ວັນທີ19ພຶດສະພານີ້ແມ່ນວັນທຳອິດໃນ3ວັນໄວ້ອາໄລທີ່ລັດຖະບານຈີນປະກາດເພື່ອໄວ້ອາໄລຜູ້ເສຍຊີວິດໃນແຜ່ນດິນໄຫວເມືອງເວິ້ນຊ່ວນແຂວງເສສວນ. ມື້ດຽວກັນ, ຜູ້ຮັບຜິດຊອບຂອງອົງການຈັດຕັ້ງສາກົນຕ່າງໆແລະທູຕານຸທູດປະເທດຕ່າງໆປະຈຳເຊີແນວພາກັນໄປຢາມຄະນະຜູ້ແທນຈີນປະຈຳເຊີແນວ, ເພື່ອໄວ້ອາໄລຜູ້ເສຍຊີວິດໃນແຜ່ນດິນໄຫວ.
ຕອນບ່າຍວັນທີ19ພຶດສະພານີ້, ທ່ານເຊີເກ ອົດໂຊນີກິດເຈ ຮອງເລຂາທິການໃຫຍ່ສະຫະປະຊາຊາດທັງເປັນຫົວໜ້າສຳນັກງານສະຫະປະຊາຊາດປະຈຳເຊີແນວໄດ້ໄປຮອດຫ້ອງໄວ້ອາໄລຢູ່ສຳນັກງານຄະນະຜູ້ແທນຈີນ. ທ່ານໄດ້ໃຊ້ເວລາ10ກວ່ານາທີຂຽນຄຳໄວ້ອາໄລຍາວໆຢູ່ເທິງປຶ້ມໄວ້ອາໄລຢ່າງເຄັ່ງຂຶມ, ແລ້ວໄດ້ລົມກັບທ່ານເອກອັກຄະລັດຖະທູດຫຼີປາວຕົ່ງ ຫົວໜ້າຄະນະຜູ້ແທນຈີນປະຈຳເຊີແນວເພື່ອສະແດງຄວາມໄວ້ອາໄລແລະຄວາມເຫັນໃຈ. ທ່ານເວົ້າວ່າ, ແຜ່ນດິນໄຫວທີ່ເກີດຂຶ້ນຢູ່ຈີນເທື່ອນີ້ແມ່ນໂສກນາດຕະກຳອັນຮ້າຍແຮງ, ພາໃຫ້ເກີດຄວາມເສຍຫາຍອັນໃຫຍ່ຫຼວງ, ຫຼາຍຄົນໄດ້ເສຍຊີວິດ, ຫຼາຍຄົນໄດ້ເສຍຊັບສິນ. ຂ້າພະເຈົ້າຫວັງວ່າປະຊາຊົນຈີນຈົ່ງພົ້ນອອກຈາກໄພພິບັດເທື່ອນີ້ໂດຍໄວ, ເອົາຊະຍະໄພພິບັດຄືທີ່ໄດ້ເຮັດຜ່ານມາ.
ສູນກາງພາກໃຕ້ແມ່ນອົງການຈັດຕັ້ງລະຫວ່າງລັດຖະບານທີ່ປະກອບດ້ວຍ30ກວ່າປະເທດທີ່ພວມພັດທະນາ. ໃນຂະນະທີ່ສະແດງຄວາມເຫັນໃຈແລະຄວາມຢື້ຢາມຖາມຂ່າວຕໍ່ປະຊາຊົນຜູ້ປະສົບໄພແລ້ວ, ທ່ານຢັສະທານທົນ ຫົວໜ້າຜູ້ບໍລິຫານຂອງສູນກາງໄດ້ສະຫຼຸບຄວາມຮູ້ສຶກຂອງຕົນດ້ວຍປະທັບໃຈເລິກເຊິ່ງໃນ3ດ້ານ.
ຂ້າພະເຈົ້າຮູ້ສຶກສະເທືອນໃຈຫຼາຍ. ພາຍຫຼັງເກີດໄພແລ້ວ, ຈີນໄດ້ລະດົມກຳລັງວັງຊາທັງໝົດມາກູ້ໄພ, ຈົນກວ່າໃຊ້ວິທີໂດດຈ້ອງມາກູ້ໄພ, ເຮັດໃຫ້ຂ້າພະເຈົ້າປະທັບໃຈຢ່າງເລິກເຊິ່ງ; ພາຍຫຼັງເກີດໄພແລ້ວ, ຜູ້ນຳແລະປະຊາຊົນຈີນໄດ້ສະແດງຄວາມໝັ້ນໃຈຕໍ່ຕົນເອງ, ເຮັດໃຫ້ຂ້າພະເຈົ້າປະທັບໃຈຢ່າງເລິກເຊິ່ງ; ພາຍຫຼັງເກີດໄພແລ້ວ, ຊາວຈີນຕ່າງດ້າວເປັນຈິດໜຶ່ງໃຈດຽວກັນ, ໃຫ້ຄວາມຊ່ວຍເຫຼືອພ້ອມກັນກູ້ໄພ, ອັນນີ້ກໍເຣັດໃຫ້ຂ້າພະເຈົ້າປະທັບໃຈຢ່າງເລິກເຊິ່ງ.
ນັກຂ່າວໄດ້ຢູ່ໃນຫ້ອງໄວ້ອາໄລເປັນເວລາ1ຊົ່ວໂມງປາຍ, ມີເອກອັກຄະລັດຖະທູດຂອງ10ກວ່າຄະນະຜູ້ແທນທີ່ປະຈຳຢູ່ເຊີແນວເຊັ່ນ: ໂຊມາລີ, ຊິມບັບເວ, ບົສນີ-ແຮກເຊໂກວິນ, ເບຼຊິນ, ກຳປູເຈຍ, ສວິສ, ຣັດເຊຍແລະຍີ່ປຸ່ນເປັນຕົ້ນໄດ້ໄປສະແດງຄວາມໄວ້ອາໄລ.
ພາຍຫລັງຈີນເກີດແຜ່ນດິນໄຫວແລ້ວ,ຣັດເຊຍບໍ່ພຽງແຕ່ໄດ້ສົ່ງເຄື່ອງ ຊ່ວຍເຫລືອຢ່າງຫລວງຫລາຍໃຫ້ຈີນທໍ່ນັ້ນ, ຍັງໄດ້ສົ່ງຫນ່ວຍກູ້ໄພໄປເຂດປະສົບໄພໂດຍກົງ,ແລະເຂົ້າຮ່ວມວຽກງານຊອກຫາຢູ່ຜູ່ລອດຊີວິດ.ໃນເວລາກ່າວເຖິງເລື່ອງນີ້, ທ່ານວາເລຣີ ໂລຊີນີນ ເອກອັກຄະລັດຖະທູດຣັດເຊຍປະຈຳຈີນກ່າວວ່າ:
ພວກເຮົາແມ່ນເພື່ອນທີ່ດີ, ການພົວພັນມິດຕະພາບແບບນີ້ຍັງຈະສືບຕໍ່ກັນໄປ.
ຍີ່ປຸ່ນແມ່ນປະເທດໃກ້ຄຽງຂອງຈີນ,ແລະກໍ່ແມ່ນປະເທດຫນຶ່ງທີ່ເກີດແຜ່ນດິນໄຫວເລື້ອຍໆ.ປະຊາຊົນຍີ່ປຸ່ນມີຄວາມຮູ້ສຶກເຊ່ນດຽວກັນກັບຈີນທີ່ເກີດແຜ່ນດິນໄຫວເທື່ອນີ້,ແລະໄດ້ໃຫ້ການຊ່ວຍເຫລືອແກ່ການກູ້ໄພຂອງຈີນ.ທ່ານອີຊີໂຣ ຟູຈີຊາຄີ ເອກອັກຄະລັດຖະທູດຍີ່ປຸ່ນປະຈຳຈີນໄດ້ສະແດງຄວາມເຫັນໃຈແລະຢື້ຢາມຖາມຂ່າວດ້ວຍຄວາມຈິງໃຈຕໍ່ປະຊາຊົນຢູ່ເຂດປະສົບໄພຂອງຈີນ.ທ່ານກ່າວວ່າ:
ຂ້າພະເຈົ້າຂໍຕາງຫນ້າລັດຖະບານແລະປະຊາຊົນຍີ່ປຸ່ນ,ສະແດງຄວາມໄວ້ອາໄລແລະຄວາມເຫັນໃຈຢ່າງເລິກເຊິ່ງຕໍ່ຜູ່ເສຍຊີວິດໃນແຜ່ນດິນໄຫວເທື່ອນີ້.
ວັນທີ 19 ພຶດສະພານີ້ ກອງປະຊຸມອະນາໄມໂລກຄັ້ງທີ 61 ໄດ້ຈັດຂຶ້ນຢູ່ວັງນາໆຊາດ ສຳນັກງານໃຫຍ່ສະຫະປະຊາຊາດປະຈຳເອີລົບທີ່ເຊີແນວ.ໃນພິທີໄຂກອງປະຊຸມ, ທ່ານແຈັນ ໂຮນທົນ ປະທານກອງປະຊຸມໄດ້ຮຽກຮ້ອງຫມົດທຸກຄົນຢູ່ທີ່ປະຊຸມຢືນຂຶ້ນ,ເພື່ອກົ້ມຫົວລົງໄວ້ອາໄລເຖິງດວງວິນຍານຂອງຜູ່ເສຍຊີວິດໃນລົມພາຍຸແຖບຮ້ອນທີ່ເກີດຂຶ້ນຢູ່ມຽນມາແລະແຜ່ນດິນໄຫວທີ່ເກີດຢູ່ຈີນ.
|