|
ແຜ່ນດິນໄຫວຢູ່ເມືອງເວິ້ນຊ່ວນແຂວງເສສວນຈີນໄດ້ຜ່ານໄປ2ອາທິດປາຍແລ້ວ.ໃນການກູ້ໄພນັ້ນ,ການປ້ອງກັນພະຍາດໄດ້ຖືເປັນວຽກສຳຄັນທີ່ຕ້ອງດຳເນີນຢ່າງຮອບດ້ານຢູ່ເຂດປະສົບໄພ.ວັນທີ27 ພຶດສະພານີ້,ຢູ່ປັກກິ່ງ,ທ່ານຊຸ່ນເຈ່ຍໄຮ ໂຄສົກຖະແຫຼງຂ່າວຂອງກະຊວງສາທາລະນະສຸກຈີນກ່າວວ່າ,ຕາມບ້ານ,ຕາແສງແລະເມືອງແລະບ່ອນຢູ່ຊົ່ວຄາວຂອງມວນຊົນທີ່ປະສົບໄພລ້ວນແຕ່ມີໂຮງໝໍກອບກູ້ແລະປົວພະຍາດ,ມີຜູ້ຕິດຕາມກວດກາປ້ອງກັນພະຍາດແລະມີອຸປະກອນປິ່ນປົວພະຍາດໂດຍທົ່ວໄປ,ປະຈຸບັນ,ໃນເຂດປະສົບໄພບໍ່ມີພະຍາດຕິດແປດຮຸນແຮງແລະບັນຫາສາທາລະນະສຸກສຸກເສີນເກີດຂຶ້ນ.ຕໍ່ໄປເຊີນຟັງການລາຍງານລະອຽດ:
ແຜ່ນດິນໄຫວຮ້າຍແຮງຢູ່ເມືອງເວິ້ນເຊ່ວນແຂວງເສສວນ,ໄດ້ພາໃຫ້ເງື່ອນໄຂອະນາໄມໃນເຂດປະສົບໄພບໍ່ສະດວກ.ທ່ານຊຸ່ນເຈ່ຍໄຮ ໂຄສົກຖະແຫຼງຂ່າວຂອງກະຊວງສາທາລະນະສຸກຈີນກ່າວວ່າ,ຂະແໜງການສາທາລະນະສຸກຈີນດ້ານໜຶ່ງໄດ້ຂຸ້ນຂ້ຽວກອບກູ້ປິ່ນປົວເອົາຜູ່ບາດເຈັບ,ອີກດ້ານໜຶ່ງ,ຍັງຕັ້ງໜ້າດຳເນີນວຽກງານກັນພະຍາດ,ເຮັດອະນາໄມຢູ່ເຂດປະສົບໄພ.
"ນັບມາຮອດ12ໂມງຂອງວັນທີ27 ພຶດສະພານີ້,ກະຊວງສາທາລະນະສຸກຈີນໄດ້ສັບຊ້ອນເອົາແຕ່ງພະນັກງານປ້ອງກັນພະຍາດແລະຕິດຕາມກວດກາທາງອະນາໄມ4939ຄົນຈາກ30ແຂວງກຳແພງນະຄອນແລະເຂດປົກຄອງຕົນເອງໃນທົ່ວປະເທດ,ສົ່ງໄປເຣັດວຽກຢູ່ເຂດປະສົບໄພ.ກະຊວງສາທາລະນະສຸກຍັງພ້ອມກັນກັບພາກສ່ວນຕ່າງໆຄືກອງທັບ,ກະສິກຳ,ວຽກປົກຄອງແລະປະຊາສົງເຄາະແລະການປ້ອງກັນຄວາມສະຫງົບເປັນຕົ້ນສ້າງຕັ້ງກົນໄກຮ່ວມມືປ້ອງກັນພະຍາດ.ແບ່ງໜ້າທີ່ຮັບຜິດຊອບປ້ອງກັນະຍາດເຖິງບຸກຄົນ,ບັນລຸການປ້ອງກັນພະຍາດຢ່າງຮອບດ້ານຢູ່ເຂດປະສົບໄພ." ປະຈຸບັນ, ຢູ່ເມືອງທີ່ປະສົບໄພໜັກໜ່ວງໄດ້ພົ່ນຢາຂ້າເຊື້ອທຸກມື້. ພາກສ່ວນສາທາລະນະສຸກ ປ້ອງກັນຄວາມສະຫງົບແລະພາກສ່ວນກະສິກຳຍັງໄດ້ຂ້າເຊື້ອແລະມ້ຽນສົບຜູ້ເສຍຊີວິດ1ໝື່ນ8ພັນກວ່າສົບ, ຊຳລະຂ້າເຊື້ອຊາກສັດ20ລ້ານກວ່າໂຕ. ເຈົ້າໜ້າທີ່ຕິດຕາມກວດກາສາທາລະນະສຸກໄດ້ຕິດຕາມກວດກາອາຫານແລະນ້ຳດື່ມທີ່ຈັດສົ່ງໃຫ້ມວນຊົນຢູ່ບ່ອນຢູ່ຊົ່ວຄາວແລະບ່ອນກິນດື່ມຢ່າງຮອບດ້ານ, ແລະໄດ້ຕິດຕາມກວດສອບສະພາບການສະໜອງນ້ຳຢູ່ເຂດປະສົບໄພ. ນັບມາຮອດເວລາ12ໂມງຂອງວັນທີ27ພຶດສະພານີ້, ຢູ່ເຂດປະສົບໄພບໍ່ໄດ້ລາຍງານມີພະຍາດຕິດແປດທີ່ຮ້າຍແຮງແລະບັນຫາສາທາລະນະສຸກສຸກເສີນ.
ທ່ານຊຸ່ນເຈ່ຍໄຫກ່າວວ່າ, ແຜ່ນດິນໄຫວໄດ້ທຳລາຍລະບົບລາຍງານພະຍາດຂອງເຂດປະສົບໄພຢ່າງໜັກໜ່ວງ, ແຕ່ພາຍຫຼັງມາໄດ້ໃຊ້ມາດຕະການ,ຜ່ານເຄືອຂ່າຍໂທລະສັບມືຖືລາຍງານສະພາບພະຍາດໂດຍກົງ, ປະຈຸບັນການຕິດຕາມພະຍາດແບບນີ້ໄດ້ເຜີຍແຜ່ທົ່ວໄປຢ່ທຸກູເມືອງແລະຕາແສງໃນເຂດປະສົບໄພແລະບ່ອນຢູ່ຊົ່ວຄາວຂອງຜູ້ປະສົບໄພ. ປະຈຸບັນ, ພາກສ່ວນສາທາລະນະສຸກໄດ້ຮັບການລາຍງານພະຍາດຕິດແປດບາງຢ່າງ, ເຊັ່ນວັນນະໂລກ ຕັບອັກເສບ ແລະຖອກທ້ອງເປັນຕົ້ນ. ແຕ່ບໍ່ມີການລາຍງານພະຍາດຕິດແປດຮ້າຍແຮງແລະເຫດການສາທາລະນະສຸກສຸກເສີນເກີດຂຶ້ນຢ່າງຂະໜາດໃຫຍ່.
ທ່ານຊຸ່ນເຈ່ຍໄຫກ່າວວ່າ, ປະຈຸບັນພວມຢູ່ໃນໄລຍະລະດູຮ້ອນທີ່ມັກເກີດພະຍາດຕິດແປດ, ກະຊວງສາທາລະນະສຸກຈະໃຊ້ມາດຕະການຕ່າງໆເພື່ອເພີ່ມທະວີວຽກງານປ້ອງກັນພະຍາດຕື່ມອີກຢູ່ເຂດປະສົບໄພ. ທ່ານກ່າວວ່າ,
ໂດຍແນໃສ່ກຸ່ມຄົນສ່ຽງ ເຂດສ່ຽງແລະພະຍາດທີ່ມັກເປັນຫຼັງເກີດໄພ, ພວກເຮົາຈະໃຊ້ມາດຕະການແຂງແຮງຕ່າງໆ, ເຊັ່ນ ສົ່ງຊ່ຽວຊານປ້ອງກັນພະຍາດທີ່ມີປະສົບການ,ໄດ້ເຮັດວຽກງານປ້ອງກັນພະຍາດໃຫ້ດີກວ່າເກົ່າ. ຮ່ວມກັນກັບພາກສ່ວນທີ່ກ່ຽວຂ້ອງສືບຕໍ່ພົ່ນຢາຂ້າເຊື້ອມ້ຽນສົບຜູ້ເສຍຊີວິດແລະສັດຕາຍ, ຄວບຄຸມແຫຼ່ງເຊື້ອພະຍາດຕິດແປດຢ່າງເຄັ່ງຄັດ. ພ້ອມທັງຕັ້ງໜ້າຈັດຕັ້ງວຽກງານສັກຢາວັກແຊງໃຫ້ກຸ່ມຄົນສ່ຽງເພື່ອສ້າງພູມຄຸ້ມກັນພະຍາດຂຶ້ນ.
ທ່ານຊຸ່ນເຈ່ຍໄຫກ່າວວ່າ, ວຽກງານປ້ອງກັນພະຍາດຢູ່ເຂດປະສົບໄພບໍ່ມີເວລາສິ້ນສຸດອັນແນ່ນອນ, ວ່າແຕ່ຍັງມີຄວາມຈຳເປັນ, ວຽກງານປ້ອງກັນພະຍາດກໍຍັງເຮັດຕໍ່ໄປ.
|
