|
ແຜ່ນດິນໄຫວຢູ່ແຂວງເສສວນ, ນອກຈາກໄດ້ພາໃຫ້ມີຜູ້ເສຍຊີວິດແລະບາດເຈັບຢ່າງຫຼວງຫຼາຍແລ້ວ, ຍັງເຮັດໃຫ້ປະຊາຊົນຈຳນວນຫຼວງຫຼາຍບໍ່ມີບ່ອນຢູ່ບ່ອນອາໄສ. ເຖິງວ່າລັດຖະບານຈີນໄດ້ສະໜອງຕູບຜ້າເຕັນໃຫ້ຜູ້ປະສົບໄພຢູ່ຊົ່ວຄາວແລ້ວກໍ່ຕາມ, ແຕ່ຍັງບໍ່ໄດ້ມາດຕະຖານປານໃດ. ເພື່ອແກ້ໄຂຄວາມຫຍຸ້ງຍາກຕົວຈິງຂອງເຂົາເຈົ້າ, ຫວ່າງມໍ່ໆນີ້, ລັດຖະບານຈີນໄດ້ໃຫ້ຄຳໝັ້ນສັນຍາວ່າ, ພາຍໃນ3ເດືອນ, ຈະປຸກເຮືອນ1ລ້ານ5ແສນຫ້ອງໃຫ້ຜູ້ປະສົບໄພຢູ່ຊົ່ວຄາວ. ຫວ່າງມໍ່ໆນີ້, ວຽກງານດັ່ງກ່າວພວມດຳເນີນໄປຢ່າງຂ້ຽວຂາດ.
ຕາມຂ່າວຫຼ້າສຸດ, ນັບມາຮອດປະຈຸບັນ, ເຂດປະສົບໄພແຜ່ນດິນໄຫວໄດ້ຍົກຍ້າຍປະຊາຊົນ15ລ້ານກວ່າຄົນໃຫ້ໄປຢູ່ບ່ອນປອດໄພໂດຍດ່ວນແລ້ວ. ເພື່ອປັບປຸງບ່ອນຢູ່ຂອງຜູ້ປະສົບໄພເຫຼົ່ານີ້, ຫວ່າງມໍ່ໆນີ້, ລັດຖະບານຈີນໄດ້ຕົກລົງວ່າ, ໃນຂະນະທີ່ສະໜອງຕູບຜ້າເຕັນຈຳນວນຫຼວງຫຼາຍໃຫ້ເຂດປະສົບໄພນັ້ນ, ຍັງຈັດວາງໃຫ້ແຂວງກວາງຕຸ້ງ ແຂວງເຮີເປແລະນະຄອນຫຼວງປັກກິ່ງເປັນຕົ້ນລວມ21ແຂວງ ກຳແພງນະຄອນແລະເຂດປົກຄອງຕົນເອງຊ່ອຍເຫຼືອແຂວງເສສວນ ແຂວງກ່ານຊູ້ແລະແຂວງສ້ານຊີ່ທີ່ປະສົບໄພຮ້າຍແຮງ, ສ້າງເຮືອນຊົ່ວຄາວ1ລ້ານ5ແສນຫ້ອງພາຍໃນ3ເດືອນ.
ລັດຖະບານຈີນຮຽກຮ້ອງວ່າ, ເຂດທີ່ຮັບຜິດຊອບຊ່ອຍເຫຼືອເຂດປະສົບໄພຕ້ອງຮັບຜິດຊອບຜະລິດ ຂົນສົ່ງແລະຕິດຕັ້ງເຮືອນຢູ່ຊົ່ວຄາວເຫຼົ່ານີ້ທັງໝົດ. ເຮືອນຢູ່ເຫຼົ່ານີ້ຕ້ອງສາມາດປ້ອງກັນແຜ່ນດິນໄຫວ ກັນໄຟໄໝ້ ກັນລົມ ກັນຝົນແລະກັນໜາວ, ຢ່າງໜ້ອຍຕ້ອງໃຊ້ໄດ້3ປີຂຶ້ນໄປ.
ຫວ່າງມໍ່ໆນີ້, ທ່ານຫູຈີນທ່າວ ປະທານປະເທດຈີນໄດ້ໄປກວດກາສະພາບການຜະລິດຕິດຕັ້ງເຮືອນຊົ່ວຄາວຢູ່ນະຄອນລາງຟາງແຂວງເຮີເປໂດຍສະເພາະ. ວິສາຫະກິດແຫ່ງໜຶ່ງຂອງນະຄອນລາງຟາງໄດ້ຮັບໜ້າທີ່ຜະລິດແລະຕິດຕັ້ງເຮືອນຊົ່ວຄາວ6ພັນຫ້ອງ. ທ່ານຫູຈີນທ່າວເວົ້າກັບກຳມະກອນວິສາຫະກິດດັ່ງກ່າວວ່າ:
"ປະຈຸບັນນີ້,ການຍົກຍ້າຍຈັດວາງປະຊາຊົນທີ່ປະສົບໄພໄດ້ກາຍເປັນໜ້າທີ່ສຳຄັນກວ່າໝູ່ໃນການກູ້ໄພແຜ່ນດິນໄຫວ,ຄວາມຫຍຸ້ງຍາກໃຫຍ່ກວ່າໝູ່ທີ່ພວກເຮົາປະເຊີນນັ້ນກໍ່ແມ່ນຂາດເຮືອນຢູ່ຊົ່ວຄາວ.ເລັ່ງລັດການສ້າງເຮືອນຢູ່ຊົ່ວຄາວ,ກໍ່ແມ່ນການຕົກລົງທີ່ສຳຄັນຂອງສູນກາງເພື່ອແກ້ໄຂຄວາມຫຍຸ້ງຍາກຂອງປະຊາຊົນທີ່ປະສົບໄພ.ຫວັງວ່າເມື່ອພວກສະຫາຍໄປຮອດເຂດໄພສົບໄພແລ້ວ,ຕ້ອງເຮັດວຽກໂດຍໄວ,ສຳເລັດໜ້າທີ່ຢ່າງດີງາມ,ເຮັດໃຫ້ປະຊາຊົນທີ່ປະສົບໄພມີເຮືອນໃໝ່ຢູ່ໂດຍໄວເທົ່າທີ່ຈະໄວໄດ້."
ໃນໂຮງງານແຫ່ງໜຶ່ງທີ່ຜະລິດເຮືອນຊົ່ວຄາວຂອງນະຄອນຢ່ຽນໄທແຂວງຊ່ານຕຸ່ງ,ກຳມະກອນໄດ້ເພີ່ມເວລາເຮັດວຽກດ້ວຍຄວາມຫ້າວຫັນທີ່ສຸດ,ທ່ານຫຼີຊາງຈື້ ຫົວໜ້າຄຸມຈັກຜູ້ໜຶ່ງຂອງໂຮງງານດັ່ງກ່າວບອກນັກຂ່າວວ່າ:
"ກຳມະກອນມີກຳລັງໃຈແລະຄວາມຫ້າວຫັນສູງທີ່ສຸດ,ເຂົາເຈົ້າລ້ວນແຕ່ຢາກຊ່ວຍປະຊາຊົນທີ່ປະສົບໄພໃຫ້ຫຼາຍເທົ່າທີ່ຈະຫຼາຍໄດ້."
ເມືອງເວິ້ນຊ່ວນແລະເມືອງເຕີຢາງທີ່ປະສົບໄພຢ່າງໜັກໜ່ວງໃນແຜ່ນດິນໄຫວຮ້າຍແຮງເທື່ອນີ້ແມ່ນແຂວງກວງຕຸ້ງຮັບຜິດຊອບຊ່ວຍເຫຼືອ.ໃນເວລາທ່ານຟາງຊີ້ງຟ່າງ ຫົວໜ້າພະແນກກໍ່ສ້າງແຂວງກວງຕຸ້ງໃຫ້ສຳພາດຕໍ່ນັກຂ່າວວິທະຍຸCRI,ທ່ານກ່າວວ່າ:
"ໃຫ້ພວກເຮົາຮັບຜິດຊອບໜ້າທີ່ຜະລິດເຮືອນຊົ່ວຄາວທີ່ໃຊ້ຢູ່ສູນກາງແຜ່ນດິນໄຫວທີ່ຫຍຸ້ງຍາກທີ່ສຸດນີ້,ຂ້າພະເຈົ້າຮູ້ສຶກວ່າ,ນີ້ແມ່ນຄວາມເຊື່ອຖືຂອງສູນກາງຕໍ່ແຂວງກວງຕຸ້ງ.ພວກເຮົາຈະໃຊ້ສຸດຄວາມສາມາດຂອງທົ່ວແຂວງ,ສຳເລັດໜ້າທີ່ດັ່ງກ່າວຢ່າງໄວທີ່ສຸດແລະຮັບປະກັນທັງຄຸນນະພາບແລະປະລິມານ."
ຕາມສະຖິຕິ,ນັບມາຮອດວັນທີ 1 ມິຖຸນານີ້,ຢູ່ເຂດປະສົບໄພ,ໄດ້ສ້າງເຮືອນຊົ່ວຄາວ 1 ໝື່ນ 1 ພັນກວ່າຫ້ອງ,ເຮືອນທີ່ພວມສ້າງຫຼືລໍຖ້າສ້າງມີ 4 ໝື່ນ 5 ພັນກວ່າຫ້ອງ,ເຮືອນທີ່ໄດ້ສົ່ງໄປແລ້ວຫຼືລໍຖ້າຈະສົ່ງຈາກແຫ່ງຕ່າງໆນັ້ນກໍ່ມີ 8 ໝື່ນ 1 ພັນກວ່າຫ້ອງແລ້ວ.ລັດຖະບານຈີນຍັງກ່າວວ່າ,ຈະປັບປຸງເຮືອນຊົ່ວຄາວເຫຼົ່ານີ້ໃຫ້ດີຂຶ້ນຢ່າງບໍ່ຢຸດຢັ້ງ,ເພື່ອຕອບສະໜອງຄວາມຕ້ອງການຂອງປະຊາຊົນທີ່ປະສົບໄພໃນການຜະລິດແລະຊີວິດການເປັນຢູ່.
|
