|
ໄພແຜ່ນດິນໄຫວຢູ່ເມືອງເວີ້ນຊວນ ແຂວງເສສວນໄດ້ເຮັດໃຫ້ ມີຄົນຕາຍບາດເຈັບ ແລະ ເສຍຫາຍຊັບສິນຢ່າງຫຼວງຫຼາຍ.ໃນເວລາກູ້ໄພແຜ່ນດິນໄຫວ, ພາກສ່ວນສາທາລະນະສຸກຈີນ,ອົງການປົກຄອງທ້ອງຖິ່ນຕ່າງໆ ແລະ ອົງການຈັດຕັ້ງມະຫາຊົນຕ່າງໆໄດ້ສົ່ງພະນັກງານກອບກູ້ຊ່ວຍເຫຼືອດ້ານຈິດໃຈເຂົ້າສູ່ເຂດປະສົບໄພ, ໃຫ້ການຊ່ວຍເຫຼືອດ້ານຈິດໃຈໃຫ້ແກ່ປະຊາຊົນເຂດປະສົບໄພ.
ຢູ່ບ່ອນພັກຊົ່ວຄາວບ່ອນໜຶ່ງຂອງເມືອງເປີຍຊວນ ທີ່ປະສົບໄພຢ່າງຮ້າຍແຮງ, ນັກຂ່າວໄດ້ພົບທ້າວລີວຂາຍ ນັກຮຽນມັດທະຍົມຕົ້ນປີທີ2ຂອງໂຮງຮຽນມັດທະຍົມເປີຍຊວນ. ລາວພວມຊ່ວຍອາສາສະໝັກຈັດວາງສະຖານທີ່ພັກເຊົາໃຫ້ຜູ່ປະສົບໄພ, ເບິ່ງແລ້ວ,ຮູ້ສຶກລາວມີຈິດໃຈທຸ່ມທ່ຽວດີ. ແຕ່ວ່າໃນຕອນທີ່ທ້າວລີວຂາຍຫາກໍ່ມາຮອດບ່ອນພັກຊົ່ວຄາວນີ້, ແມ່ນບໍ່ເປັນແນວນີ້. ທ່ານຊຸ່ນຊຽງ ອາສາສະໝັກຊ່ວຍເຫຼືອດ້ານຈິດໃຈບອກວ່າ,
"ໃນເວລາທ້າວລີວຂາຍຫາກໍ່ມາລາວມີອາຫານຕື່ນຕົກໃຈຢ້ານກົວຫຼາຍ, ນອນບໍ່ຫຼັບ, ນັ່ງຊຶງຢູ່ບໍ່ປາກບໍ່ເວົ້າຫຍັງ."
ຢູ່ບ່ອນພັກຊົ່ວຄາວ, ພະນັກງານກູ້ຊ່ວຍເຫຼືອດ້ານຈິດໃຈໄດ້ຊັກຊວນໃຫ້ທ້າວລີວຂາຍເວົ້າປະສົບການຂອງຕົນ, ແລະ ຊ່ວຍໃຫ້ຈິດໃຈຂອງລາວສະຫງົບລົງຢ່າງອົດທົນ, ຊຸກຍູ້ໃຫ້ລາວຊ່ວຍອາສາສະໝັກເຮັດວຽກທີ່ລາວສາມາດເຮັດໃຫ້. ປັດຈຸບັນ, ທ້າວລີວຂາຍຮູ້ສຶກສະບາຍໃຈຫຼາຍແລ້ວ.
ຫຼັງຈາກເກີດໄພແຜ່ນດິນໄຫວ, ວຽກງານກອບກູ້ຊ່ວຍເຫຼືອດ້ານຈິດໃຈກໍ່ໄດ້ເລິ່ມດຳເນີນໄປພ້ອມ. ທ່ານເຟີງຈິ້ງຈຶ ຈິດຕະແພດຂອງມະຫາວິທະຍາໄລແພດທີສາມຂອງກອງທັບປົດປ່ອຍປະຊາຊົນຈີນ ໄດ້ເດີນທາງໄປຮອດເຂດປະສົບໄພນຳໜ່ວຍກອບກູ້ຂອງກອງທັບ ໃນມື້ທີ2ຫຼັງເກີດແຜ່ນດິນໄຫວ. ທ່ານເວົ້າສູ່ຟັງວ່າ,
"ທີ່ຈິງແລ້ວ, ການກອບກູ້ຊ່ວຍເຫຼືອດ້ານຈິດໃຈຂອງພວກເຮົາໄດ້ເລິ່ມດຳເນີນ ນັບແຕ່ຂຸດຄົ້ນເອົາຄົນໃນຊາກອາຄານທີ່ພັງທະລາຍ, ວຽກງານໃນຕອນນັ້ນແມ່ນກະຕຸ້ນໃຫ້ພວກເຂົາເຈົ້າມີຄວາມຫວັງຕໍ່ຊີວິດອີກເທື່ອໜຶ່ງ. ວິທີຊ່ວຍກໍ່ແມ່ນ, ພວກເຮົາໄປເຮືອນຂອງພວກເຂົາເຈົ້າ, ລົມກັບເຂົາເຈົ້າ, ຊັກຊວນໃຫ້ເຂົາເຈົ້າເວົ້າຄວາມຢ້ານກົວໃນໃຈ."
ປັດຈຸບັນ, ຢ່າງໜ້ອຍມີໜ່ວຍຈິດຕະແພດຫຼາຍກວ່າ50ໜ່ວຍໄດ້ເດີນທາງໄປເຂດປະສົບໄພແລ້ວ. ນອກນີ້, ພາກສ່ວນທີ່ກ່ຽວຂ້ອງກໍ່ໄດ້ເປີດໂທລະສັບສາຍດ່ວນ ແລະ ໃຫ້ຟັງລາຍການທີ່ກ່ຽວຂ້ອງ, ໃຫ້ຄວາມຊ່ວຍເຫຼືອດ້ານຈິດໃຈແກ່ຜູ່ປະສົບໄພ. ພະນັກງານກອບກູ້ຍັງໄດ້ແຈກຢາຍເອກະສານທີ່ກ່ຽວພັນກັບຄວາມປອດໃສດ້ານຈິດໃຈ, ແນະນຳໃຫ້ເຂົາເຈົ້າຮູ້ໃຫ້ກຳລັງໃຈຕົນເອງ.
ປັດຈຸບັນ, ວຽກງານຊ່ວຍເຫຼືອດ້ານຈິດໃຈຢູ່ເຂດປະສົບໄພໄດ້ຂະຫຍາຍໄປເຖິງປະຊາຊົນທາງນອກ. ທ່ານໂວ້ຈ້ຽນຈົ່ງ ສາດສະດາຈານ ວິຊາຈິດຕະແພດຂອງມະຫາວິທະຍາໄລສ້າງຄູປັກກິ່ງພວມກຽມເດີນທາງໄປເຂດປະສົບໄພ, ທ່ານກ່າວວ່າ,
"ຜູ່ທີ່ພວກເຮົາຈະຊ່ວຍເຫຼືອນັ້ນ ນອກຈາກປະຊາຊົນຢູ່ເຂດປະສົບໄພແລ້ວ, ຍັງມີອາສາສະໝັກ, ທະຫານກູ້ໄພ, ແລະແພດໝໍເປັນຕົ້ນ, ເພາະວ່າຄວາມກົດດັນດ້ານຈິດໃຈຂອງພວກເຂົາເຈົ້າສູງຫຼາຍ."
ຕາມຂ່າວແຈ້ງວ່າ, ຫຼັງຈາກເກີດໄພແຜ່ນດິນໄຫວ ປະມານ1ອາທິດ, ຄົນ ຫາກໍ່ຜ່ານໄພພິບັດ, ຈິດໃຈພວມຢູ່ໃນສະພາບມິນງົງ, ຍັງບໍ່ທັນສົນໃຈນຳອາລົມຈິດໃຈຂອງຕົນເທື່ອ. ແຕ່ຕໍ່ມໍປະມານ7ມື້ ຫາ 3ເດືອນຫຼັງເກີດໄພ, ເຂົາເຈົ້າກໍ່ຈະເລິ່ມຫວນຄືນພາບໄພພິບັດ, ເກີດຄວາມຮູ້ສຶກດ້ານຈິດໃຈໄປທາງລົບ ເຊັ່ນ,ຢ້ານກົວ ແລະ ໝົດຫວັງເປັນຕົ້ນ, ແລ້ວເກີດບັນຫາທາງຈິດໃຈຂຶ້ນ. ສະນັ້ນ, ປັດຈຸບັນ,ວຽກງານກອບກູ້ຊ່ວຍເຫືຼອດ້ານຈິດໃຈຂະໜາດໃຫຍ່ນັບແຕ່ປະເທດຈີນໃໝ່ສ້າງຕັ້ງຂຶ້ນນັ້ນ ຈຶ່ງພວມດຳເນີນຢູ່ເຂດປະສົບໄພແຜ່ນດິນໄຫວ ແຂວງເສສວນ.
|
