|
14ໂມງ28ນາທີມື້ນີ້, ກໍແມ່ນໃນຂະນະທີ່ແຂວງເຊສວນຂອງຈີນເກີດໄພແຜ່ນດິນໄຫວຢ່າງຮຸນແຮງໃນ7ມື້ກ່ອນ, ປະຊາຊົນທົ່ວປະເທດຈີນໄດ້ຢືນສະຫງົບນິ້ງກົ້ມຫົວໄວ້ອາໄລ3ນາທີເຖິງຜູ້ເສຍຊີວິດໃນເຫດການແຜ່ນດິນໄຫວເມືອງເວີ້ນຊວນແຂວງເຊສວນ. ລົດຍົນ, ລົດໄຟແລະກ່ຳປັ່ນເປີດສຽງໂຫວດ3ນາທີ, ສັນຍານເຕືອນໄພທາງອາກາດກໍດັງຂຶ້ນຢູ່ໃນຕົວເມືອງຕ່າງໆ. ຜູ້ນຳຈີນ ເຊັ່ນທ່ານຫູຈີນທາວ, ທ່ານອູປາງກົວ, ທ່ານເວີ່ນເຈຍປາວແລະທ່ານອື່ນໆພ້ອມກັບປະຊາຊົນທົ່ວປະເທດຈີນຢືນສະຫງົບນິ້ງກົ້ມຫົວໄວ້ອາໄລເຖິງຜູ້ເສຍຊີວິດ.
ແຜ່ນດິນໄຫວທີ່ເກີດຂຶ້ນຢູ່ເມືອງເວີ້ນຊວນແຂວງເຊສວນໃນວັນທີ12ພຶດສະພານີ້ໄດ້ເຮັດໃຫ້ແຂວງເຊສວນ, ແຂວງກັ່ນຊູ້ແລະແຂວງສານສີ່ແລະບ່ອນອື່ນໆມີ3ໝື່ນ2ພັນກວ່າຄົນເສຍຊີວິດ, 2ແສນ2ໝື່ນກວ່າຄົນບາດເຈັບ. ເພື່ອສະແດງຄວາມເສົ້າສະຫຼົດໃຈອັນເລິກເຊິ່ງຂອງປະຊາຊົນຈີນທົ່ວປະເທດຕໍ່ຜູ້ເສຍຊີວິດໃນແຜ່ນດິນໄຫວ, ລັດຖະບານຈີນຕົກລົງຈັດຕັ້ງວັນທີ19ຫາວັນທີ21ເປັນວັນໄວ້ອາໄລແຫ່ງຊາດ. ໃນ3ວັນນີ້, ທົ່ວປະເທດແລະສຳນັກງານທີ່ປະຈຳຢູ່ຕ່າງປະເທດຊັກທຸງຊາດລົງເຄິ່ງເສົາເພື່ອສະແດງຄວາມໄວ້ອາໄລ, ຢຸດເຊົາການເລີ້ນເລິງບັນເທິງທຸກປະການ, ກະຊວງການຕ່າງປະເທດຈີນແລະສະຖານທູດຈີນປະຈຳຕ່າງປະເທດຈັດໃຫ້ມີການລົງນາມໃນປຶ້ມໄວ້ອາໄລ.
14ໂມງ28ນາທີຂອງມື້ນີ້, ນັກຂ່າວວິທະຍຸCRIທີ່ພວມໄປເອົາຂ່າວຢູ່ເມືອງມຽນຢາງແຂວງເຊສວນໄດ້ພ້ອມກັບປະຊາຊົນເຂດປະສົບໄພຢືນສະຫງົບນິ້ງໄວ້ອາໄລເຖິງຜູ້ເສຍຊີວິດໃນແຜ່ນດິນໄຫວ3ນາທີ. ພາຍຫຼັງມາ, ນັກຂ່າວໄດ້ສົ່ງຂ່າວຈາກທ້ອງຖິ່ນນັ້ນ.
ພວກເຮົາໄດ້ໄປເຖິງສະໜາມກິລາໃນຮົ່ມຈິວໂຈວ່ເມືອງມຽນຢາງທີ່ເປັນບ່ອນພັກຊົ່ວຄາວຂອງປະຊາຊົນຜູ້ປະສົບໄພຫຼາຍພັນຄົນ, ໃນເວລາ14ໂມງ28ນາທີ, ຢູ່ແຫ່ງນັ້ນ, ເທິງທ້ອງຟ້າມີສັນຍານເຕືອນໄພທາງອາກາດດັງຂຶ້ນ, ປະຊາຊົນຜູ້ປະສົບໄພທຸກຖ້ວນໜ້າອ່ວຍໜ້າໄປສູ່ທິດເມືອງເປຊ່ວນ ເຊິ່ງເປັນບ້ານເມືອງຂອງເຂົາເຈົ້າ, ຢືນສະຫງົບກົ້ມຫົວໄວ້ອາໄລ. ພວກເຮົາເຫັນປະຊາຊົນຜູ້ປະສົບໄພມີຈິດໃຈຫົດຫູ່, ນ້ຳຕາເຕັມເບົ້າ, ພວກເພິ່ນອ່ວຍໜ້າໄປທິດຂອງບ້ານເມືອງ, ອົດກັ້ນຄວາມເສົ້າສະຫຼົດໃຈ, ແຕ່ພວກເຮົາຍັງໄດ້ຍິນສຽງໄຫ້ຄ່ອຍໆໃນຝູງຊົນ. ກ່ອນຢືນສະຫງົບໄວ້ອາໄລ, ພວກເຮົາໄດ້ສຳພາດປະຊາຊົນຜູ້ປະສົບໄພຫຼາຍຄົນ, ພວກເພິ່ນເວົ້າວ່າ, ພວກເພິ່ນຈະຈື່ຈຳໄພພິບັດເທື່ອນີ້ຕະຫຼອດໄປ, ຈະດຳລົງຊີວິດຕໍ່ໄປ, ສ້າງບ້ານແປງເມືອງຄືນໃໝ່, ມີແຕ່ເຮັດແນວນີ້, ຈິ່ງຈະສາມາດສະແດງຄວາມໄວ້ອາໄລຕໍ່ຜູ້ທີ່ໄດ້ລວງລັບໄປແລ້ວໃນແຜ່ນດິນໄຫວເທື່ອນີ້.
ຕອນເຊົ້າມື້ນີ້, ທ້ອງຖິ່ນຕ່າງໆຂອງຈີນຍັງໄດ້ຈັດພິທີຊັກທຸງຊາດລົງເຄິ່ງເສົາເພື່ອສະແດງຄວາມໄວ້ອາໄລຕໍ່ປະຊາຊົນຜູ້ເສຍຊີວິດໃນແຜ່ນດິນໄຫວອັນຮຸນແຮງທີ່ເກີດຂຶ້ນຢູ່ເມືອງເວີ້ນຊວນແຂວງເຊສວນ.
ໃນເວລາ4ໂມງ58ນາທີວັນທີ19ພຶດສະພານີ້,ຢູ່ສະໜາມຫຼວງທ່ຽນອ່ານເມີນປັກກິ່ງ.ຄຽງຄູ່ກັບສຽງເພງຊາດທີ່ເຄັ່ງຂືມດັງຂຶ້ນ,ທຸງແດງ5ດາວທີ່ເປັນຕົວແທນກຽດສັກສິດແຫ່ງຊາດຄ່ອຍໆຊັກສູງຂຶ້ນ,ພາຍຫຼັງຊັກຮອດຍອດເສົາເປັນເວລາສັ້ນແລ້ວ ທຸງຊາດກໍ່ຄ່ອຍໆລົງເຄິ່ງເສົາ.ນີ້ແມ່ນທົ່ວປະເທດຈີນຊັກທຸງຊາດລົງເຄິ່ງເສົາໄວ້ອາໄລເຖິງຜູ່ເສຍຊີວິດໃນແຜ່ນດິນໄຫວເວີ້ນຊ່ວນແຂວງເສສວນ.
ສະໜາມຫຼວງທ່ຽນອ່ານເມີນໃນຕອນຂ້ອນແຈ້ງສະຫງົບຫຼາຍ,ປະຊາຊົນທຳມະດາຫຼາຍພັນຄົນມາຢືນຢູ່ສະໜາມຫຼວງ,ເນັງສາຍຕາໃສ່ທຸງຊາດ.ຫຼັງຈາກພິທີສິ້ນສຸດລົງແລ້ວ,ນັກຂ່າວໄດ້ສຳພາດພໍ່ແລະລູກສາວຄົນປັກກິ່ງ.ພໍ່ຊື່ວ່າທຽນກວາງຫຸ່ຍ,ລູກສາວຊື່ທຽນຊ່າງຊ່ານ.
ລູກສາວ: ໃນຜູ່ເສຍຊີວິດມີເດັກນ້ອຍແມ່ນລຸ້ນດຽວກັນກັບຂ້ອຍ,ມີຫຼາຍຄົນຖືກຝັງຢູ່ໃຕ້ຊາກຕຶກອາຄານແລ້ວ.
ພໍ່:ຂ້ອຍຮູ້ສຶກເສົ້າສະຫຼົດໃຈຫຼາຍ,ແຕ່ຂ້າພະເຈົ້າຮູ້ສຶກວ່າຢູ່ຕໍ່ໜ້າໄພພິບັດ,ປະເທດພວກຂ້າພະເຈົ້າໄດ້ມີຄວາມສາມັກຄີແລະຄວາມເປັນເອກະພາບຫຼາຍກວ່າເກົ່າ.
ນອກຈາກປະຊາຊົນປັກກິ່ງແລ້ວ, ຍັງມີຄົນຕ່າງແຂວງຫຼາຍຄົນທີ່ມາຮ່ຳຮຽນແລະເຮັດວຽກຢູ່ປັກກິ່ງກໍໄດ້ມາສະໜາມຫຼວງທ່ຽນອ່ານເໝີງເພື່ອເຂົ້າຮ່ວມພິທີຊັກທຸງຊາດໃນມື້ນີ້. ນາງໂຫຼເວີງສິນແມ່ນຄົນເຊີນເຈີ້ນ, ມາເຮັດວຽກຢູ່ປັກກິ່ງໃນຫວ່າງກ່ອນນີ້ບໍ່ເທົ່າໃດມື້. 4 ໂມງເຊົ້ານາງກໍໄດ້ຊຸກຈາກນອນແລະມາສະໜາມຫຼວງທ່ຽນອ່ານເໝີງ. ນາງກ່າວວ່າ, ເຊື່ອວ່າໃຕ້ການຊ່ອຍເຫຼືອຂອງປະຊາຊົນທົ່ວປະເທດ, ປະຊາຊົນຢູ່ເຂດປະສົບໄພສາມາດສ້າງບ້ານແປງເມືອງຄືນໃໝ່ຢ່າງແນ່ນອນ.
"ເລື່ອງໄດ້ເກີດຂຶ້ນແລ້ວແລະປ່ຽນແປງບໍ່ໄດ້. ປະເທດພວກຂ້າພະເຈົ້າມີຫຼາຍຫຼາຍຄົນສະໜັບສະໜູນຊ່ອຍເຫຼືອພວກເຂົາເຈົ້າ. ປະຊາຊົນແຂວງເສສວນມີຈິດໃຈຈະພະຍາຍາມສ້າງບ້ານແປງເຮືອນຄືນໃໝ່ດ້ວຍຄວາມເດັດດ່ຽວໜຽວແໜ້ນ."
ທ່ານຕຸ້ນຊື້ຊິນແມ່ນລັດຖະກອນຜູ້ໜຶ່ງ, ພາຍຫຼັງພິທີຊັກທຸງຊາດສິ້ນສຸດແລ້ວ, ທ່ານບໍ່ໄດ້ໜີໄປໃນທັນທີ, ພັດແມ່ນຢືນສະຫງົບໜຶ່ງຢູ່ບ່ອນເກົ່າຫຼາຍນາທີ. ທ່ານກ່າວວ່າ, ໄພທຳມະຊາດເທື່ອນີ້ແມ່ນເລື່ອງເຄາະຮ້າຍຢ່າງໜັກໜ່ວງ. ຈີນຕັ້ງວັນໄວ້ອາໄລແຫ່ງຊາດແລະຊັກທຸງຊາດລົງເຄິ່ງເສົາເພື່ອສະແດງເຖິງຄວາມສະຫຼົດໃຈ, ນີ້ບໍ່ພຽງແຕ່ສະໜອງວິທີສະແດງຄວາມເສົ້າສະຫຼົດໃຈໃຫ້ປະຊາຊົນເທົ່ານັ້ນ, ກໍໄດ້ສະແດງໃຫ້ເຫັນຄວາມນັບຖືແລະເອົາໃຈໃສ່ຂອງລັດຖະບານຕໍ່ຊີວິດ.
"ສຳລັບປະຊາຊົນທົ່ວປະເທດແລ້ວແມ່ນໃຫ້ການສຶກສາເທື່ອໜຶ່ງທີ່ດີຫຼາຍ. ລັດຖະບານຕັ້ງວັນໄວ້ອາໄລໄດ້ສະແດງເຖິງກຳລັງຂອງປະຊາຊົນ, ກໍໄດ້ສະແດງເຖິງແສງສະຫວ່າງຂອງມະນຸດສະຍະພາບ."
ທ້າວຊາຍໂຈ ເປີຊີ ນັກສຶກສາອາເມລິກາທີ່ຮຽນຢູ່ຈີນກໍໄດ້ເຂົ້າຮ່ວມພິທີຊັກທຸງຊາດທີ່ຈັດຂຶ້ນຢູ່ສະໜາມຫຼວງທ່ຽນອ່ານເມີງໃນມື້ນີ້. ລາວກ່າວວ່າ:
"ຂ້ອຍຮູ້ສຶກເຈັບແສບຫຼາຍ, ຫຼາຍຄົນໄດ້ເສຍຊີວິດໄປແລ້ວ. ພວກເຮົາບໍ່ສາມາດສະກັດກັ້ນການເກີດໄພແຜ່ນດິນໄຫວ. ລັດຖະບານຈີນເຮັດໄດ້ດີຫຼາຍແລ້ວ, ໄດ້ອອກແຮງສຸດຂີດແລ້ວ, ໄດ້ເຮັດທຸກສິ່ງທີ່ສາມາດເຮັດໄດ້, ດີຫຼາຍ.
ຕອນເຊົ້າວັນທີ 19 ພຶດສະພານີ້,ກະຊວງການຕ່າງປະເທດຈີນແລະສະຖານທູດຈີນປະຈຳຕ່າງປະເທດກໍ່ໄດ້ຊັກທຸງຊາດລົງເຄິ່ງເສົາເພື່ອສະແດງຄວາມໄວ້ອາໄລ,ແລະຈັດໃຫ້ມີການລົງນາມໃນປື້ມໄວ້ອາໄລ.ນາງນີຣູພາມາ ຣາວ ເອກອັກຄະລັດຖະທູດອິນເດຍປະຈຳຈີນທີ່ມາໄວ້ອາໄລກ່າວວ່າ:
"ຂ້າພະເຈົ້າຮູ້ສຶກເສົ້າສະຫຼົດໃຈຫຼາຍ.ອິນເດຍກັບຈີນເປັນປະເທດບ້ານໃກ້ເຮືອນຄຽງທີ່ດີຕໍ່ກັນ,ໃນຂະນະນີ້,ພວກຂ້າພະເຈົ້າຍິນດີຢູ່ຮ່ວມກັນກັບປະຊາຊົນຈີນຢ່າງແໜ້ນແຟ້ນ.ພວກຂ້າພະເຈົ້າຮູ້ວ່າ,ດຽວນີ້,ຈີນພວມປະສົບກັບເລື່ອງຫຍັງ,ເພາະວ່າ,ພວກຂ້າພະເຈົ້າກໍ່ເຄີຍປະສົບໄພທຳມະຊາດແບບນີ້.ອິນເດຍໄດ້ເລີ່ມຊ່ວຍເຫຼືອຈີນ,ຂ້າພະເຈົ້າຫາກໍ່ກັບມາຈາກນະຄອນເຊິງຕູ່ໃນມື້ວານນີ້.ພວກຂ້າພະເຈົ້າບໍ່ເຄີຍສົງໄສວ່າ,ຈີນສາມາດຜ່ານຜ່າຄວາມຫຍຸ້ງຍາກ,ຈີນແມ່ນປະເທດທີ່ເຂັ້ມແຂງ."
ເອກອັກຄະລັດຖະທູດອາເມລິກາ ຣັດເຊຍ ແອັສປາຍແລະການາດາປະຈຳຈີນທີ່ມາໄວ້ອາໄລລ້ວນແຕ່ກ່າວວ່າ,ຂໍແຕ່ລັດຖະບານຈີນຕ້ອງການ,ສີ່ປະເທດຈະເພີ່ມຄວາມຊ່ວຍເຫຼືອໂລກ.ເອກອັດຄະລັດຖະທູດອາຟຼິກາໃຕ້ແລະສ.ເກົາຫຼີກໍ່ກ່າວວ່າ,ເຖິງວ່າປະຊາຊົນຈີນໄດ້ປະສົບໄພແຜ່ນດິນໄຫວທີ່ຮ້າຍແຮງປານນີ້,ແຕ່ເຊື່ອວ່າ,ງານກິລາໂອລິມປິກປັກກິ່ງຍັງຈະຈັດຂຶ້ນຢ່າງສຳເລັດຜົນ.
ວັນໄວ້ອາໄລທົ່ວປະເທດແຕ່ວັນທີ 19 ຫາວັນທີ 21 ພຶດສະພານີ້,ລວມ 3 ວັນ.ໃນໄລຍະນີ້,ການເຄື່ອນໄຫວສົ່ງຕໍ່ທວນໄຟງານກິລາໂອລິມປິກພາຍໃນປະເທດຈີນກໍ່ຈະຢຸດຕິຊົ່ວຄາວ.
|
