|
ຫຼັງຈາກຈີນໄດ້ເກີດໄພແຜ່ນດິນໄຫວຢູ່ເມືອງເວີ້ນຊວນ ແຂວງເສສວນໃນວັນທີ12ພຶດສະພານີ້, ເພື່ອຮັບປະກັນການສະໜອງເຄື່ອງໃຊ້ສອຍໃນການຜະລິດ ຊີວິດ ແລະ ເຄື່ອງກູ້ໄພຂອງເຂດປະສົບໄພ, ກະຊວງການຄ້າຈີນໄດ້ເລິ່ມປະຕິບັດແຜນການຮັບມືກັບສະພາບສຸກເສີນໃນທັນທີ, ອອກແຮງຮັບປະກັນການສະໜອງສິນຄ້າໃນຕະຫຼາດຂອງເຂດປະສົບໄພ. ໂດຍຜ່ານຈາກເພິ່ມການຂົນສົ່ງວັດຖຸຕ່າງໆ, ປັດຈຸບັນ, ການສະໜອງ ແລະ ລາຄາຢູ່ຕະຫຼາດໄດ້ຄ່ອຍໆໝັ້ນທ່ຽງແລ້ວ.
ໃນກອງປະຊຸມຂ່າວທີ່ຫ້ອງການຖະແຫຼງຂ່າວ ລັດຖະບານຈີນຈັດຂຶ້ນໃນວັນທີ22ພຶດສະພານີ້, ທ່ານເຊີນເຕິມີງ ລັດຖະມົນຕີວ່າການກະຊວງການຄ້າຈີນແຈ້ງວ່າ, ຫຼັງຈາກຈີນໄດ້ເກີດໄພແຜ່ນດິນໄຫວຢູ່ເມືອງເວີ້ນຊວນ ແຂວງເສສວນໃນວັນທີ12ພຶດສະພານີ້, ກະຊວງການຄ້າຈີນໄດ້ເລິ່ມປະຕິບັດແຜນການຮັບມືກັບສະພາບສຸກເສີນລະດັບAໃນທັນທີ, ໃຊ້ວິທີຕ່າງໆຂົນສົ່ງເຄື່ອງໃຊ້ສອຍປະຈຳວັນ ແລະ ເຄື່ອງກູ້ໄພໄປຮອດເຂດປະສົບໄພ, ຮັບປະກັນການສະໜອງສິນຄ້າໃນຕະຫຼາດ. ທ່ານກ່າວວ່າ, ປັດຈຸບັນນີ້, ໜ້າທີ່ຕົ້ນຕໍຂອງກະຊວງການຄ້າຈີນມີສອງຢ່າງ
"ອັນທີໜຶ່ງ, ແມ່ນຂົນສົ່ງວັດຖຸສິ່ງຂອງຈາກທົ່ວປະເທດໄປຮອດແຂວງເສສວນ ຮັບປະກັນບໍ່ຂາດ ການສະໜອງຕະຫຼາດ, ອັນທີສອງ,ແມ່ນຟື້ນຟູການກຳເນີນທຸລະກິດໂດຍຄືນໄວ."
ທ່ານເຊີນເຕິມີງກ່າວວ່າ, ປັດຈຸບັນ, ການສະໜອງຕະຫຼາດຢູ່ເມືອງເຊີງຕູ່ ເມືອງເອກແຂວງເສສວນ ແລະ ຕົວເມືອງໃຫຍ່ຕ່າງງພຽງພໍດີ, ການຈໍລະຈອນສິນຄ້າທີ່ໄປຮອດເມືອງນ້ອຍກໍ່ສະດວກໃນຂັ້ນພື້ນຖານ. ປັດຈຸບັນ, ວຽກງານຈຸດໜັກແມ່ນການສ້ອມແປງເສັ້ນທາງ, ຂົນສົ່ງວັດຖຸ ແລະ ສິນຄ້າທີ່ຂາດເຂີນທີ່ສຸດໃຫ້ປະຊາຊົນໃນເຂດຫຍຸ້ງຍາກທີ່ສຸດ.ທ່ານກ່າວວ່າ,
"ວິສາຫະກິດການຄ້າຕ້ອງຈັດຕັ້ງກຳລັງຕ່າງໆ, ຂົນສົ່ງວັດຖຸ ແລະ ສິນຄ້າໃຫ້ປະຊາຊົນຢູ່ຮາກຖານເຂດປະສົບໄພ, ໃຊ້ລົດຍົນ,ລົດຈັກຂົນສົ່ງ, ບ່ອນທີ່ໃຊ້ລົດຍົນ ແລະ ລົດຈັກບໍ່ໄດ້ນັ້ນກໍ່ໃຊ້ມ້າ, ບ່ອນທີ່ມ້າໄປບໍ່ໄດ້ກໍ່ໃຫ້ຄົນແບກຫາບ."
ໃນຂະນະທີ່ອອກແຮງຮັບປະກັນການສະໜອງຕະຫຼາດຂອງເຂດປະສົບໄພ, ກະຊວງການຄ້າຈີນຍັງຮັບຜິດຊອບໜ້າທີ່ຮັບການຊ່ວຍເຫຼືອຈາກສາກົນ. ທ່ານຈາງເຄີ້ນີງຫົວໜ້າ ພະແນກສາກົນກະຊວງການຄ້າຈີນແຈ້ງໃຫ້ຊາບວ່າ,
"ໃນເວລາເກີດແຜ່ນດິນໄຫວ, ພວກເຮົາກໍ່ໄດ້ແຈ້ງຂ່າວໃຫ້ສະຖານທູດ,ສະຖານກົງສຸນ ແລະ ອົງການຂອງຕ່າງປະເທດປະຈຳຈີນຊາບ. ນັບແຕ່ວັນທີ13ພຶດສະພານີ້, ພວກເຮົາກໍ່ເລິ່ມໄດ້ຮັບເງິນບໍລິຈາກແລ້ວ.
ແລະເອົາເງິນນີ້ໄປຊື້ເຄື່ອງຊ່ອຍເຫຼືອທີ່ຕ້ອງການດ່ວນໃນເຂດປະສົບໄພ,ແລ້ວສົ່ງໄປໃຫ້ເຂດປະສົບໄພໂດຍກົງ,ຕົວຢ່າງຄື:ອາຫານສຳເລັດຮູບ ຕູບຜ້າເຕັ້ນແລະຢາປິ່ນປົວສຸກເສີນ.
ທ່ານກ່າວວ່າ,ໃນເວລາຟື້ນຟູແລະສ້າງສາເຂດປະສົບໄພຄືນໃຫມ່,ກະຊວງການຄ້າຈີນຍັງຈະສືບຕໍ່ຮ່ວມມືກັບອົງການຊ່ອຍເຫຼືອສາກົນຢ່າງໃກ້ຊິດ,ສືບຕໍ່ຈັດວາງເຄື່ອງຊ່ອຍເຫຼືອແລະສິ່ງທີ່ເຂດປະສົບໄພຕ້ອງການ ດ່ວນ.ໃນງານຖະແຫຼງຂ່າວ,ທ່ານເສີນເຕີມິງ ລັດຖະມົນຕີວ່າການກະຊວງການຄາຈີນຍັງກ່າວວ່າ,ແຜ່ນດິນໄຫວແຂວງເສສວນເທື່ອນີ້ໄດ້ສ້າງຄວາມເສຍຫາຍຢ່າງຫນັກຫນ່ວງ,ແຕ່ບໍ່ມີຜົນກະທົບຫຼາຍປານໃດຕໍ່ການສະຫນອງຂອງຕະຫຼາດໃນທົ່ວປະເທດ.
ແຂວງເສສວນແມ່ນແຫຼ່ງຜະລິດເຂົ້າ,ຊີ້ນແລະນ້ຳມັນພືດທີ່ສຳຄັນຂອງປະເທດ.ແຕ່ວ່າ,ບ່ອນທີ່ປະສົບໄພເທື່ອນີ້ແມ່ນເຂດພາກເຫນືອແຂວງເສສວນ ທີ່ເປັນເຂດພູດອຍ,ບໍ່ມີຜົນສະທ້ອນຫຼາຍຕໍ່ການຜະລິດພາຍໃນປະເທດ. ປະຈຸບັນ,ຈີນມີອາຫານ ນ້ຳມັນພືດແລະຊີ້ນແຮໄວ້ຢ່າງພຽງພໍ, ອາຫານແລະນ້ຳມັນພືດໃນລະດູຮ້ອນຈະມີຈຳນວນຫຼວງຫຼາຍກວ່າເກົ່າ,ການຜະລິດຊີ້ນຫມູ ພວມຟື້ນຟູໃຫ້ເປັນປົກກະຕິໃນຂອບເຂດທົ່ວປະເທດ.
ທ່ານຍັງເປີດເຜີຍວ່າ, ຮອດປະຈຸບັນ,ໄພແຜ່ນດິນໄຫວແຂວງເສສວນບໍ່ໄດ້ກະທົບກະເທືອນເຖິງການສົ່ງອອກຂອງຈີນໂດຍພື້ນຖານ.
|
