|
ທີ່ນີ້ວິທະຍຸສາກົນແຫ່ງປະເທດຈີນ, ທ່ານຜູ້ຟັງທີ່ເຄົາລົບ, ເຖິງວ່າເສັ້ນທາງໄປເມືອງເວິ້ນຊ່ວນເຊິ່ງເປັນຈຸດສູນກາງແຜ່ນດິນໄຫວຍັງແລ່ນລົດບໍ່ໄດ້, ແຕ່ມີທະຫານແລະຕຳຫຼວດປະກອບອາວຸດຈີນຫຼາຍພັນຄົນໄດ້ບຸກເຂົ້າເມືອງເວິ້ນຊ່ວນດ້ວຍວິທີໂຕນຈ້ອງ, ໄປທາງນ້ຳແລະຍ່າງເພື່ອໄປກູ້ໄພ. ຕໍ່ໄປເຊີນຟັງລາຍງານລະອຽດຂອງນັກຂ່າວCRI:
ພາຍຫຼັງເກີດໄພແຜ່ນດິນໄຫວໃນວັນຈັນຜ່ານມານີ້(ວັນທີ 12 ພຶດສະພານີ້), ໄຟຟ້າແລະການສື່ສານຂອງເມືອງເວິ້ນຊ່ວນຖືກຕັດຂາດ, ບໍ່ສາມາດຕິດຕໍ່ກັບພາຍນອກໄດ້, ບໍ່ຮູ້ຊຸຕາກຳຂອງປະຊາຊົນ 1 ແສນກວ່າຄົນເລີຍ. ໃນຂະນະດຽວກັນນັ້ນ, ພູເຈື່ອນຍ້ອນແຜ່ນດິນໄຫວຍັງໄດ້ຕັນທາງຈາກພາຍນອກເຂົ້າຫາເມືອງເວິ້ນຊ່ວນ, ຍິ່ງກວ່ານັ້ນ, ສະພາບອາກາດທີ່ຂີ້ຮ້າຍແລະແຮງສັ່ນສຸເທືອນຕາມມາກໍເກີດຂຶ້ນເລື້ອຍໆ, ເຮັດໃຫ້ໜ່ວຍກູ້ໄພບໍ່ສາມາດເຂົ້າເຖິງເມືອງເວິ້ນຊ່ວນໄດ້. ໃນສະພາບແບບນີ້, ລັດຖະບານຈີນຮຽກຮ້ອງໃຫ້ກອງທັບເຂົ້າກູ້ໄພຢູ່ເມືອງເວິ້ນຊ່ວນໂດຍບໍ່ສົນໃຈວ່າຈະສູນເສຍຫຍັງອີກ.
ນັບແຕ່ທະຫານໜ່ວຍທຳອິດຍ່າງເຂົ້າເຂດຍິ້ງຊ້ຽວຂອງເມືອງເວິ້ນຊ່ວນໃນຕອນກາງຄືນຂອງວັນອັງຄານຜ່ານມານີ້, ກອງທະຫານກູ້ໄພຈີນໄດ້ບຸກເຂົ້າເຖິງເມືອງເວິ້ນຊ່ວນນັບມື້ນັບຫຼາຍຂຶ້ນ. ທ່ານຫວາງຍີ້ ຫົວໜ້າເສນາທິການຂອງກອງຕຳຫຼວດປະກອບອາວຸດໄດ້ນຳພາກຳລັງພົນ 200 ຄົນຍ່າງ 90 ກິໂລແມັດ, ໃຊ້ເວລາ 20 ກວ່າຊົ່ວໂມງແລະເຂົ້າເຖິງເມືອງເວິ້ນຊ່ວນໃນຕອນການຄືນວັນອັງຄານຜ່ານມານີ້ແລ້ວກໍ່ດຳເນີນການກອບກູ້ໃນທັນທີໂລດ. ທ່ານກ່າວວ່າ, ຢູ່ທີ່ນັ້ນປະສົບໄພຢ່າງຮ້າຍແຮງ.
"ເມື່ອສັງເກດເບິ່ງສະພາບປະຈຸບັນແລ້ວ,ຢູ່ໃນເຂດເມືອງມີຜູ່ບາດເຈັບ3ພັນກວ່າຄົນ.ເຮືອນຢູ່ໃນເມືອງລົ້ມຫັກເພພັງ1ສ່ວນ3,ສ່ວນທີ່ເຫຼືອນັ້ນຖືກທຳລາຍຢ່າງໜັກໜ່ວງ,ພັກອາໄສບໍ່ໄດ້.ບ້ານຕ່າງໆຢູ່ເທີງພູໃກ້ໆລົ້ມເພພັງໝົດ,ຍ້ອນເສັ້ນທາງຂາດສະບັ້ນ,ຈຳນວນຄົນຫາຍສາບສູນແລະບາດເຈັບກໍ່ຍັງເກັບກຳບໍ່ໄດ້ຄົບຖ້ວນເທື່ອ."
ຢູ່ເຂດອີ້ງຊີ້ວເມືອງເວີ້ນຊ່ວນ,ສະພາບກໍ່ບໍ່ເປັນໜ້າໄວ້ວາງໃຈເທື່ອ.ຢູ່ແຫ່ງນັ້ນມີປະຊາກອນ1ໝື່ນກວ່າຄົນ,ປະຈຸບັນ ຜູ່ລອດຊີວິດມີພຽງ2300ຄົນ,ໃນນັ້ນມີ1000ກວ່າຄົນບາດເຈັບສາຫັດ.
ວັນທີ14ພຶດສະພານີ້,ກອງທະຫານໄດ້ຢ່ອນລະບົບສື່ສານຜ່ານດາວທຽມ ຢາປິ່ນປົວແລະຜ້າຫົ່ມທາງອາກາດໃຫ້ເຂດປະສົບໄພໜັກຄືໃຈກາງເມືອງເວີ້ນຊ່ວນແລະເຂດອີ້ງຊີ້ວເປັນຕົ້ນ,ຍົນເຮຣີກົບແຕທະຫານຍັງສົ່ງເຄື່ອງຊ່ວຍເຫຼືອແລະຜູ່ກູ້ໄພໄປຮອດເມືອງເວີ້ນຊ່ວນ,ແລ້ວນຳສົ່ງຜູ່ບາດເຈັບຫຼາຍສິບຄົນຈາກເມືອງເວີ້ນຊ່ວນໄປປິ່ນປົວຢູ່ເທດສະບານເສີງຕູ່.ໜ່ວຍສື່ສານໜ່ວຍໜຶ່ງຂີ່ຍົນເຮຣີກົບແຕໄປຮອດເມືອງເວີ້ນຊ່ວນ,ສ້າງສູນສື່ສານຢູ່ທີ່ນັ້ນ,ອັນໄດ້ເຮັດໃຫ້ການຕິດຕໍ່ສື່ສານດີຂຶ້ນ.ກອງທະຫານຍັງກຽມຢ່ອນມືຖືໃຫ້ເມືອງເວີ້ນຊ່ວນ,ສ້າງສະຖານີມືຖືຂະໜາດນ້ອຍຢູ່ທ້ອງຖິ່ນ,ເພື່ອໃຫ້ເມືອງເວີ້ນຊ່ວນຕິດຕໍ່ກັບພາຍນອກໄດ້ສະດວກ.ນອກນັ້ນ,ໜ່ວຍແພດ30ຄົນໄດ້ໄປຮອດເມືອງເວີ້ນຊ່ວນ,ເພື່ອເລີ່ມກອບກູ້ແລະປິ່ນປົວຜູ່ບາດເຈັບ.
ຕອນບ່າຍວັນພຸດຜ່ານມານີ້(ວັນທີ 14 ພຶດສະພານີ້),ທ່ານເວີ່ນເຈຍປາວ ນາຍົກລັດຖະມົນຕີຈີນໄດ້ຂີ່ຍົນເຮຣິກົບແຕໄປຮອດເມືອງເວິ້ນຊ່ວນເພື່ອສຳຫຼວດສະພາບປະສົບໄພ.ທ່ານບອກປະຊາຊົນທ້ອງຖິ່ນວ່າ,ກອງຊ່ວຍເຫຼືອຈະໃຊ້ທຸກວິທີເພື່ອກູ້ໄພແລະປິ່ນປົວຄົນບາດເຈັບໂດຍໄວເທົ່າທີ່ຈະໄວໄດ້.ທ່ານກ່າວວ່າ:
"ລັດຖະບານບໍ່ເຄີຍລືມບ່ອນນີ້,ແນ່ນອນການກອບກູ້ປະຊາຊົນທີ່ບາດເຈັບຍ້ອນແຜ່ນດິນໄຫວແມ່ນວຽກບຸລິມະສິດ."
ຕອນຄ່ຳວັນພຸດຜ່ານມານີ້,ຢູ່ເທິງລົດໄຟຈາກນະຄອນເຊິງຕູ່ໄປຫາເຂດປະສົບໄພກວງຢວນ,ທ່ານເວີ່ນເຈຍປາວໄດ້ລວມປະຊຸມກອງບັນຊາການກູ້ໄພແຜ່ນດິນໄຫວ,ທ່ານເນັ້ນວ່າ,ການກອບກູ້ຄົນຍັງແມ່ນວຽກງານບຸລິມະສິດໃນການກູ້ໄພໃນປະຈຸບັນນີ້,ຕົກລົງເພີ່ມຍົນເຮຣິກົບແຕອີກ 90 ລຳໄປຊ່ວຍເຂດປະສົບໄພ.
ມາຮອດຕອນບ່າຍວັນພຸດຜ່ານມານີ້,ທ້ອງຟ້າຄ່ອຍໆແຈ້ງຂຶ້ນ,ເຮັດໃຫ້ການກູ້ໄພອາດຈະໄວຂຶ້ນຕື່ມອີກ.ປະຈຸບັນ,ຝ່າຍຕ່າງໆພວມຊອກຫາທຸກວິທີສ້ອມແປງເສັ້ນທາງໂດຍດ່ວນ,ເພື່ອເຮັດໃຫ້ກອງຊ່ວຍເຫຼືອຫຼາຍກວ່າເກົ່າເຂົ້າໄປຊອກຫາແລະກອບກູ້ຊີວິດປະຊາຊົນທີ່ປະສົບໄພຢູ່ເມືອງເວິ້ນຊ່ວນໂດຍໄວເທົ່າທີ່ຈະໄວໄດ້.
|
