|
ພາຍຫຼັງເກີດແຜ່ນດິນໄຫວຢູ່ເມືອງເວີ້ນຊ່ວນແຂວງເສສວນຈີນເປັນຕົ້ນມາ,ໃຕ້ສະພາບການທີ່ເກີດແຮງສັ່ນສະເທືອນຕາມມາຫຼາຍເທື່ອແລະຖະໜົນຖືກຕັດຂາດ, ແພດໝໍຢູ່ແຫ່ງຕ່າງໆຂອງຈີນພາກັນໄປກອບກູ້ຊີວິດຂອງປະຊາຊົນຢູ່ເຂດປະສົບໄພດ້ວຍການໂດດຈ້ອງກໍ່ມີ,ໄປທາງນ້ຳແລະຍ່າງເອົາກໍ່ມີ. ນັບມາຮອດເວລາ10ໂມງຂອງວັນທີ15ພຶດສະພານີ້,ແພດໝໍ1ໝື່ນກວ່າຄົນທີ່ມາຈາກແຫ່ງຕ່າງໆຂອງຈີນໄດ້ຊ່ວຍກອບກູ້ປິ່ນປົວແລະປ້ອງກັນພະຍາດຢູ່ເຂດປະສົບໄພ,ໄດ້ຊ່ວຍເຫຼືອຜູ່ບາດເຈັບ2ໝື່ນ3ພັນກວ່າຄົນ.ດ້ວຍຄວາມພະຍາຍາມຂອງເຂົາເຈົ້າ,ຢູ່ເຂດປະສົບໄພບໍ່ມີເຫດການພະຍາດຕິດແປດລະບາດແລະບໍ່ມີບັນຫາສາທາລະນະສຸກສຸກເສີນອື່ນໆ.
ຫຼັງຈາກເກີດແຜ່ນດິນໄຫວຢູ່ເມືອງເວີ້ນຊ່ວນແລ້ວ,ກະຊວງສາທາລະນະສຸກໄດ້ຈີນເລີ່ມດຳເນີນວຽກງານຮັບມືກັບເຫດການສຸກເສີນທາງສາທາລະນະໄພອັນດັບໜຶ່ງໃນທັນທີ.ມື້ລຸນມາ ກະຊວງສາທາລະນະສຸກກໍ່ໄດ້ຈັດຕັ້ງແລະສົ່ງໜ່ວຍແພດສຸກເສີນ700ຄົນ,ນຳເອົາຢາແລະເຄື່ອງມືປິ່ນປົວໄປເຂດປະສົບໄພ.ໃນສອງມື້ຕໍ່ມາ,ມື້ໃດກໍ່ມີແພດໝໍຫຼາຍພັນຄົນຈາກແຫ່ງຕ່າງໆເດີນທາງໄປຮອດເຂດປະສົບໄພ.ນັບມາຮອດ8ໂມງເຊົ້າວັນທີ15ພຶດສະພານີ້,ໜ່ວຍແພດໄດ້ເຂົ້າໄປເຖີງທຸກເມືອງທີ່ປະສົບໄພໜັກໜ່ວງຂອງແຂວງເສສວນ,ວຽກງານກູ້ໄພດຳເນີນໄປຢ່າງຂຸ້ນຂ້ຽວ.ເພື່ອຮັບປະກັນການຈັດຊື້ແລະຂົນສົ່ງຢາແລະເຄື່ອງມືປິ່ນປົວກູ້ໄພ,ການເງິນສູນກາງຈີນໄດ້ເບີກເງິນໃຫ້600ກວ່າລ້ານຢວນແລ້ວ.
ໃນງານຖະແຫຼງຂ່າວທີ່ຈັດຂຶ້ນຢູ່ປັກກິ່ງໃນວັນທີ15ພຶດສະພານີ້ ທ່ານກ່າວຊຽງ ຫົວໜ້າໜ່ວຍປ້ອງກັນພະຍາດຂອງກອງບັນຊາການຕ້ານໄພແລະກູ້ໄພຂອງລັດຖະບານຈີນກ່າວວ່າ,ເປົ້າໝາຍກອບກູ້ປິ່ນປົວດ່ວນຄັ້ງນີ້ແມ່ນ:ປິ່ນປົວຊ່ວຍຊີວິດ ປ້ອງກັນພະຍາດແລະຮັບປະກັນໃຫ້ທຸກເມືອງແລະຕາແສງທີ່ປະສົບໄພໜັກໜ່ວງມີເຄື່ອງມືປິ່ນປົວໃຊ້.
"ຕ້ອງໃຫ້ທຸກເມືອງແລະຕາແສງທີ່ປະສົບໄພໜັກໜ່ວງ ມີແພດໝໍປິ່ນປົວຊ່ວຍຊີວິດ ມີການປ້ອງກັນພະຍາດແລະມີເຄື່ອງມືປິ່ນປົວໃຊ້,ເຖິງວ່າເສັ້ນທາງຂາດສະບັ້ນກໍ່ຕາມ,ກໍ່ຕ້ອງພະຍາຍາມຂົນສົ່ງທາງຍົນຫຼືຍ່າງເອົາ,ສົ່ງແພດໝໍແລະເຄື່ອງມືປິ່ນປົວໄປເຖິງທຸກບ່ອນທີ່ປະສົບໄພໜັກໜ່ວງ,ແລະປະຕິບັດວຽກງານຢ່າງມີປະສິດທີພາບ,ເພື່ອຫຼຸດຈຳນວນຜູ່ເສຍຊີວິດໃຫ້ໜ້ອຍທີ່ສຸດ,ຮັບປະກັນບໍ່ໃຫ້ເຂດປະສົບໄພມີພະຍາດລະບາດຮຸນແຮງ."
ທ່ານຍັງບອກວ່າ,ໃນຖັນແຖວແພດໝໍທີ່ໃຫ້ການປິ່ນປົວສຸກເສີນຢູ່ເຂດປະສົບໄພນັ້ນ,ຍັງມີຈິດຕະແພດທີ່ໃຫ້ຄຳປຶກສາແນະນຳດ້ານຈິດໃຈແກ່ປະຊາຊົນຜູ່ປະສົບໄພ.
ນອກຈາກພາກສ່ວນສາທາລະນະສຸກໄດ້ສົ່ງໜ່ວຍແພດແລະເຄື່ອງມືປິ່ນປົວໄປເຂດປະສົບໄພຢ່າງບໍ່ຂາດສາຍແລ້ວ,ທາງກອງທັບຈີນກໍ່ໄດ້ສົ່ງໜ່ວຍແພດທະຫານແລະອຸປະກອນປິ່ນປົວໄປຊ່ວຍເຂດປະສົບໄພ.ທ່ານເຢິນກົວະສວນ ຫົວໜ້າພະແນກຢາປົວພະຍາດແລະເຄື່ອງມືປິ່ນປົວພະແນກສາທາລະນະສຸກຂອງກອງພະລາທິການໃຫຍ່ກອງທັບປົດປ່ອຍປະຊາຊົນຈີນແຈ້ງໃຫ້ຊາບວ່າ,ກາງທັບໄດ້ຈັດສົ່ງຢາແລະເຄື່ອງມືປິ່ນປົວສອງງວດໄປເຂດປະສົບໄພແລ້ວ.ທ່ານກ່າວວ່າ:
"ເຄື່ອງມືປິ່ນປົວຂອງກອງທັບຕົ້ນຕໍແມ່ນຢາປະເພດປິ່ນປົວສຸກເສີນ,ຢາ ຕ້ານການຕິດເຊື້ອແລະປ້ອງກັນພະຍາດແລະອຸປະກອນປິ່ນປົວທີ່ໃຊ້ໃນເງື່ອນໄຂສະພາບສົງຄາມ.ນັບມາຮອດປັດຈຸບັນ,ເຄື່ອງເຫຼົ່ານີ້ໄດ້ຂົນຈາກສະໜາມບິນ5ແຫ່ງ ໄປນະຄອນເສິງຕູ່.ພວກຂ້າພະເຈົ້າໄດ້ຮັບການລາຍງານຂອງພະແນກສາທາລະນະສຸກເຂດທະຫານ ເສິງຕູ່ແລ້ວວ່າ,ຢາຊຸດທຳອິດໄດ້ໃຊ້ຍົນຖິ້ມລົງ ເຂດປະສົບໄພໃນຕອນເຊົ້າວັນທີ15ພຶດສະພານີ້ແລ້ວ."
ເພື່ອຮັບປະກັນໃຫ້ເຄື່ອງກູ້ໄພເຊັ່ນຢາປິ່ນປົວແລະອື່ນໆສາມາດຂົນສົ່ງໄປເຖິງປະຊາຊົນເຂດປະສົບໄພ, ກອງທັບຈີນໄດ້ສົ່ງຍົນເຮລິກົບແຕຫຼາຍລຳເຂົ້າຮ່ວມການຂົນສົ່ງ. ຢູ່ເຂດລົດຍັງເຂົ້າໄປບໍ່ໄດ້, ຍົນເຮລິກົບແຕທີ່ຂົນສົ່ງເຄື່ອງກູ້ໄພກໍ່ໄດ້ເຮັດໜ້າທີ່ຂົນສົ່ງຄົນບາດເຈັບ. ວັນທີ 15 ພຶດສະພານີ້, ຍົນເຮລິກົບແຕຂອງທະຫານໄດ້ຂົນສົ່ງຄົນບາດເຈັບໜັກ 10 ຄົນຈາກເຂດອີ້ງຊິ້ວເມືອງເວີ້ນຊ່ວນເຊິ່ງເປັນເຂດທີ່ປະສົບໄພຮ້າຍແຮງ. ຜູ້ບາດເຈັບຜູ້ໜຶ່ງເວົ້າວ່າ:
"ຂ້ອຍດີໃຈຫຼາຍ, ເມື່ອເຫັນຍົນກໍ່ຮູ້ວ່າຈະໄດ້ຮັບການຊ່ອຍເຫຼືອແລ້ວ, ໃນຄືນກ່ອນ, ຂ້ອຍຮູ້ສຶກວ່າໂຕເອງຈະຕາຍແລ້ວ. ເພາະຂ້ອຍຮູ້ສຶກວ່າຖືກບາດໜັກໂພດ, ເລືອດອອກຫຼາຍໂພດ."
ທ່ານກ່າວຊຽງ ຫົວໜ້າໜ່ວຍແພດຂອງກອງບັນຊາການກູ້ໄພແຜ່ນດິນໄຫວຂອງລັດຖະບານຈີນກ່າວວ່າ, ເຖິງວ່າດຽວນີ້ໄດ້ກາຍໄປ 72 ຊົ່ວໂມງເຊິ່ງເປັນເວລາກູ້ໄພດີທີ່ສຸດ, ແຕ່ລັດຖະບານຈີນຈະບໍ່ຢຸດເຊົາການກອບກູ້ຊີວິດຂອງປະຊາຊົນຜູ້ປະສົບໄພຈັກເທື່ອ. ໃນເວລາດຽວກັນ, ພາກສ່ວນອະນາໄມກໍ່ໄດ້ດຳເນີນວຽກງານຮັກສາແຫຼ່ງນ້ຳ, ຂ້າເຊື້ອພະຍາດໃນສິ່ງແວດລ້ອມແລະປ້ອງກັນພະຍາດແຜ່ລະບາດເປັນຕົ້ນ, ຮັບປະກັນ "ບໍ່ໃຫ້ມີພະຍາດແຜ່ລະບາດຢ່າງຂະໜາດໃຫຍ່ຫຼັງເກີດໄພຮ້າຍແຮງ".
"ພວກຂ້າພະເຈົ້າໄດ້ຈັດວາງວຽກງານປ້ອງກັນພະຍາດລະບາດຢູ່ເຂດປະສົບໄພແຂວງເສສວນຢ່າງຮອບຄອບ, ແລະໄດ້ສົ່ງພະນັກງານແພດຜູ້ມີປະສົບການ ມີເຕັກນິກແລະມີຄວາມສາມາດສູງໄປເຂດປະສົບໄພເຮັດວຽກງານປ້ອງກັນຄວບຄຸມພະຍາດ. ພວກເຂົາເຈົ້າຮ່ວມກັບແພດໝໍທ້ອງຖິ່ນດຳເນີນວຽກງານປ້ອງກັນພະຍາດຢ່າງເປັນລະບຽບ ແຂງແຮງແລະມີປະສິທິພາບ. ປັດຈຸບັນ, ຢູ່ເຂດປະສົບໄພແຂວງເສສວນບໍ່ໄດ້ເກີດພະຍາດຕິດແປດຮ້າຍແຮງແລະບໍ່ມີເຫດການສາທາລະນະສຸກສຸກເສີນອື່ນໆ."
ພ້ອມກັນນັ້ນທ່ານກ່າວສຽງກ່າວວ່າ, ພາຍຫຼັງແຂວງເສສວນເກີດໄພແຜ່ນດິນໄຫວແລ້ວ, ລັດຖະບານປະເທດຕ່າງໆລ້ວນແຕ່ໄດ້ສະແດງຄວາມເຫັນໃຈຢ່າງເລິກເຊິ່ງແລະໃຫ້ເຫຼືອການຊ່ອຍຢ່າງແຂງແຮງ. ມີຫຼາຍປະເທດສະເໜີວ່າຈະສະໜອງເຄື່ອງຊ່ອຍເຫຼືອໃຫ້ຈີນ, ລວມທັງຢາປິ່ນປົວແລະອຸປະກອນປິ່ນປົວສຸກເສີນ. ລັດຖະບານຈີນສະແດງຄວາມຂອບອົກຂອບໃຈຢ່າງຈິງໃຈ.
ຕອນບ່າຍວັນທີ 12 ພຶດສະພານີ້, ພາຍຫຼັງແຂວງເສສວນເກີດໄພແຜ່ນດິນໄຫວແລ້ວ, ທ່ານເວີນເຈ່ຍປາວ ນາຍົກລັດຖະມົນຕີຈີນໄດ້ໄປບັນຊາການກູ້ໄພຢູ່ກັບບ່ອນໃນທັນທີ. ຕອນເຊົ້າວັນທີ 16 ພຶດສະພານີ້, ທ່ານຫູຈີນທ່າວ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນ ປະທານຄະນະກຳມະການທະຫານສູນກາງຈີນໄດ້ຂີ່ຍົນໄປແຂວງເສສວນ, ເພື່ອຢື້ຢາມຖາມຂ່າວພະນັກງານແລະປະຊາຊົນໃນເຂດປະສົບໄພ, ແລະຢ້ຽມຢາມນະຍແລະພົນທະຫານແລະແພດໝໍທີ່ພວມຊ່ອຍເຫຼືອປະຊາຊົນ.
|
