|
ນັບແຕ່ເດືອນມິຖຸນານີ້ເປັນຕົ້ນໄປ, ມາດຕະການອະນຸລັກສິ່ງແວດລ້ອມໃໝ່ອັນໜຶ່ງໄດ້ເຜີຍແຜ່ປະຕິບັດຢ່າງຮອບດ້ານຢູ່ຈີນ, ຄື ຢູ່ຊູເປີມາເກັດ ຮ້ານຄ້າແລະຕະຫຼາດສົດເປັນຕົ້ນເລີ່ມປະຕິບັດມາດຕະການທີ່ໃຊ້ຖົງປຼາສຕິກຕ້ອງເສຍຄ່າ, ບໍ່ໃຫ້ຮ້ານຄ້າສະໜອງຖົງປຼາສຕິກໂດຍບໍ່ຈ່າຍເງິນ. ຫຼັງຈາກປະຕິບັດມາດຕະການດັ່ງກ່າວແລ້ວ, ຈຳນວນການໃຊ້ຖົງປຼາສຕິກອາດຈະຫຼຸດລົງ2ສ່ວນ3.
ຕາມສະຖິຕິ, ໃນຫຼາຍປີມໍ່ໆມານີ້, ແຕ່ລະມື້ຈີນໄດ້ໃຊ້ຖົງປຼາສຕິກຊະນິດຕ່າງໆເກືອບ3ຕື້ຖົງ. ຖົງປຼາສຕິກລະລາຍຍາກ, ບໍ່ວ່າຈູດເຜົາຫຼືຝັງຢູ່ໃຕ້ດິນ, ລ້ວນແຕ່ຈະສ້າງມົນລະພິດຕໍ່ສິ່ງແວດລ້ອມຢ່າງໜັກໜ່ວງ. ເພື່ອຊີ້ນຳແລະສົ່ງເສີມໃຫ້ມວນຊົນໃຊ້ຖົງປຼາສຕິກຢ່າງສົມເຫດສົມຜົນ, ຊຸກຍູ້ນຳໃຊ້ຊັບພະຍາກອນຢ່າງສັງລວມ, ອະນຸລັກສິ່ງແວດລ້ອມ. ໃນຕົ້ນປີນີ້, ຈີນປະກາດຈະເກັບຄ່າຖົງປຼາສຕິກຢູ່ຮ້ານຂາຍຍ່ອຍຕ່າງໆ. ເມື່ອໂຄສະນາແລະກະກຽມເປັນເວລາເກືອບ5ເດືອນ, ມາດຕະການດັ່ງກ່າວໄດ້ເລີ່ມປະຕິບັດຢ່າງເປັນທາງການແຕ່ວັນທີ1ມິຖຸນານີ້.
ວັນທີ1ມິຖຸນານີ້, ຢູ່ຮ້ານຄ້າໃຫຍ່ແລະຮ້ານຊູເປີມາເກັດຕ່າງໆຂອງປັກກິ່ງ, ນັກຂ່າວໄດ້ເຫັນວ່າ, ທາງຮ້ານຄ້າໄດ້ຕິດປະກາດແຈ້ງຂ່າວທີ່ເກັບຄ່າຖົງປຼາສຕິກຢູ່ບ່ອນທີ່ເຫັນງ່າຍ. ປະຊາຊົນຫຼາຍຄົນໄດ້ເອົາກະຕ່າຫຼືຖົງຜ້າຂອງຕົນມາຊື້ສິນຄ້າ. ເຂົາເຈົ້າໄດ້ສະແດງຄວາມສະໜັບສະໜູນຕໍ່ມາດຕະການດັ່ງກ່າວເປັນຢ່າງດີ.
(ຍິງ)ລຶ້ງແລ້ວ, ຂ້ອຍເອົາຖົງຂອງຕົນເອງມາຊື້ເຄື່ອງຂອງ, ແຕ່ກ່ອນກໍ່ແມ່ນເອົາກະຕ່າແລະຖົງຜ້າ, ຕໍ່ມາໄດ້ໃຊ້ຖົງປຼາສຕິກ. ດຽວນີ້ຍ້ອນວ່າມັນເປັນມົນລະພິດຕໍ່ສິ່ງແວດລ້ອມ, ກໍ່ບໍ່ໃຊ້ແລ້ວ, ເອົາກະຕ່າແລະຖົງຜ້າມາຊື້ເຄື່ອງຂອງ, ກໍສະດວກດີ.
(ຊາຍ)ເພື່ອອະນຸລັກສິ່ງແວດລ້ອມ, ສ້າງງານກິລາໂອລິມປິກສີຂຽວໄດ໋, ພວກເຮົາໃຊ້ຖົງຜ້າຂອງຕົນ, ບໍ່ໃຊ້ຖົງປຼາສຕິກ. ເພາະວ່າມັນສ້າງມົນລະພິດຫຼາຍ.
ຢູ່ຕະຫຼາດກະສິກຳທີ່ຖືວ່າຈັດຕັ້ງປະຕິບັດຄຳສັ່ງນີ້ອ່າວຍາກ,ນັກຂ່າວໄດ້ສຳພາດພໍ່ຄ້າບາງຄົນ,ພວກເຂົາເຈົ້າກ່າວວ່າ,ເຖິງວ່າຂໍ້ກຳນົດໃໝ່ອາດຈະສົ່ງຜົນສະທ້ອນຕໍ່ການຊື້ຂາຍ,ແຕ່ວ່າກໍ່ຍັງມີຜົນດີທີ່ປະຢັດຕົ້ນທຶນ.
ທຽບກັບວິທີເຮັດຂອງບາງປະເທດແລະພາກພື້ນທີ່ຫ້າມໃຊ້ຖົງປະລັດສະຕິກຢ່າງຮອບດ້ານ,ຈີນບໍ່ໃຊ້ວິທີທີ່ເຮັດແບບເດັດຂາດ,ແຕ່ແມ່ນການຫ້າມຜະລິດແລະໃຊ້ຖົງປະລັດສະຕິກບາງທີ່ສຸດທີ່ໃຊ້ຫຼາຍເທື່ອບໍ່ໄດ້,ແລະຫຼຸດຜ່ອນການໃຊ້ຖົງປະລັດສະຕິດໄດ້ມາດຕະຖານໂດຍຜ່ານວິທີທີ່ເກັບເງິນ.
ທ່ານຈ່າງຊຽງ ຫົວໜ້າຫ້ອງການຄຸ້ມຄອງລະບຽບຈໍລະຈອນຂອງພະແນກການຄ້າປັກກິ່ງວ່າ,ຖົງປະລັດສະຕິກເກັບຄ່າທີ່ໄດ້ມາດຕະຖານມີມາດຕະຖານແລະຂະໜາດອັນເຄັ່ງຄັດ:
"ອີງຕາມການກຳນົດ,ຄວາມໜາຂອງຖົງປະລັດສະຕິກໄດ້ມາດຕະຖານນ້ອຍກວ່າ0,025ມີລີແມັດບໍ່ໄດ້,ຕ້ອງຜະລິດອີງຕາມມາດຕະຖານແບບບັງຄັບທີ່ລັດປະກາດໃຊ້,ຕ້ອງພິມເຄື່ອງບອກສາຄາໃສ່ພ້ອມດ້ວຍເຄື່ອງ,ຍັງມີບາງຂີດໝາຍແລະໂທລະສັບຂອງໂຮງງານຜະລິດ,ເພື່ອໃຫ້ຂະແໜງການກ່ຽວຂ້ອງຕິດຕາມແລະກວດກາ."
ເພື່ອຊຸກຍູ້ໃຊ້ຖົງປະລັດສະຕິກຊື້ເຄື່ອງໂດຍເສຍຄ່າ,ຫວ່າງມໍ່ໆນີ້,ລັດຖະບານຈີນຍັງໄດ້ປະກາດໃຊ້ມາດຕະການ,ກຳນົດວ່າຖ້າວິສາຫະກິດສະໜອງຖົງປະລັດສະຕິກບໍ່ໄດ້ມາດຕະຖານຫຼືສະໜອງຖົງປະລັດສະຕິກໃຫ້ລ້າແກ່ຜູ່ບໍລິໂພກ,ຈະຖືກປັບໃໝສູງສົມຄວນ.
ອີງຕາມຜູ່ຊ່ຽວຊານບອກວ່າ,ພາຍຫຼັງຈີນປະຕິບັດການໃຊ້ຖົງປະລັດສະຕິກແບບເກັບຄ່າ,ຈຳນວນໃຊ້ຖົງປະລັດສະຕິກທົ່ວປະເທດຄາດວ່າຈະຫຼຸດລົງ2/3.ໃນຂະນະດຽວກັນ,ຜູ່ຊ່ຽງຊານຍັງຊີ້ອອກວ່າ,ຈີນຍັງຄວນປະກາດໃຊ້ຜະລິດຕະພັນແທນຖົງປະລັດສະຕິກ,ຜະລິດຕະພັນແທນເຫຼົ່ານີ້ຕ້ອງໃຊ້ຊໍ້າໄດ້ຫຼາຍເທື່ອ,ເຮັດແນວນີ້ຈິ່ງຈະສາມາດອະນຸລັກສິ່ງແວດລ້ອມແລະປະຢັດຊັບພະຍາກອນໄດ້ດີ.
|
