|
ຕາມຂ່າວCRI: ວັນທີ 31 ພຶດສະພານີ້ຢູ່ທີ່ປັກກກິ່ງ, ທ່ານເວີນເຈ່ຍປາວ ກຳມະການປະຈຳກົມການເມືອງສູນກາງພັກກອມມູນິດຈີນ ນາຍົກລັດຖະມົນຕີຈີນໄດ້ພົບປະທ່ານນົງດຶກແມັງ ເລຂາທິການໃຫຍ່ສູນກາງພັກກອມມູນິດຫວຽດນາມ.
ກ່ອນອື່ນ, ທ່ານເວີນເຈ່ຍປາວໄດ້ຂອບໃຈນຳຫວຽດນາມໃຫ້ການສະໜັບສະໜູນອັນລ້ຳຄ່າແກ່ການຕໍ່ສູ້ຕ້ານໄພກູ້ໄພຂອງຈີນ. ທ່ານເວີນເຈ່ຍປາວກ່າວວ່າ, ພັກແລະລັດຖະບານຈີນເອົາໃຈໃສ່ນຳການຂະຫຍາຍການພົວພັນລະຫວ່າງຈີນກັບຫວຽດນາມຈາກລະດັບສູງດ້ານຍຸດທະສາດ. ທ່ານກ່າວວ່າ, ຄວນເລັ່ງລັດຫາລືເຊັນແລະປະຕິບັດ"ແຜນການພັດທະນາ 5 ປີຂອງການຮ່ວມມືດ້ານເສດຖະກິດການຄ້າລະຫວ່າງຈີນຫວຽດນາມ", ໃຊ້ມາດຕະການໃຫ້ຜົນປະໂຫຍດແກ່ກັນທີ່ແຂງແຮງກວ່າເກົ່າໃນດ້ານການພັດທະນາຕະຫຼາດແລະເພີ່ມທະວີການລົງທຶນ, ລັດຖະບານຈີນຕັ້ງໜ້າສະໜັບສະໜູນການກໍ່ສ້າງເຂດຮ່ວມມືເສດຖະກິດການຄ້າຈີນຫວຽດນາມ, ເພື່ອໃຫ້ວິສາຫະກິດຈີນລົງທຶນຢູ່ຫວຽດນາມຫຼາຍກວ່າເກົ່າ.
ທ່ານນົງດຶກແມັງເຫັນດີນຳຂໍ້ສະເໜີຂອງທ່ານເວີນເຈ່ຍປາວກ່ຽວກັບການຂະຫຍາຍການພົວພັນລະຫວ່າງສອງປະເທດຢ່າງຮອບດ້ານໂດຍສະເພາະແມ່ນເພີ່ມທະວີການຮ່ວມມືດ້ານເສດຖະກິດການຄ້າລະຫວ່າງສອງປະເທດ. ທ່ານກ່າວວ່າ, ທ່ານໄດ້ເຈລະຈາກັບທ່ານຫູຈີນທ່າວ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນຢ່າງສຳເລັດຜົນໃນວັນທີ 30 ພຶດສະພານີ້. ຫວຽດນາມພະພະຍາຍາມຮ່ວມກັນກັບຈີນ, ເພື່ອຈັດຕັ້ງປະຕິບັດຄວາມຮັບຮູ້ຄືກັນເຫຼົ່ານີ້ຢ່າງສຸດຂີດ, ຊຸກຍູ້ມິດຕະພາບທີ່ມີມູນເຊື້ອລະຫວ່າງຫວຽດນາມຈີນກ້າວໄປສູ່ອະນາຄົດທີ່ງົດງາມກວ່າເກົ່າ.
|
