,ເດັກນ້ອຍຈຳນວນໜຶ່ງໄດ້ຮັບບາດເຈັບໃນເຫດການ.ຂ້າພະເຈົ້າເຫັນວ່ານີ້ແມ່ນການກະທຳທີ່ອະໄພໃຫ້ບໍ່ໄດ້.
ໃນລະດູຮ້ອນປີ2007,ທ່ານອານເດຼ ຄີຣີລົຟ ຫົວໜ້າສາຂາປັກກິ່ງຂອງຂ່າວສານອີຕາຕາສ໌ເຄີຍໄປເອົາຂ່າວຢູ່ຕິເບດປະມານໜຶ່ງອາທິດ,ທ່ານໄດ້ວາງສະແດງຮູບພາບຢ່າງຫຼວງຫຼາຍທີ່ຖ່າຍໃນຄາວນັ້ນໃຫ້ນັກຂ່າວເບິ່ງ,ທ່ານກ່າວວ່າ:"ຂ້າພະເຈົ້າ ມີພາບປະທັບໃຈວ່າ,ຊີວິດການເປັນຢູ່ຂອງຄົນຕິເບດມ່ວນຫຼາຍ.ຂ້າພະເຈົ້າໄດ້ຖ່າຍຮູບຢ່າງຫຼວງຫຼາຍຢູ່ຕິເບດ,ພາຍຫຼັງມາຈຶ່ງຄົ້ນພົບວ່າ,ເກືອບທຸກຄົນໃນຮູບພາບລ້ວນແຕ່ຍິ້ມແຍ້ມແຈ່ມໃສ.ພວກເຮົາໄດ້ທ່ຽວຊົມວັດແຫ່ງໜຶ່ງຢູ່ໃຈກາງນະ ຄອນລາຊາ,ໃນຮູບພາບທີ່ຂ້າພະເຈົ້າຖ່າຍ,ພະສົງໜຸ່ມເຫຼົ່ານັ້ນກໍລ້ວນແຕ່ຍິ້ມແຍ້ມແຈ່ມໃສ.ສະພາບການທີ່ຂ້າພະເຈົ້າໄດ້ເຫັນແມ່ນ,ຢູ່ຕິເບດ,ພິທີກຳທາງສາສະໜາແມ່ນມີຄວາມອິດສະຫຼະເສລີ, ບໍ່ໄດ້ຖືກກີດຂວາງຫຍັງເລີຍ."ແຕ່ວ່າ,ໃນເວລາແຈ້ງຂ່າວກ່ຽວກັບເຫດການ"14ມີນາ"ຂອງຕິເບດ,ສື່ມວນຊົນຕາເວັນຕົກພັດຕັ້ງໃຈບິດເບືອນເລື່ອງຈິງ,ໂຈມຕີລັດຖະບານຈີນດ້ວຍເຈຕະນາຮ້າຍ,ບັນລະຍາຍເຫດການຈະລາຈົນທີ່ວາງແຜນໂດຍພວກຕິເບດເອກະລາດນັ້ນວ່າ ເປັນ"ການຮຽກຮ້ອງໂດຍສັນຕິ",ນີ້ໄດ້ພາໃຫ້ປະຊາຊົນຈີນບໍ່ພໍໃຈທີ່ສຸດ.ກ່ຽວກັບເລື່ອງນີ້,ທ່ານຄີຣີລົຟກ່າວວ່າ,ນີ້ໄດ້ສະແດງໃຫ້ເຫັນວ່າ ສື່ມວນຊົນຕ່າງປະເທດສ່ວນໜຶ່ງໄດ້ໃຊ້ນະໂຍບາຍສອງໜ້າໃນບັນຫານີ້."ຖ້າວ່າເກີດເຫດການລະເບີດຢ່າງລຽນຕິດຢູ່ແອສປາຍ,ກໍວ່າແມ່ນການຫຼອນໂຈມຕີກໍ່ການຮ້າຍ,ແຕ່ຢູ່ຕິເບດ, ພວກກໍ່ການຈະລາຈົນເຜົາເຮືອນ,ພັດເວົ້າວ່າແມ່ນການຮຽກຮ້ອງໂດຍສັນຕິ."
ໃນເວລາການສຳພາດຈະສິ້ນສຸດລົງ,ທ່ານຄີຣີລົຟຮຽກຮ້ອງໃຫ້ນັກຂ່າວຂອງປະເທດຕ່າງໆໃນໂລກ,ຈົ່ງລາຍງານບັນຫາຕິເບດຢ່າງທ່ຽງທຳແລະຕົວຈິງ.ທ່ານກ່າວວ່າ:"ຂ້າພະເຈົ້າຢາກຮຽກຮ້ອງເພື່ອນຮ່ວມອາຊີບດຽວກັນ,ລາຍງານຂ່າວທີ່ເຈົ້າເຫັນກັບຕາຢ່າງພາວະວິໄສ,ຢ່າຖືກສວຍໃຊ້ໃນ"ເກມການເມືອງ"ຂອງບາງຄົນ."
|
|
