|
ຕາມຂ່າວCRI:ພາຍຫຼັງແຂວງເສສວນຈີນເກີດແຜ່ນດິນໄຫວແລ້ວ,ວັນທີ 14 ພຶດສະພານີ້,ປະຊາຄົມໂລກສືບຕໍ່ໃຫ້ການຊ່ວຍເຫຼືອດ້ານເງິນແລະເຄື່ອງຊ່ວຍເຫຼືອໃຫ້ແກ່ການກູ້ໄພຂອງຈີນ,ສະແດງຄວາມເຫັນໃຈແລະການສະໜັບສະໜູນຕໍ່ລັດຖະບານແລະປະຊາຊົນຈີນດ້ວຍຮູບການຕ່າງໆ.
ປະຈຸບັນ,ອາຣາບີຊາອຸດິດໄດ້ບໍລິຈາກເງິນ 50 ລ້ານໂດລາແລະເຄື່ອງຊ່ວຍເຫຼືອມູນຄ່າ 10 ລ້ານໂດລາໃຫ້ແກ່ຈີນ;ລັດຖະບານອາເມລິກາໄດ້ໃຫ້ຄວາມຊ່ວຍເຫຼືອ 5 ແສນໂດລາ;ຍົນຂົນສົ່ງອິນ-76 ສອງລຳຂອງຣັດເຊຍທີ່ບັນທຸກເຄື່ອງຊ່ວຍເຫຼືອດ້ານມະນຸດສະທຳໄດ້ບິນໄປຮອດນະຄອນເຊິງຕູ່;ລັດຖະບານອັງກິດກ່າວວ່າ,ຈະໃຫ້ເຄື່ອງຊ່ວຍເຫຼືອມູນຄ່າ 1 ລ້ານປອນໃຫ້ແກ່ເຂດປະສົບໄພ;ລັດຖະບານຝະຣັ່ງກຽມສົ່ງຍົນຂົນສົ່ງຂະໜາດໃຫຍ່ລຳໜຶ່ງທີ່ບັນທຸກເຄື່ອງຊ່ວຍເຫຼືອມູນຄ່າ 2 ແສນ 5 ໝື່ນເອີໂຣໄປຈີນໃນວັນທີ 16 ພຶດສະພານີ້;ບຸກຄົນວົງການຕ່າງໆຂອງຍີ່ປຸ່ນກໍ່ໄດ້ໃຫ້ການບໍລິຈາກແກ່ເຂດປະສົບໄພຂອງຈີນຢ່າງຫ້າວຫັນ.ລັດຖະບານຂອງແບນຊິກ ອີຕາລີ ແມັກຊິກ ສ.ເກົາຫຼີ ປາກີສະຖານແລະອິນເດຍເປັນຕົ້ນພ້ອມດ້ວຍອົງການຈັດຕັ້ງສາກົນເຊັ່ນກອງທຶນສະຫະປະຊາຊາດເພື່ອເດັກນ້ອຍເປັນຕົ້ນກໍ່ໄດ້ໃຫ້ຄວາມຊ່ວຍເຫຼືອແກ່ຈີນ.
ນອກນີ້,ວັນທີ 14 ພຶດສະພານີ້,ສື່ມວນຊົນສ.ເກົາຫຼີແລະສິ່ງກະໂປຕ່າງໄດ້ພິມບົດຄວາມ,ຍ້ອງຍໍວຽກງານກູ້ໄພທີ່ມີປະສິດທິພາບຂອງລັດຖະບານຈີນ.
ນອກນີ້,ຂ່າວແຈ້ງວ່າ,ຜູ້ນຳຂອງກາຊັກສະຖານ ຊອັກຊີ ອູແກຼນ ອີຣານແລະຕວກກີເປັນຕົ້ນສືບຕໍ່ສົ່ງໂທລະເລກມາຍັງທ່ານຫູຈີນທ່າວ ປະທານປະເທດຈີນແລະທ່ານເວີ່ນເຈຍປາວ ນາຍົກລັດຖະມົນຕີຈີນຫຼືໃຊ້ຮູບການອື່ນໆສະແດງຄວາມເຫັນໃຈຕໍ່ໄພແຜ່ນດິນໄຫວຢູ່ແຂວງເສສວນ,ສະໜັບສະໜູນລັດຖະບານແລະປະຊາຊົນຈີນທີ່ພວມພະຍາຍາມກູ້ໄພ.
|
