|
ວັນທີ 8 ພຶດສະພານີ້ເວລາ 8 ໂມງ 18 ນາທີຕາມເວລາວຽງຈັນ, ສະມາຊິກທິມປີນພູຈີນໄດ້ຖືໄຟສັກສິດຂຶ້ນຈອມພູສູງສຸດໃນໂລກ---ຈອມພູຈູງມູລາງມາທີ່ສູງກວ່າລະດັບໜ້ານ້ຳທະເລ 8844ແມັດ43 ຊັງຕີແມັດ, ໄດ້ປະຕິບັດຕາມຄຳໝັ້ນສັນຍາທີ່ຈີນໃຫ້ຕໍ່ປະຊາຄົມໂລກຄື: ເຮັດໃຫ້ທວນໄຟງານກິລາໂອລິມປິກຈູດຢູ່ຈອມພູຈູງມູລາງມາເປັນຄັ້ງທຳອິດ. ທຸງ 5 ບ້ວງຂອງໂອລິມປິກສາກົນ ທຸງຊາດຈີນແລະທຸງງານກິລາໂອລິມປິກປັກກິ່ງໄດ້ປິວສະບັດຕາມສາຍລົມຢູ່ຈອມພູຈູງມູລາງມາ.
ເພື່ອຮັບປະກັນໃຫ້ການເຄື່ອນໄຫວເທື່ອນີ້ຈັດຂຶ້ນຢ່າງສຳເລັດຜົນ, ທິມປີນພູຈີນໄດ້ດຳເນີນການເຝິກຫັດອັນຫຍຸ້ງຍາກລຳບາກເປັນເວລາ 2 ປີ, ແລະໄດ້ເຝິກຊ້ອມຂຶ້ນຈອມພູໃນປີກາຍນີ້. ວັນທີ 28 ມີນາປີນີ້, ສະມາຊິກແລະຄູເຝິກທັງໝົດຂອງທິມປີນພູຈີນໄດ້ເຂົ້າປະຈຳຄ້າຍຈອມພູຈູງມູລາງມາ, ແລະໄດ້ສຳເລັດວຽກງານສ້າງແລະປັບປຸງຄ້າຍກ່ອນວັນທີ 22 ເມສາ.
ເສັ້ນທາງເອົາໄຟສັກສິດງານກິລາໂອລິມປິກຂຶ້ນຈອມພູທີ່ທິມປີນພູຈີນເລືອກແມ່ນເສັ້ນທາງພາກເໜືອຂຶ້ນຈອມພູ. ເສັ້ນທາງນີ້ມີບ່ອນທຸລະກັນດານຫຼາຍບ່ອນ, ໃນນັ້ນ"ພັກທີ 2 "ທີ່ສູງກວ່າລະດັບໜ້ານ້ຳທະເລ 8680 ແມັດຫາ 8720 ແມັດມີຊື່ສຽງຫຼາຍ. ທ່ານຢູຫຼຽງພູ ອະດີດເລຂາທິການໃຫຍ່ສະມາຄົມປີນພູຈີນກ່າວຕໍ່ນັກຂ່າວວ່າ, ທາງຕອນນີ້ສັ້ນພຽງ 40 ແມັດເທົ່ານັ້ນແຕ່ແມ່ນຜາຊັນໝົດ, ໃນ 5 ແມັດສຸດທ້າຍມີຊັນເກືອບ 90 ອົງສາ, ນີ້ແມ່ນການພິສູດຄວາມສາມາດຂະໜາດໃຫຍ່ຕໍ່ນັກກິລາປີນພູ.
ສິ່ງທີ່ໂຊກດີຫຼາຍແມ່ນນັກກິລາປີນພູເທື່ອນີ້ທຸກຄົນໄດ້ເຄີຍຜ່ານບ່ອນທະລະກັນດານທັງໝົດຢູ່ເສັ້ນທາງຂຶ້ນຈອມພູ, ໄດ້ຂຶ້ນຈອມພູຢ່າງສຳເລັດຜົນ. ສະມາຊິກທິມປີນກອງດະລຸມມອນ 12 ຄົນນີ້ມາຈາກເຜົ່າຕິເບດ, ເຜົ່າຮ້ານແລະເຜົ່າຖູ້, ໃນນັ້ນຍັງມີຜູ້ຍິງສອງຄົນ. ໃນເວລາທີ່ຄົນທັງຫຼາຍສະເຫຼີມສະຫຼອງຜົນສຳເລັດອັນຍິ່ງໃຫຍ່ຂອງສະມາຊິກກອງຕະລຸມມອນທີ່ເປັນວິລະຊົນເຫຼົ່ານີ້, ທ່ານຈ່ຽງຈື້ຈ່ຽນ ໂຄສົກສະມາຄົມປີນພູຈີນກ່າວວ່າ, ພວກເຮົາບໍ່ຄວນລື່ມທຸກຄົນທີ່ໄດ້ທຳຄວາມພະຍາຍາມຢ່າງບໍ່ລົດລະເພື່ອການຂຶ້ນຈອມພູເທື່ອນີ້:" ຜູ້ຂຶ້ນຮອດຈອມພູແມ່ນຄົນສ່ວນໜ້ອຍ, ຜູ້ຊູທວນໄຟງານກິລາໂອລິມປິກຢູ່ຈອມພູກໍແມ່ນຄົນສ່ວນໜ້ອຍ. ສະນັ້ນ, ໃນເວລາທີ່ພວກເຮົາສຸມສາຕາໃສ່ຄົນເຫຼົ່ານີ້, ກໍບໍ່ຄວນລື່ມນັກກິລາຄົນອື່ນໆທີ່ເຮັດວຽກຢ່າງຕັ້ງໜ້າເພື່ອໃຫ້ຜູ້ຂຶ້ນສູ່ຈອມພູເຫຼົ່ານີ້."
ພາຍຫຼັງໄຟສັກສິດງານກິລາໂອລິມປິກຂຶ້ນຮອດຈອມພູຈູງມູລາງມາຢ່າງສຳເລັດຜົນແລ້ວ, ເຊື້ອໄຟສັກສິດຈະສົ່ງໄປນະຄອນລາຊາແລະຮັກສາໄວ້ຢູ່ຫັ້ນ, ແລະຈະເຕົ້າໂຮມກັນກັບໄຟສັກກິດຕົ້ນຕໍທີ່ສົ່ງໄປຮອດນະຄອນລາຊາຫຼັງການສົ່ງຕໍ່ຢູ່ແຜນດິນໃຫຍ່ຈີນ.
|
