|
|
 |
| (GMT+08:00)
2008-05-11 17:22:58
|
 |
|
ການຢ້ຽມຢາມໃນລະດູບານໃໝ່ທີ່ອົບອຸ່ນເຮັດໃຫ້ມິດຕະພາບຈີນຍີ່ປຸ່ນອົບອຸ່ນຕະຫຼອດ
cri
Author: mo
ຕາມຂ່າວCRI: ໂດຍຕອບສະໜອງຕາມຄຳເຊີນຂອງລັດຖະບານຍີ່ປຸ່ນ, ທ່ານຫູຈີນທ່າວ ປະທານປະເທດຈີນໄດ້ໄປຢ້ຽມຢາມຍີ່ປຸ່ນທາງລັດຖະກິດແຕ່ວັນທີ 6 ຫາວັນທີ 10 ພຶດສະພານີ້. ໃນເວລາສິ້ນສຸດການຢ້ຽມຢາມ, ຂີ່ຍົນກັບຄືນປັກກິ່ງ, ທ່ານຢາງເຈສື ລັດຖະມົນຕີວ່າການກະຊວງການຕ່າງປະເທດຈີນທີ່ເປັນເພື່ອນຕິດຕາມທ່ານຫູຈິນທ່າວອອກໄປຢ້ຽມຢາມນັ້ນໄດ້ຕ້ອນຮັບການເຂົ້າສຳພາດຂອງນັກຂ່າວ.
ທ່ານຢາງເຈສືຊີ້ອອກວ່າ, ການຢ້ຽມຢາມຂອງທ່ານປະທານຫູຈິນທ່າວເທື່ອນີ້ມີເນື້ອໃນອຸດົມສົມບູນ, ຕິດແທດຕົວຈິງແລະມີປະສິດທິພາບສູງ, ໄດ້ຮັບໝາກຜົນອັນອຸດົມສົມບູນ, ແລະໄດ້ບັນລຸຈຸດໝາຍທີ່ຄາດໄວ້ລ່ວງໜ້າ.
ກ່ອນອື່ນ, ການຢ້ຽມຢາມເທື່ອນີ້ໄດ້ແຕ້ມຜັງວາດແຫ່ງການຂະຫຍາຍການພົວພັນຈີນຍີ່ປຸ່ນ, ໄດ້ຊີ້ແຈ້ງທິດທາງກ້າວເດີນ. ໃນໄລຍະຢ້ຽມຢາມ, ສອງຝ່າຍໄດ້ປະກາດ"ຖະແຫຼງການຮ່ວມຈີນຍີ່ປຸ່ນກ່ຽວກັບການຊຸກຍູ້ການພົວພັນຍຸດທະສາດທີ່ຕ່າງຝ່າຍຕ່າງມີຜົນປະໂຫຍດຢ່າງຮອບດ້ານ". ເອກະສານສະບັບນີ້ໄດ້ສືບທອດຫຼັກການຂອງເອກະສານການເມືອງ 3 ສະບັບທີ່ມີຢູ່ແລ້ວ, ອີງຕາມການຂະຫຍາຍຕົວໃໝ່ຂອງການພົວພັນຈີນຍີ່ປຸ່ນ, ໄດ້ກຳນົດຫຼັກການຊີ້ນຳການຂະຫຍາຍການພົວພັນສອງປະເທດທີ່ຍາວໄກ, ກາຍເປັນເອກະສານສຳຄັນດ້ານການເມືອງສະບັບທີ 4 ລະຫວ່າງຈີນຍີ່ປຸ່ນ. ນີ້ມີຄວາມໝາຍຕົວຈິງອັນໃຫຍ່ຫຼວງແລະມີຄວາມໝາຍປະຫວັດສາດອັນເລິກເຊິ່ງຍາວໄກຕໍ່ການປັບປຸງພື້ນຖານການເມືອງແຫ່ງການພົວພັນຈີນຍີ່ປຸ່ນ, ເພີ່ມຄວາມໄວ້ເນື້ອເຊື່ອໃຈດ້ານຍຸດທະສາດລະຫວ່າງຈີນຍີ່ປຸ່ນ, ລົງເລິກການພົວພັນຍຸດທະສາດທີ່ຕ່າງຝ່າຍຕ່າງມີຜົນປະໂຫຍດລະຫວ່າງຈີນຍີ່ປຸ່ນຢ່າງຮອບດ້ານ.
ຖັດມາ, ການຢ້ຽມຢາມເທື່ອນີ້ໄດ້ລົງເລິກການຮ່ວມມືທີ່ຕ່າງຝ່າຍຕ່າງມີຜົນປະໂຫຍດໃນຂົງເຂດເສດຖະກິດການຄ້າ, ແລະໄດ້ປັບປຸງພື້ນຖານວັດຖຸແຫ່ງການຂະຫຍາຍການພົວພັນຈີນຍີ່ປຸ່ນ. ທ່ານຫູຈິນທ່າວກ່າວເນັ້ນວ່າ, ຈີນຍີ່ປຸ່ນຕ່າງເປັນໜຶ່ງໃນຄູ່ຮ່ວມມືເສດຖະກິດການຄ້າທີ່ສຳຄັນກວ່າໝູ່, ສອງຝ່າຍຄວນເສີມຂະຫຍາຍທ່າແຮງທີ່ຄ້ຳຊູກັນດ້ານເສດຖະກິດຢ່າງເຕັມສ່ວນ, ເຮັດໃຫ້ເສດຖະກິດການຄ້າຈີນຍີ່ປຸ່ນກ້າວກະໂດດຈາກດ້ານປະລິມານຂຶ້ນເປັນດ້ານຄຸນນະພາບ. ທ່ານຫູຈີນທ່າວສະເໜີວ່າຕ້ອງເພີ່ມທະວີການຮ່ວມມືໃນຂົງເຂດປະຢັດພະລັງງານແລະອະນຸລັກສິ່ງແວດລ້ອມ, ຕັ້ງໜ້າເຂົ້າຮ່ວມຂະບວນການພັດທະນາພາກພື້ນຂອງຈີນ, ອອກແຮງຊຸກຍູ້ການຮ່ວມມືລະຫວ່າງວິສາຫະກິດຂອງສອງປະເທດ, ເພີ່ມທະວີການຮ່ວມມືໃນວຽກງານເສດຖະກິດຂອງພາກພື້ນແລະຂອງໂລກ.
ອັນທີສາມ, ໄດ້ເພີ່ມທະວີການແລກປ່ຽນວັດທະນະທຳເພີ່ມມິດຕະພາບລະຫວ່າງປະຊາຊົນສອງຊາດ, ສ້າງພື້ນຖານສັງຄົມຂອງການພົວພັນຈີນຍີ່ປຸ່ນໃຫ້ໝັ້ນຄົງ. ທ່ານຫູຈີນທ່າວຊີ້ອອກວ່າ, ເວົ້າເຖິງກົກເຖິງຮາກແລ້ວ, ມິດຕະພາບຈີນຍີ່ປຸ່ນກໍ່ແມ່ນມິດຕະພາບລະຫວ່າງປະຊາຊົນສອງຊາດ, ວິທີທີ່ບັງເກີດຜົນກວ່າໝູ່ແລະໄວ້ໃຈໄດ້ກວ່າໝູ່ໃນການເພີ່ມຄວາມເຂົ້າໃຈກັນແລະມິດຕະພາບລະຫວ່າງປະຊາຊົນສອງປະເທດ ກໍ່ແມ່ນເປີດກວ້າງການແລກປ່ຽນວັດທະນະທຳລະຫວ່າງສອງປະເທດ.
ໃນໄລຍະຢ້ຽມຢາມ, ທ່ານຫູຈີນທ່າວກ່າວເນັ້ນວ່າ, ງານກິລາໂອລິມປິກປັກກິ່ງເປັນຂອງປະຊາຊົນຈີນ, ເປັນຂອງປະຊາຊົນອາຊີ, ກໍເປັນຂອງປະຊາຊົນທົ່ວໂລກ. ຈີນຈະຈັດງານກິລາໂອລິມປິກປັກກິ່ງໃຫ້ເປັນງານກິລາໂອລິມປິກທີ່ມີລະດັບສູງແລະມີສີສັນພິເສດຄັ້ງໜຶ່ງ. ບຸກຄົນວົງການຕ່າງໆຂອງຍີ່ປຸ່ນພາກັນກ່າວວ່າ, ຄອງຄອຍງານກິລາໂອລິມປິກປັກກິ່ງຈັດຂຶ້ນ, ແລະອວຍພອນດ້ວຍຄວາມຈິງໃຈໃຫ້ງານກິລາໂອລິມປິກປັກກິ່ງຈົ່ງໄດ້ຮັບຜົນສຳເລັດຢ່າງເຕັມເມັດເຕັມໜ່ວຍ, ຍິນດີອອກແຮງສະໜອງການສະໜັບສະໜູນແລະການຮ່ວມມືໃຫ້ແກ່ງານກິລາໂອລິມປິກປັກກິ່ງ.
ສຸດທ້າຍ, ໄດ້ເປີດກວ້າງຄວາມຮັບຮູ້ທີ່ຄືກັນໃນວຽກງານພາກພພື້ນແລະສາກົນ, ແລະໄດ້ເພີ່ມທະວີການຮ່ວມມືກັນ. ທ່ານປະທານຫູຈີນທ່າວຊີ້ອອກວ່າ, ຄວາມຈະເລີນຂອງອາຊີຈະຕັດແຍກອອກຈາກການປະສານງານແລະການຮ່ວມມືລະຫວ່າງຈີນແລະຍີ່ປຸ່ນບໍ່ໄດ້. ສອງຝ່າຍຕົກລົງປະຕິບັດຕາມຫຼັກການທີ່ໄຂປະຕູ ໂປ່ງໄສ ແລະຕ່າງຝ່າຍຕ່າງຍອມຮັບກັນ, ຊຸກຍູ້ການຮ່ວມມືພາກພື້ນອາຊີຕາເວັນອອກ, ພ້ອມກັນຊຸກຍູ້ການສ້າງອາຊີທີ່ມີສັນຕິພາບ ຈະເລີນຮຸ່ງເຮືອງ ໝັ້ນທ່ຽງແລະໄຂປະຕູ. ນອກນັ້ນ, ສອງຝ່າຍຍັງເຫັນດີເພີ່ມທະວີການຮ່ວມມືທີ່ຮັບມືກັບການປ່ຽນແປງຂອງດິນຟ້າອາກາດແລະຮ່ວມມືໃນການຂົງເຂດອະນຸລັກສິ່ງແວດລ້ອມ, ແລະໄດ້ປະກາດຖະແຫຼງການຮ່ວມທີ່ຮັບມືກັບການປ່ຽນແປງຂອງດິນຟ້າອາກາດ.
ໃນຕອນມ້ວນທ້າຍຂອງການສຳພາດ, ທ່ານຢາງເຈສືກ່າວວ່າ, ການຢ້ຽມຢາມໃນລະດູບານໃໝ່ທີ່ອົບອຸ່ນຂອງທ່ານປະທານຫູຈີນທ່າວເທື່ອນີ້ໄດ້ສ້າງພາບໃໝ່ແຫ່ງການພົວພັນຍຸດທະສາດທີ່ຕ່າງຝ່າຍຕ່າງມີຜົນປະໂຫຍດລະຫວ່າງຈີນແລະຍີ່ປຸ່ນ, ໄດ້ຮັບໝາກຜົນທີ່ຈົບງາມ. ຄົນທັງຫຼາຍມີເຫດຜົນຄອງຄອຍວ່າ, ການພົວພັນຈີນຍີ່ປຸ່ນຈະອົບອຸ່ນຕະຫຼອດ.
|
|
|
