ຕອນບ່າຍວັນທີ5ພຶດສະພານີ້, ທ່ານອູນຽນວິນ ລັດຖະມົນຕີວ່າການກະຊວງການຕ່າງປະເທດມຽນມາໄດ້ແຈ້ງຂ່າວໃຫ້ບັນດາທູຕານຸທູດຊາບວ່າ, ນັບມາຮອດປະຈຸບັນ, ພາຍຸແຮງເຂດຮ້ອນທີ່ພັດເຂົ້າມຽນມາໃນວັນທີ2ພຶດສະພານີ້ຢ່າງໜ້ອຍໄດ້ເຮັດໃຫ້1ໝື່ນ5ພັນຄົນເສຍຊີວິດ, ຄາດວ່າຈຳນວນຄົນເສຍຊີວິດຍັງອາດຈະເພີ່ມຂຶ້ນ.
ແຕ່ເດີມລົມພາຍຸເຂດຮ້ອຍທີ່ມີຊື່ວ່າ ນາກິສແມ່ນພັດໄປທາງບັງກາລາເດັດ, ແຕ່ໃນວັນທີ2ພຶດສະພານີ້ພາຍຸໄດ້ປ່ຽນທິດຢູ່ອ່າວບັງການຢ່າງກະທັນຫັນ, ແລະພັດໄປທາງມຽນມາໂດຍກົງ. ລົມພາຍຸເຂດຮ້ອນແກມຝົນຕົກໜັກໄດ້ຂຶ້ນບົກຢູ່ປາກແມ່ນ້ຳອີຣາວາດີອອກສູ່ທະເລທີ່ໄກຈາກນະຄອນຢາງກຸງໄປທາງທິດຕາເວັນຕົກສຽງໃຕ້220ກິໂລແມັດ, ແລ້ວສຸມໄປໃສ່ເຂດສາມຫຼ່ຽມລະຫວ່າງຢາງກຸງກັບແມ່ນ້ຳອີຣາວາດີ, ຄວາມໄວສູງສຸດຂອງລົມພາຍຸແມ່ນ190ຮອດ240ກິໂລແມັດຕໍ່ຊົ່ວໂມງ. ດຽວນີ້ພຽງແຕ່ຢູ່ແຂວງອີຣາວາດີແຂວງດຽວ, ກໍມີຜູ້ເສຍຊີວິດແລະບາດເຈັບຫຼາຍກວ່າ1ໝື່ນ1ພັນຄົນແລ້ວ.
ລົມພາຍຸເຂດຮ້ອນໄດ້ທຳລາຍສິ່ງກໍ່ສ້າງນັບເປັນໝື່ນຫຼັງ, ເຮັດໃຫ້ຊາວເມືອງຫຼາຍບໍ່ມີບ່ອນຢູ່, ພຽງແຕ່ຢູ່ເກາະໄຫກີແຂວງອີຣາວາອີແຫ່ງດຽວກໍ່ມີເກືອບ1ແສນຄົນບໍ່ມີບ່ອນເພິ່ງພາອາໄສ. ລົມພາຍຸຍັງພາໃຫ້ຂາດນ້ຳຂາດໄຟໄຟ້ ຫົນທາງເພພັງ ການສື່ສານຖືກຕັດຂາດ, ນ້ຳກິນກໍ່ຂາດຫຼາຍທີ່ສຸດ. ປະຈຸບັນ, ລັດຖະບານມຽນມາປະກາດໃຫ້ນະຄອນຢາງກຸງ ແຂວງອີຣາວາດີ ແຂວງເປກູ ກິ່ງແຂວງມົນແລະກິ່ງແຂວງຄາເຣັນເປັນເຂດປະສົບໄພ, ແລະປະກາດເຂົ້າສູ່ພາວະສຸກເສີນຢູ່ເຂດປະສົບໄພຢ່າງໜັກໜ່ວງ.
ປະຈຸບັນ, ມຽນມາໄດ້ສ້າງຕັ້ງຄະນະກຳມະການຕ້ານໄພແລະກູ້ໄພສູນກາງທີ່ມີນາຍົກລັດຖະມົນຕີເຕັນເຊັນເປັນຫົວໜ້າ, ແລະໄດ້ສົ່ງໜ່ວຍງານ10ໜ່ວຍລົງໄປສູ່ເຂດປະສົບໄພເພື່ອໃຫ້ການຊ່ອຍເຫຼືອ. ເຈົ້າໜ້າທີ່ກະຊວງຖະແຫຼງຂ່າວມຽນມາກໍ່ໄດ້ກ່າວວ່າ, ລັດຖະບານໄດ້ສົ່ງກອງທະຫານໄປເຂົ້າຮ່ວມກູ້ໄພແລະຟື້ນຟູຄືນໃໝ່. ສະພາກາແດງມຽນມາກໍໄດ້ເລີ່ມແຈກຢາຍເຄື່ອງໃຊ້ທີ່ຈຳເປັນໃຫ້ຜູ້ປະສົບໄພ.
ນະຄອນຢາງກູງທີ່ມີປະຊາກອນ5ລ້ານຄົນເຄີຍເປັນນະຄອນຫຼວງຂອງມຽນມາ,ປັດຈຸບັນແມ່ນສູນກາງເສດຖະກິດຂອງມຽນມາ,ເມືອງນີ້ປະສົບໄພອັນໜັກໜວງ.ສະໜາມບິນສາກົນທີ່ຖືກສັ່ງປິດໄດ້ເລີ່ມບໍລິການຕໍ່ຖ້ຽວບິນສາກົນແລະພາຍໃນປະເທດຄືນໃໝ່ໃນວັນທີ5 ພຶດສະພານີ້.ລະບຽບສັງຄົມຂອງຢາງກູງເປັນປົກກະຕິ,ຖະໜົມສາຍຫຼັກໄດ້ຮັບການອະນາໄມທຳຄວາມສະອາດ,ການສື່ສານຂອງບາງເຂດໄດ້ຟື້ນຟູ,ແຕ່ໄຟຟ້າແລະນ້ຳຍັງຂາດເຂີນຢູ່.ບໍລິສັດໄຟຟ້າແລະເຈົ້າໜ້າທີ່ເທສະບານພວມຍາດສ້ອມແປງສິ່ງກໍ່ສ້າງຕ່າງໆຢ່າງຂຸ້ນຂ້ຽວ.
ສະພາບປະສົບໄພຂອງມຽນມາໄດ້ພາໃຫ້ປະຊາຄົມໂລກໃຫ້ຄວາມເອົາໃຈໃສ່ໃນລະດັບສູງ .ວັນທີ5 ພຶດສະພານີ້,ທ່ານບັນກີມູນ ເລຂາທິການໃຫຍ່ສະຫະປະຊາຊາດກ່າວວ່າ,ສະຫະປະຊາຊາດຈະເຮັດໃຫ້ດີທີ່ສຸດເພື່ອຊ່ອຍເຫຼືອກູ້ໄພມຽນມາທີ່ປະສົບໄພລົມພາຍຸແຖບຮ້ອນ.ໂຄງການອາຫານໂລກໄດ້ຂົນສົ່ງສະບຽງອາຫານ500ໂຕນໄປໃຫ້ສູ່ເຂດປະສົບໄພໂດຍດ່ວນ.ນອກນີ້,ອົງການທີ່ກ່ຽວຂ້ອງຂອງສະຫະປະຊາຊາດພວມຈັດວາງແຜນການ,ເພື່ອຮຽກຮ້ອງການຊ່ອຍເທືອດ່ວນຈາກປະຊາຄົມໂລກ.
ວັນທີ4 ພຶດສະພານີ້,ທ່ານຢາງເຈຍຊີ ລັດຖະມົນຕີວ່າການກະຊວງການຕ່າງປະເທດຈີນໄດ້ໂທລະສັບໄປຫາທ່ານອູນຽນວິນ ລັດຖະມົນຕີວ່າການກະຊວງການຕ່າງປະເທດມຽນມາ,ເພື່ອຖາມຂ່າວຄາວເຫດປະສົບໄພລົມພາຍຸເທື່ອນີ້.
ວັນທີ5 ພຶດສະພານີ້,ຄະນະກຳມະການສະຫະພາບເອີລົບປະກາດວ່າໃຫ້ການຊ່ອຍເຫຼືອດ້ານມະນຸດສະທຳດ່ວນ2ລ້ານເອີໂລໃຫ້ມຽນມາ.
ສະຖານທູດອາເມລິກາປະຈຳຢາງກູງໄດ້ໃຫ້ການຊ່ອຍເຫຼືອດ່ວນໂດຍຜ່ານໂຄງການອາຫານໂລກ.ວັນທີ5 ພຶດສະພານີ້,ທ່ານສະກອັດ ໄມໂຄວ ສະແຕນເຊວ ໂຄສົກທຳນຽບຂາວກ່າວວ່າ,ອາເມລິາກພວມພິຈາລະນາໃຫ້ການຊ່ອຍເຫຼືອອື່ນໆ.ລັດຖະບານອິນເດຍສົ່ງສານສະແດງຄວາມຢື້ຢາມຖາມຂ່າວລັດຖະບານແລະປະຊາຊົນມຽນມາ,ແລະກ່າວວ່າຈະສະໜອງການຊ່ອຍເຫຼືອດ່ວນໃຫ້ປະຊາຊົນມຽນມາ.ກະຊວງການຕ່າງປະເທດໄທໄດ້ສຊ່ອຍເງິນ5ໝື່ນໂດລາ,ກອງທັບຂອງໄທກໍ່ໄດ້ຊ່ອຍອາຫານແຫ້ງແລະຢາປົວພະຍາດ,ແລະຈະສົ່ງຍົນທະຫານຂົນສົ່ງເຄື່ອງຊ່ອຍເຫຼືອ9ໂຕນໄປໃຫ້ມຽນມາໃນວັນທີ6 ພຶດສະພານີ້.
|