|
|
 |
| (GMT+08:00)
2008-05-22 14:43:49
|
 |
|
ສະຕິຊາດຂອງຄົນຈີນພວມສູງຂຶ້ນຢ່າງບໍ່ຢຸດຢັ້ງ
cri
Author: mo
ທ່ານເສີນຢຽນແມ່ນເຈົ້າຂອງວິສາຫະກິດເອກະຊົນແຫ່ງໜຶ່ງຂອງເມືອງຕົ່ງກວນແຂວງກວາງຕົ່ງ ພາກໃຕ້ຂອງຈີນ, ໃນມື້ທີສອງຫຼັງເກີດແຜ່ນດິນໄຫວຢູ່ເມືອງເວີ້ນຊວນ, ເພິ່ນພາເມຍເອົາເຄື່ອງກູ້ໄພໄປເມືອງມຽນຈູແຂວງເສສວນ. ໃນຫຼາຍມື້ມານີ້, ເພິ່ນໄດ້ກອບກູ້ຊີວິດເດັກນ້ອຍ 20 ກວ່າຄົນ, ແມ່ນໜຶ່ງໃນອາສາສະໝັກທີ່ກອບກູ້ຄົນຫຼາຍກວ່າໝູ່ໃນແຜ່ນດິນໄຫວເທື່ອນີ້.
ຫຼັງເກີດແຜ່ນດິນໄຫວຢູ່ເມືອງເວີ້ນຊວນແລ້ວ, ອາສາສະໝັກທີ່ມາຈາກແຫ່ງຕ່າງໆຂອງຈີນໄດ້ໄປເຂດປະສົບໄພຢ່າງວ່ອງໄວເພື່ອຊ່ວຍກອບກູ້ຊີວິດ.
ສະຕິຊາດແມ່ນສະຕິມວນຊົນທີ່ຈໍ່ຕົວຂຶ້ນພ້ອມກັບການພັດທະນາແລະຄວາມກ້າວໜ້າຂອງສັງຄົມ, ເຊິ່ງລວມທັງສະຕິທີ່ມີຕໍ່ສິດຜົນປະໂຫຍດແລະຄຸນຄ່າຂອງຕົນແລະຂອງຜູ້ອື່ນ, ຍັງມີໜ້າທີ່ຮັບຜິດຊອບຂອງພົນລະເມືອງທີ່ມີຕໍ່ປະເທດແລະສັງຄົມ. ທີ່ຈິງແລ້ວ, ແຕ່ສູນກາງຄະນະຊາວໜຸ່ມຈີນລິເລີ່ມປະຕິບັດການເຄື່ອນໄຫວວຽກງານອາສາສະໝັກຊາວໜຸ່ມຈີນເມື່ອປີ 1993 ມານີ້, ທັດສະນະຄະຕິທີ່ບໍລິການໂດຍສະໝັກໃຈໄດ້ເຜີຍແຜ່ໃຫ້ທົ່ວເຖິງກັນຢູ່ຈີນຢ່າງວ່ອງໄວ. ການກູ້ໄພແຜ່ນດິນໄຫວເມືອງເວີ້ນຊວນໄດ້ເຮັດໃຫ້ທັດສະນະຄະຕິທີ່ວ່າ"ອາສາສະໝັກ"ທີ່ຈີນສ້າງມາຫຼາຍປີ ໄດ້ສະແດງອອກຢ່າງພົ້ນເດັ່ນ.
ຖ້າເວົ້າວ່າ, ການເຄື່ອນໄຫວອາສາສະໝັກແມ່ນຜ່ານຜູ້ຄົນໄປເຮັດວຽກຢູ່ແຖວໜ້າມາສະແດງສະຕິຮັບຜິດຊອບຂອງຕົນທີ່ມີຕໍ່ສັງຄົມແລະຜູ້ອື່ນ, ຄັນຊັ້ນ, ການບໍລິຈາກເງິນ, ການບໍລິຈາກເລືອດແລະອື່ນໆກໍ່ແມ່ນໄດ້ຜ່ານວິທີການເຂົ້າຮ່ວມໂດຍທາງອ້ອມເພື່ອມາບັນລຸສະຕິຮັບຜິດຊອບຂອງຕົນເຊັ່ນດຽວກັນ.
ພາຍຫຼັງເກີດແຜ່ນດິນໄຫວແລ້ວ, ປະຊາຊົນໃນຕົວເມືອງຕ່າງໆຂອງຈີນໄດ້ໄປຫາບ່ອນບໍລິຈາກເລືອດຢ່າງເປັນເຈົ້າການ; ອົງການຈັດຕັ້ງສາທາລະນະປະໂຫຍດຕ່າງໆຂອງປັກກິ່ງໄດ້ຈັດກິດຈະກຳຮ່ວມກັນກູ້ໄພຢ່າງຕັ້ງໜ້າ; ເວັບໄຊຈຳນວນນຶ່ງໄດ້ຈັດການບໍລິຈາກແລະໄດ້ຮັບການຕອບຮັບຢ່າງຫ້າວຫັນຈາກຜູ້ໃຊ້ອິນເຕີເນັດທັງຫຼາຍ; ຄູບາອາຈານຂອງຕິເບດໄດ້ສວດມົນພາວະນາຢ່າງເຄັ່ງຂືມ, ເພື່ອໃຫ້ດວງວິນຍານຂອງຜູ້ເສຍຊີວິດໄປສູ່ສຸຂະຕິພົບ; ສູນບໍລິການດ້ວຍຄວາມຮັກແພງ"ຊິງຊິງກາງ"ຊຽງໄຮ້ທີ່ປະກອບດ້ວຍຜູ້ເປັນແມ່ທີ່ສູນເສຍລູກເຕົ້າໄດ້ຈັດກອງຊ່ວຍເຫຼືອດ້ານຈິດໃຈ ໄປເຂດປະສົບໄພເຂົ້າຮ່ວມການຊ່ວຍເຫຼືອເດັກກຳພອຍໃນໄພແຜ່ນດິນໄຫວ… ຕອນຄ່ຳວັນທີ 18 ພຶດສະພານີ້, CCTVຈີນໄດ້ຈັດງານລາຕີກູ້ໄພຂອງວົງການສິລະປິນທີ່ມີຂະໜາດໃຫຍ່ກວ່າໝູ່ຫຼັງສ້າງຕັ້ງປະເທດຈີນໃໝ່ມານີ້, ໄດ້ເງິນບໍລິຈາກຫຼາຍກວ່າ 1 ຕື້ 500 ລ້ານຢວນ.
ລັດຖະບານຈີນຕົກລົງວ່າ, ວັນທີ 19 ຫາວັນທີ 21 ພຶດສະພານີ້ແມ່ນວັນໄວ້ອາໄລທົ່ວປະເທດຈີນ. 14 ໂມງ 28 ນາທີຂອງວັນທີ 19 ພຶດສະພານີ້, ເວລາປັກກິ່ງ, ເມື່ອໂຫວດສັນຍານເຕືອນໄພປ້ອງກັນອາກາດດັງຂຶ້ນ, ຜູ້ຍ່າງຕາມທາງໄດ້ຢຸດ, ກຳມະກອນຊາວນາໄດ້ເຊົາເຮັດວຽກຊົ່ວຄາວ, ຄົນທັງຫຼາຍພາກັນກົ້ມຫົວໄວ້ອາໄລ 3 ນາທີຕໍ່ຜູ້ເສຍຊີວິດໃນແຜ່ນດິນໄຫວຢ່າງໂສກເສົ້າສະຫຼົດໃຈ. ຕອນຄ່ຳວັນທີ 19 ພຶດສະພາ, ປະຊາຊົນໃນຫຼາຍແຂວງແລະກຳແພງນະຄອນຂອງຈີນຍັງໄດ້ໄຕ້ທຽນເພື່ອໄວ້ອາໄລ.
ໃນການກູ້ໄພແຜ່ນດິນໄຫວເທື່ອນີ້, ປະຊາຊົນຈີນໄດ້ໃຊ້ການກະທຳຂອງຕົນສະແດງໃຫ້ເຫັນວ່າ, ການກູ້ໄພບໍ່ພຽງແຕ່ແມ່ນໜ້າທີ່ຮັບຜິດຊອບຂອງລັດຖະບານທໍ່ນັ້ນ, ຍັງແມ່ນພັນທະຂອງພົນລະເມືອງທີ່ມີຕໍ່ສິດແລະຜົນປະໂຫຍດຂອງຜູ້ອື່ນ ວຽກງານສາທາລະນະ ແລະການພັດທະນາຂອງປະເທດຊາດ. ພ້ອມກັນນັ້ນ, ມັນກໍ່ໄດ້ສະແດງໃຫ້ເຫັນວ່າ, ຄຽງຄູ່ກັບການພັດທະນາຂອງສັງຄົມຈີນ, ສະຕິຊາດຂອງຊາວຈີນກໍ່ໄດ້ສູງຂຶ້ນຢ່າງບໍ່ຢຸດຢັ້ງ.
|
|
|
