|
ປະມຸກລັດຈີນແລະຣັດເຊຍກ່າວວ່າ, ຊຸກຍູ້ການພົວພັນຄູ່ຮ່ວມມືຍຸດທະສາດຈີນຣັດເຊຍໃຫ້ຂະຫຍາຍຕົວເປັນຢ່າງດີກວ່າເກົ່າ
cri
ຕາມຂ່າວCRI, ວັນທີ23ພຶດສະພານີ້, ໃນເວລາເຈລະຈາກັນຢູ່ນະຄອນຫຼວງປັກກິ່ງ, ປະມຸກລັດຈີນແລະຣັດເຊຍກ່າວວ່າ, ຍິນດີພ້ອມກັນພະຍາຍາມ, ຊຸກຍູ້ການພົວພັນຄູ່ຮ່ວມມືຍຸດທະສາດລະຫວ່າງຈີນກັບຣັດເຊຍໃຫ້ຂະຫຍາຍໄປໜ້າດີກວ່າເກົ່າ.
ໂດຍໄດ້ຮັບຄຳເຊີນຂອງທ່ານຫູຈິນທ່າວ ປະທານປະເທດຈີນ, ວັນທີ23ພຶດສະພານີ້, ທ່ານດີມິຕຼີ ເມັດເວເດັບ ປະທານາທິບໍດີສະຫະພັນຣັດເຊຍໄດ້ເດີນທາງໄປຮອດປັກກິ່ງ, ເລີ່ມຢ້ຽມຢາມຈີນທາງລັດຖະກິດເປັນເວລາ2ມື້. ໃນເຈລະຈາກັບທ່ານເມັດເວເດັບ, ທ່ານຫູຈິນທ່າວກ່າວວ່າ, ແຕ່ຈີນກັບຣັດເຊຍສ້າງຕັ້ງການພົວພັນຄູ່ຮ່ວມມືຍຸດທະສາດ12ປີມານີ້, ສອງຝ່າຍໄດ້ສ້າງກົນໄກພົບປະຫາລືກັນລະດັບຕ່າງໆຢ່າງຄົບຖ້ວນ, ຮັກສາຄວາມໄວ້ເນື້ອເຊື່ອໃຈທາງການເມືອງໃນລະດັບສູງ, ການຮ່ວມມືເສດຖະກິດການຄ້າລະຫວ່າງສອງປະເທດໄດ້ຂະຫຍາຍອອກເລື້ອຍໆ, ການຮ່ວມມືໃນວຽກງານສາກົນແລະພາກພື້ນກໍໄດ້ຮັບຜົນດີເດັ່ນ. ທ່ານຫູຈິນທ່າວຫວັງໃຫ້ເພີ່ມທະວີຄວາມໄວ້ເນື້ອເຊື່ອໃຈທາງການເມືອງຕື່ມອີກ, ລົງເລິກການຮ່ວມມືທີ່ຕິດແທດຕົວຈິງ, ເພີ່ມທະວີມິດຕະພາບລະຫວ່າງປະຊາຊົນສອງຊາດຕື່ມອີກ.
ທ່ານເມັດເວເດັບກ່າວວ່າ, ການຂະຫຍາຍຕົວຂອງການພົວພັນຣັດເຊຍຈີນແມ່ນປັດໄຈສຳຄັນທີ່ຮັກສາສັນຕິພາບແລະສະຖຽນລະພາບຂອງໂລກ, ຝ່າຍຣັດເຊຍເອົາໃຈໃສ່ໃນລະດັບສູງຂະຫຍາຍການພົວພັນຄູ່ຮ່ວມມືຍຸດທະສາດກັບຈີນ. ຍິນດີພ້ອມກັບຝ່າຍຈີນອອກແຮງສຸດຂີດຊຸກຍູ້ການຮ່ວມມືຂອງສອງຝ່າຍໃນດ້ານເສດຖະກິດການຄ້າ ພະລັງງານ ວິທະຍາສາດເຕັກນິກແລະວັດທະນະທຳ, ເພີ່ມທະວີການສົນທະນາແລະປະສານສົມທົບກັນໃນບັນຫາສາກົນແລະພາກພື້ນທີ່ສຳຄັນ.
ທ່ານເມັດເວເດັບໄດ້ຕາງໜ້າລັດຖະບານແລະປະຊາຊົນຣັດເຊຍສະແດງຄວາມເຫັນໃຈແລະຄວາມຖາມຂ່າວມາຍັງລັດຖະບານຈີນອີກເທື່ອໜຶ່ງທີ່ເສຍຫາຍຢ່າງໜັກໜ່ວງໃນດ້ານຊີວິດແລະຊັບສິນໃນແຜ່ນດິນໄຫວທີ່ເກີດຂຶ້ນຢູ່ເມືອງເວິ້ນຊ່ວນແຂວງເສສວນ.
|
|
