|
ທີ່ນີ້, ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ້ຟັງທີ່ໂຄລົບ, ຕີມໍເລສເຕແມ່ນປະເທດທີ່ໜຸ່ມນ້ອຍກວ່າໝູ່ຂອງອາຊີ, ງານໂອລິມປິກປັກກິ່ງແມ່ນງານມະຫະກຳກິລາທີ່ມີລັກສະນະທົ່ວໂລກຄັ້ງທີສອງທີ່ຕີມໍເລສເຕເຂົ້າຮ່ວມໃນຖານະເປັນປະເທດເອກະລາດ ເຊິ່ງຖັດຈາກງານໂອລິມປິກອາແຕນໃນ4ປີກ່ອນ. ນາງມາລີອານາ ດີອາສ ຊີເມນີສ ແມ່ນນັກກິລາພຽງຜູ້ດຽວຂອງຄະນະນັກກິລາຕີມໍເລສເຕ. ໃນລາຍການຄະນະຜູ້ແທນອາຊີອາຄະເນຢູ່ປັກກິ່ງພາກນີ້, ພວກເຮົາແນະນຳນັກກິລາຜູ້ນີ້.
ຂ້ອຍຮັກເຈົ້າ ປັກກິ່ງ
ທ່ານຜູ້ຟັງ, ທີ່ທ່ານຟັງມານັ້ນແມ່ນຄຳເວົ້າຂອງນາງມາລີອານາ ດີອາສ ຊີເມນີສ ນັກກິລາແລ່ນມາລາທອນຂອງຕີມໍເລສເຕ, ລາວແມ່ນນັກກິລາພຽງຜູ້ດຽວຂອງຄະນະນັກກິລາຕີມໍເລສເຕທີ່ເຂົ້າຮ່ວມງານໂອລິມປິກປັກກິ່ງຄັ້ງນີ້. ເຖິງວ່ານາງບໍ່ໄດ້ສຳເລັດການແຂ່ງຂັນຂອງນາງໃນທີ່ສຸດ, ແຕ່ການກະທຳຂອງນາງໄດ້ສ່ອງແສງໃຫ້ເຫັນເຖິງນ້ຳໃຈເຂົ້າຮ່ວມຂອງງານໂອລິມປິກຢ່າງເຕັມສ່ວນ.
ຕີມໍເລສເຕແມ່ນປະເທດທີ່ໜຸ່ມນ້ອຍກວ່າໝູ່ຂອງອາຊີ, ງານໂອລິມປິກປັກກິ່ງແມ່ນງານມະຫະກຳກິລາທີ່ມີລັກສະນະທົ່ວໂລກຄັ້ງທີສອງທີ່ຕີມໍເລສເຕເຂົ້າຮ່ວມໃນຖານະເປັນປະເທດເອກະລາດ ເຊິ່ງຖັດຈາກງານໂອລິມປິກອາແຕນໃນ4ປີກ່ອນ. ເຖິງວ່າໃນຄະນະນັກກິລາຕີມໍເລສເຕມີແຕ່ນັກກິລາຜູ້ດຽວເທົ່ານັ້ນ, ແຕ່ການເຂົ້າຮ່ວມຂອງນາງມາລີອານາໄດ້ເຮັດໃຫ້ວົງຄະນາຍາດໂອລິມປິກຄົບຖ້ວນກວ່າເກົ່າ.
ນາງມາລີອານາທີ່ອາຍຸ25ປີເກີດຢູ່ດີລີ ນະຄອນຫຼວງຂອງຕີມໍເລສເຕ, ເມື່ອອາຍຸ12ປີ, ນາງກໍເລີ່ມຝຶກຊ້ອມແລ່ນໄກ, ແລະເລີ່ມຝຶກຊ້ອມແລ່ນມາລາທອນໄລຍະສັ້ນ10ກິໂລແມັດແຕ່ປີ2002.
ນາງມາລີອານາກ່າວວ່າ, ໃນຖານະເປັນນັກກິລາພຽງຜູ້ດຽວຂອງຕີມໍເລສເຕໃນງານໂອລິມປິກຄັ້ງນີ້, ນາງໄດ້ຮູ້ເຖິງຄວາມຄອງຄອຍຂອງປະຊາຊົນທົ່ວປະເທດທີ່ມີຕໍ່ຕົນເອງນັ້ນຢ່າງເລິກເລິ່ງ. ແຕ່ຍ້ອນວ່າຄວາມເຈັບເປັນ, ນາງໄດ້ຖອນອອກຈາກການແຂ່ງຂັນໃນເວລາ
ແລ່ນຮອດປະມານ20ກິໂລແມັດ. ເຖິງວ່າມີຄວາມເສຍດາຍກໍຕາມ, ແຕ່ ນາງມາລີອານາເວົ້າວ່າ, ນາງໄດ້ພະຍາຍາມສຸດຂີດແລ້ວ.
ໃນຖານະເປັນນັກກິລາຂອງຕີມໍເລສເຕ, ຂ້ອຍຫວັງຢາກຍາດເອົາຜົນງານທີ່ດີທີ່ສຸດໃນງານໂອລິມປິກຄັ້ງນີ້. ແຕ່ວ່າ, ລາຍການແລ່ນມາລາທອນບໍ່ແມ່ນເລື່ອງງ່າຍ. ກ່ອນໄຂງານໂອລິມປິກ, ຂ້ອຍມີແຕ່ຝຶກຊ້ອມຢ່າງຄົບຊຸດເປັນເວລາໜຶ່ງເດືອນ. ຖ້າວ່າຂ້ອຍຢາກຊິງໄດ້ຫຼຽນລາງວັນ, ຢ່າງໜ້ອຍຂ້ອຍຕ້ອງຝຶກຊ້ອມເປັນ1ຫາ2ປີ. ຜ່ານຈາກງານໂອລິມປິກຄັ້ງນີ້ຂ້ອຍໄດ້ສະສົມບົດຮຽນໜ້ອຍໜຶ່ງ, ຜ່ານຈາກການຝຶກຊ້ອມຢ່າງລຳບາກແລ້ວ, ຂ້ອຍອາດຈະສາມາດຍາດໄດ້ຜົນງານທີ່ດີກວ່າເກົ່າເພື່ອປະເທດຊາດຂອງຂ້ອຍ.
ນາງມາລີອານາເວົ້າວ່າ, ເຖິງວ່າຕີມໍເລສເຕຍັງອ່າວຫຼ້າຫຼັງກໍຕາມ, ແຕ່ໄດ້ເອົາໃຈໃສ່ນຳເລື່ອງກິລາເປັນພິເສດ. ເທື່ອນີ້ສາມາດມາເຂົ້າຮ່ວມການແຂ່ງຂັນຢູ່ປັກກິ່ງ, ປະເທດຊາດໄດ້ໃຫ້ການຊ່ວຍເຫຼືອຫຼາຍຢ່າງໃຫ້ແກ່ນາງ.
ຄະນະກຳມະການໂອລິມປິກຕີມໍເລສເຕໄດ້ໃຫ້ການຊ່ວຍເຫຼືອອັນມະຫາສານແກ່ຂ້ອຍ. ຂ້ອຍຢູ່ເຂດຊານເມືອງດີລີ. ເມື່ອຂ້ອຍເຂົ້າມາຢູ່ໃນເມືອງດີລີ, ເຂົາເຈົ້າໄດ້ກຽມບ່ອນຢູ່ແລະບ່ອນຝຶກຊ້ອມໃຫ້ແກ່ຂ້ອຍ. ໜຶ່ງເດືອນກ່ອນ, ເຂົາເຈົ້າຍັງໄດ້ໃຫ້ເງິນແກ່ຂ້ອຍເພື່ອມາເຂົ້າຮ່ວມການແຂ່ງຂັນ.
ເມື່ອເວົ້າເຖິງພາບປະທັບໃຈຂອງຕົນທີ່ມີຕໍ່ງານໂອລິມປິກປັກກິ່ງ, ນາງມາລີອານາເວົ້າວ່າ, ນາງຮູ້ສຶກພໍໃຈເປັນພິເສດຕໍ່ວຽກງານຂອງອາສາສະໝັກທັງຫຼາຍ. ນາງເວົ້າວ່າ, ເຂົາເຈົ້າບໍ່ພຽງແຕ່ສາມາດໃຊ້ພາສາອັງກິດແລະພາສາປອດຕຸຍການລົມກັບນາງເທົ່ານັ້ນ, ຍັງໃຫ້ການຊ່ວຍເຫຼືອແກ່ນາງໃນທຸກເວລາ.
"ນັ້ນຈັ່ງແມ່ນດີທີ່ສຸດ, ເມື່ອຂ້ອຍເດີນທາງມາຮອດສະໜາມບິນ, ກໍ່ໄດ້ເຫັນອາສາສະໝັກທັງຫຼາຍທີ່ຕິດຕາມຄະນະເຮົາ, ແມ່ນຜູ້ສາວງາມໆທັງນັ້ນ. ການປະພຶດຂອງເຂົາເຈົ້າດີຫຼາຍ, ເຂົາເຈົ້າລົມກັບພວກເຮົາຢ່າງອົບອຸ່ນ, ພາພວກເຮົາໄປຮ້ານຊູເບີມະເກັດແລະໄປທ່ຽວຫຼາຍບ່ອນ. ຂ້ອຍມັກເຂົາເຈົ້າຫຼາຍ."
ນາງມາລີອານາກ່າວວ່າ, "ຮັງນົກ"ແມ່ນສະໜາມກິລາທີ່ນາງມັກກວ່າໝູ່, ສະຫງ່າງາມຫຼາຍ.
"ຂ້ອຍເຫັນວ່າ, "ຮັງນົກ"ແມ່ນສະໜາມກິລາທີ່ດີກວ່າໝູ່ໃນອາຊີຈົນກະທັ້ງທົ່ວໂລກ, ຂ້ອຍຫວັງວ່າ, ໃນອະນາຄົດ, ປະເທດຊາດຂອງຂ້ອຍກໍ່ຈະມີສະໜາມກິລາທີ່ງາມປານນີ້."
ນາງມາລີອານາບອກນັກຂ່າວວ່າ, ນາງໄດ້ຊື້ເງື່ອນຜູກຂອງຈີນຢ່າງຫຼວງຫຼາຍເພື່ອເອົາເມືອຕ້ອນຄົນ, ເພາະວ່າ, ເງື່ອນຜູກຂອງຈີນໄດ້ເປັນຕົວແທນໃຫ້ແກ່ຄວາມສຸກແລະໂຊກດີ, ນາງຫວັງໃຫ້ນຳເອົາຄວາມສຸກແກ່ຍາດພີ່ນ້ອງແລະໝູ່ເພື່ອນຂອງນາງ. ນາງເວົ້າວ່າ, ປັກກິ່ງແມ່ນຕົວເມືອງທີ່ສວຍງາມແຫ່ງໜຶ່ງ, ຄົນປັກກິ່ງໃຈບຸນຫຼາຍ, ແຫ່ງນີ້ໄດ້ສ້າງຄວາມຊົງຈຳທີ່ສວຍງາມໄວ້ໃຫ້ນາງ.
ເວົ້າສຳລັບນາງມາລີອານາແລ້ວ, ສາມາດເຂົ້າຮ່ວມງານໂອລິມປິກກໍ່ແມ່ນໄຊຊະນະຊະນິດໜຶ່ງ, ເພາະວ່າ, ການແຂ່ງຂັນຂອງງານໂອລິມປິກບໍ່ແມ່ນຕີລາຄາຄົນເກັ່ງດ້ວຍຜົນໄດ້ຜົນເສຍ, ຄົນທັງຫຼາຍມາເຂົ້າຮ່ວມງານມະຫະກຳກິລາດັ່ງກ່າວນີ້ດ້ວຍນ້ຳໃຈເຂົ້າຮ່ວມ. ນາງມາລີອານາກ່າວວ່າ, ນາງປາຖະໜາທີ່ສຸດຢາກຊິງໄດ້ຫຼຽນໃຫ້ແກ່ປະເທດຕົນ, ນາງເຫັນວ່າ, ງານໂອລິມປິກປັກກິ່ງຈະແມ່ນຈຸດເລີ່ມຕົ້ນໃໝ່ຂອງຊີວິດອາຊີບຂອງນາງ, ຈາກບ່ອນນີ້, ນາງຈະສືບຕໍ່ສະແຫວງຫາອຸດົມການຂອງນາງ, ເພື່ອບັນລຸຄວາມໄຝ່ຝັນຫຼຽນລາງວັນຂອງຕົນ.
|
