|
|
 |
| (GMT+08:00)
2008-08-17 13:07:01
|
 |
|
ຮັກໂອແລັມປິກ20ປີ
cri
Author: li
ທ່ານຜູ້ຟັງທີ່ໂຄລົບ,ຕໍ່ໄປແມ່ນລາຍການ"ສາຍດ່ວນໂອແລັມປິກ". ມື້ນີ້ ພວກເຮົາຈະໂທລະສັບລົມກັບທ່ານຕົງກ່າງ ຄູສອນພາສາຈີນໃນໂຮງຮຽນມັດທະຍົມແຫ່ງໜຶ່ງຂອງປັກກິ່ງ,ເພື່ອຊອກຮູ້ເລື່ອງທີ່ເພີ່ນຮັກໂອແລັມປິກ 20 ປີ.
ທ່ານຕົງກ່າງບອກພວກເຮົາວ່າ,ຕັ້ງແຕ່ຍາມຍັງນ້ອຍ,ທ່ານກໍມັກກິລາຫຼາຍ ແລະຮູ້ດີຕໍ່ສະພາບການແຂ່ງຂັນຂອງງານກິລາໂອແລັມປິກທຸກຄັ້ງທີ່ຜ່ານມາ. ທ່ານກ່າວວ່າ,ຄວາມຊົງຈຳຕໍ່ງານໂອແລັມປິກຄັ້ງທຳອິດຂອງທ່ານແມ່ນຂາວດຳ.
"ປີ 1988 ງານກິລາໂອແລັມປິກເຊອຸ່ນຄັ້ງທີ 24 ແມ່ນຄວາມຊົງຈຳຄັ້ງທຳອິດຂອງຂ້ອຍຕໍ່ງານກິລາໂອແລັມປິກ,ປີນັ້ນ ຂ້ອຍອາຍຸ 10 ປີ,ເວລານັ້ນແມ່ນຍາມພັກຮຽນ,ຂ້ອຍຈື່ໄດ້ວ່າ ຂ້ອຍຈົນລືມເຮັດວຽກບ້ານ,ແຕ່ລະມື້ກໍເບິ່ງແຕ່ໂທລະພາບ. ຈົນມາຮອດດຽວນີ້,ຂ້ອຍຍັງຈື່ແຕ່ນາງກ່າວໝິນທໍ່ນັ້ນ,ເວລານັ້ນ ພວກເຮົາເອີ້ນນາງເປັນລາຊີນີໂດດນ້ຳ. ເວລານັ້ນ ຄອບຄົວຍັງຍາກແດ່,ມີແຕ່ໂທລະພາບຂາວດຳ 14 ນິ້ວໜ່ວຍໜຶ່ງ. ສະນັ້ນ ຂ້ອຍຈຶ່ງເວົ້າວ່າ ຄວາມຊົງຈຳຂອງຂ້ອຍຕໍ່ງານກິລາໂອແລັມປິກຄັ້ງທຳອິດແມ່ນຂາວດຳ."
ແຕ່ເສຍດາຍ,ຫຼັງຈາກນັ້ນ 20 ປີ ທ່ານຕົງກ່າງຍັງບໍ່ສາມາດຊື້ປີ້ເຂົ້າຊົມພິທີໄຂງານກິລາໂອແລັມປິກປັກກິ່ງໄດ້,ສະນັ້ນ ທ່ານໄດ້ຈັດຕັ້ງນັກຮຽນທີ່ມັກກິລາ 10 ກວ່າຄົນໃນຫ້ອງຮຽນມາເບິ່ງພິທີໄຂງານໂອແລັມປິກຢູ່ໃນຫ້ອງປະຊຸມຂອງໂຮງຮຽນ. ຜູ້ໃດກໍມ່ວນຫຼາຍ. ທ່ານຕົງກ່າງກ່າວວ່າ:
"ຂ້ອຍຮູ້ສຶກວ່າພິທີໄຂງານຍິ່ງໃຫຍ່ມະໂຫລານທີ່ສຸດ,ມີຄວາມໝາຍຫຼາຍ,ເພາະວ່າມັນໄດ້ສະແດງວັດທະນະທຳທີ່ອຸດົມສົມບູນຫຼາຍ. ຂ້ອຍຮູ້ສຶກວ່ານີ້ແມ່ນພີທີໄຂງານຄັ້ງໜຶ່ງທີ່ສາມາດເຮັດໃຫ້ຜູ້ຊົມມີພາບປະທັບໃຈຢ່າງເລິກເຊິ່ງ,ໂດຍສະເພາະແມ່ນການສະແດງວັດທະນະທຳຈີນ,ໃຊ້ລະບົບແສງສີສຽງທີ່ລ້ຳຍຸກໃນສະໜາມ,ຂ້ອຍຮູ້ສຶກວ່າ ບໍ່ວ່າຕໍ່ຊາວຈີນກໍຄືຊາວໂລກ,ເຫດການທີ່ປະທັບໃຈນີ້ເຂົາເຈົ້າຈະຈື່ຈຳຕະຫຼອດຊີວິດ."
ທ່ານຕົງກ່າງເວົ້າວ່າ, ຄວາມຕື່ນເຕັ້ນທີ່ພິທີໄຂງານກິລາໂອລິມປິກຄັ້ງນີ້ນຳມາໃຫ້ລາວ, ພ້ອມດ້ວຍຄວາມຕື່ນເຕັ້ນທີ່ປັກກິ່ງຮ້ອງຂໍຈັດງານກິລາໂອລິມປິກຢ່າງສຳເລັດຜົນໃນປີ2001ນັ້ນ, ຈະເຮັດໃຫ້ລາວຈື່ຈຳໄປຕະຫຼອດຊີວິດ. ລາວເວົ້າວ່າ,
ວັນທີ13ກໍລະກົດປີ2001, ຂ້ອຍຈື່ໄດ້ດີທີ່ສຸດ, ໃນຄາວນັ້ນຍັງອີກບໍ່ເທົ່າໃດມື້ຂ້ອຍກໍ່ຈະຮຽນຈົບຈາກມະຫາວິທະຍາໄລແລ້ວ, ໝູ່ເພື່ອນຫຼາຍຄົນໃນຫ້ອງນອນດຽວກັນເຕົ້າໂຮມກັນຢູ່ໃນຮ້ານອາຫານນ້ອຍໆແຫ່ງໜຶ່ງຢູ່ໃກ້ໂຮງຮຽນ. ໃນເວລາປະມານ22ໂມງ, ທ່ານຊາມາຣານປະກາດວ່າ ປັກກິ່ງໄດ້ຮັບສິດຈັດງານກິລາໂອລິມປິກລະດູຮ້ອນ2008, ຄົນທັງຫຼາຍຕື້ນຕັນໃຈທີ່ສຸດ. ຍັງຈື່ໄດ້ວ່າຢູ່ຮ້ານອາຫານນ້ອຍແຫ່ງນັ້ນ, ລູກຄ້າທັງໝົດໄດ້ຍົກໄມ້ຖູ່ຂຶ້ນສະແດງຄວາມດີໃຈທີ່ສຸດ.
ທ້າວຕົງກ່າງກ່າວເວົ້າວ່າ, ຄວາມຮູ້ສຶກແນວນີ້ກໍ່ຄືກັນກັບເມື່ອໄດ້ຊົມການແຂ່ງຂັນຍົກນ້ຳໜັກລຸ້ນ48ກິໂລເພດຍິງນັ້ນ,ເວລາຍ່າງກໍ່ຮູ້ສຶກມ່ວນໃຈ. ລາວເວົ້າວ່າ,
ບໍ່ນຶກບໍ່ຝັນວ່າ, ປີ້ໃບທຳອິດຂອງຂ້ອຍກໍໄດ້ເຫັນທິມຈີນໄດ້ຫຼຽນຄຳຫຼຽນທຳອິດ, ຂ້ອຍຮູ້ສຶກມີໂຊກທີ່ສຸດ. ເມື່ອຊັກທຸງຊາດຂຶ້ນ, ກໍ່ຮູ້ສຶກຕື່ນເຕັ້ນຫຼາຍ. ຂ້ອຍເຊື່ອວ່າໃນໄລຍະງານກິລາໂອລິມປິກປັກກິ່ງ, ຈະນຳເອົາຄວາມຕື້ນຕັນໃຈຫຼາຍມາໃຫ້ພວກເຮົາ.
ຄອງຄອຍມາຮ້ອຍປີ, ແລະກະກຽມ7ປີ, ງານກິລາໂອລິມປິກປັກກິ່ງ2008ໄດ້ມາເຖິງໃນທີ່ສຸດ. ເວົ້າສຳລັບຄົນທຳມະດາທັງຫຼາຍແລ້ວ, ນີ້ກໍ່ແມ່ນໄລຍະທີ່ສຳຄັນທີ່ສຸດໃນຊີວິດ. ທ້າວຕົງກ່າງກ່າວເວົ້າວ່າ,
ຄວາມຮູ້ສຶກແບບນີ້, ກໍ່ເໝືອນດັ່ງຄວາມຮັກທີ່ໂຣແມັນຕິກ. ແລະຄວາມຝັນນີ້ໄດ້ປະກົດຜົນເປັນຈິງໃນວັນທີ8ສິງຫານີ້. ຈັ່ງແມ່ນດີໃຈຢ່າງຫາອັນປຽບບໍ່ໄດ້. ຂ້ອຍເຊື່ອວ່າປະເທດຈີນໃນປີ2008ຍັງຈະມີສິ່ງອັດສະຈັນຫຼາຍກວ່າເກົ່າ, ແລະມີຄວາມປາຖະໜາຫຼາຍກວ່າເກົ່າທີ່ຈະປະກົດຜົນເປັນຈິງ.
|
|
|
