|
ວັນທີ2 ມິຖຸນານີ້,ທ່ານສະເຫຼີມ ຢູ່ບໍລຸງ ລັດຖະມົນຕີວ່າການກະຊວງມະຫາດໄທຂອງໄທກ່າວວ່າ,ທ່ານນາຍົກລັດຖະມົນຕີສະໝັກ ສຸນທໍລະເວດຈະບໍ່ລາອອກຈາກຕຳແໜ່ງຫຼືຍຸບສະພາເພື່ອແກ້ໄຂວິກິດການທາງການເມືອງທີ່ເກີດການໂຮມຊຸມນຸມໃຫຍ່ໃນປັດຈຸບັນ,ແລະຈະບໍ່ໃຊ້ກຳລັງອາວຸດຂັບໄລ່ການໂຮມຊຸມນຸມ.ຕອນບ່າຍມື້ດຽວກັນ,ທ່ານສະໝັກ ສຸນທໍລະເວດຈັດກອງປະຊຸມຄວາມໝັ້ນຄົງແຫ່ງຊາດໂດຍດ່ວນ,ເພື່ອພະຍາຍາມແກ້ໄຂວິກິດການທາງການເມືອງເທື່ອນີ້ໂດຍສັນຕິ.
ແຕ່ວັນທີ25 ພຶດສະພານີ້ເປັນຕົ້ນມາ,ສະຫະພັນປະຊາທິປະໄຕປະຊາຊົນທີ່ປະກອບດ້ວຍກຸ່ມແລະບຸກຄົນທີ່ຄັດຄ້ານທ່ານທັກສິນ ຊິນນະວັດ ອະດີດນາຍົກລັດຖະມົນຕີຂອງໄທເລີ່ມຈັດຕັ້ງການໂຮມຊຸມນຸມທາງການເມືອງຢູ່ໃຈກາງຂອງບາງກອກ,ຄັດຄ້ານການດັດແກ້ລັດຖະທຳມະນູນ.ສະຫະພັນປະຊາທິປະໄຕປະຊາຊົນເຫັນວ່າ,ຈຸດປະສົງທີ່ພັກພະລັງປະຊາຊົນເຊິ່ງເປັນພັກກຳອຳນາດຕົ້ນຕໍດັດແກ້ລັດຖະທຳມະນູນແມ່ນເພື່ອຜົນປະໂຫຍດຂອງຕົນ,ພ້ອມກັນນັ້ນກໍ່ເພື່ອຊ່ອຍເຫຼືອອະດີດນາຍົກລັດຖະມົນຕີຄືທ່ານທັກສິນ ຊິນນະວັດຫຼົບໜີການຕັດສິນຂອງຂະບວນການຍຸດຕິທຳ,ຫຼີກລ່ຽງບໍ່ໃຫ້ຊັບສິນຈຳນວນມະຫານສານຖືກຍຶດ.ພາຍໃຕ້ກຳລັງໜີບອັນໃຫຍ່ຫຼວງຂອງສະຫະພັນປະຊາທິປະໄຕປະຊາຊົນ,ວັນທີ30 ມິຖຸນານີ້,ທ່ານຈັກກະພົບ ເພັນແຂ ລັດຖະມົນຕີວ່າການປະຈຳສຳນັກງານນາຍົກລັດຖະມົນຕີໄທປະກາດລາອອກຈາກຕຳແໜ່ງ.ມື້ດຽວກັນ,ຍັດຕິດັດແກ້ລັດຖະທຳມະນູນກໍປະກາດຢຸດຕິລົງ.
ຕໍ່ມາ,ສະຫະພັນປະຊາທິປະໄຕປະຊາຊົນຍັງຕົກລົງສືບຕໍ່ການປະທ້ວງດ້ວຍທ່ວງທ່າທີ່ແຂງແຮງເວ່າເກົ່າ,ກ່າວວ່າຈະຂັບໄລ່"ລັດຖະບານຫຸ່ນ",ຮຽກຮ້ອງທ່ານສະໝັກລາອອກຈາກຕຳແໜ່ງນາຍົກລັດຖະມົນຕີ.ໃນຂະນະດຽວກັນ,ຢູ່ສະໜາມຫຼວງຂອງໃຈກາງບາງກອກ,ຍັງປະກົດມີການໂຮມຊຸມນຸມທີ່ຄັດຄ້ານສະຫະພັນປະຊາທິປະໄຕປະຊາຊົນ.ສະນັ້ນ,ສະພາບການເມືອງໄທນັບມື້ນັບເຄັ່ງຕຶງ.
ວັນທີ31 ພຶດສະພາປີນີ້,ທ່ານສະໝັກກ່າວວ່າ,ລັດຖະບານອາດຈະສົ່ງຕຳຫຼວດຫຼືທະຫານໄປຂັບໄລ່ຜູ່ປະທ້ວງ,ແຕ່ໄດ້ຖອນຄຳຂູ່ນີ້ໃນວັນທີ1 ມິຖຸນານີ້,ແລະກ່າວວ່າຢາກເຈລະຈາກັບສະຫະພັນປະຊາທິປະໄຕປະຊາຊົນ.ຈາກການກ່າວຂອງທ່ານສະໝັກເທື່ອນີ້,ຜູ່ນຳສະຫະພັນປະຊາທິປະໄຕປະຊາຊົນເປີດເຜີຍວ່າ,ທ່ານສະໝັກຕ້ອງລາອອກຈາກຕຳແໜ່ງ,ຖ້າບໍ່ດັ່ງນັ້ນ,ຜູ່ປະທ້ວງຈະບໍ່ຢຸດຕິ,ແລະຈະປະທ້ວງໃນເວລາຍາວນານ.
ເຖິງວ່າໃນປັດຈຸບັນ,ການໂຮມຊຸມນຸມຍັງດຳເນີນໂດຍຄວາມສັນຕິຢູ່.ແຕ່ການສຳຫຼວດຄວາມເຫັນຂອງປະຊາຊົນສະແດງໃຫ້ເຫັນວ່າ,ຄົນສ່ວນຫຼາຍຮູ້ສຶກວິຕົກກັງວົນນຳເສດຖະກິດແລະສະຖານະການທາງການເມືອງຂອງໄທຈະຊຸດໂຊມລົງອີກ,ແລະວິຕົກກັງວົນນຳການໂຮມຊຸມນຸມຈະພາໃຫ້ເກີດການປະທະກັນແລະອາດຈະພາໃຫ້ເກີດການລັດຖະປະຫານນຂຶ້ນອີກເທື່ອໜຶ່ງ.
ນັກວິເຄາະຂອງໄທເຫັນວ່າ,ປັດຈຸບັນ,ທ່າທີຂອງພົນເອກ ບຸນສະລ້າງ ນຽມປະດິດ ຜູ່ບັນຊາການສູງສຸດຂອງກອງທັບໄທແມ່ນເປັນເອກະສັນກັນກັບທ່ານນາຍົກລັດຖະມົນຕີສະໝັກ.ສ່ວນພົນເອກ ອະນຸພົງ ເຜົ່າຈິນດາ ຜູ່ບັນຊາການໃຫຍ່ຂອງທະຫານບົກເຊິ່ງເປັນບຸກຄົນສຳຄັນຂອງກອງທັບກໍ່ມີການພົວພັນທີ່ດີກັບທ່ານນາຍົກລັດຖະມົນຕີສະໝັກ,ສະນັ້ນ,ໄທອາດຈະບໍ່ເກີດການລັດຖະປະຫານໃນມໍ່ໆນີ້.ແຕ່ວ່າ,ຖ້າການໂຮມຊຸມນຸມຕ້ານລັດຖະບານຂະຫຍາຍຕົວຈົນເຖິງຂັ້ນຄວບຄຸມຍາກ,ກໍ່ບໍ່ສາມາດຮັບປະກັນໄດ້ວ່າກອງທັບຈະບໍ່ຍຶດອຳນາດເພື່ອແກ້ໄຂຄວາມວຸ້ນວາຍ.
|
