|
ລັດຖະບານກຳປູເຈຍສະແດງວ່າມີພັນທະສາກົນລະງັບລາຄາເຂົ້າ
cri
ຕາມຂ່າວສານຊິ່ນຮວາ: ໜັງສືພິມແມ່ຂອງແທມສ໌ກຳປູເຈຍສະບັບວັນທີ 2 ພຶດສະພານີ້ໄດ້ຍົກຄຳເວົ້າຂອງທ່ານຄີວ ກາຍາຣັດ ໂຄສົກລັດຖະບານກຳປູເຈຍ, ລັດຖະມົນຕີກະຊວງຖະແຫຼງຂ່າວກຳປູເຈຍມາແຈ້ງຂ່າວວ່າ, ຖ້າປ່ອຍໃຫ້ລາຄາເຂົ້າສູງຂຶ້ນຕໍ່ໄປ, ແນ່ນອນຈະເກີດສົງຄາມລາຄາເຂົ້າ, ບໍ່ມີຜົນດີຕໍ່ໝົດທຸກປະເທດ. ທ່ານກ່າວວ່າ, ກຳປູເຈຍກໍ່ມີພັນທະສາກົນລະງັບລາຄາເຂົ້າ.
ກ່ຽວກັບຄວາມຄຶດໃຫ້ຈັດຕັ້ງອົງການປະເທດສົ່ງອອກເຂົ້າທີ່ໄທສະເໜີອອກ, ທ່ານຄີວ ກາຍາຣັດກ່າວວ່າ, ປະເທດທີ່ສົ່ງອອກເຂົ້າທີ່ກ່ຽວຂ້ອງຕ້ອງຫາລືຢ່າງເຕັມສ່ວນ. ທ່ານຍັງຮຽກຮ້ອງໃຫ້ປະເທດທີ່ສົ່ງອອກເຂົ້າສາມັກຄີກັນ.
ວັນທີ 30 ເມສາແລ້ວນີ້, ທ່ານສະໝັກ ສຸນທໍລະເວດ ນາຍົກລັດຖະມົນຕີໄທກ່າວວ່າ, 5 ປະເທດທີ່ສົ່ງເຂົ້າອອກໄປຕ່າງປະເທດ, ຄື: ກຳປູເຈຍ, ລາວ, ມຽນມາ, ໄທແລະຫວຽດນາມສາມາດຈັດຕັ້ງອົງການປະເທດສົ່ງອອກເຂົ້າສູ່ຕ່າງປະເທດທີ່ຄ້າຍຄືອົງການປະເທດສົ່ງອອກນ້ຳມັນເຊື້ອໄຟ, ເພື່ອສຸມກຳລັງພ້ອມກັນສົ່ງຜົນສະທ້ອນຕໍ່ລາຄາເຂົ້າສາກົນ.
|
|
