|
|
 |
| (GMT+08:00)
2008-08-21 10:31:53
|
 |
|
ຮອງຫົວໜ້າຄະນະນັກກິລາມຽນມາ: ຢູ່ບ້ານໂອລິມປິກຮູ້ສຶກເໝືອນດັ່ງໄດ້ກັບບ້ານ
cri
ທີ່ນີ້, ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ້ຟັງທີ່ໂຄລົບ, ໃນຖານະເປັນເຈົ້າໜ້າທີ່ຄະນະກຳມະການໂອລິມປິກມຽນມາທີ່ຮັບຜິດຊອບການແຂ່ງຂັນແລະຝຶກຊ້ອມ, ໃນ40ປີມານີ້, ທ່ານອູຄິມມາງລວິນ ຮອງຫົວໜ້າຄະນະນັກກິລາໂອລິມປິກມຽນມາໄດ້ນຳພາທິມຊາດມຽນມາໄປເຂົ້າຮ່ວມການແຂ່ງຂັນພາກພື້ນແລະສາກົນທຸກຄັ້ງ, ທ່ານເຄີຍໄປ60ກວ່າປະເທດ. ຄັນຊັ້ນ, ທ່ານອູຄິມມາງລວິນມີຄວາມປະທັບໃຈແນວໃດຕໍ່ງານໂອລິມປິກປັກກິ່ງ? ໃນລາຍການຄະນະນັກກິລາອາຊີອາຄະເນຢູ່ປັກກິ່ງຂອງພວກເຮົາພາກນີ້, ເຊີນຟັງບົດແຈ້ງຂ່າວປະກອບສຽງຂອງນັກຂ່າວCRIທີ່ພາດຫົວເລື່ອງວ່າ: ຢູ່ບ້ານໂອລິມປິກປັກກິ່ງຮູ້ສຶກເໝືອນດັ່ງໄດ້ກັບບ້ານ.
ທ່ານອູຄິມມາງລວິນ ຮອງຫົວໜ້າຄະນະນັກກິລາໂອລິມປິກມຽນມາທີ່ມີອາຍຸ63ປີໄດ້ມາປັກກິ່ງຫຼາຍເທື່ອແລ້ວ. ທ່ານເວົ້າວ່າ, ແຕ່ກ່ອນມາປັກກິ່ງແບບຟ້າວໆຟັ່ງໆ, ເທື່ອນີ້ພໍດີແມ່ນຍາມຈັດງານໂອລິມປິກ, ທ່ານຈິ່ງມີໂອກາດພັກຢູ່ປັກກິ່ງດົນແດ່. ເມື່ອເວົ້າເຖິງການປ່ຽນແປງຂອງປັກກິ່ງ, ທ່ານກ່າວວ່າ:
ການພັດທະນາຂອງປັກກິ່ງຈັ່ງແມ່ນໄວແທ້ໆ. ສາມເດືອນກ່ອນ, ຮັງນົກແລະກ້ອນນ້ຳ4ຫຼ່ຽມຫາກໍ່ສ້າງສຳເລັດ, ແຕ່ບໍ່ຄຶດບໍ່ຝັນວ່າ, ຫາກໍ່ຜ່ານໄປ3ເດືອນເທົ່ານັ້ນ, ສິ່ງກໍ່ສ້າງເຫຼົ່ານີ້ກໍຕົບແຕ່ງໄດ້ງາມປານນີ້ແລ້ວ.
ເມື່ອຮູ້ວ່ານັກຂ່າວໄດ້ມາທ່ຽວຊົມບ້ານໂອລິມປິກເປັນຄັ້ງທຳອິດ, ທ່ານອູຄິມມາງລວິນພານັກຂ່າວໄປທ່ຽວຊົມບ້ານໂອລິມປິກຢ່າງເບີກບານມ່ວນຊື່ນ. ທ່ານໄດ້ພານັກຂ່າວໄປຊົມຫ້ອງການນາຍບ້ານໂອລິມປິກທີ່ເປັນສານເຈົ້າພະຍາມັງກອນໃນສະໄໝບູຮານ, ເພິ່ນໄດ້ອະທິບາຍປະຕູໃຫຍ່ສີແດງ, ຝາແຕ້ມໜ້າປະຕູແລະຝາຂັ້ນທີ່ໄດ້ຄວັດແກະ12ລາສີຂອງຈີນ. ເພິ່ນອະທິບາຍຢ່າງຫຼ່ຽນໄຫຼ, ຈາກນີ້ເຫັນໄດ້ວ່າເພິ່ນໄດ້ຄົ້ນຄວ້າສິ່ງກໍ່ສ້າງເຫຼົ່ານີ້ມາໄດ້ຫຼາຍມື້ແລ້ວ.
ຕາມຮູ້ວ່າ, ປະຕູສີແດງຂອງບ້ານໂອລິມປິກແມ່ນສ້າງຕາມແບບສິ່ງກໍ່ສ້າງພະລາຊະວັງໃນສະໄໝບູຮານຂອງຈີນ, ຍັງມີຫຼາຍບ່ອນ, ລ້ວນແຕ່ໄດ້ສ່ອງແສງໃຫ້ເຫັນບັນຍາກາດວັດທະນະທຳ. ຈີນໄດ້ເອົາປັດໄຈວັດທະນະທຳບູຮານຂອງຈີນເຊື່ອມໂຍງເຂົ້າໃນສິ່ງກໍ່ສ້າງແບບທັນສະໄໝໃນບ້ານໂອລິມປິກ, ເຣັດໃຫ້ນັກກິລາປະເທດຕ່າງໆທີ່ມາເຂົ້າຮ່ວມການແຂ່ງຂັນຢູ່ຈີນມີໂອກາດຊອກຮູ້ວັດທະນະທຳຂອງຈີນ, ເຂົ້າໃຈອາລະຍະທຳປະຫວັດສາດທີ່ຮຸ່ງເຮືອງເຫຼືອງເຫຼື້ອມຂອງຈີນ.
ທ່ານອູຄິມມາງລວິນກ່າວວ່າ, ບ້ານໂອລິມປິກດຶງດູດຄົນທັງຫຼາຍ, ບໍ່ພຽງແຕ່ຍ້ອນວ່າມີທິວທັດສວຍງາມເທົ່ານັ້ນ, ເມື່ອທຽບກັບໂຮງແຮມແລ້ວ, ຈຸດເດັ່ນກວ່າໝູ່ຂອງບ້ານໂອລິມປິກແມ່ນທຸກຄົນທີ່ຢູ່ໃນບ້ານສາມາດແລກປ່ຽນກັນຢ່າງໃກ້ຊິດ, ໃນຂະນະທີ່ເຂົ້າພັກຢູ່ໃນບ້ານໂອລິມປິກ, ຄະນະນັກກິລາແຕ່ລະປະເທດກໍໄດ້ຫ້ອຍທຸງຊາດຂອງປະເທດຕົນຢູ່ນອກປ່ອງຢ້ຽມ, ເມື່ອເບິ່ງຈາກທາງໄກ, ທຸກປ່ອງຢ້ຽມລ້ວນແຕ່ໄດ້ມີທຸງຊາດນາໆສີປິວສະບັດ, ບ້ານໂອລິມປິກໄດ້ກາຍເປັນບ້ານໜ່ວຍໂລກ. ໃນບ້ານໜ່ວຍໂລກດັ່ງກ່າວ, ນັກກິລາແລະຄູຝຶກຕ່າງປະເທດທີ່ບໍ່ເຄີຍເຫັນໜ້າກັນຈັກເທື່ອມາເປັນເພື່ອບ້ານທີ່ໃກ້ຄຽງກັນ, ໄດ້ດຳລົງຊີວິດຢູ່ບ່ອນດຽວກັນ, ທັກທາຍກັນ, ບາງເທື່ອຍັງໄປມາຫາສູ່ກັນ. ທ່ານເວົ້າວ່າ:
ງານໂອລິມປິກບໍ່ພຽງແຕ່ມີການແຂ່ງຂັນດ້ານກິລາເທົ່ານັ້ນ, ຍັງແມ່ນງານມະໂຫລານທີ່ໃຫ້ຄົນທັງຫຼາຍມາເຕົ້າໂຮມກັນ. ບ້ານໂອລິມປິກກໍຄືບ້ານໜ່ວຍໂລກ, ເຖິງວ່າບໍ່ຮູ້ຈັກກັນ, ເມື່ອພົບໜ້າກັນແລ້ວກໍສະໜິດສະໜົມຄືເພື່ອນເກົ່າ, ເຮັດໃຫ້ທຸກຄົນຮູ້ສຶກວ່າໂລກນີ້ມີໄມຕີຈິດ, ສັນຕິພາບແລະກົມກຽວກັນ. ນີ້ກໍແມ່ນງານໂອລິມປິກໄດ້ຕ່າງກັບງານກິລາອື່ນໆ, ເຮັດໃຫ້ຄົນຮູ້ສຶກມ່ວນຊື່ນທີ່ສຸດ.
ທ່ານອູຄິມມາງລວິນຍັງເວົ້າຢອກວ່າ, ຢູ່ໃນບ້ານໂອລິມປິກຮູ້ສຶກເບີກບານມ່ວນຊື່ນທີ່ສຸດ, ຖ້າບໍ່ມີການແຂ່ງຂັນ, ນີ້ກໍຄືກັນກັບເຮືອນພັກ, ຢູ່ເຢັນເປັນສຸກທີ່ສຸດ. ທ່ານເວົ້າວ່າ, ມື້ທຳອິດ, ເມື່ອທ່ານຍ່າງເຂົ້າຫ້ອງອາຫານ, ທ່ານຮູ້ສຶກງຶດງໍ້, ເພາະວ່າທ່ານເຄີຍໄດ້ຍິນວ່າຫ້ອງອາຫານໃນບ້ານໂອລິມປິກສາມາດບັນຈຸໄດ້ເຖິງ5ພັນຄົນ, ຖ້າບໍ່ເຫັນກັບຕາ, ທ່ານກໍຈະບໍ່ເຊື່ອເລີຍ. ເພິ່ນຍັງເວົ້າວ່າ, ໃນຫ້ອງອາຫານມີອາຫານອາຊີ, ເອີລົບເປັນຕົ້ນ, ແລະຍັງມີອາຫານອາຊີອາຄະເນແທ້ໆ. ແຕ່ວ່າຫຼາຍມື້ມານີ້, ເພິ່ນພັດມັກກິນອາຫານລົດຊາດຂອງຈີນແທ້ໆ.
ຂ້າພະເຈົ້າມັກເປັດປີ້ນປັກກິ່ງໃນຫ້ອງອາຫານທີ່ສຸດ, ແຊບຫຼາຍ.
ໃນໄລຍະຕົ້ນຂອງງານໂອລິມປິກ, ຍ້ອນວ່າຕ້ອງໄປຮ່ວມປະຊຸມແລະຈັດໃຫ້ນັກກິລາໄປແຂ່ງຂັນແລະຝຶກຊ້ອມເລື້ອຍໆ, ທ່ານອູຄິມມາງລວິນສ່ວນຫຼາຍແມ່ນຢູ່ໃນບ້ານໂອລິມປິກເທົ່ານັ້ນ. ທ່ານເວົ້າວ່າ, ທ່ານຢາກຂອບໃຈຄະນະກຳມະການຈັດງານໂອລິມປິກທີ່ໄດ້ໃຫ້ການບໍລິການອາສາສະໝັກດ້ານພາສາແກ່ຄະນະຜູ້ແທນປະເທດຕ່າງໆ, ເຮັດໃຫ້ວຽກງານແລະຊີວິດການເປັນຢູ່ລ້ວນແຕ່ສະດວກສະບາຍທີ່ສຸດ. ທ່ານເວົ້າວ່າ, ບໍ່ຄິດເລີຍວ່າ, ຄະນະກຳມະການຈັດງານໂອລິມປິກສົ່ງອາສາສະໝັກດ້ານພາສາແລະຜູ້ຊ່ວຍໃຫ້ຄະນະຜູ້ແທນທັງໝົດ, ເພື່ອອຳນວຍຄວາມສະດວກໃຫ້ແກ່ຄະນະຜູ້ແທນທີ່ມາຈາກ204ປະເທດແລະເຂດແຄວ້ນສາມາດເຮັດວຽກແລະແລກປ່ຽນໄດ້ຢ່າງສະດວກສະບາຍ, ຂະໜາດພາສາມຽນມາ ທີ່ເປັນພາສາທີ່ມີຄົນໃຊ້ບໍ່ຫຼາຍປານໃດກໍຍັງມີນາຍພາສາສະເພາະ, ຈັ່ງແມ່ນດີຫຼາຍ.
ໃນຫຼາຍມື້ມານີ້, ອາສາສະໝັກພາສາມຽນມາຂອງຈີນໄດ້ຊ່ວຍພວກເຮົາຫຼາຍຢ່າງ, ຍ້ອນວ່າໃຊ້ພາສາແມ່, ສະນັ້ນ, ພວກເຮົາຍັງໄດ້ຮັກແພງເປັນເພື່ອນກັບອາສາສະໝັກເຫຼົ່ານີ້, ແລະເວົ້າພາສາຈີນເປັນຫຼາຍຄຳ.
ທ່ານອູຄິມມາງລວິນເວົ້າວ່າ, ນັບແຕ່ມາພັກຢູ່ໃນບ້ານໂອລິມປິກສອງອາທິດມານີ້, ຮູ້ສຶກວ່າ, ຕົນເອງໜຸ່ມກວ່າແຕ່ກ່ອນຫຼາຍ. ນີ້ຕ້ອງຂອບໃຈຄະນະຈັດງານໂອລິມປິກປັກກິ່ງທີ່ໄດ້ເອົາໃຈໃສ່ຕ້ອນຮັບຢ່າງລະອຽດຮອບຄອບ, ເຮັດໃຫ້ນັກກິລາແລະຄູຝຶກໝົດທຸກຄົນລ້ວນແຕ່ຮູ້ສຶກວ່າໄດ້ເຂົ້າຮ່ວມງານກິລາໂອລິມປິກຢູ່ບ້ານຂອງຕົນ.
|
|
|
