ຕາມຂ່າວcri:ແຕ່ປີນີ້ເປັນຕົ້ນມາ, ເຂົ້າສານຈ້າວຂອງຕະຫຼາດສາກົນເພີ່ມຂຶ້ນຢ່າງຕໍ່ເນື່ອງ,ພາໃຫ້ບາງປະເທດເກີດຄວາມກັງວົນແລະຍາດຊື້.ໃນຖານະເປັນແຫຼ່ງສົ່ງອອກເຂົ້າຕົ້ນຕໍໃນໂລກ,ຫວ່າງມໍ່ໆນີ້,ປະເທດອາຊີອາຄະເນທະຍອຍກັນໃຊ້ມາດຕະການຮັບມື,ຕັ້ງໜ້າພະຍາຍາມເພື່ອແກ້ໄຂວິກິດການດ້ານສະບຽງອາຫານຂອງໂລກ.
ໄທເປັນປະເທດສົ່ງອອກເຂົ້າໃຫຍ່ກວ່າໝູ່ໃນໂລກ,ປີ2007ສົ່ງອອກ9ລ້ານ5ແສນ5ໝື່ນໂຕນ,ສ້າງລາຍຮັບ3ຕື້592ລ້ານໂດລາ.ອີງຕາມຕົວເລກທີ່ກະຊວງການຄ້າໄທປະກາດໃນຫວ່າງມໍ່ໆນີ້,ໃນ4ເດືອນຕົ້ນປີນີ້,ໄທກໍ່ໄດ້ສົ່ງອອກເຂົ້າ4ລ້ານ7ໝື່ນໂຕນ,ເພີ່ມຂຶ້ນ74%ເມື່ອທຽບກັບໄລຍະດຽວກັນປີກາຍນີ້.ວັນທີ4 ພຶດສະພານີ້,ໃນເວລາກ່າວເຖິງບັນຫາເຂົ້າຢູ່ບາງກອກ,ທ່ານສະໝັກ ສູນທໍລະເວດ ນາຍົກລັດຖະມົນຕີໄທກ່າວຢ່າງຈະແຈ້ງວ່າ,ໃນເວລາທີ່ໂລກປະເຊີນໜ້າກັບຂາດສະບຽງອາຫານ,ໄທຈະບໍ່ໃຊ້ນະໂຍບາຍທີ່ຫ້າມສົ່ງອອກ.
ຫວຽດນາມເປັນປະເທດທີ່ສົ່ງອອກເຂົ້າໃຫຍ່ທີ2ໃນໂລກ.ວັນທີ28 ເມສາແລ້ວນີ້,ທ່ານຫງຽນເດຕນຢຸງ ນາຍົກລັດຖະມົນຕີຫວຽດນາມກ່າວວ່າ,ຫວຽດນາມມີການສະສົມເຂົ້າຢ່າງເຕັມທີ່,ສາມາດສະໜອງຄວາມຕ້ອງການພາຍໃນປະເທດແລະຕ່າງປະເທດ.ຕາມສະຖິຕິ,ປີນີ້,ຫວຽດນາມຍັງຈະສົ່ງອອກເຂົ້າ3ລ້ານ5ແສນໂຕນ.
ໃນຖານະເປັນປະເທດທີ່ສົ່ງອອກເຂົ້າ, ປີກາຍນີ້ກຳປູເຈຍໄດ້ສົ່ງອອກເຂົ້າ1ລ້ານ5ແສນໂຕນ. ຫວ່າງມໍ່ໆນີ້, ໃນເວລາໃຫ້ສຳພາດກ່ຽວກັບບັນຫາສະບຽງອາຫານຂອງໂລກ, ໂຄສົກລັດຖະບານກຳປູເຈຍ ລັດຖະມົນຕີວ່າການກະຊວງຖະແຫຼງຂ່າວກ່າວວ່າ, ຖ້າປ່ອຍໃຫ້ລາຄາເຂົ້າຖີບສູງຂຶ້ນຕໍ່ໄປ, ຍ່ອມຈະເກີດຄວາມວຸ້ນວາຍດ້ານລາຄາສະບຽງອາຫານ, ນີ້ບໍ່ມີຜົນດີຕໍ່ທຸກປະເທດ. ກ່ຽວກັບຄວາມຄິດທີ່ປະເທດຜະລິດເຂົ້າຂອງອາຊີອາຄະເນສ້າງຕັ້ງອົງການສົ່ງອອກເຂົ້ານັ້ນ, ກຳປູເຈຍໄດ້ສະແດງຄວາມສະໜັບສະໜູນ.
ຟິລິບປິນແມ່ນປະເທດໜຶ່ງທີ່ນຳເຂົ້າສະບຽງອາຫານຫຼາຍ. ວັນທີ2ພຶດສະພານີ້, ທ່ານອາເຊີ ຢັບ ລັດຖະມົນຕີວ່າການກະຊວງກະສິກຳຟິລິບປິນເປີດເຜີຍວ່າ, ເມື່ອໄດ້ພະຍາຍາມແລ້ວ, ຟິລິບປິນໄດ້ສັ່ງຊື້ເຂົ້າ1ລ້ານ6ແສນໂຕນ, ແລະຍັງຈະຮັບປະມູນເກັບຊື້ເຂົ້າອີກ6ແສນ7ໝື່ນ5ພັນໂຕນ, ນີ້ບໍ່ພຽງແຕ່ຈະຮັບປະກັນຄວາມຕ້ອງການສະບຽງອາຫານພາຍໃນປະເທດເທົ່ານັ້ນ, ຍັງຈະມີຈຳນວນໜຶ່ງຮັກສາໄວ້ໃນສາງ.
ວັນທີ30ເມສາແລ້ວນີ້, ທ່ານສະໝັກ ສຸນທໍລະເວດ ນາຍົກລັດຖະມົນຕີໄທໄດ້ພົບປະເຈລະຈາກັບທ່ານເທັນເຊັນ ນາຍົກລັດຖະມົນຕີມຽນມາທີ່ໄປຢ້ຽມຢາມໄທ, ທ່ານສະເໜີວ່າ, ໄທ ຫວຽດນາມ ກຳປູເຈຍ ລາວ ແລະມຽນມາທີ່ເປັນ5ປະເທດສົ່ງອອກເຂົ້າສານ, ສາມາດສ້າງຕັ້ງອົງການສົ່ງອອກເຂົ້າທີ່ຄ້າຍຄືກັບອົງການປະເທດສົ່ງອອກນ້ຳມັນເຊື້ອໄຟ, ເພື່ອເສີມຂະຫຍາຍບົດບາດຮ່ວມກັນ, ແລະມີຜົນສະທ້ອນຕໍ່ລາຄາເຂົ້າຂອງໂລກ. ແຕ່ທ່ານຄູໂຣດາ ຮາຣູຮີໂກ ຜູ້ວ່າການທະນາຄານພັດທະນາອາຊີໄດ້ຄັດຄ້ານຂໍ້ສະເໜີດັ່ງກ່າວ. ທ່ານເຫັນວ່າ, ການສ້າງຕັ້ງອົງການແບບນີ້ບໍ່ພຽງແຕ່ຈະທຳລາຍຜົນປະໂຫຍດຂອງປະເທດທີ່ນຳເຂົ້າເທົ່ານັ້ນ, ມັນຍັງບໍ່ມີຜົນດີຕໍ່ປະເທດສົ່ງອອກນຳອີກ. ຟິລິບປິນກໍ່ໄດ້ຄັດຄ້ານຂໍ້ສະເໜີດັ່ງກ່າວ. ສະນັ້ນ, ນັກວິເຄາະເຫັນວ່າ, ແນວຄິດລິເລີ່ມດັ່ງກ່າວຈະປະກົດຜົນເປັນຈິງຫຼືບໍ່ຍັງຄາດຄະເນຍາກໃນປະຈຸບັນ.
|