|
ວັນທີ 11 ພຶດສະພານີ້, ບໍລິສັດຈີນຍົນໂດຍສານຈຳກັດທີ່ຮັບຜິດຊອບການຄົ້ນຄວ້າຜະລິດຍົນໂດຍສານຂະໜາດໃຫຍ່ຂອງຈີນໄດ້ສ້າງຕັ້ງຂຶ້ນຢູ່ຊຽງໄຮ້ຢ່າງເປັນທາງການ, ນີ້ໝາຍຄວາມວ່າການຄົ້ນຄວ້າຜະລິດຍົນໂດຍສານຂະໜາດໃຫຍ່ຂອງຈີນໄດ້ເຂົ້າສູ່ໄລຍະປະຕິບັດຕົວຈິງ. ຕໍ່ໄປເຊິນຟັງແຈ້ງຂ່າວລະອຽດ:
ປີ 2007, ລັດຖະບານຈີນໄດ້ອະນຸມັດໂຄງການພິເສດສຳຄັນທີ່ຄົ້ນຄວ້າຜະລິດຍົນໂດຍສານຂະໜາດໃຫຍ່. ຍົນໂດຍສານຂະໜາດໃຫຍ່ທີ່ຈີນຈະຄົ້ນຄວ້າຜະລິດນັ້ນແມ່ນຍົນອາຍພົ່ນທີ່ສາມາດບັນທຸກຄົນໂດຍສານຫຼາຍກວ່າຮ້ອຍຄົນ. ມັນຈະເປັນຍົນສຳຄັນທີ່ບໍລິສັດການບິນນຳໃຊ້ຫຼາຍທີ່ສຸດ. ປັດຈຸບັນ, ໃນທົ່ວໂລກມີແຕ່ອາເມລິກາແລະໜ້ອຍປະເທດທີ່ສຸດທີ່ມີຄວາມສາມາດຜະລິດຍົນໂດຍສານຂະໜາດໃຫຍ່ໄດ້, ຍົນໂດຍສານຂະໜາດໃຫຍ່ທີ່ຊື້ຂາຍໃນຕະຫຼາດສາກົນມີແຕ່ຍົນໃບອີງຂອງອາເມລິກາແລະຍົນແອບັສຂອງເອີລົບ.
ໃນກອງປະຊຸມສ້າງຕັ້ງບໍລິສັດຈີນຍົນໂດຍສານຈຳກັດທີ່ຈັດຂຶ້ນໃນວັນທີ 11 ພຶດສະພານີ້, ທ່ານຈ່າງເຕີຈ່ຽງ ຮອງນາຍົກລັດຖະມົນຕີຈີນກ່າວວ່າ, ຈີນຈະເລັ່ງລັດຊຸກຍູ້ວຽກງານຄົ້ນຄວ້າຜະລິດຍົນໂດຍສານຂະໜາດໃຫຍ່, ຍ້ອນວ່າຈີນມີຄວາມຕ້ອງການຢ່າງຫຼວງຫຼາຍຕໍ່ການຂົນສົ່ງທາງອາກາດ, ພ້ອມກັນນັ້ນກໍຢາກໃຫ້ເປັນໂອກາດພັດທະນາຂະແໜງການທີ່ກ່ຽວຂ້ອງ. ທ່ານກ່າວວ່າ:
"ບໍລິສັດຈີນຍົນໂດຍສານຈຳກັດຕ້ອງຍຶດໝັ້ນການປະດິດສ້າງໃໝ່ດ້ວຍຕົນເອງ, ເລັ່ງລັດຈັດຕັ້ງການປະຕິບັດຄົ້ນຄວ້າເຕັກນິກທີ່ເປັນຂໍກະແຈ, ເພື່ອຮັບປະກັນຄວາມໄວຂອງການຄົ້ນຄວ້າຜະລິດຍົນໂດຍສານຂະໜາດໃຫຍ່. ພ້ອມກັນນັ້ນ, ໂດຍຜ່ານການນຳໃຊ້ເຕັກນິກໃໝ່, ອຸປະກອນໃໝ່ແລະຝີມືໃໝ່, ຮັບປະກັນໃຫ້ຍົນ ທີ່ຄົ້ນຄວ້າຜະລິດອອກນັ້ນສາມາດຕອບສະໜອງຄວາມຕ້ອງການດ້ານຄວາມ ປອດໄພ, ການໄວ້ໃຈໄດ້, ປະຢັດ, ສະດວກສະບາຍແລະອະນຸລັກສິ່ງແວດລ້ອມ."
ບໍລິສັດຈີນຍົນໂດຍສານຈຳກັດທີ່ສ້າງຕັ້ງຂຶ້ນໃໝ່ນັ້ນມີຕົ້ນທຶນຂຶ້ນທະບຽນ 19 ຕື້ຢວນຫຼືປະມານ 2 ຕື້ 700 ລ້ານໂດລາ. ທ່ານຈ່າງຊິງເວແມ່ນປະທານຄະນະບໍລິຫານຂອງບໍລິສັດດັ່ງກ່າວ. ກ່ອນໜ້ານີ້, ທ່ານໄດ້ເຂົ້າຮ່ວມການຈັດຕັ້ງໂຄງການການບິນອະວະກາດທີ່ບັນທຸກມະນຸດຄົນແລະໂຄງການສຳຫຼວດດວງຈັນຂອງຈີນ, ມີປະສົບປະການສູງໃນຂົງເຂດການບິນແລະການບິນອະວະກາດ. ທ່ານກ່າວວ່າ, ພາຍຫຼັງການຄົ້ນຄວ້າຜະລິດຍົນໂດຍສານຂະໜາດໃຫຍ່ສຳເລັດຜົນແລ້ວ, ບໍລິສັດຈີນຍົນໂດຍສານຈຳກັດຍັງຈະສຸມກຳລັງດ້ານຍົນໂດຍສານຂະໜາດໃຫຍ່ປະສົບຜົນສຳເລັດດີ, ເພື່ອເຮັດໃຫ້ບໍລິສັດດັ່ງກ່າວກາຍເປັນຜູ້ຜະລິດຍົນໂດຍສານທີ່ມີຄວາມສາດມາດແຂ່ງຂັນໃນສາກົນ.
ທ່ານຈິ່ງຈວ້າງຫຼົງ ຜູ້ຈັດການໃຫຍ່ຂອງບໍລິສັດຈີນຍົນໂດຍສານຈຳກັດກ່າວວ່າ, ໃຕ້ສະພາບການທີ່ເປີດປະຕູສູ່ພາຍນອກ, ຈີນຈະນຳໃຊ້ຊັບພະຍາກອນທົ່ວໂລກຢ່າງເຕັມທີ່ເພື່ອຄົ້ນຄວ້າຜະລິດຍົນໂດຍສານຂະໜາດໃຫຍ່, ແລະເຊີນຊວນິຂະແໜງດຽວກັນຂອງຕ່າງປະເທດເຂົ້າຮ່ວມການຮ່ວມມືຄົ້ນຄວ້າຜະລິດ.
"ພວກຂ້າພະເຈົ້າຕ້ອງພິຈາລະນາເຖິງການນຳໃຊ້ຊັບພະຍາກອນການບິນທີ່ປະເທດພວກຂ້າພະເຈົ້າມີຢູ່ໃນປັດຈຸບັນເພື່ອພັດທະນາໂຄງການຍົນໂດຍສານຂະໜາດໃຫຍ່, ຍັງຕ້ອງປະຕິບັດນະໂຍບາຍເປີດປະຕູສູ່ພາຍນອກ, ຕັ້ງໜ້າດຳເນີນການຮ່ວມມືສາກົນ. ຂ້າພະເຈົ້າເຊື່ອວ່າໃນດ້ານການຜະລິດອຸປະກອນແລະອາໄຫຼ່ຍົນ, ຈະມີພໍ່ຄ້າສະໜອງຕ່າງປະເທດເຂົ້າຮ່ວມຢ່າງຫຼວງຫຼາຍ. ໃນບັນຫາບຸກຄະລາກອນ, ພວກຂ້າພະເຈົ້າກໍເຊີນຊວນຜູ້ມີຄວາມຮູ້ຄວາມສາມາດມາເຂົ້າຮ່ວມກິດຈະການພັດທະນາການຄົ້ນຄວ້າຜະລິດຍົນໂດຍສານຂອງພວກຂ້າພະເຈົ້າ."
ວັນທີ 11 ພຶດສະພານີ້, ທ່ານເວີນເຈ່ຍປາວ ນາຍົກລັດຖະມົນຕີຈີນເຜີຍແຜ່ບົດຄວາມຂຽນວ່າ, ການຄົ້ນຄວ້າຜະລິດຍົນຂະໜາດໃຫຍ່ຈະຍົກລະດັບເຕັກນິກວິທະຍາສາດເຕັກນິກຂອງຈີນໃຫ້ສູງຂຶ້ນຢ່າງຮອບດ້ານແລະຫຼວງຫຼາຍ. ທ່ານສະເໜີວ່າ, ຈີນຄົ້ນຄວ້າຜະລິດຍົນຂະໜາດໃຫຍ່ຕ້ອງຍຶດໝັ້ນລັກສະນະຄວາມປອດໄພແລະລັກສະນະປະຢັດໄປຄຽງຄູ່ກັນ; ໃນເວລາຍຶດໝັ້ນການປະດິດສ້າງໃໝ່ດ້ວຍຕົນເອງ, ຮ່ຳຮຽນແລະນຳໃຊ້ເຕັກນິກທັນສະໄໝສາກົນ; ຍັງຈະປະເຊີນກັບຄວາມຕ້ອງການທີ່ມີຫຼາຍຮູບຫຼາຍແບບຂອງຕະຫຼາດຈີນແລະຕ່າງປະເທດ, ຕ້ອງສ້າງຂະແໜງການຍົນໂດຍສານຂະໜາດໃຫຍ່ທີ່ຄົບຖ້ວນແລະສ້າງລະບົບບໍລິການພາຍຫຼັງການຂາຍທີ່ມີມາດຕະຖານສູງ.
|
