ໃນໂອກາດການເຊັນ “ຖະແຫຼງການຮ່ວມພຽງຢາງກັນຍາ” ຄົບຮອບສອງປີ, ວັນທີ 19 ກັນຍານີ້, ທ່ານມູນເຈອິນ ປະທານາທິບໍດີ ສ.ເກົາຫຼີກ່າວຄຳເຫັນທາງສື່ສັງຄົມອອນລາຍວ່າ: ສັນຍາທີ່ໄດ້ບັນລຸໄວ້ໃນ “ຖະແຫຼງການຮ່ວມພຽງຢາງກັນຍາ” ຕ້ອງໄດ້ຮັບການປະຕິບັດຢ່າງເດັດຂາດ.
ທ່ານມູນເຈອິນກ່າວຕື່ມວ່າ: ສອງປີກ່ອນ, ຕົນ ແລະ ທ່ານກິມເຈິງອຸນ ຜູ້ນຳສູງສຸດ ສປປ ເກົາຫຼີໄດ້ຮ່ວມກັນກ່າວວ່າ, ຕ້ອງບັນລຸການປອດນິວເຄຼຍຢູ່ແຫຼມເກົາຫຼີ ແລະ ສ້າງແຫຼມເກົາຫຼີທີ່ມີສັນຕິພາບ. ສອງຝ່າຍໄດ້ກ້າວເຖິງຂັ້ນເຊັນສັນຍາທີ່ລະອຽດ ແລະ ປະຕິບັດໄດ້ໃນຂົງເຂດການທະຫານ, ຊຸກຍູ້ການປອດກຳລັງອາວຸດຢູ່ເຂດປານມູນຈອມ ແລະ ການຂຸດຄົ້ນຊາກກະດູກຢູ່ເຂດປອດທະຫານ. ຫຼັງຈາກນັ້ນ, ສອງຝ່າຍບໍ່ໄດ້ເກີດການປະທະກັນດ້ວຍກຳລັງອາວຸດຈັກເທື່ອ, ນີ້ເປັນ “ຄວາມຄືບໜ້າທີ່ລ້ຳຄ່າທີ່ສຸດ”.
ວັນທີ 27 ເມສາປີ 2018, ທ່ານມູນເຈອິນ ແລະ ທ່ານກິມເຈິງອຸນ ໄດ້ພົບປະກັນຢູ່ປານມູນຈອມ ແລະ ອອກ “ຖະແຫຼງການປານມູນຈອມ” ໂດຍປະກາດວ່າ: ສອງຝ່າຍຈະພະຍາຍາມ ເພື່ອບັນລຸການປອດນິວເຄຼຍຢູ່ແຫຼມເກົາຫຼີ ແລະປ່ຽນກົນໄກຢຸດຍິງໃຫ້ເປັນກົນໄກສັນຕິພາບ. ວັນທີ 19 ກັນຍາປີດຽວກັນ, ສອງທ່ານໄດ້ເຊັນ “ຖະແຫຼງການຮ່ວມພຽງຢາງກັນຍາ” ຢູ່ນະຄອນຫຼວງພຽງຢາງ ໂດຍໄດ້ກ້າວເຖິງຂັ້ນມີຄວາມເຫັນທີ່ເປັນເອກະພາບກັນກ່ຽວກັບການຊຸກຍູ້ຂະບວນການປອດນິວເຄຼຍຢູ່ແຫຼມເກົາຫຼີ, ເພີ່ມທະວີການແລກປ່ຽນແລະຮ່ວມມືເໜືອ-ໃຕ້, ພະຍາຍາມສ້າງແຫຼມເກົາຫຼີໃຫ້ເປັນເຂດສັນຕິພາບຖາວອນ ແລະ ອື່ນໆ.