|
ຕາມຂ່າວ cri:ເລີ່ມແຕ່ຕົ້ນເດືອນນີ້ເປັນຕົ້ນມາມາ, ອາສາສະຫມັກຂອງງານກິລາໂອລິມປິກປັກກິ່ງໄດ້ທະຍອຍກັນເລີ່ມເຮັດວຽກແລ້ວ.ວັນທີ16ກໍລະກົດນີ້ ຢູ່ປັກກິ່ງ, ນາງຈ່າງຫົງ ຮອງຫົວຫນ້າພະແນກອາສາສະຫມັກ ຂອງຄະນະຈັດຕັ້ງໂອລິມປິກປັກກິ່ງໃຫ້ສຳພາດວ່າ,ວຽກງານອາສາສະຫມັກຂອງງານກິລາໂອລິມປິກປັກກິ່ງໄດ້ກຽມພ້ອມຫມົດແລ້ວ.
ໃນໄລຍະຈັດງານກິລາໂອລິມປິກແລະງານກິລາໂອລິມປິກຄົນພິການປັກກິ່ງ,ຈະມີອາສາສະຫມັກ 1 ແສນຄົນໃຫ້ການບໍລິການໂດຍກົງແກ່ສອງງານດັ່ງກ່າວ.ພ້ອມກັນນັ້ນ,ອາສາສະຫມັກ4ແສນຄົນຈະໃຫ້ການບໍລິການດ້ານໃຫ້ຄຳແນະນຳ ແປພາສາແລະກອບກູ້ປິ່ນປົວຢູ່ໃນຕົວເມືອງແລະເຂດອ້ອມແອ້ມສະຫນາມກິລາ. 1ແສນ ແລະ 4 ແສນ,ສອງຕົວເລກນີ້ໄດ້ຫລາຍກວ່າຍອດຈຳນວນນັກກິລາແລະຄູຝຶກທີ່ເຂົ້າຮ່ວມງານກິລາໂອລິມປິກປັກກິ່ງຢ່າງຫລວງຫລາຍ.ໃນກອງປະຊຸມຂ່າວກ່ຽວກັບວຽກງານອາສາສະຫມັກຂອງ ໂອລິມປິກທີ່ຈັດຂຶ້ນໃນວັນທີ16ກໍລະກົດນີ້,ນາງຈ່າງຫົງ ຮອງຫົວຫນ້າພະແນກອາສາສະຫມັກຂອງຄະນະຈັດຕັ້ງໂອລິມປິກປັກກິ່ງກ່າວວ່າ, ຕົວເລກດັ່ງກ່າວບໍ່ພຽງແຕ່ສະແດງໃຫ້ເຫັນຄວາມຟົດຟື້ນຂອງວົງການຕ່າງໆທີ່ມີຕໍ່ການບໍລິການງານໂອລິມປິກທໍ່ນັ້ນ,ຫາກຍັງສາມາດເຮັດໃຫ້ອາສາສະຫມັກຫລາຍກວ່າເກົ່າສາມາດມີສ່ວນຮ່ວມກັບລາຍການຕ່າງໆຂອງງານໂອລິມປິກ.ໃນໄລຍະຈັດງານກິລາໂອລິມປິກ,ພໍ່ເຖົ້າຊ້າງມູ້ໂຈວ ອາສາສະຫມັກທີ່ມີອາຍຸ 84 ປີຈະໃຫ້ການບໍລິການແກ່ການແຂ່ງຂັນຢູໂດແລະເທຄວນໂດຢູ່ສະຫນາມກິລາຂອງມະຫາວິທະຍາໄລວິທະຍາສາດປັກກິ່ງ.ພໍ່ເຖົ້າເວົ້າວ່າ:"ປັກກິ່ງສາມາດຈັດງານໂອລິມປິກຄັ້ງທີ29ແມ່ນຄວາມຝັນຂອງປະຊາຊົນຈີນໃນຮ້ອຍປີຜ່ານມາແລະໂອກາດທີ່ຫາຍາກໃນຮ້ອຍປີ.ຂ້ອຍຮູ້ສຶກວ່າ ມີໂອກາດເຮັດວຽກໃຫ້ງານໂອລິມປິກໃນຊີວິດນີ້,ຈະບໍ່ມີຄວາມກິນແໜງຫຍັງອີກແລ້ວ."
ນອກຈາກອາສາສະໝັກຈີນທີ່ເປັນສ່ວນໃຫຍ່,ໃນງານໂອລິມປິກປັກກິ່ງ,ຍັງມີອາ ສາສະໝັກຕ່າງປະເທດ935ຄົນທີ່ມາຈາກເກືອບຮ້ອຍປະເທດແລະເຂດແຄ້ວນໃນໂລກ,ທ່ານບຼູສ ເລີສ໌ທີ່ມາຈາກວິທະຍາໄລເອເມີຊັນຂອງບອດສ໌ຕັນອາເມລິກາກໍ່ ແມ່ນໜຶ່ງໃນນັ້ນ,ເພິ່ນໄດ້ມາຮອດຈີນອາທິດປາຍແລ້ວ.ທ່ານບຼູສບອກນັກຂ່າວວ່າ: "ໃນເວລາຢູ່ອາເມລິກາ,ພວກເຮົາກໍໄດ້ເລີ່ມດຳເນີນການກະກຽມເພື່ອເປັນອາສາສະໝັກໂອລິມປິກປັກກິ່ງ,ໃນນັ້ນລວມທັງການຮຽນວັດທະນະທຳຈີນແລະພາສາຈີນ.ໃນຖານະເປັນຄົນອາເມລິກາ,ຂ້າພະເຈົ້າຮູ້ສຶກດີໃຈຫຼາຍສາມາດມາເຫັນກັບຕາວ່າ ການດຳລົງຊີວິດຢູ່ປັກກິ່ງແລະຈີນເປັນແນວໃດ.ຂ້າພະເຈົ້າກໍຮູ້ສຶກພາກພູມໃຈຫຼາຍທີ່ສາມາດເຜີຍແຜ່ງານກິລາໂອລິມປິກປັກກິ່ງຕໍ່ຊາວໂລກໂດຍຕາງໜ້າວິທະຍາໄລຂອງຕົນ ປະເທດຂອງຕົນ ຈົນເຖິງຕາງໜ້າປັກກິ່ງແລະຈີນ."
ເພື່ອອົບຮົມອາສາສະໝັກເຫຼົ່ານີ້ໃຫ້ມີຄວາມສາມາດດີ, ຄະນະຈັດຕັ້ງງານໂອລິມປິກປັກກິ່ງໄດ້ອົບຮົມຢ່າງມີວິທະຍາສາດແລະເປັນລະບົບ, ແລະໄດ້ໃຫ້ໂອກາດແກ່ເຂົາເຈົ້າເຂົ້າຮ່ວມການເຝິກຊ້ອມຕົວຈິງ. ນາງລຽງຊູ່ຮຸ້ຍ ທີ່ມາຈາກມະຫາວິທະຍາໄລຊິ່ງຮວາຈະບໍລິການຢູ່ສູນລອຍນ້ຳແຫ່ງຊາດ. ນັບແຕ່ປີ2006ເປັນຕົ້ນມາ, ນາງກໍ່ໄດ້ຮັບການທົດສອບໃນການໃຫ້ເຮັດວຽກອາສາສະໝັກຂອງການແຂ່ງຂັນຕ່າງໆ.
"ຂ້ອຍເຄີຍໄດ້ບໍລິການຢູ່ໃນການແຂ່ງຂັນເທັນນິດສ໌ຈີນປີ 2006 ແລະປີ 2007, ງານກິລາອາຊີທີ່ຈັດຂຶ້ນຢູ່ໂດຮາ, ງານກິລາຄົນພິການຈີນຄັ້ງທີ7,ຍັງມີງານກິລາໂອລິມປິກພິເສດໂລກຊຽງໄຮ້.ພ້ອມກັນນັ້ນ, ພວກເຮົາກໍ່ໄດ້ເຂົ້າຮ່ວມການແຂ່ງຂັນທົດລອງງານກິລາໂອລິມປິກ,ນັ້ນກໍ່ຄືການແຂ່ງຂັນລອຍນ້ຳຈີນແລະການແຂ່ງຂັນໂດດນ້ຳໂລກທີ່ຈັດຂຶ້ນຢູ່ສະໜາມກິລາກ້ອນນ້ຳ4ຫຼ່ຽມ."
ທ່ານລິວຈ້ຽນ ຫົວໜ້າໜ່ວຍງານອາສາສະໝັກຂອງຄະນະຈັດຕັ້ງງານກິລາໂອລິມປິກປັກກິ່ງກ່າວວ່າ,ໂດຍຜ່ານງານກິລາໂອລິມປິກ,ວຽກງານບໍລິການຂອງອາສາສະໝັກປັກກິ່ງຈະສູງຂຶ້ນສູ່ລະດັບໃໝ່.
"ໂດຍອີງຕາມບົດຮຽນຂອງອົງການອາສາສະໝັກສະຫະປະຊາຊາດ,ຈຳນວນອາສາສະໝັກຂອງເຂດໃດໜຶ່ງຄວນກວມ30%ຂອງປະຊາກອນຈຶ່ງດີ. ພວກເຮົາຫວັງໃຫ້ຜ່ານງານໂອລິມປິກ,ປັກກິ່ງຈະມີ6ລ້ານຄົນເຂົ້າຮ່ວມການບໍລິການອາສາສະໝັກປະຈຳວັນ.ພວກເຮົາດີໃຈຫຼາຍທີ່ໄດ້ເຫັນວ່າ,ສະພາບແບບນີ້ກຳລັງເປັນຮູບເປັນຮ່າງຂຶ້ນ."
|
