ເບື້ອງຫຼັງຂ່າວ: ມາຮອດທ້າຍປີຜ່ານມາ, ນັບລວມແລ້ວ, ນັກກິລາຈີນຊີງໄດ້ແຊັມໂລກ 3.458 ຄັ້ງ ແລະ ທຳລາຍສະຖິຕິໂລກ 1.332 ຄັ້ງ. ປັດຈຸບັນ, ມີນັກກິລາອາຊີບດີເດັ່ນ ຫຼາຍກວ່າ 25.000 ຄົນ, ຄູຝຶກ ແລະ ກຳມະການເກືອບ 130.000 ຄົນ. ປັດຈຸບັນ, ສະໜາມກິລາສາທາລະນະໃນທົ່ວປະເທດມີ 3,1 ລ້ານກວ່າແຫ່ງ, ປະຊາຊົນຈີນທີ່ອອກກຳລັງກາຍເປັນປະຈຳມີຫຼາຍກວ່າ 400 ລ້ານຄົນ. ແຕ່ລະປີ, ມີການແຂ່ງຂັນກິລາສາກົນ 200 ກວ່າຄັ້ງຈັດຂຶ້ນຢູ່ຈີນ. ຍອດມູນຄ່າການຜະລິດໃນຂະແໜງການກິລາໃນປີ 2017 ຂອງຈີນບັນລຸຫຼາຍກວ່າ 2000 ຕື້ຢວນ, ກວມ 1% ຂອງ GDP ຈີນ.
ການວິເຄາະຂອງ CRI: ໃນໄລຍະຕົ້ນຂອງການສະຖາປະນາ ສປ ຈີນ, ເພື່ອປ່ຽນແປງພາບພົດ “ປະຊາຊົນອ່ອນເພຍ ແລະ ປະເທດຊາດທຸກຍາກ” ໂດຍໄວ, ຈີນໄດ້ກຳນົດຮູບການການພັດທະນາກິລາປະເພດແຂ່ງຂັນທີ່ຖື “ງານໂອລິມປິກເປັນວຽກງານໃຈກາງ”. ໃນງານໂອລິມປິກລະດູຮ້ອນປັກກິ່ງປີ 2008, ຈີນຊີງໄດ້ຫຼຽນຄຳ 51 ຫຼຽນ, ຄອງອັນດັບ 1 ໃນຕາຕະລາງຫຼຽນຄຳ ເຊິ່ງກາຍເປັນປະເທດອາຊີປະເທດທຳອິດທີ່ຄອງອັນດັບ 1 ຂອງງານໂອລິມປິກ ໃນບັນດາປະເທດອາຊີ. ເຖິງຈະເປັນແນວນີ້ກໍຕາມ, ແຕ່ຈີນຍັງມີຄວາມແຕກໂຕນກັນຫຼາຍໃນລາຍການບານເຕະ, ບານບ້ວງ ແລະ ກິລາປະເພດແລ່ນແລະລານ. ໃນຫຼາຍປີມໍ່ໆມານີ້, ຈີນໄດ້ປັບປຸງຮູບການການພັດທະນາວຽກງານກິລາ ໂດຍໄດ້ຮຽກຮ້ອງໃຫ້ປະຊາຊົນອອກກຳລັງກາຍຢ່າງກວ້າງຂວາງ ແລະ ນຳໃຊ້ກຳລັງແຮງທາງສັງຄົມຢ່າງເຕັມສ່ວນ ເພື່ອເລັ່ງລັດການສ້າງສາປະເທດກິລາທີ່ເຂັ້ມແຂງ. ປີ 2018, ຈີນມີປະຊາກອນກວ່າ 90% ໄດ້ຕາມ “ມາດຕະຖານວັດແທກພະລານາໄມ ແລະ ຄວາມເຂັ້ມແຂງທາງຮ່າງກາຍແຫ່ງຊາດ”, ຈີນພວມໄດ້ກ້າວເດີນໄປສູ່ເປົ້າໝາຍທີ່ສ້າງປະເທດກິລາທີ່ເຂັ້ມແຂງ.