|
ເວລາ14ໂມງ28ນາທີຂອງວັນທີ12ພຶດສະພານີ້ຕາມເວລາປັກກິ່ງ, ຢູ່ເມືອງເວິ້ນຊ່ວນແຂວງເຊສວນຈີນໄດ້ເກີດແຜ່ນດິນໄຫວວັດແຮງສັ່ນສະເທືອນໄດ້7,8ລິກເຕີ, ແຜ່ນດິນໄຫວເທື່ອນີ້ມີຄວາມຮຸນແຮງຫຼາຍ, ສົ່ງຜົນກະທົບເຖິງເນື້ອທີ່ກວ້າງຂວາງ, ຢູ່10ກວ່າແຂວງແລະກຳແພງນະຄອນຂອງທົ່ວປະເທດ. ນັບມາຮອດ7ໂມງຂອງວັນທີ13ພຶດສະພານີ້, ຍ້ອນແຜ່ນດິນໄຫວໄດ້ເຮັດໃຫ້8ແຂວງແລະກຳແພງນະຄອນເຊັ່ນ ແຂວງເຊສວນ ແຂວງກ່ານຊູ້ ແຂວງສານຊີ່ ນະຄອນຈຸງກິງແລະບ່ອນອື່ນໆມີ9219ຄົນເສຍຊີວິດ.
ສູນກາງແຜ່ນດິນໄຫວເທື່ອນີ້ຢູ່ເມືອງເວິ້ນຊ່ວນແຂວງເຊສວນຕັ້ງຢູ່ເສັ້ນຂະໜານເໜືອ31ອົງສາ, ເສັ້ນແວງຕາເວັນອອກ103,4ອົງສາ, ຫ່າງຈາກຄະຄອນເສີງຕູ່ ເທສະບານແຂວງເຊສວນ100ກວ່າກິໂລແມັດ, ມີປະຊາກອນ1ແສນ1ໝື່ນກວ່າຄົນ. ຫຼັງຈາກເກີດແຜ່ນດິນໄຫວແລ້ວ, ທ່ານຈ່າງຮົງເວິ້ຍ ໂຄສົກກົມແຜ່ນດິນໄຫວແຫ່ງຊາດຈີນໄດ້ແຈ້ງໃຫ້ສື່ມວນຊົນຊາບໂດຍດ່ວນ. ທ່ານກ່າວວ່າ,
ແຜ່ນດິນໄຫວເທື່ອນີ້ມີຄວາມແຮງສູງ, ສົ່ງຜົນກະທົບເຖິງບໍລິເວນກວ້າງຂວາງ, ເຂດນິງເຊ້ຍ ແຂວງກ່ານຊູ້ ແຂວງຊິ່ງໄຫ ແຂວງສ່ານຊີ່ ແຂວງສານຊີ ແຂວງຊ່ານຕົ່ງ ແຂວງເຮີນານ ແຂວງຫູເປ ແຂວງຫູນານ ນະຄອນຈຸງກິງ ແຂວງກຸ້ຍໂຈ່ວ ແຂວງຢຸນນານ ເຂດຕິເບດແລະແຂວງຈ່ຽງຊູ່ລ້ວນແຕ່ມີຄວາມຮູ້ສຶກເຖິງແຮງສັ່ນສະເທືອນຂອງແຜ່ນດິນໄຫວ.
ຫຼັງຈາກແຜ່ນດິນໄຫວເກີດຂຶ້ນແລ້ວ, ທ່ານຫູຈິນທ່າວ ປະທານປະເທດຈີນໄດ້ສັ່ງການໃນທັນທີ, ໃຫ້ຊ່ອຍເຫຼືອຜູ້ຖືກບາດເຈັບໂດຍໄວ, ພະຍາຍາມໃຫ້ຄູວາມເສຍຫາຍມີໜ້ອຍທີ່ສຸດ. ຄະນະລັດຖະບານຈີນຍັງໄດ້ຕັ້ງກອງບັນຊາການຕ້ານໄພແລະກູ້ໄພທີ່ມີທ່ານນາຍົກລັດຖະມົນຕີເວິ່ນເຈ່ຍປາວເປັນຜູ້ບັນຊາການໃຫຍ່. ປະຈຸບັນ, ທ່ານເວິ່ນເຈ່ຍປາວພວມຊີ້ນຳວຽກງານຕ້ານໄພແລະກູ້ໄພຢູ່ແຂວງເຊສວນ.
ປັດຈຸບັນ, ທະຫານ ແລະ ຕຳຫຼວດປະກອບອາວຸດທີ່ໄປຕ້ານໄພແຜ່ນດິນໄຫວນັ້ນມີເກືອບ1ໝື່ນ7ພັນຄົນ. ຍັງມີນາຍ ແລະ ພົນທະຫານອີກ3ໝື່ນ4ພັນຄົນພວມເຂົ້າໄປູເຂດປະສົບໄພໂດຍທາງເຮືອບິນ, ລົດໄຟ ຫຼື ຍ່າງ. ນັບມາຮອດ7ໂມງ ວັນທີ13ພຶດສະພານີ້,ໄດ້ຊ່ວຍເຫຼືອຜູ່ບາດເຈັບ1800ກວ່າຄົນແລ້ວ.
ຫຼັງຈາກຈີນເກີດແຜ່ນດິນໄຫວແລ້ວ, ລັດຖະບານ ແລະ ຜູ່ນຳຕ່າງປະເທດພ້ອມທັງຜູ່ຮັບຜິດຊອບອົງການຈັດຕັ້ງສາກົນຈຳນວນໜຶ່ງໄດ້ສະແດງຄວາມເຫັນໃຈຕໍ່ຈີນ. ທ່ານຈູມມະລີ ໄຊຍະສອນ ປະທານປະເທດລາວ ກັບ ທ່ານບົວສອນ ບຸບຜາວັນ ນາຍົກລັດຖະມົນຕີລາວໄດ້ສະແດງຄວາມເຫັນໃຈອັນເລິກເຊິ່ງຕໍ່ລັດຖະບານຈີນ ແລະ ປະຊາຊົນຈີນ, ແລະເຊື່ອວ່າ,ປະຊາຊົນຈີນຍ່ອມຈະຟື້ນຟູການຜະລິດ ແລະ ຊີວິດການເປັນຢູ່ເປັນປົກກະຕິໂດຍໄວ.
ວັນທີ12ພຶດສະພານີ້, ທ່ານບານກີມູນ ເລຂາທິການໃຫຍ່ສະຫະປະຊາຊາດກ່າວວ່າ, ທ່ານເຊື່ອວ່າ, ພາຍໃຕ້ການນຳພາອັນເຂັ້ມແຂງຂອງລັດຖະບານຈີນ ແລະ ຜູ່ນຳຈີນ, ປະຊາຊົນເຂດປະສົບໄພຍ່ອມຈະສາມາດຜ່ານຜ່າຄວາມຫຍຸ້ງຍາກ ແລະ ສ້າງສາບ້ານເກີດຄືນໃໝ່. ທ່ານຢາຊູໂອ ຟູຄູດາ ນາຍົກລັດຖະມົນຕີຍີ່ປຸ່ນໄດ້ສະແດງຄວາມຢື້ຢາມຖາມຂ່າວອັນຈິງໃຈ, ຫວັງວ່າ ຊີວິດການເປັນຢູ່ຂອງປະຊາຊົນປະສົບໄພສາມາດຟື້ນຟູຄວາມໝັ້ນຄົງ ແລະ ສ້າງສາບ້ານເກີດຄືນໃໝ່ໂດຍໄວ. ທ່ານຈັອດ ບຸສ ປະທານາທິບໍດີອາເມລິກາໄດ້,ສະແດງຄວາມໄວ້ອາໄລຕໍ່ຜູ່ປະສົບເຄາະຮ້າຍໃນໄພແຜ່ນດິນໄຫວ, ສະແດງຄວາມຢື້ຢາມຖາມຂ່າວຕໍ່ຍາດພີ່ນ້ອງຂອງຜູ່ເສຍຊີວິດ ແລະ ຜູ່ບາດເຈັບ ,ແລະກ່າວວ່າ,ອາເມລິກາກຽມຈະສະໜອງການຊ່ວຍເຫຼືອໃນທຸກເວລາ. ນອກນີ້,ສະຫະພາບເອີລົບ, ເຢັຍລະມັນ, ຝຣັ່ງ, ສະໂລເວນີ,ຣັດເຊຍ,ຣູມານີ, ປາກິສະຖານ,ສ.ເກົາຫຼີ,ຊັອກດານີ,ອີຕາລີ, ເບຼຊິນ,ໂປໂລຍ ແລະ ປະເທດອື່ນໆກໍ່ໄດ້ສະແດງຄວາມເຫັນໃຈຕໍ່ຈີນ.
ຂ່າວແຈ້ງວ່າ, ເວລາຍັງຢູ່ໃນຍົນທີ່ບິນໄປເຂດປະສົບໄພ, ທ່ານເວີ່ນເຈ່ຍປາວຮຽກຮ້ອງໃຫ້ອົງການປົກຄອງຕ່າງໆຖືການປ້ອງກັນຄວາມປອດໄພຊີວິດຂອງປະຊາຊົນເປັນອັນດັບໜຶ່ງ, ອອກແຮງສຸດຂີດເຮັດວຽກງານກອບກູ້ປິ່ນປົວປະຊາຊົນທີ່ຍັງຕິດຄ້າງຢູ່ແລະປະຊາຊົນບາດເຈັບໃຫ້ດີ. ເມື່ອຮອດນະຄອນຕູ່ຈ່ຽງອ້ຽນທີ່ເປັນເຂດປະສົບໄພແລ້ວ, ທ່ານເວີ່ນເຈ່ຍປາວໄດ້ຈັດກອງປະຊຸມດ່ວນຢູ່ກັບທີ່, ຮຽກຮ້ອງໃຫ້ນາຍແລະພົນທະຫານທີ່ເຂົ້າຮ່ວມການກູ້ໄພໃຫ້ພະຍາຍາມຜ່ານຜ່າອຸປະສັກທັງໝົດ, ເຖິງວ່າຈະຍ່າງກໍ່ຕ້ອງເຂົ້າໄປໃຫ້ເຖິງເຂດປະສົບໄພຮ້າຍແຮງກວ່າໝູ່ໂດຍໄວ. ທ່ານກ່າວວ່າ:
"ອັນທຳອິດຕ້ອງກອບກູ້ຄົນ, ຈຸດສຳຄັນກວ່າໝູ່ແມ່ນເຂດສູນກາງແຜ່ນດິນໄຫວ. ຕ້ອງເກັບກຳຈຳນວນຄົນເສຍຊີວິດແລະບາດເຈັບຢູ່ແຫ່ງຕ່າງໆໃນທົ່ວປະເທດໂດຍໄວ."
ພາຍຫຼັງຈັດກອງປະຊຸມດ່ວນ, ທ່ານເວີ່ນເຈ່ຍປາວໄດ້ໄປຢ້ຽມຢາມປະຊາຊົນທີ່ປະສົບໄພຢູ່ໂຮງໝໍຢາພື້ນເມືອງຈີນນະຄອນຕູ່ຈ່ຽງອ້ຽນແລະໂຮງຮຽນມັດທະຍົມຈູ້ຢວນທີ່ປະສົບໄພຮ້າຍແຮງກວ່າໝູ່, ຊອກຮູ້ສະພາບ. ອາຄານຂອງໂຮງໝໍຢາພື້ນເມືອງຈີນນະຄອນຕູ່ຈ່ຽງອ້ຽນພັງທະລາຍ, ຮ້ອຍກວ່າຄົນຖືກທັບຢູ່ໃຕ້ກອງດິນຈີ່, ທ່ານເວີ່ນເຈ່ຍປາວປິນຂຶ້ນກອງຫີນທີ່ສະຫຼັກຫັກພັງທັງຮ້ອງໃສ່ປະຊາຊົນທີ່ຕິດຄ້າງຢູ່ໃນວ່າ:
"ທຸ່ນທ່ຽງເດີ້, ທະຫານກຳລັງພະຍາຍາມຊ່ອຍເຫຼືອຢູ່."
ຕໍ່ມາ, ທ່ານເວີ່ນເຈ່ຍປາວໄດ້ໄປບ່ອນປະສົບໄພຢູ່ໂຮງຮຽນມັດທະຍົມຈູ້ຢວນ.
"ຍັງມີຄົນບໍ່ໜ້ອຍອາດຕະລອດຕາຍ, ຂໍແຕ່ວ່າມີຄວາມຫວັງໜ້ອຍໜຶ່ງພວກເຮົາກໍ່ຕ້ອງທຳຄວາມພະຍາຍາມສຸດຂີດ, ບໍ່ປ່ອຍປະເດັດຂາດ."
ຫຼັງຈາກແຜ່ນດິນໄຫວເກີດຂຶ້ນຢູ່ເມືອງເວິ້ນຊ່ວນແຂວງເຊສວນແລ້ວ, ພາກສ່ວນທີ່ກ່ຽວຂ້ອງຕ່າງໆຂອງຈີນລ້ວນແຕ່ລົງມືເຮັດວຽກກູ້ໄພຢ່າງຮີບດ່ວນ,ປະຈຸບັນ,ໄດ້ມີທະຫານຂອງກອງທັບປົດປ່ອຍປະ ຊາຊົນຈີນພ້ອມດ້ວຍນາຍແລະພົນທະຫານຂອງກອງຕຳຫຼວດປະກອບອາ ວຸດເກືອບ 2 ຫມື່ນຄົນໄດ້ໄປຮອດເຂດປະສົບໄພແລ້ວເພື່ອຊ່ອຍກູ້ໄພ,ນອກນີ້,ຍັງມີນາຍແລະພົນທະຫານອີກຫຼາຍຫມື່ນຄົນພວມເດີນທາງໄປເຖິງເຂດປະສົບໄພ,ກອງທະຫານຈີນກໍ່ໄດ້ລົງມືປະຕິບັດແຜນການຮັບມືກັບເຫດ ການສຸກເສີນໃນທັນທີ,ສົ່ງນາຍແລະພົນທະຫານໄປເຂດປະສົບໄພເວີ້ນ ຊ່ວນຢ່າງຮີບດ່ວນ.
ຫຼັງຈາກແຜ່ນດິນໄຫວເກີດຂຶ້ນແລ້ວ,ກົມແຜ່ນດິນໄຫວຈີນໄດ້ເລີ່ມ ປະຕິບັດແຜນການຂັ້ນຫນຶ່ງໃນທັນທີ,ແລະສົ່ງໜ່ວຍງານຮັບມືກັບເຫດການແຜ່ນດິນໄຫວຂອງລັດກອງທຳອິດແລະກອງກູ້ໄພສຸກເສີນຂອງລັດລວມທັງໝົດ 216 ຄົນ,ເດີນທາງໄປກູ້ໄພໃນມື້ດຽວກັນນັ້ນເລີຍ.
ທ່ານຈ່າງຮົງເວິ້ຍ ໂຄສົກຖະແຫຼງຂ່າວຂອງກົມແຜ່ນດິນໄຫວແຫ່ງຊາດຈີນກ່າວວ່າ:
"ພາຍຫຼັງເກີດແຜ່ນດິນໄຫວແລ້ວ, ກົມແຜ່ນດິນໄຫວແຫ່ງຊາດຈີນໄດ້ປະຕິບັດແຜນການສຸກເສີນຢ່າງວ່ອງໄວ. ນອກນັ້ນ, ກົມແຜ່ນດິນໄຫວຍັງສົ່ງກອງກູ້ໄພແຜ່ນດິນໄຫວທີ່ມີປະມານ 180 ຄົນໄປຊ່ອຍເຫຼືອ. ກ່ຽວກັບການວິເຄາະທ່າອ່ຽງຂອງສະພາບແຜ່ນດິນໄຫວຫຼັງເກີດເຫດ, ປັດຈຸບັນ, ກົມແຜ່ນດິນໄຫວແຫ່ງຊາດຈີນພວມຂຸ້ນຂ້ຽວປຶກສາກັນຢູ່."
ກອງກູ້ໄພສຸກເສີນຂອງກົມແຜ່ນດິນໄຫວແຫ່ງຊາດຈີນໄດ້ອອກເດີນທາງຈາກປັກກິ່ງ, ແລະໄປຮອດນະຄອນເສີງຕູ່ໃນຕອນຄ່ຳວັນທີ 12 ພຶດສະພາແລ້ວ, ກຽມປະຕິບັດໜ້າທີ່ຊອກຫາ ກອບກູ້ແລະປິ່ນປົວພະຍາດ. ກະຊວງສາທາລະນະສຸກກໍ່ໄດ້ສົ່ງໜ່ວຍແພດໝໍສຸກເສີນ 10 ກວ່າກອງໄປເຂດປະສົບໄພແຜ່ນດິນໄຫວແລ້ວ.
ຕອນເຊົ້າວັນທີ 13 ພຶດສະພານີ້, ທ່ານເວີ່ນເຈຍປາວ ນາຍົກລັດຖະມົນຕີຈີນກ່າວວ່າ, ແຜ່ນດິນໄຫວເທື່ອນີ້ແມ່ນໄພທຳມະຊາດທີ່ໃຫຍ່ພິລຶກ, ລັດຖະບານຈີນຈະພະຍາຍາມສຸດຂີດສົ່ງຄົນແລະວັດຖຸໄປຊ່ອຍເຫຼືອເຂດປະສົບໄພ. ຕໍ່ໄພແຜ່ນດິນໄຫວເທື່ອນີ້, ຄະນະກຳມະການຫຼຸດຜ່ອນໄພພິບັດແຫ່ງລັດຈີນໄດ້ມີປະຕິບັດແຜນການຮັບມືກູ້ໄພສຸກເສີນຂັ້ນໜຶ່ງ. ມື້ດຽວກັນ, ກະຊວງການເງິນຈີນປະກາດວ່າ, ການເງິນສູນກາງເປີກງົບປະມານສຸກເສີນ 860 ລ້ານຢວນ, ເພື່ອຊ່ອຍເຂດປະສົບໄພແຜ່ນດິນໄຫວດຳເນີນວຽກງານກູ້ໄພ. ໃນນັ້ນ, 700 ລ້ານຢວນແມ່ນໃຊ້ກູ້ໄພແຜ່ນດິນໄຫວທີ່ເບີກໃຫ້ແຂວງເຊສວນຢ່າງສຸກເສີນໃນຕອນຄ່ຳວັນທີ 12 ພຶດສະພານີ້, ເພື່ອໃຊ້ສຳລັບຝ່າຍຕ່າງໆກູ້ໄພແລະຈັດວາງຍົກຍ້າຍປະຊາຊົນຊົນທີ່ປະສົບໄພ. ອີກ 160 ລ້ານຢວນແມ່ນເງິນສຸກເສີນທີ່ເບີກໃຫ້ແຂວງກ່ານຊູ້ ແຂວງສ້ານຊີ່ ແຂວງຢຸນນານ ແລະກຳແພງນະຄອນຈຸ່ງກິ່ງເປັນຕົ້ນເພື່ອຊ່ອຍດ້ານຊີວິດການເປັນຢູ່ໃນເຂດປະສົບໄພ. ນອກນັ້ນ, ກະຊວງການປົກຄອງແລະປະຊາສົງເຄາະຈີນຍັງໄດ້ສົ່ງຕູບຜ້າເຕັ້ນ 25.000 ອັນໄປໃຫ້ໂດຍດ່ວນ, ສະພາກາແດງຈີນໄດ້ຈັດສົ່ງເຄື່ອງກູ້ໄພ 7 ແສນ 8 ໝື່ນກວ່າຢວນໃຫ້ເຂດປະສົບໄພຢ່າງສຸກເສີນແລ້ວ.
|
