|
ທີ່ນີ້, ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ້ຟັງທີ່ໂຄລົບ, ງານໂອລິມປິກລະດູຮ້ອນຄັ້ງທີ29ທີ່ຈັດຂຶ້ນຢູ່ປັກກິ່ງໃກ້ຈະສິ້ນສຸດລົງແລ້ວ. ໃນ10ກວ່າມື້ທີ່ໄປເອົາຂ່າວໃນງານໂອລິມປິກ, ແສງທອງໄດ້ຍິນຄຳຕີລາຄາຕ່າງໆຢູ່ບໍ່ຂາດເຊັ່ນວ່າ: ງານໂອລິມປິກປັກກິ່ງໄດ້ຮັບຜົນສຳເລັດອັນມະຫາສານ, ງານໂອລິມປິກປັກກິ່ງໄດ້ໃຫ້ໂລກເຂົ້າໃຈຈີນຫຼາຍກວ່າເກົ່າ, ຈາກນີ້ຕໍ່ໄປຈີນຈະກ້າວເຂົ້າສູ່ໄລຍະປະຫວັດສາດທີ່ພັດທະນາໃໝ່. ນີ້ໄດ້ເຮັດໃຫ້ແສງທ້ອງຮູ້ສຶກພາກພູມໃຈທີ່ສຸດ. ໃນລາຍການພາກນີ້, ແສງທອງຈະລົມກັບທ່ານກ່ຽວກັບງານໂອລິມປິກັບຈີນໃນສາຍຕາຂອງຜູ້ຊ່ຽວຊານຕ່າງປະເທດ.
ໃນສອງປີທີ່ຜ່ານມາ, ເພື່ອຂຽນບົດທີ່ແນະນຳວຽກງານກະກຽມງານໂອລິມປິກແລະໂສມໜ້າພັດທະນາຂອງຈີນຢ່າງຮອບດ້ານ, ທ່ານປີແອ ປີຄາດ ທີ່ເປັນດອກເຕີວັດທະນະທຳສັງຄົມແລະພູມສາດມະຫາວິທະຍາໄລປາຣີ ຜູ້ຊ່ຽວຊານບັນຫາຈີນ ໄດ້ມາທັດສະນະສຶກສາ, ຢ້ຽມຢາມແລະແລກປ່ຽນຢູ່ຈີນ4ເທື່ອ, ທ່ານໄດ້ໄປບ່ອນກໍ່ສ້າງສະໜາມກິລາໂອລິມປິກທຸກແຫ່ງ. ກ່ອນໄຂງານໂອລິມປິກປັກກິ່ງ, ຮູບການກິລາໂອລິມປິກຂອງຈີນທີ່ທ່ານໃຊ້ເວລາ4ປີຈິ່ງຂຽນສຳເລັດ, ໄດ້ພິມຈຳໜ່າຍໃນທີ່ສຸດ. ວັນທີ22ສິງຫານີ້, ໃນເວລາໃຫ້ສຳພາດຕໍ່ນັກຂ່າວ, ທ່ານປີແອກ່າວວ່າ, ງານກິລາໂອລິມປິກປັກກິ່ງຍັງດີກວ່າແລະງາມກວ່າທີ່ຂ້ອຍພັນລະນາໃນປຶ້ມຂ້ອຍນັ້ນອີກ, ນີ້ແມ່ນຜົນສຳເລັດອັນຍິ່ງໃຫຍ່.
ທ່ານກູສຕາເວີສ ກຼາສ ຫົວໜ້າສະຖາບັນຄົ້ນຄວ້າຈີນຍຸກປະຈຸບັນບຼູແຊນຂອງແບນຊິກເຫັນວ່າ, ງານໂອລິມປິກປັກກິ່ງເຮັດໃຫ້ໂລກເຂົ້າໃຈຈີນດີກວ່າເກົ່າ, ເຮັດໃຫ້ຄົນທັງຫຼາຍໄດ້ຮູ້ການພັດທະນາຂອງຈີນຢ່າງແທ້ຈິງ, ແລະກໍຮູ້ວັດທະນະທຳຂອງຈີນດີກວ່າເກົ່າ, ໄດ້ປ່ຽນຄວາມຊົງຈຳພິດພາດຕໍ່ຈີນທີ່ຮູ້ແຕ່ວ່າຈີນເຄີຍທຸກຍາກຫຼ້າຫຼັງ. ທ່ານກ່າວວ່າ, ງານໂອລິມປິກປັກກິ່ງຈັດຂຶ້ນຢ່າງສຳເລັດຜົນໄດ້ສ່ອງແສງໃຫ້ເຫັນຄວາມເຂັ້ມແຂງຂອງຈີນ, ເພີ່ມຄວາມເຂົ້າໃຈກັນລະຫວ່າງປະຊາຊົນຈີນກັບປະຊາຊົນຕ່າງປະເທດ, ແລະກໍຍ່ອມຈະຊຸກຍູ້ການປະຕິຮູບແລະໄຂປະຕູສູ່ພາຍນອກຂອງຈີນຕື່ມອີກ.
ທ່ານເຮີນານເດີສ ສາສະດາຈານວິຊາສື່ສານມະຫາວິທະຍາໄລປົກຄອງຕົນເອງແຫ່ງຊາດແມັກຊິກທີ່ຄົ້ນຄວ້າຫົວຂໍ້ເສດຖະກິດແລະສັງຄົມຈີນເປັນ10ກວ່າປີນັ້ນໄດ້ເວົ້າວ່າ, ຖ້າບໍ່ໄດ້ເຫັນກັບຕາ, ຄົນທັງຫຼາຍມັກຈະຮູ້ສຶກວ່າ, ເບິ່ງປະເທດຕາເວັນອອກນີ້ຈາກໄກໆ, ຄືວ່າມີຜ້າບາງໆປົກໄວ້, ເຮັດໃຫ້ເບິ່ງປະເທດນີ້ບໍ່ຄັກ, ຮູ້ສຶກເລິກລັບ. ງານໂອລິມປິກປັກກິ່ງໄດ້ອຳນວຍໂອກາດໃຫ້ຫຼາຍປະເທດຍ່າງເຂົ້າໃກ້ກັບຈີນ, ແລ້ວປະກົດເຫັນຮັບຮູ້ແລະສຳຜັດຈີນຄືນໃໝ່. ທ່ານເຫັນວ່າ, ງານໂອລິມປິກປັກກິ່ງໄດ້ສະແດງດ້ານທີ່ມີຊີວິດຊີວາ, ທັນສະໄໝ, ເປີດເຜີຍແລະຫຼາຍເຄົ້າຂອງຈີນຕໍ່ນັກກິລາທີ່ມາເຂົ້າຮ່ວມການແຂ່ງຂັນແລະແຂກຜູ້ມີກຽດຂອງປະເທດຕ່າງໆ. ເຊື່ອວ່າພາຍຫຼັງງານໂອລິມປິກສິ້ນສຸດລົງແລ້ວ, ທົ່ວໂລກຈະມີຜູ້ຕິດໃຈນຳຈີນຫຼາຍກວ່າເກົ່າ, ແລະມີຜູ້ຊ່ຽວຊານທີ່ຮູ້ຈັກຈີນຫຼາຍຂຶ້ນ, ທັງມີກະແສນິຍົມຈີນ.
ທ່ານອັບດຸນ ອາຊີສ ແມ່ນນັກຄົ້ນຄວ້າວັດທະນະທຳຈີນທີ່ມີຊື່ສຽງຂອງເອຢິບ. ໃນສາຍຕາຂອງທ່ານ, ງານໂອລິມປິກປັກກິ່ງບໍ່ພຽງແຕ່ໄດ້ເຮັດໃຫ້ຫ້ນ້ຳໃຈໂອລິມປິກຊາບຊຶມເຂົ້າທຸກຈອກທຸກແຈຂອງສັງຄົມຈີນເທົ່ານັ້ນ, ຍັງຊຸກຍູ້ການພັດທະນາແບບສັງລວມຂອງຈີນແລະຊຸກຍູ້ໃຫ້ຈີນເຂົ້າສູ່ໄລຍະພັດທະນາໃໝ່.
ກ່ຽວກັບເລື່ອງນີ້, ທ່ານປີແອ ຂອງມະຫາວິທະຍາໄລປາຣີຂອງຝຣັ່ງກໍມີຄວາມຮັບຮູ້ຄືກັນ. ທ່ານກ່າວວ່າ, ປີ2010, ຈີນຍັງຈະເປັນເຈົ້າພາບຈັດງານວາງສະແດງສິນຄ້າໂລກ, ນີ້ກໍແມ່ນງານມະໂຫລານຂອງທົ່ວໂລກຄືກັນ. ເມື່ອຮອດເວລານັ້ນ, ບົດຮຽນຂອງຈີນທີ່ຈັດງານໂອລິມປິກຢ່າງສຳເລັດຜົນນັ້ນກໍ່ຍ່ອມຈະຖືກນຳໃຊ້ໃນວຽກງານຈັດງານວາງສະແດງສິນຄ້າໂລກຄືກັນ. ຈີນຈະເຊື່ອມໂຍງເຂົ້າໂລກໄວກວ່າເກົ່າ. ທ່ານປີແອຊີ້ອອກວ່າ, ງານໂອລິມປິກປັກກິ່ງພຽງແຕ່ແມ່ນໝູ່ດາວທີ່ຮຸ່ງເຮືອງໃນທາງຊ້າງເຜືອກແຫ່ງການພັດທະນາຂອງຈີນເທົ່ານັ້ນ, ຫຼັງຈາກງານໂອລິມປິກແລ້ວ, ຈີນຍ່ອມຈະປະຕິບັດນະໂຍບາຍປະຕິຮູບແລະໄຂປະຕູສູ່ພາຍນອກຕໍ່ໄປ, ສືບຕໍ່ເດີນຕາມເສັ້ນທາງພັດທະນາສັນຕິພາບ, ຈີນຈະອຸ້ມກອດໂລກດ້ວຍທ່າທີກະຕືລືລົ້ນແລະຕັ້ງໜ້າກວ່າເກົ່າ.ທ່ານຜູ້ຟັງທີ່ໂຄລົບ, ຫົວຂໍ້ງານໂອລິມປິກກັບຈີນພາກນີ້ຂໍສ້ຽງສຸດລົງພຽງເທົ່ານີ້. ຕອນຄ່ຳວັນທີ24ສິງຫານີ້, ງານໂອລິມປິກປັກກິ່ງກໍ່ຈະສິ້ນສຸດລົງແລ້ວ, ສ່ວນລາຍການບົດບັນທຶກປະຈຳວັນຂອງແສງທອງກໍຈະສິ້ນສຸດລົງຄືກັນ. ຂອບໃຈທ່ານທີ່ຮັບຟັງລາຍການຂອງພວກເຮົາໃນ10ກວ່າມື້ມານີ້, ສະບາຍດີ.
|
