|
ພາຍຫຼັງເມືອງເວິ້ນຊ່ວນແຂວງເສສວນຈີນໄດ້ເກີດແຜ່ນດິນໄຫວຄວາມແຮງ 7,8 ຣິກເຕີແລ້ວ,ຈີນໄດ້ດຳເນີນການກູ້ໄພຢ່າງຂະໜາດໃຫຍ່ແລະວ່ອງໄວແບບບໍ່ເຄີຍມີມາກ່ອນຢູ່ເຂດປະສົບໄພ.ການສະແດງອອກຂອງລັດຖະບານຈີນໃນການຮັບມືກັບໄພແຜ່ນດິນໄຫວ,ໄດ້ຮັບການສະໜັບສະໜູນຈາກປະຊາຊົນພາຍໃນປະເທດ,ໄດ້ເຊີດຊູກຳລັງໃຈຄົນແລະເຮັດໃຫ້ປະຊາຊົນມີຄວາມໝັ້ນໃຈ,ພ້ອມກັນນັ້ນ,ກໍ່ໄດ້ຮັບຄວາມຍ້ອງຍໍໂດຍທົ່ວໄປຈາກປະຊາຄົມໂລກ.
ກ່ອນອື່ນ,ການກູ້ໄພແຜ່ນດິນໄຫວເທື່ອນີ້ໄດ້ສະແດງໃຫ້ເຫັນຄວາມສະດຸ້ງໄວຂອງຈີນຢ່າງພົ້ນເດັ່ນ.ພາຍຫຼັງເກີດແຜ່ນດິນໄຫວແລ້ວ,ທ່ານຫູຈີນທ່າວ ປະທານປະເທດຈີນໄດ້ສັ່ງໃຫ້ກູ້ໄພໃນທັນທີ,ທ່ານເວີ່ນເຈຍປາວ ນາຍົກລັດຖະມົນຕີຈີນໄດ້ເດີນທາງໄປເຂດປະສົບໄພພາຍໃນ 1 ຊົ່ວໂມງເຄິ່ງ.ຕໍ່ເລື່ອງນີ້,ທ່ານຊານວາໂນ ບຼີເຊໂນ ຫົວໜ້າກອງເລຂາຍຸດທະຍາດຫຼຸດຜ່ອນໄພພິບັດສາກົນທີ່ຂຶ້ນກັບສະຫະປະຊາຊາດກ່າວວ່າ:
"ຄວາມສະດຸ້ງໄວຕໍ່ໄພທຳມະຊາດຂອງລັດຖະບານຈີນເຮັດໄດ້ຢ່າງບໍ່ໜ້າເຊື່ອເລີຍ！ຂ້າພະເຈົ້າໄດ້ເຫັນໃນໂທລະພາບວ່າ,ພາຍຫຼັງເກີດແຜ່ນດິນໄຫວບໍ່ຮອດ 4 ຊົ່ວໂມງ,ໜ່ວຍກູ້ໄພກໍ່ໄດ້ໄປຮອດເຂດປະສົບໄພແລ້ວ.ລັດຖະບານຈີນໄດ້ຮັບມືກັບໄພທຳມະຊາດໄດ້ດີອີ່ຫຼີ,ໄດ້ສ້າງພາບປະທັບໃຈຢ່າງເລິກເຊິ່ງໃຫ້ຂ້າພະເຈົ້າ,ຈີນເຮັດວຽກໄດ້ໄວແທ້ໆ！"
ການກູ້ໄພແຜ່ນດິນໄຫວເທື່ອນີ້ຍັງໄດ້ສະແດງໃຫ້ເຫັນຄວາມສາມາດອັນແຂງແຮງໃນການປະສານງານຂອງຈີນ. ພາຍຫຼັງໄພແຜ່ນດິນໄຫວເກີດຂຶ້ນ, ພາກສ່ວນຕ່າງໆຂອງລະບົບຕ້ານໄພຂອງຈີນໄດ້ຊ່ອຍກັນກູ້ໄພຢ່າງວ່ອງໄວ, ກຳລັງຄົນແລະວັດຖຸກູ້ໄພຢ່າງຫຼວງຫຼາຍສົ່ງເຂົ້າເຂດປະສົບໄພຢ່າງວ່ອງໄວ. ພ້ອມກັນນັ້ນ, ພົນລະເມືອງຈີນກໍໄດ້ຈັດການບໍລິຈາກຢ່າງຂະໜາດໃຫຍ່, ນັບມາຮອດ 16 ໂມງວັນທີ 14 ພຶດສະພານີ້, ທົ່ວປະເທດໄດ້ຮັບເງິນແລະເຄື່ອງຂອງບໍລິຈາກຈາກວົງການຕ່າງໆຂອງສັງຄົມ 877 ລ້ານຢວນເຖິງ. ທ່ານວິນເດິມ ເຈັມສ ຜູ້ຕາງໜ້າ ສະມາຄົມຊ່ອຍເຫຼືອເດັກນ້ອຍເຊິ່ງເປັນອົງການສາກົນທີ່ບໍ່ຫວັງຜົນກຳໄລຫຍັງກ່າວວ່າ: "ໃນເວລາຄັນຂັນແບບນີ້, ມີລັດຖະບານຈຳນວນໜ້ອຍທີ່ສຸດທີ່ສາມາດເຕົ້າໂຮມພະລັງແລະເອົາໃຈໃສ່ໄດ້ຄືຈີນ."
ການກູ້ໄພແຜ່ນດິນໄຫວເທື່ອນີ້ຍັງໄດ້ສະແດງໃຫ້ເຫັນຄວາມສາມາດໃນການເຮັດວຽກທີ່ມີປະສິດທິພາບສູງຂອງຈີນ. ໃຕ້ສະພາບອາກາດທີ່ຂີ້ຮ້າຍແລະທາງຫຼວງຖືກທຳລາຍຢ່າງໜັກໜ່ວງ, ກອງກູ້ໄພຈີນໄດ້ຜ່ານຜ່າຄວາມຫຍຸ້ງຍາກທີ່ຍາກຈະພັນລະນາ, ໃຊ້ວິທີໂດດຈ້ອງ ໄປທາງນ້ຳແລະຍ່າງເອົາ, ປະຕິບັດການກູ້ໄພຢ່າງທັນເວລາແລະບັງເກີດຜົນ. ນັບມາຮອດຕອນເຊົ້າວັນທີ 15 ພຶດສະພານີ້, ກອງກູ້ໄພໄດ້ຊ່ອຍກອບກູ້ຜູ້ບາດເຈັບ 6 ໝື່ນກວ່າຄົນແລ້ວ, ແລະໄດ້ຂົນສົ່ງ ອາຫານແລະເຄື່ອງໃຊ້ປະຈຳວັນຢ່າງຫຼວງຫຼາຍໂດຍທາງລົດແລະໂຍນລົງຈາກຍົນ.
ການກູ້ໄພແຜ່ນດິນໄຫວເທື່ອນີ້ຍັງເຮັດໃຫ້ຕ່າງປະເທດເຫັນຄວາມສາມາດຂອງຈີນໃນດ້ານເກັບກຳຂໍ້ມູນຂ່າວແລະລາຍງານຂ່າວ.ບໍ່ຮອດ10ນາທີຫຼັງເກີດແຜ່ນດິນໄຫວ,ກົມແຜ່ນດິນໄຫວແຫ່ງຊາດຈີນກໍໄດ້ແຈ້ງຂ່າວນີ້ໃຫ້ມວນຊົນຊາບ,ແລະໄດ້ປະກາດລະດັບຄວາມແຮງຂອງແຜ່ນດິນໄຫວໃນແຫ່ງຕ່າງໆຂອງຈີນຢ່າງທັນການ.ສື່ມວນຊົນແລະເວັບໄຊຕ່າງໆກໍໄດ້ລາຍງານສະພາບຫຼ້າສຸດຂອງໄພແຜ່ນດິນໄຫວແລະການກູ້ໄພຢ່າງທັນເວລາ.ການປະກາດຂ່າວທີ່ມີອິດທິພົນຢ່າງທັນການເຮັດໃຫ້ທົ່ວປວງຊົນໄດ້ຮູ້ເລື່ອງຈິງຢ່າງວ່ອງໄວ,ເພື່ອບໍ່ໃຫ້ເກີດຄວາມຕື່ນຕົກໃຈເກີນໄປ.
ຄວາມສາມາດຂອງລັດຖະບານຈີນທີ່ສະແດງອອກໃນການກູ້ໄພແຜ່ນດິນໄຫວເທື່ອນີ້ໄດ້ຮັບຄວາມຢືນຢັນຢ່າງຕັ້ງໜ້າຈາກປະຊາຄົມໂລກ.ນາງຟາເດລາ ຊາອິບ ໂຄສົກອົງການອະນາໄມໂລກມີຄວາມໝັ້ນໃຈຢ່າງເຕັມປ່ຽມຕໍ່ວຽກງານກູ້ໄພຂອງຈີນ.ນາງກ່າວວ່າ:"ຂ້າພະເຈົ້າມີຄວາມໝັ້ນໃຈຢ່າງເຕັມທີ່.ປະຈຸບັນນີ້,ຈີນແມ່ນປະເທດໃຫຍ່,ມີປະສົບການດ້ານການກູ້ໄພຢ່າງຫຼວງຫຼາຍ,ແລະມີຜູ້ຊ່ຽວຊານດ້ານນີ້ຢ່າງຫຼວງຫຼາຍ,ຂ້າພະເຈົ້າເຫັນວ່າ ລັດຖະບານຈີນມີຄວາມສາມາດຊຳລະແກ້ໄຂວຽກງານຫຼັງເກີດໄພໄດ້ດີ."
|
