|
ຕາມຂ່າວCRI: ວັນທີ 6 ພຶດສະພານີ້, ທ່ານຫູຈີນທ່າວ ປະທານປະເທດຈີນທີ່ຫາກໍ່ໄປຮອດໂຕກຽວແລະເລີ່ມຢ້ຽມຢາມຍີ່ປຸ່ນທາງລັດຖະກິດນັ້ນໄດ້ພົບປະເພື່ອນມິດຍີ່ປຸ່ນຫຼາຍທ່ານ. ເຈົ້າພາບແລະແຂກເວົ້ານົວຫົວມ່ວນນຳກັນ, ມີບັນຍາກາດສະໜິດສະໜົມຫຼາຍ, ເລື່ອງໃນອະດີດ ປັດຈຸບັນແລະອະນາຄົດຂອງການຂະຫຍາຍການພົວພັນລະຫວ່າງຈີນກັບຍີ່ປຸ່ນ. ຕໍ່ໄປເຊີນຟັງບົດແຈ້ງຂ່າວທີ່ນັກຂ່າວCRIສົ່ງມາຈາກໂຕກຽວ.
ວັນທີ 6 ພຶດສະພານີ້ພາຍຫຼັງໄປຮອດໂຕກຽວແລ້ວບໍ່ດົນ, ທ່ານຫູຈີນທ່າວ ປະທານປະເທດຈີນທີ່ພວມດຳເນີນການຢ້ຽມຢາມຍີ່ປຸ່ນທາງລັດຖະກິດໃນລະດູບານໃໝ່ທີ່ອົບອຸ່ນກໍໄດ້ພົບປະກັບເພື່ອນເກົ່າແລະຄອບຄົວຂອງຜູ້ບຸກເບີກການພົວພັນລະຫວ່າງຈີນກັບຍີ່ປຸ່ນຈຳນວນໜຶ່ງ, ແລະເພື່ອນມິດຍີ່ປຸ່ນທີ່ພວມທຳຄວາມພະຍາຍາມຢ່າງບໍ່ລົດລະເພື່ອພາລະກິດມິດຕະພາບລະຫວ່າງຈີນຍີ່ປຸ່ນ.
ທ່ານຫູຈີນທ່າວໄດ້ຫວນຄືນນັກການເມືອງຍີ່ປຸ່ນລຸ້ນເກົ່າທີ່ປະກອບສ່ວນອັນພົ້ນເດັ່ນເຂົ້າໃນການຂະຫຍາຍການພົວພັນລະຫວ່າງຈີນຍີ່ປຸ່ນດ້ວຍຄວາມຮັກແພງອັນເລິກເຊິ່ງ, ໃນນັ້ນມີທ່ານທານາຄາ ຄາຄູເອ ອະດີດນາຍົກລັດຖະມົນຕີ ຍີ່ປຸ່ນຜູ້ເຮັດໃຫ້ການພົວພັນລະຫວ່າງຈີນກັບຍີ່ປຸ່ນເຂົ້າສູ່ສະພາບປົກກະຕິ; ທ່ານໂອຮິຣາ ມາຊາໂຢຊີ ອະດີດນາຍົກລັດຖະມົນຕີຍີ່ປຸ່ນທີ່ມີປະກອບສ່ວນສຳຄັນຕໍ່ການພົວພັນລະຫວ່າງຈີນກັບຍີ່ປຸ່ນຫັນເຂົ້າສູ່ສະພາບປົກກະຕິ, ແລະຕົກລົງສະໜອງເງິນກູ້ໃຫ້ຈີນ; ແລະທ່ານໂຊໂນຕາ ຮິໂຣຢຸກິ ອະດີດລັດຖະມົນຕີວ່າການກະຊວງການຕ່າງປະເທດຍີ່ປຸ່ນທີ່ຕາງໜ້າລັດຖະບານຍີ່ປຸ່ນເຊັນສົນທິສັນຍາສັນຕິພາບມິດຕະພາບກັບລັດຖະບານຈີນໃນ 30 ປີກ່ອນ.
ປັດຈຸບັນ, ນາງທານາຄາ ມາກິໂກ ລູກສາວຂອງທ່ານທານາຄາ ຄາຄູເອຍັງເຮັດວຽກໃນວົງການການເມືອງຍີ່ປຸ່ນ. ໃນຖານະເປັນນັກການເມືອງທີ່ລູກສາວສືບທອດວຽກງານຂອງພໍ່, ນາງທານາຄາ ມາກິໂກກ່າວວ່າ:"ໃນຖານະເປັນຄອບຄົວນັກການເມືອງ, ຄອບຄົວທັງໝົດຂອງຂ້າພະເຈົ້າລ້ວນແຕ່ເອົາໃຈໃສ່ນຳເລື່ອງຂອງຈີນໃນລະດັບສູງ. ໃນຕໍ່ໜ້າບໍ່ວ່າຈະເກີດເຫດການຫຍັງ, ບໍ່ວ່າໃນຖານະສ່ວນຕົວຫຼືເປັນນັກການເມືອງ, ຂ້າພະເຈົ້າລ້ວນແຕ່ຍິນດີນຳໃຊ້ສະຕິປັນຍາຂອງຕົນ, ສືບຕໍ່ທຳຄວາມພະຍາຍາມອັນຕັ້ງໜ້າເພື່ອຂະຫຍາຍການພົວພັນລະຫວ່າງສອງປະເທດ."
ນອກຈາກຜູ້ນຳລຸ້ນອາວຸໂສແລ້ວ, ການຂະຫຍາຍການພົວພັນລະຫວ່າງຈີນກັບຍີ່ປຸ່ນກໍແຍກອອກຈາກການຊຸກຍູ້ຂອງບຸກຄົນຝ່າຍພົນລະເຮືອນຜູ້ເຫັນກວ້າງມອງໄກບໍ່ໄດ້. ກ່ອນການພົວພັນລະຫວ່າງຈີນກັບຍີ່ປຸ່ນຫັນສູ່ປົກກະຕິນັ້ນ, ທ່ານໄຊໂອນຈີ ຄິນຄາຈູກໍໄດ້ດຳລົງຊີວິດຢູ່ຈີນ 12 ປີແລ້ວ, ທ່ານຖືກເອີ້ນວ່າ"ທູດປະຊາຊົນຍີ່ປຸ່ນປະຈຳຈີນ". ທ່ານຢູຊຸໂນມິຢາ ໂທໂຄມາເຄີຍຢ້ຽມຢາມຈີນເມື່ອປີ 1954, ແລະໄດ້ເຂົ້າພົບປະທານເໝົາເຈີຕຸ້ງ ທ່ານຫຼິວຊ້າວສີແລະທ່ານໂຈວເອີນຫຼາຍເປັນຕົ້ນ, ທ່ານໄດ້ເຮັດວຽກຢ່າງຫຼວງຫຼາຍເພື່ອເຊັນສັນຍາການຄ້າລະຫວ່າງຈີນຍີ່ປຸ່ນ.
ພາຍຫຼັງພົບປະກັບເພື່ອນມິດເຫຼົ່ານີ້, ທ່ານຫູຈີນທ່າວຮູ້ສຶກດີໃຈຫຼາຍ:" ທ່ານທັງຫຼາຍຢູ່ນີ້ໄດ້ເຮັດວຽກຫຼວງຫຼາຍເພື່ອມິດຕະພາບລະຫວ່າງຈີນຍີ່ປຸ່ນເປັນເວລາດົນນານມາແລ້ວ, ຂ້າພະເຈົ້າສະແດງຄວາມຂອບອົກຂອບໃຈນະທີ່ນີ້."
ປີ 1984, ຊາວໜຸ່ນຍີ່ປຸ່ນ 3000 ຄົນມາຢ້ຽມຢາມຈີນ, ໄດ້ກາຍເປັນກິດຈະກຳທີ່ບຸກເບີກໃນປະຫວັດການພົວພັນມິດຕະພາບລະຫວ່າງຈີນຍີ່ປຸ່ນ. ຕອນນັ້ນທ່ານຫູຈີນທ່າວຍັງແມ່ນເລຂາທິການຜູ້ທີໜຶ່ງຂອງສູນກາງຊາວໜຸ່ມຄອມມູນິດຈີນ, ໃນເວລາຫວນຄືນສະພາບໃນເວລານັ້ນ, ທ່ານຫູຈີນທ່າວຍັງຈື່ໄດ້ດີ. "ປີ 1984, ໃນເວລາຊາວໜຸ່ມຍີ່ປຸ່ນ 3000 ຄົນມາຢ້ຽມຢາມຈີນ, ພວກເຮົາໄດ້ຜູກມິດຕະພາບອັນເລິກເຊິ່ງ. ຮອດປັດຈຸບັນມີຊາວກວ່າປີແລ້ວ, ມິດຕະພາບຂອງພວກເຮົາບໍ່ໄດ້ຫຼຸດໜ້ອຍລົງຍ້ອນເວລາຜ່ານໄປ, ກົງກັນຂ້າມໄດ້ເລິກເຊິ່ງກວ່າເກົ່າແລ້ວ."
ໃນຕອນທ້າຍ, ທ່ານຫູຈີນທ່າວໄດ້ເວົ້າເຖິງພາບອະນາຄົດທີ່ງົດງາມກວ່າເກົ່າຕໍ່ການພົວພັນລະຫວ່າງຈີນກັບຍີ່ປຸ່ນ."ປັດຈຸບັນການພົວພັນລະຫວ່າງຈີນກັບຍີ່ປຸ່ນພວມຢູ່ຈຸດເລີ່ມຕົ້ນປະຫວັດສາດໃໝ່, ໄດ້ພົບກັບໂອກາດຂະຫຍາຍຕົວໃໝ່. ການຢ້ຽມຢາມຂອງຂ້າພະເຈົ້າເທື່ອນີ້ກໍ່ຈະທຳຄວາມພະຍາຍາມຮ່ວມກັນກັບຝ່າຍຍີ່ປຸ່ນ, ສ້າງສະພາບໃໝ່ຂອງການພົວພັນຍຸດທະສາດທີ່ໃຫ້ປະໂຫຍດແກ່ກັນລະຫວ່າງຈີນກັບຍີ່ປຸ່ນຢ່າງຮອບດ້ານ."
|
