|
ເຖິງວ່າແຜ່ນດິນໄຫວແຮງຢູ່ແຂວງເສສວນຈີນໄດ້ພາໃຫ້ມີຜູ້ເສຍຊີວິດແລະບາດເຈັບຈຳນວນຫຼວງຫຼາຍແລະເສຍຫາຍທາງຊັບສິນຢ່າງໜັກໜ່ວງ, ແຕ່ຫວ່າງມໍ່ໆນີ້, ໃນເວລາໃຫ້ສຳພາດຕໍ່ນັກຂ່າວCRI, ຊ່ຽວຊານທີ່ກ່ຽວຂ້ອງກ່າວວ່າ, ຜົນກະທົບທາງລົບທີ່ແຜ່ນດິນໄຫວນຳມາໃຫ້ເສດຖະກິດຈີນແມ່ນຈຳກັດຢູ່ໃນບາງພາກສ່ວນຊົ່ວຄາວເທົ່ານັ້ນ, ມັນຈະບໍ່ກະທົບເຖິງການພັດທະນາຂອງເສດຖະກິດຈີນ.
ແຜ່ນດິນໄຫວທີ່ເກີດຂຶ້ນຢູ່ເມືອງເວິ້ນຊ່ວນແຂວງເສສວນໃນວັນທີ12ພຶດສະພານີ້ແມ່ນໄພແຜ່ນດິນໄຫວທີ່ກະທົບເຖິງບໍລິເວນກວ້າງຂວາງທີ່ສຸດນັບແຕ່ປີ1949ມານີ້. ນັບມາຮອດປະຈຸບັນ, ແຜ່ນດິນໄຫວໄດ້ເຮັດໃຫ້6ໝື່ນກວ່າຄົນເສຍຊີວິດ. ຍັງເຮັດໃຫ້ພື້ນຖານໂຄງລ່າງຕ່າງໆ, ເຊັ່ນໄຟຟ້າ ການສື່ສານແລະຖະໜົນຫົນທາງຖືກທຳລາຍຢ່າງໜັກໜ່ວງ; ໂຮງງານ1ໝື່ນ4ພັນກວ່າແຫ່ງຖືກທຳລາຍ, ເສຍຫາຍທາງເສດຖະກິດໂດຍກົງເຖິງ67ຕື້ຢວນ. ພ້ອມກັນນັ້ນ, ຢູ່ເຂດປະສົບໄພ, ການຜະລິດກະສິກຳກໍຖືກທຳລາຍຢ່າງໜັກໜ່ວງ, ເຄື່ອງປູກຂອງຝັງຫຼາຍໝື່ນເຮັກຕາຖືກທຳລາຍ.
ທ່ານອີ້ຊ້ຽນຢົງ ນັກຄົ້ນຄວ້າຂອງສະຖາບັນຄົ້ນຄວ້າການເງິນຂອງສະພາບັນດິດວິທະຍາສາດສັງຄົມຈີນກ່າວວ່າ,
ເຖິງວ່າແຜ່ນດິນໄຫວຄັ້ງນີ້ເປັນການກະທົບຢ່າງຮ້າຍແຮງຕໍ່ເສດຖະກິດທ້ອງຖິ່ນກໍຕາມ, ແຕ່ເມື່ອສັງເກດຈາກບໍລິເວນທົ່ວປະເທດແລ້ວ, ຜົນກະທົບນີ້ກໍ່ບໍ່ແຮງຫຼາຍ. ເຖິງວ່າຄວາມເສຍຫາຍໃນແຜ່ນດິນໄຫວຄັ້ງນີ້ໜັກໜ່ວງຫຼາຍ, ແຕ່ກວມອັດຕາGDPບໍ່ຫຼາຍປານໃດ. ສະນັ້ນ, ຜົນກະທົບຕໍ່ເສດຖະກິດກໍ່ບໍ່ເຖິງຂະໜາດແຮງເກີນໄປ.
ນອກນີ້, ໂດຍແນໃສ່ຄວາມເປັນຫ່ວງທີ່ຢ້ານວ່າແຜ່ນດິນໄຫວອາດຈະເພີ່ມຄວາມກົດດັນໃຫ້ເກີດໄພເງິນເຟີ້ຢູ່ຈີນ, ທ່ານອີ້ຊ້ຽນຢົງເຫັນວ່າ,
ເວົ້າໃນດ້ານຜົນກະທົບຕໍ່ລາຄາສິນຄ້າ, ໃນໄລຍະສັ້ນອາດຈະມີການກະທົບຫຼາຍດ້ານຈິດໃຈໃນທົ່ວປະເທດ. ແຕ່ທີ່ຈິງແລ້ວລາຄາເຄື່ອງຂອງກໍ່ຈະບໍ່ສູງເກີນໄປ, ຈະບໍ່ກ່ຽວພັນເຖິງCPIຫຼາຍປານໃດ.
ບໍ່ແຮ່ສັງກະສີ,ຊືນແລະອາລຸຍມີຍົມຂອງເສສວນມີບົດບາດສຳຄັນໃນທົ່ວປະເທດ,ແຜ່ນດິນໄຫວບໍ່ພາໃຫ້ຊັບພະຍາກອນທຳມະຊາດມີການເສຍຫາຍຫຍັງ,ພຽງແຕ່ເຮັດໃຫ້ໂຮງຈັກໂຮງງານເພພັງ,ເຄື່ອງຜະລິດໄຟຟ້າແລະທາງຄົມມະນາຄົມແລະພື້ນຖານໂຄງລ່າງອື່ນໆຖືກທຳລາຍ.ເຖິງວ່າໃນໄລຍະໜຶ່ງອາດຈະກະທົບເຖິງລາຄາອຸບປະກອນໂລຫະໃນທົ່ວປະເທດ,ແຕ່ເມື່ອການຜະລິດຟື້ນຟູຄືນມາ,ລາຄາກໍຈະເຂົ້າສູ່ສະພາບປົດກກະຕິ.
ນອກນີ້,ເຊສວນມີບົດບາດສຳຄັນໃນການສະໜອງຜະລິດຕະພັນກະສິກຳຂອງຈີນ,ການຜະລິດທັນຍາຫານກວມ6%ຂອງຍອດຜົນຜະລິດທົ່ວປະເທດ,ພືດນ້ຳມັນກວມ8%.ແຕ່ວ່າເຂດພາກເໜືອຂອງເສສວນທີ່ປະສົບໄພຮ້າຍແຮງເທື່ອນີ້,ອັດຕາຜະລິດເຂົ້າສິນຄ້າຍັງອ່າວຕ່ຳ,ທ່ານເວິ່ຍຊາວອ່ານ ລັດຖະມົນຕີຊ່ວຍວ່າການກະຊວງກະສິກຳຈີນກໍ່ເຄີຍກ່າວວ່າ,ແຜ່ນດິນໄຫວຈະບໍ່ມີຜົນກະທົບແຮງປານໃດຕໍ່ການສະໜອງຜົນຜະລິດໃຫ້ຕະຫຼາດແລະລາຄາຂອງຜົນຜະລິດກະສິກຳ:
"ໄພແຜ່ນດິນໄຫວເທືອນີ້ໄດ້ພາໃຫ້ກະສິກຳເສຍຫາຍຢ່າງໃຫຍ່ຫຼວງ,ແຕ່ວ່າ,ສະພາບການຜະລິດທາງກະສິກຳໃນທົ່ວປະເທດປີນີ້ຍັງໝັ້ນທ່ຽງ,ສະນັ້ນ,ຜົນກະທົບຕໍ່ການພັດທະນາກະສິກຳທົ່ວປະເທດແມ່ນມີຈຳກັດ,ລາຄາຜະລິດຕະພັນກະສິກຳກໍ່ຍັງໝັ້ນທ່ຽງໂດຍທົ່ວໄປ."
ປັດຈຸບັນ,ລັດຖະບານຈີນໄດ້ຈັດວາງການສ້າງສາຄືນໃໝ່ແລະຟື້ນຟູການຜະລິດເຂົ້າໃນຕາລາງເວລາປະຈຳວັນແລ້ວ,ການເງິນສູນກາງໄດ້ຈັດວາງງົບປະມານ70ຕື້ຢວນ,ສ້າງຕັ້ງກອງທຶນສ້າງຄືນໃໝ່ເພື່ອຟື້ນຟູຫຼັງເກີດໄພ.ທ່ານອີ້ຊ້ຽນປົງ ນັກຄົ້ນຄວ້າຂອງສະຖາບັນຄົ້ນຄວ້າການເງິນຂອງສະພາບັນດິດວິທະຍາສາດສັງຄົມຈີນເຫັນວ່າ,ເມື່ອລັດຖະບານກາງໃຊ້ລົບປະມານຢ່າງຫຼວງຫຼາຍແລ້ວ,ການກໍ່ສ້າງຖະໜົນຫົນທາງ, ສິ່ງກໍ່ສ້າງສາທາລະນະໃນຕົວເມືອງ,ແລະເຮືອນຊານເປັນຕົ້ນກໍສາມາດຟື້ນຟູເຖິງລະດັບກ່ອນເກີດໄພພາຍໃນເວລາສັ້ນ,ການທຸ້ມເທການເງິນຢ່າງໃຫຍ່ຫຼວງຂອງລັດຖະບານບໍ່ພຽງແຕ່ບໍ່ກະທົບການເຕີບໂຕຂອງGDPໃນປີນີ້ທໍ່ນັ້ນ , ກົງກັນຂ້າມ,ຍັງອາດຈະກາຍເປັນປັດໄຈອັນສຳຄັນອັນໜຶ່ງທີ່ຈະຊຸກຍູ້ໃຫ້GDPເຕີບໂຕ.
|
