|
|
 |
| (GMT+08:00)
2008-05-26 16:35:48
|
 |
|
ຈີນໃຊ້ມາດຕະການປ້ອງກັນໄພທີ່ຕາມມາຍ້ອນແຜ່ນດິນໄຫວ
cri
Author: mo
ປັດຈຸບັນ, ວຽກງານກູ້ໄພແຜ່ນດິນໄຫວຂອງຈີນພວມຂຸ້ນຂ້ຽວດຳເນີນຢູ່. ໃນກອງປະຊຸມຂ່າວທີ່ຫ້ອງການຖະແຫຼງຂ່າວຂອງລັດຖະບານຈັດຂຶ້ນໃນວັນທີ 25 ພຶດສະພານີ້, ເຈົ້າໜ້າທີ່ທີ່ກ່ຽວຂ້ອງແຈ້ງວ່າ, ຈີນໄດ້ເພີ່ມທະວິການເຕືອນໄພຕໍ່ລະບົບຊົນະປະທານທີ່ຖືກທຳລາຍຍ້ອນແຜ່ນດິນໄຫວແລະເວີງນ້ຳຫົ້ງ, ໄດ້ວາງແຜນການຫຼີກລ່ຽງສະພາບອັນຕະລາຍແລະແຜນການຍົກຍ້າຍປະຊາຊົນ. ທ່ານກ່າວວ່າ, ຈີນຈະພະຍາຍາມຫຼຸດໄພທີ່ຕາມມາໃຫ້ມີໜ້ອຍທີ່ສຸດ, ແລະຮັບປະກັນຄວາມປອດໄພດ້ານຊີວິດແລະຊັບສີນຂອງປະຊາຊົນ.
ໄພທີ່ຕາມມາຍ້ອນແຜ່ນດິນໄຫວແມ່ນໝາຍເຖິງໄພອື່ນໆທີ່ອາດຈະເກີດຂຶ້ນຍ້ອນແຜ່ນດິນໄຫວ. ຕົວຢ່າງວ່າ: ແຜ່ນດິນໄຫວອາດຈະເຮັດໃຫ້ມີພະຍາດລະບາດ, ອາດຈະເຮັດໃຫ້ເຂື່ອນອ່າງນ້ຳຖືກທຳລາຍແລ້ວເວີງນ້ຳກໍຈະຍື່ງຂຶ້ນ ແລ້ວເຮັດໃຫ້ເກີດນ້ຳຖ້ວມ, ຫຼືອາດເຮັດໃຫ້ທໍ່ສົ່ງຂອງວິສາຫະກິດອຸດສາຫະກຳເຄມີຂາດ, ແລ້ວເຮັດໃຫ້ທາດພິດໄຫຼອອກມາເຊື່ອມພິດຕໍ່ສິ່ງແວດລ້ອມ, ແລະອື່ນໆ. ນັບມາຮອດປັດຈຸບັນ, ເຂດແຜ່ນດິນໄຫວບໍ່ໄດ້ເກີດພະຍາດລະບາດແລະເຫດການເຊື່ອມພິດສິ່ງແວດລ້ອມໃດໆ. ແຕ່ແຜ່ນດິນໄຫວໄດ້ເຮັດໃຫ້ສິ່ງກໍ່ສ້າງຊົນລະປະທານຈຳນວນໜຶ່ງໃນເຂດປະສົບໄພເປ່ເພໃນລະດັບໃດໜຶ່ງ, ເວີງນ້ຳຫົ້ງທີ່ເກີດຂຶ້ນຍ້ອນແຜ່ນດິນໄຫວກໍ່ໄດ້ສ້າງໄພຂົ່ມຂູ່ອັນໜັກໜ່ວງແກ່ຍ່ານໃຕ້ຂອງແມ່ນ້ຳ.
ໃນກອງປະຊຸມຂ່າວທີ່ຫ້ອງການຖະແຫຼງຂ່າວລັດຖະບານຈັດຂຶ້ນໃນວັນທີ 25 ພຶດສະພານີ້, ທ່ານເອີ້ຈີ້ງພິງ ລັດຖະມົນຕີຊ່ວຍວ່າການກະຊວງຊົນລະປະທານຈີນກ່າວວ່າ, ນັບມາຮອດ 8 ໂມງຂອງວັນທີ 25 ພຶດສະພານີ້, ແຜ່ນດິນໄຫວໄດ້ເຮັດໃຫ້ອ່າງນ້ຳ 2 ພັນກວ່າແຫ່ງມີສະພາບອັນຕະລາຍ, ໃນນັ້ນ, ຢູ່ໃນເຂດແຂວງເສສວນມີ 70% ຂຶ້ນໄປ. ທ່ານກ່າວວ່າ:
"ປະຈຸບັນ, ອ່າງນ້ຳທີ່ຖືກທຳລາຍຍ້ອນແຜ່ນດິນໄຫວໃນແຂວງເສສວນໄດ້ມີ 69 ແຫ່ງບໍ່ມີນ້ຳແລ້ວ, 826 ແຫ່ງໄດ້ໃຊ້ມາດຕະການເຮັດໃຫ້ນ້ຳຫຼຸດໜ້ອຍລົງ, ໄດ້ຮັບປະກັນຄວາມປອດໄພຂອງອ່າງນ້ຳຢ່າງບັງເກີດຜົນ."
ນອກຈາກຮັບປະກັນຄວາມປອດໄພຂອງອ່າງນ້ຳແລ້ວ, ເວົ້າສຳລັບການປ້ອງກັນໄພທີ່ຕາມມາ, ເວີງນ້ຳຫົ້ງກໍ່ແມ່ນຈຸດສຳຄັນແລະຈຸດຫຍຸ້ງຍາກ. ເວີງນ້ຳຫົ້ງໝາຍເຖີງໜອງທີ່ເກີດຂຶ້ນຍ້ອນແຜ່ນດິນໄຫວເຮັດໃຫ້ພູເຈື່ອນ, ດິນໄຫຼລົງມາຕັນທາງນ້ຳ, ເຮັດໃຫ້ນ້ຳຍື່ງຂຶ້ນ. ຖ້າດິນທີ່ຕັນນ້ຳຖືກທຳລາຍ, ນ້ຳໜອງຈະມາກຂຶ້ນແລະໄຫຼອອກມາ, ກາຍເປັນນ້ຳນອງທີ່ອັນຕະລາຍທີ່ສຸດ.
ທ່ານເອີ້ຈີ້ງພີງກ່າວວ່າ, ພາຍຫຼັງເກີດແຜ່ນດິນໄຫວແລ້ວ, ກະຊວງຊົນລະປະທານຈີນໄດ້ຂ້ຽວຈັດຕັ້ງພະນັກງານວິຊາການຢ່າງຫຼວງຫຼາຍ, ປັດຈຸບັນ, ໄດ້ຮູ້ຈັກຂະໜາດ, ອົງປະກອບທໍລະນີ, ສະພາບເກັບນ້ຳຂອງເວີງນ້ຳຫົ້ງແລະຜົນສະທ້ອນທີ່ມີຕໍ່ຍ່ານໃຕ້ໃນຂັ້ນພື້ນຖານແລ້ວ. ໃນເວີງນ້ຳຫົ້ງເຫຼົ່ານີ້, ເປັນໄພຂົ່ມຂູ່ໃຫຍ່ກວ່າໝູ່ ແລະອັນຕະລາຍກວ່າໝູ່ກໍ່ແມ່ນເວີງນ້ຳຫົ້ງຖາງເຈຍຊ່ານທີ່ຢູ່ໃກ້ເຂດໃຈກາງແຜ່ນດິນໄຫວ. ທ່ານລີວນິງແມ່ນວິສະວະກອນໃຫຍ່ຂອງກະຊວງຊົນລະປະທານຈີນ, ທ່ານກ່າວວ່າ, ປັດຈຸບັນ, ພາກສ່ວນທີ່ກ່ຽວຂ້ອງໄດ້ສ້າງຈຸດວັດແທກ 4 ຈຸດຢູ່ເວີງນ້ຳຫົ້ງຖາງເຈ່ຍຊ່ານ, ເພື່ອວັດແທກຕະຫຼອດ 24 ຊົ່ວໂມງ, ຖ້າເກີດສະພາບອັນຕະລາຍຈະແຈ້ງໃຫ້ຍ່ານໃຕ້ຊາບໃນທັນທີ. ທ່ານກ່າວວ່າ:
"ອົງການປົກຄອງທ້ອງຖິ່ນກໍໄດ້ວາງແຜນການຍົກຍ້ານປະຊາຊົນຢູ່ຍ່ານໃຕ້, ຖ້າລະດັບຄວາມສ່ຽງສູງຂຶ້ນ, ຈະເລີ່ມປະຕິບັດແຜນການໃນທັນທີ. ມາດຕະການເຫຼົ່ານີ້ມີຈຸດປະສົງວ່າໃຫ້ຫຼຸດໄພທີ່ຕາມມາໃຫ້ມີໜ້ອຍທີ່ສຸດ, ຮັບປະກັນຄວາມປອດໄພຂອງຊີວິດແລະຊັບສີນຂອງປະຊາຊົນໃນຍ່ານໃຕ້."
ປັດຈຸບັນ, ແຜນການກູ້ໄພເວີງນ້ຳຫົ້ງຖາງເຈ່ຍຊ່ານໄດ້ມີການດັບແປງໜ້ອຍໜຶ່ງຄື: ຈາກແຜນການເກົ່າທີ່ໃຊ້ອຸປະກອນຂະໜາດໃຫຍ່ມາຂຸດເວີງນ້ຳຫົ້ງໃຫ້ນ້ຳໄຫຼອອກມາປ່ຽນເປັນສອງແຜນການດຳເນີນພ້ອມກັນຄືທັງຂຸດດິນທັງລະເບີດດິນທີ່ຕັນນ້ຳ, ສ່ວນຫຼາຍຈະໃຊ້ການລະເບີດ.
ຕາມຂ່າວຫຼ້າສຸດ, ກອງກູ້ໄພວິຊາການຂອງກອງຕຳຫຼວດປະກອບອາວຸດທີ່ຮັບຜິດຊອບຄວາມປອດໄພດ້ານນ້ຳແລະໄຟຟ້າໄດ້ເດີນທາງໄປຮອດຈອມເວີງນ້ຳຫົ້ງຖາງເຈ່ຍຊ່ານໃນ 0 ໂມງ 35 ນາທີຂອງວັນທີ 26 ພຶກສະພານີ້, ແລະໄດ້ປະຕິບັດໜ້າທີ່ກູ້ໄພໃນທັນທີ.
|
|
|
