|
ໂລກຕີລາຄາສູງຕໍ່ວຽກງານກູ້ໄພແຜ່ນດິນໄຫວຂອງຈີນ
cri
ວັນທີ 12 ພຶດສະພານີ້, ແຂວງເຊສວນຈີນໄດ້ເກີດໄພແຜ່ນດິນໄຫວຮ້າຍແຮງ, ປະຊາຄົມໂລກໃຫ້ຄວາມສົນໃຈຢ່າງກວ້າງຂວາງ.
ນາງອິລິຊາເບັສ ໂຄສົກຫ້ອງການປະສານງານມະນຸດສະທຳສະຫະປະຊາຊາດໄດ້ສະແດງຄວາມເຫັນໃຈຢ່າງເລິກເຊິ່ງຕໍ່ຈີນທີ່ໄດ້ປະສົບໄພຮ້າຍແຮງເຖິງຂັ້ນນີ້, ນາງເວົ້າວ່າ:
"ຂ້າພະເຈົ້າຄິດວ່າ, ລັດຖະບານຈີນໄດ້ທຳຄວາມພະຍາຍາມສຸດຂີດ, ສົ່ງເຄື່ອງໃຊ້ໃນຊີວິດປະຈຳວັນໃຫ້ຜູ້ປະສົບໄພທີ່ລອດຊີວິດ, ຂ້າພະເຈົ້າເຊື່ອວ່າ, ຄຽງຄູ່ກັບວຽກງານກູ້ໄພລົງເລິກໄປ, ຍັງຈະສາມາດກອບກູ້ຜູ້ລອດຊີວິດຫຼາຍກວ່າເກົ່າ."
ເມື່ອແຂວງເຊສວນເກີດແຜ່ນດິນໄຫວແລ້ວ, ລັດຖະບານຈີນໄດ້ມີການຮັບມືກັບເຫດການສຸກເສີນຢ່າງໄວທີ່ສຸດ, ແລະໃຊ້ຄຳຂວັນທີ່ວ່າ "ທຸກວິນາທີຄືຊີວິດ", ຈັດຕັ້ງກຳລັງສັງຄົມຕ່າງໆເຂົ້າຮ່ວມການກູ້ໄພ. ທ່ານເວີ່ນເຈ່ຍປາວ ນາຍົກລັດຖະມົນຕີຍັງໄດ້ໄປເຂດປະສົບໄພ, ນຳພາວຽກງານກູ້ໄພຢູ່ກັບທີ່, ພາບເຫຼົ່ານີ້ລ້ວນແຕ່ໄດ້ປະທັບໃຈຂອງທ່ານຊາວາໂນ ບຼິເຊໂນ ຫົວໜ້າກອງເລຂາຍຸດທະສາດຫຼຸດຜ່ອນໄພພິບັດສາກົນສະຫະປະຊາຊາດ, ທ່ານກ່າວວ່າ:
"ຂ້າພະເຈົ້າໄດ້ເຫັນຢູ່ໂທລະພາບວ່າ, ໃນເວລາບໍ່ຮອດ 4 ຊົ່ວໂມງຫຼັງເກີດໄພແຜ່ນດິນໄຫວ, ໜ່ວຍກູ້ໄພກໍ່ໄດ້ໄປຮອດເຂດປະສົບໄພ. ລັດຖະບານຈີນໄດ້ຈັດວາງການຮັບມືກັບໄພເທື່ອນີ້ເປັນຢ່າງດີ, ໄດ້ສ້າງພາບປະທັບໃຈໃຫ້ແກ່ຂ້າພະເຈົ້າຢ່າງເລິກເຊິ່ງ, ມີຄວາມສະດຸ້ງໄວຫຼາຍ."
ເຖິງວ່າທົ່ວປະເທດຈີນເປັນຈິດໜຶ່ງໃຈດຽວກັນ, ຕັ້ງໜ້າກູ້ໄພ, ແຕ່ຍ້ອນອາກາດຂີ້ຮ້າຍແລະສະພາບເສັ້ນທາງຕັດຂາດ, ວຽກງານກູ້ໄພຍັງປະເຊີນກັບຄວາມຫຍຸ້ງຍາກຫຼາຍ. ເມື່ອນັກຂ່າວຖາມນາງຟາເດລາ ຊາອິບໂຄສົກອົງການອະນາໄມໂລກວ່າ, ນາງມີຄວາມໝັ້ນໃຈຕໍ່ວຽກງານກູ້ໄພຂອງຈີນຫຼືບໍ່, ຄຳຕອບຂອງນາງຊັດແຈນທີ່ສຸດ. ນາງຕອບວ່າ:
"ແນ່ນອນມີຄວາມໝັ້ນໃຈ, ດຽວນີ້ຈີນເປັນປະເທດໃຫຍ່, ມີປະສົບການກູ້ໄພຢ່າງຫຼວງຫຼາຍ, ແລະມີຜູ້ຊ່ຽວຊານດ້ານນີ້ຫຼາຍ, ຂ້າພະເຈົ້າເຫັນວ່າ, ຈີນມີຄວາມສາມາດຮັບມືໄດ້."
ວັນທີ 13 ພຶດສະພານີ້, ສື່ມວນຊົນຂອງອາເມລິກາ, ຍີ່ປຸ່ນ,ອົສຕຼາລີ, ອັງກິດ, ນູແວັນເຊລັງ, ສວິສ, ມາເລເຊຍ, ເຢຍລະມັນແລະໄທກໍ່ໄດ້ລາຍງານຂ່າວ, ຂຽນບົດຄາມ,ສະແດງຄວາມເອົາໃຈໃສ່ຕໍ່ສະພາບການປະສົບໄພຂອງເມືອງເວີ້ນຊ່ວນແຂວງເຊສວນຈີນ, ແລະຕີລາຄາຢ່າງຕັ້ງໜ້າຕໍ່ວຽກງານກູ້ໄພຢູ່ເຂດປະສົບໄພຂອງລັດຖະບານຈີນ. ວັນທີ 14 ພຶດສະພານີ້,ສື່ມວນຊົນສິງກະໂປກໍ່ໄດ້ພິມບົດຄວາມ, ຍ້ອງຍໍວຽກງານກູ້ໄພຂອງລັດຖະບານຈີນ. ຫຼາຍປະເທດແລະອົງການສາກົນຍັງໄດ້ສະແດງຄວາມຍິນດີໃຫ້ການສະໜັບສະໜູນແລະການຊ່ອຍເຫຼືອແກ່ຈີນ.
ແຜ່ນດິນໄຫວທີ່ເກີດຂຶ້ນຢູ່ແຂວງເຊສວນເທື່ອນີ້ໄດ້ເຮັດໃຫ້ໝື່ນກວ່າຄົນເສຍຊີວິດ, ພາບຂອງເຂດປະສົບໄພຮ້າຍແຮງເຮັດໃຫ້ຄົນຕື່ນຕົກໃຈ, ຕໍ່ໄພທຳມະຊາດຮ້າຍແຮງຂະໜາດນີ້, ມີວິທີປ້ອງກັນລ່ວງໜ້າຫຼືບໍ່? ໃນຖານະເປັນຜູ້ຮັບຜິດຊອບອົງການຮັບຜິດຊອບການຫຼຸດຜ່ອນໄພພິບັດສະຫະປະຊາຊາດ, ທ່ານບຼິເຊໂນກ່າວວ່າ:
"ເຕືອນໄພແຜ່ນດິນໄຫວຍາກຫຼາຍ, ປະຈຸບັນກໍ່ມີແຕ່ສາມາດວັດແທກກ່ອນແຜ່ນດິນໄຫວພຽງບໍ່ພໍເທົ່າໃດນາທີເທົ່ານັ້ນ, ແລະເວລາສັ້ນໆນີ້ເກືອບບໍ່ມີບົດບາດຫຍັງຕໍ່ການປ້ອງກັນໄພລ່ວງໜ້າ."
ທ່ານກ່າວວ່າ, ປະຈຸບັນ, ມະນຸດຍັງວັດແທກແຜ່ນດິນໄຫວຄັກແນ່ບໍ່ໄດ້, ມີແຕ່ເພີ່ມປະສິດທິພາບການປ້ອງກັນໄພແຜ່ນດິນໄຫວຂອງສິ່ງກໍ່ສ້າງໄດ້ເທົ່ານັ້ນ.
|
|
