|
ໂດຍຕອບສະໜອງຄຳເຊີນຂອງລັດຖະບານຍີ່ປຸ່ນ, ທ່ານຫູຈີນທ່າວ ປະທານປະເທດຈີນຈະໄປຢ້ຽມຢາມຍີ່ປຸ່ນທາງລັດຖະກິດແຕ່ວັນທີ 6 ຫາວັນທີ 10 ພຶດສະພານີ້. ນີ້ແມ່ນປະມຸກລັດຈີນໄປຢ້ຽມຢາມຍີ່ປຸ່ນ 10 ປີ. ກ່ອນຈະໄປຢ້ຽມຢາມ, ທ່ານຫູຈີນທ່າວໄດ້ໃຫ້ສຳພາດຂ່າວຂອງສື່ມວນຊົນຍີ່ປຸ່ນປະຈຳປັກກິ່ງ 16 ສຳນັກ. ທ່ານກ່າວວ່າ, ການຢ້ຽມຢາມຍີ່ປຸ່ນຂອງທ່ານແມ່ນການເດີນທາງໃນລະດູບານໃໝ່ທີ່ອົບອຸ່ນ, ຫວັງວ່າການຢ້ຽມຢາມເທື່ອນີ້ສາມາດຊຸກຍູ້ການພົວພັນຍຸດທະສາດທີ່ໃຫ້ປະໂຫຍດເຊິ່ງກັນແລະກັນລະຫວ່າງຈີນກັບຍີ່ປຸ່ນຢ່າງຮອບດ້ານ. ຕໍ່ໄປເຊີນຟັງລາຍລະອຽດ.
ໃນການເລີ່ມຕົ້ນຂອງການໃຫ້ສຳພາດຂ່າວໃນວັນທີ 4 ພຶດສະພານີ້, ກ່ອນອື່ນ, ປະທານຫູຈີນທ່າວໄດ້ຝາກນັກຂ່າວຍີ່ປຸ່ນທີ່ເຂົ້າຮ່ວມການສຳພາດຂ່າວສົ່ງຄຳຢື້ຢາມຖາມຂ່າວຢ່າງຈິງໃຈແລະຄວາມອວຍພອນອັນດີງາມໄປເຖິງປະຊາຊົນຍີ່ປຸ່ນ. ຜູ້ນຳສູງສຸດຈີນໄດ້ພັນລະນາການຢ້ຽມຢາມຍີ່ປຸ່ນຂອງຕົນທີ່ເລີ່ມຂຶ້ນຈະດຳເນີນນັ້ນເປັນ"ການເດີນທາງໃນລະດູບານໃໝ່ທີ່ອົບອຸ່ນ", ແລະອວຍພອນມິດຕະພາບລະຫວ່າງປະຊາຊົນຈີນກັບຍີ່ປຸ່ນມີຄວາມອົບອຸ່ນຕະຫຼອດ.
ປີນີ້ແມ່ນຈີນຍີ່ປຸ່ນເຊັນສົນທິສັນຍາສັນຕິພາບມິດຕະພາບຄົບຮອບ 30 ປີ. ໃນການໃຫ້ສຳພາດຂ່າວ, ທ່ານຫູຈີນທ່າວໄດ້ຕີລາຄ່າຢ່າງຕັ້ງໜ້າຕໍ່ການຂະຫຍາຍຕົວຂອງການພົວພັນລະຫວ່າງຈີນກັບຍີ່ປຸ່ນໃນ 30 ປີຜ່ານມາ, ແລະຊີ້ອອກວ່າການພົວພັນລະຫວ່າງຈີນກັບຍີ່ປຸ່ນຂະຫຍາຍຕົວບໍ່ພຽງແຕ່ສ້າງຜົນປະໂຫຍດຢ່າງແທ້ຈິງໃຫ້ແກ່ປະຊາຊົນສອງປະເທດເທົ່ານັ້ນ, ແຕ່ຍັງໄດ້ປະກອບສ່ວນອັນສຳຄັນຕໍ່ສັນຕິພາບ ສະຖຽນລະພາບແລະຄວາມຈະເລີ່ນຂອງອາຊີກໍຄືຂອງໂລກ. ທ່ານກ່າວວ່າ:
"ຄວາມຈິງຢືນຢັນຢ່າງເຕັມສ່ວນວ່າ, ຂະຫຍາຍການພົວພັນມິດຕະພາບຖານປະເທດໃກ້ຄຽງລະຫວ່າງຈີນກັບຍີ່ປຸ່ນທີ່ໝັ້ນທ່ຽງຍາວນານ, ສອດຄ່ອງກັບຜົນປະໂຫຍດພື້ນຖານຂອງສອງປະເທດແລະປະຊາຊົນສອງຊາດ. ຈຸດປະສົງຂອງການຢ້ຽມຢາມຍີ່ປຸ່ນຂອງຂ້າພະເຈົ້າເທື່ອນີ້ແມ່ນເພີ່ມທະວີຄວາມໄວ້ເນື້ອເຊື່ອໃຈເຊິ່ງກັນ, ແລະກັນເພີ່ມທະວີມິດຕະພາບ, ລົງເລິກການຮ່ວມມື, ວາງແຜນອະນາຄົດ, ຊຸກຍູ້ການພົວພັນຍຸດທະສາດທີ່ໃຫ້ປະໂຫຍດເຊິ່ງກັນແລະກັນລະຫວ່າງຈີນກັບຍີ່ປຸ່ນຢ່າງຮອບດ້ານ.
ທ່ານຫູຈີນທ່າວເຫັນວ່າ, ການສະໜັບສະໜູນຂອງປະຊາຊົນສອງຊາດແມ່ນພື້ນຖານອັນໝັ້ນແກ່ນທີ່ຈີນກັບຍີ່ປຸ່ນພັດທະນາໄມຕີຈິດມິດຕະພາບ. ທ່ານຫູຈີນທ່າວກ່າວວ່າ, ໃນຫຼາຍປີມານີ້ທ່ານໄດ້ຮູ້ຈັກໝູ່ເພື່ອນຍີ່ປຸ່ນຫຼາຍຄົນ, ໃນນັ້ນມີນັກການເມືອງ, ນັກທຸລະກິດແລະສາຂາອາຊີບອື່ນໆ. ການຄົບຄາສະມາຄົມເຫຼົ່ານີ້ກໍໄດ້ເຮັດໃຫ້ທ່ານເຂົ້າໃຈແລະຮູ້ຈັກປະຊາຊົນຍີ່ປຸ່ນດີກວ່າເກົ່າ. ທ່ານຫວັງວ່າຜ່ານການຢ້ຽມຢາມຍີ່ປຸ່ນເທື່ອນີ້, ສາມາດພົບປະກັບເພື່ອນເກົ່າແລະຮູ້ຈັກກັບເພື່ອນໃໝ່ຫຼາຍກວ່າເກົ່າ.
ໃນການຂະຫຍາຍການພົວພັນລະຫວ່າງຊາດຈະປະກົດມີບັນຫາຈຳນວນໜຶ່ງແມ່ນຫຼີກລ້ຽງບໍ່ໄດ້, ການພົວພັນລະຫວ່າງຈີນກັບຍີ່ປຸ່ນກໍເຊັນດຽວກັນ. ສຳລັບເລື່ອງນີ້, ທ່ານຫູຈີນທ່າວກ່າວເນັ້ນເປັນພິເສດວ່າ, ມີບາງຄວາມເຫັນແຕກຕ່າງກັນແມ່ນເລື່ອງປົກກະຕິ, ຂໍກະແຈແມ່ນວິທີຊຳລະແກ້ໄຂຂໍ້ຂັດແຍ່ງແລະບັນຫາຕ່າງໆ
"ສິ່ງສຳຄັນແມ່ນສອງຝ່າຍຄວນມີຄວາມຈິງໃຈຊື່ກົງ, ແລກປ່ຽນກັນຢ່າງໄມຕີຈິດສະແຫວງຫາອັນຄືກັນແຕ່ເຄົາລົບສິ່ງທີ່ຕ່າງກັນ, ຮ່ວມກັນຊຸກຍູ້ໃຫ້ປະຊາຊົນສອງຊາດມີມິດຕະພາບ, ຮັກສາພາກສ່ວນໃຫຍ່ທີ່ຂະຫຍາຍການພົວພັນລະຫວ່າງສອງປະເທດ.
ສຳລັບບັນຫາຮ່ວມກັນພັດທະນາບໍ່ນ້ຳມັນທີ່ປົນອາຍແກັສຢູ່ທະເລຈີນຕາເວັນອອກທີ່ຝ່າຍຍີ່ປຸ່ນເອົາໃຈໃສ່ທີ່ສຸດນັ້ນ, ທ່ານຫູຈີນທ່າວກ່າວເນັ້ນວ່າ, ຝ່າຍຈີນກໍເອົາໃຈໃສ່ນຳເລື່ອງດັ່ງກ່າວໃນລະດັບສູງ. ອີງຕາມຄວາມຮັບຮູ້ທີ່ເປັນເອກະສັນກັນທີ່ຜູ້ນຳສອງປະເທດບັນລຸນັ້ນ, ເຈົ້າໜ້າທີ່ການຕ່າງປະເທດຂອງສອງປະເທດໄດ້ດຳເນີນການປຶກສາຫາລືທີ່ມີຜົນປະໂຫຍດ, ແລະໄດ້ຮັບຄວາມຄືບໜ້າອັນຕັ້ງໜ້າ. ຈີນເຊື່ອວ່າໃຕ້ຄວາມພະຍາຍາມຮ່ວມກັນຂອງສອງຝ່າຍ, ຈະສາມາດຊອກຫາວິທີທີ່ສອງຝ່າຍເຫັນດີນຳແລະແກ້ໄຂໃຫ້ຕົກຢ່າງເໝາະສົມ.
ສຳລັບຜົນສຳເລັດຂອງການຢ້ຽມຢາມຍີ່ປຸ່ນເທື່ອນີ້, ທ່ານຫູຈີນທ່າວມີຄວາມເຊື່ອໝັ້ນຢ່າງເຕັມຢຽມ, ແລະເຊື່ອວ່າໃຕ້ຄວາມພະຍາຍາມຮ່ວມຂອງສອງຝ່າຍ, ການຢ້ຽມຢາມເທື່ອນີ້ຈະໄດ້ຮັບໝາກຜົນທີ່ຄາດໄວ້ຢ່າງແນ່ນອນ.
|
